Tatulingile ukutontonkanya ukuti pa mulandu fye wa kuti balya abasambi ba kwa Yesu 70 tabalipo ilyo Yesu atendeke Umulaalilo wa kwa Shikulu, ninshi Yesu tabatemenwe nelyo ukuti ninshi balimubutwike. Icalengele nico pali ilya inshita, Yesu alefwaya ukuba fye na batumwa.

Alitemenwe bonse, abali 12 na balya abaali 70. Yesu abalilepo ukusala abasambi 12 pa basambi bakwe abengi kabili aba 12 abenike ukuti abatumwa. (Luka 6:​12-16) Ali mu Galili ilyo “aitile abatumwa bakwe 12” kabili “abatumine mu kubila pa Bufumu bwa kwa Lesa no kundapa abalwele.” (Luka 9:​1-6) Pa numa ilyo ali mu Yudea, “asalile abasambi na bambi 70 kabili abatumine babili babili.” (Luka 9:51; 10:1) Kanshi Yesu alikwete abasambi mu ncende ishalekanalekana abalebila pali ena.

AbaYuda abaishileba abasambi ba kwa Yesu balekwata Icakucilila cila mwaka, kabili bafwile balekwatila pamo ne ndupwa shabo. (Ukufu. 12:​6-11, 17-20) Ilyo inshita ya kuti Yesu afwe yapaleme, ena na batumwa bakwe baile ku Yerusalemu. Lelo taitile abasambi bakwe bonse abali mu Yudea, mu Galili na mu Perea ukuti bese bakwatile pamo nankwe Icakucilila. Cailanga fye apabuuta tuutu ukuti pali ilya nshita, Yesu alefwaya fye ukuba na batumwa. Abebele ati: “Nalefwaisha ukulya na imwe ici Icakucilila ilyo nshilacula.”—Luka 22:15.

Kwali icalengele ukuti Yesu acite ifi. Ali mupepi no kufwa nga “Umwana wa mpaanga uwa kwa Lesa, uulesenda ulubembu lwa ba mu calo.” (Yoh. 1:29) Ali no kufwila mu Yerusalemu umo baletuulila Lesa amalambo ukutula fye na kale. Icakucilila caleibukishako abena Israele ukuti Yehova alibalubwile ukufuma mu Egupti. Lelo Yesu nga afwa, ali no kucita icintu icacililenapo. Ali no kulubula abantu bonse ku lubembu ne mfwa! (1 Kor. 5:​7, 8) Pa mulandu we lambo ilyo Yesu atuulile, abatumwa 12 bali no kuba umufula wa cilonganino ca Bena Kristu. (Efes. 2:​20-22) Na kuba, Yerusalemu umusumba wa mushilo wa “amabwe aya mufula ayali 12,” kabili pali aya mabwe palembwa “amashina 12 aya batumwa 12 aba Mwana wa mpaanga.” (Ukus. 21:​10-14) Cine cine abatumwa ba kwa Yesu abali ne cishinka bali no kubomba umulimo uukalamba mu kufikilisha ifyo Lesa afwaya. Kanshi kuti twamona ico Yesu alefwaila ukuti abe nabo pali cilya Icakucilila ca kulekeleshako kabili ilyo aletendeka Umulaalilo wa kwa Shikulu.

Balya abasambi 70 na basambi bambi tabali na Yesu ilyo akwete Umulaalilo wa kwa Shikulu. Na lyo line, abasambi bonse abali ne cishinka bali no kunonkelamo mu Mulaalilo wa kwa Shikulu uo Yesu atendeke. Abasambi bonse abaishileba Abena Kristu abasubwa, bali no kuba mu cipangano ca Bufumu ico Yesu aebelepo abatumwa pali bulya bushiku mu nshita ya bushiku.—Luka 22:​29, 30