PA 26 December  mu 2004, kwali icinkukuma icikalamba nga nshi icacitike pa cishi ca Simeulue, icabela lwa ku kapinda ka ku kuso aka Sumatra, mu Indonesia. Abantu bonse abaali ku lulamba bamwene fye uko amenshi ya pali bemba yantampile ukucepa bwangu bwangu. Ilyo line fye, abantu bonse batendeke ukubutukila ku mpili, ninshi balepunda abati, “Smong! Smong!” Ifi e fyo aba pali ici icishi beta amabimbi ayakalamba ayesa ku mulundu (tsunami). Mu mamineti fye 30, amabimbi ayakalamba yaishile pali ici cishi kabili amayanda ayengi yalyonaike.

Pa cishi ca Simeulue, e po amabimbi ayakalamba yabalilepo ukonaula mu 2004. Na lyo line, pa bantu  78,000 abaleikala pali ici icishi, abantu fye 7 e bafwile. Cinshi calengele abengi bapusuke? * Abekala pali ici icishi batemwa ukulanda ati: ‘Nga kwaba icinkukuma icikalamba kabili amenshi nga yatendeka ukucepa ku lulamba lwa bemba, ninshi kubutukila ku mpili, pa kuti takuli uubundile.’ Apo pa cishi ca Simeulue palesa amabimbi ayakalamba, abekala pali ici icishi baleshiba nga ca kuti amabimbi yalaisa nga bamona fye ifyo bemba alemoneka. Kanshi ukumfwila ukusoka kwalilengele aba pali ici icishi ukupusuka.

Baibolo ilalanda pa bucushi ubukesa nomba line ukuti bukaba “bucushi ubukalamba ubushatala abubako ukutula pa ntendekelo ya ba pano calo ukufika nomba, kabili tabwakatale abubako na kabili.” (Mateo 24:21) Ubu ubucushi tabwakonaule isonde, pantu Lesa afwaya ukuti isonde likatwalilile ukubako umuyayaya. (Lukala Milandu 1:4) Lelo ubucushi ubuleisa bukaba ni nshita iyo Lesa “akonaula abaleonaula isonde.” Lesa akonaula ababifi kabili akapwisha ukucula. (Ukusokolola 11:18; Amapinda 2:22) Icalo cikawama sana nga ca kuti Lesa aonaula ababifi kabili nga apwisha no bubifi.

Nga kwaba amabimbi ayakalamba, ifinkukuma, nelyo ukupuulika kwa mpili, abantu bakaele nabo balafwilamo, lelo Lesa ena akonaula fye abantu abacita ifyabipa. Baibolo itila: “Lesa kutemwa,” kabili Lesa uo ishina lyakwe ni Yehova alilaya ukuti “abalungama e bakekala mu calo, kabili bakekalamo umuyayaya.” (1 Yohane 4:8; Amalumbo 37:29) Nomba finshi mulingile ukucita pa kuti mukapusuke ilyo ubucushi bukalamba bukesa na pa kuti mukakwate amapaalo ayo Lesa atulaya? Icikalamba ico mulingile ukucita, kumfwila ifyo Lesa atusoka.

Tatwaishiba ubushiku ilyo Lesa akonaula ababifi no kupwisha ukucula pantu Yesu atile: “Ulwa bushiku bulya ne nshita takuli uwaishiba, nangu ni bamalaika ba mu muulu nangu Mwana, kano fye Tata.” Na lyo line, Yesu atwebele no kuti “mulelola.” (Mateo 24:36; 25:13) Ukuba abalola kuli finshi? Baibolo yalilanda pa fyo ifintu fikaba mu  calo ilyo Lesa ashilaonaula ababifi. Nga filya fine ukwaluka kwa menshi pali bemba kwalengele aba pa cishi ca Simeulue bailuka ukuti amabimbi yakalamba yali no kwisa, na ifwe bene kuti twaishiba ukuti impela ya calo naipalama nga twamona ifilecitika mu calo. Belengeni akabokoshi akalelanda filanga ukuti impela ili mupepi.

