Ba Rosie batile: “Nalesakamikwa sana pa fyo ifintu fyali no kuba nangu ca kuti fimo no kuba te fyo fyaleba.” Malembo nshi ayabafwile? Limo pa Malembo yabafwile lilembo lya Mateo 6:34 ilitila: “Mwilasakamikwa pa bushiku bwa mailo, pantu ubwa mailo bukaba na masakamika ya buko. Amafya ya mu bushiku bumo yalilinga kuli ubo bwine bushiku.” Ba Rosie pali ino nshita batila aya amashiwi Yesu alandile yalibafwile ukuleka ukusakamikwa pa fingacitika ku ntanshi. Na kabili batila: “Apo nalikwete amasakamika ayengi, nshalingile ukulatontonkanya pa fintu ifishali tafilacitika nelyo ifya kuti no kucitika tafyakacitike.”

Yasmine na o uwalesakamikwa sana, atile: “Nalelila sana kabili limo nalefilwa no kulaala ubushiku. Amasakamika yalelenga ndeba sana no bulanda.” Lilembo nshi ilyamwafwile? Alandile ukuti lilembo lya 1 Petro 5:7 ilitila: “Mulepoosa amasakamika yenu yonse pali ena [Lesa], pantu asakamana imwe.” Yasmine alandile no kuti: Mu kuya kwa nshita, nalitwalilile ukupepa kuli Yehova, kabili Yehova alyaswike amapepo yandi. Naumfwile kwati bantuula icipe icafina sana. Inshita shimo ndaba na masakamika, lelo nalishiba ifya kucita pa kuti nilaba sana no bulanda.”

Ba Isabella batile: “Imona kwati ukulaalikisha imilimo ca mu lupwa, pantu na batata e fyo baaba. Ndalalikisha ukucita ifintu fimo ifyacindama pa kuti fye ntuushe nelyo ndetamba TV. Ukucita ifi takwawama pantu kulalenga umuntu aba na masakamika no kulenga afilwa ukubomba bwino umulimo akwete.” Ilembo lyabafwile, lilembo lya 2 Timote 2:15, ilitila: “Uibikilisheko ukuipeela kuli Lesa ngo muntu uo asuminisha, umubomfi uushingaba ne nsoni pa mulimo wakwe.” Ba Isabella balandile no kuti: “Nshalefwaya Yehova aleumfwa ububi pa milimo nalebomba pa mulandu fye wa kulalikisha imilimo.” Pali ino nshita, ba Isabella tabalalikisha sana imilimo.

Kelsey na o alandile ukuti: “Nalelalikisha sana imilimo ica kuti naleibomba fye lilya kwashala inshita iinono. Ifyo nalecita tafyali bwino pantu fyalelenga ndelila, ndefilwa ukulaala e lyo no kulasakamikwa sana.” Ilembo lyayafwile Kelsey lya Amapinda 13:16 ilitila: “Onse uwacenjela akacitila ifintu mu kwishiba, lelo umuwelewele akasalanganya ubupumbu.” Alondolola ifyo ukutontonkanya pali ili ilembo kwamwafwile, atila: “Cisuma ukutantikila libela ifyo ulefwaya ukucita. Nomba nalikwata umo nemba ilyo ningile ukubomba imilimo nkwete, kabili ici cilangafwa ukupekanishisha imilimo libela ukucila ukwisaibomba ilyo kwashala inshita iinono.”

Ba Kirsten batile: “Ifyupo na balume bandi fyapwile ninshi tuli bana 4.” Lilembo nshi ilyayafwile ba Kirsten? Lilembo lya Amapinda 17:17 ilitila: “Ukutemwa kwa kwa cibusa wa cishinka takupwa, kabili uyu cibusa ni munyina uufyalwa ilyo kuli ubucushi.” Ba Kirsten balile ku ba mu cilonganino ukuti babafwe. Cinshi cacitike? Batile: Ifibusa fyalingafwile sana. Bamo balendetela ifya kubomfya pa ng’anda e lyo na maluba. Imiku itatu ifibusa fyandi ifingi fyalingafwile na bana bandi ilyo twalekuukila mu mayanda yambi. Ifibusa fyandi fyalengafwa lyonse ica kuti cibusa wandi umo alingafwile no kusanga incito.”

Ba Delphine, abo tulandilepo kale, nabo baletalalilwa sana. Balondolola ifyo cali ilyo bali na mafya ukuti: “Naletalalilwa sana kabili naleba no bulanda ica kuti nalemona fye kwati takwali umuntu uwingansansamusha.” Ilembo limo ilyabafwile lya Amalumbo 68:6 ilitila: “Lesa alelenga ababa beka ukwikala mu ng’anda.” Balandile no kuti: “Nalishibe ukuti ing’anda iyo ili lembo lyalandapo kuti yaba ne ng’anda ya mampalanya, e kutila bamunyinane aba mu cilonganino umo twingacingililwa no kusanga icisansamushi. Na lyo line, nalishibe no kuti nalingile intanshi ukupalama kuli Yehova ilyo nshilapalama kuli bamunyinane. E ico ilembo lya Amalumbo 37:4 lyalingafwile pantu litila: ‘Sekelela nga nshi muli Yehova, na o akakupeela ififwaya umutima obe.’”

Ba Delphine balondolola no kuti: “Nalimwene ukuti nalingile ukupalama sana kuli Yehova pantu e cibusa wawamisha pali bonse. Lyena nalilembele imilimo ya kwa Lesa iyo ningalacitila pamo na bantu bambi pa kuti naba cibusa wa bantu abatemwa Yehova. Nalisambilile no kulamona ifisuma muli bambi pa kuti nilabika amano ku filubo fyabo.”

Ca cine ukuti ababombela Yehova nabo tabapwililika. Inte sha kwa Yehova nabo balakwata amafya ayo abantu bambi bakwata. Na lyo line, ifyo Baibolo ilanda filalenga abantu ukulayafwa abantu banabo. Kanshi kuti cawama abantu ba musango uyo ukuba ifibusa fyenu. Nomba bushe ifyo Baibolo ilanda kuti fyatwafwa na lintu tuli na mafya ayashingapwa bwangu, pamo nga amalwele ayashipola e lyo na lintu tuli no bulanda?