Ifintu fimo ifyo Baibolo yalandapo ukuti e fikalacitika mu nshiku sha mpela ifili mu kabokoshi fyalecitika na kale. Na lyo line, Yesu alandile ukuti nga mwalamona “fyonse ifi,” ninshi mukeshiba ukuti impela naipalama. (Mateo 24:33) Kanshi mulingile ukuyipusha amuti, ‘Ni lilali ifi ifintu fyonse ifyo Baibolo yalandapo (1) fyacitikapo mu calo conse, (2) fyacitikilapo pa nshita imo, kabili (3) fyaya filebipilako fye?’ Ukwabula no kutwishika, tuleikala mu nshiku sha mpela.

Uwali kateka mu calo ca America alandile ukuti: “Ukusokela abantu libela . . . kulapususha.” Ilyo amabimbi yakalamba ayaliko mu 2004 yapwile, ku ncende shonse uko amabimbi yafikile balibikileko ifya kwishibilako amabimbi ayengesa pa kuti abantu tabafwile. Ifi fine e fyo na Lesa aacita. Alatusokela libela ilyo impela ishilaisa. Baibolo yasobeele ukuti: “Imbila nsuma iyi iya bufumu ikabilwa ku bantu bonse aba pe sonde ku kuba ubunte ku nko shonse; e lyo impela ikesa.”—Mateo 24:14.

Mu mwaka wafumineko, Inte sha kwa Yehova bashimikiile abantu imbila nsuma pa maawala 1.9 bilioni, mu fyalo 240, mu ndimi ukucila pali 700. Uyu umulimo wa kubila imbila nsuma e ulanga maka maka ukuti impela ili mupepi. Apo ba Nte balitemwa abantu, balasoka abantu ukuti ubushiku bwa kwa Lesa ubwa bupingushi nabupalamisha nga nshi.  (Mateo 22:39) Ifi mulekutika kuli ifi fyebo, filelanga fye ukuti Yehova alimutemwa. Muleibukisha ukuti, “[Lesa] tafwaya umuntu nangu umo ukonaika lelo afwaya ukuti bonse bakalapile.” (2 Petro 3:9) Bushe mukalalanga ukuti mulatasha pa fyo Lesa amutemwa pa kukutika ku mbila nsuma?

Ibukisheni ukuti ilyo aba pa cishi ca Simeulue bamwene amenshi ya ku lulamba lwa bemba yatendeka ukucepa, tabaikete ku cani, lelo babutukiile ku mpili. Ifyo bacitile fyalengele bapusuke. Na imwe nga mulefwaya ukupusuka, mufwile ukubutukila bwangu bwangu ku lupili lwa mampalanya. Finshi mulingile ukucita pa kubutukila kuli ulu ulupili? Lesa alengele kasesema Esaya ukulemba pa fyo Lesa aleita abantu muli shino “nshiku sha ku mpela.” Baibolo itila: “Iseni, natunine tuleya ku lupili lwa kwa Yehova . . . Akatusambilisha imibele yakwe, kabili tukenda mu nshila shakwe.”—Esaya 2:2, 3.

Umuntu nga aya pa muulu wa lupili, alamona ifintu ifilecitika kabili alacingililwa. Ifi fine e fyo caba na ku bantu abengi mwi sonde lyonse abasambilila Baibolo. Ifyo basambilila muli Baibolo filalenga bayalula imibele yabo. (2 Timote 3:16, 17) Nga bayalula imibele yabo, balatendeka ‘ukwenda mu nshila sha kwa [Lesa],’ balapaalwa, kabili balacingililwa.

Bushe na imwe kuti mwatemwa ukumfwila ubu ubwite pa kuti Lesa alemucingilila muli shino nshiku ishayafya? Tulemukoselesha ukuti mutontonkanye sana pa Malembo ayali mu kabokoshi kali muli cino cipande ayalelanda pa fintu ifilelanga ukuti tuleikala mu “nshiku sha kulekelesha.” Inte sha kwa Yehova abekala ku cifulo mwikalila bakatemwa sana ukumwafwa ukumfwikisha aya Amalembo e lyo ne fyo mwingayabomfya. Kuti mwasanga amasuko ku mepusho mwakwata nga mwaya na pa webusaiti yesu iya www.pr418.com/bem. Kabiyeni apo balemba ati AMASAMBILISHO YA MU BAIBOLO > AMASUKO KU MEPUSHO YA MU BAIBOLO..