1. Finshi ifyo abaice abengi basalapo ukucita?

 CILA mwaka abaice abengi balabatishiwa. Nga muli baice, bushe mwalibatishiwa? Nga ca kuti mwalibatishiwa, bamunyinenwe na bankashi e lyo na Yehova balitemwa pa fyo mwacita! (Amapi. 27:11) Tontonkanyeni pa fisuma ifingi ifyo mwacita. Ku ca kumwenako, mwalisambilila Baibolo nalimo pa myaka iingi. Ifyo mwasambilila fyalilenga mwashininkisha ukuti Baibolo Cebo ca kwa Lesa. Kabili ne cacilapo ukucindama ca kuti mwalishiba Yehova umwine wa Baibolo kabili mwalimutemwa. Mwalimutemenwe sana ica kuti mwasalilepo ukuipeela no kubatishiwa pa kuti mube ababomfi bakwe. Ala mwalicita bwino ifi mwasalapo ukubatishiwa!

2. Cinshi twalasambilila muli cino cipande?

 ² Ilyo mushilabatishiwa, mufwile mwalikwete amafya ayengi ayalelenga cilemukosela ukuba aba cishinka kuli Yehova. Lelo apo muleya mulekula mwakulakwata amafya na yambi. Satana akulafwaisha ukuti muleke ukutemwa no kubombela Yehova. (Efes. 4:14) Mwikaleka ica musango uyu cikamucitikile. Cinshi cingamwafwa ukutwalilila ukuba aba cishinka kuli Yehova e lyo no kufishapo ifyo mwamulaile ukuti mwakulamubombela? Mufwile ukutwalilila ukulunduluka, e kutila ukuba abakalamba mu fya kwa Lesa. (Heb. 6:1) Nomba kuti mwacita shani ifi? Ifi e fyo twalasambilila muli cino cipande.

3. Cinshi Abena Kristu bonse balingile ukucita pa numa ya kubatishiwa?

³ Pa numa ya kubatishiwa, bonse tufwile ukulacita ifyo umutumwa Paulo afundile Abena Kristu mu Efese. Abakoseleshe  ukuba “abakalamba” mu fya kwa Lesa. (Efes. 4:13) Ici calolele mu kuti Abena Kristu mu Efese balingile ukutwalilila ukulunduluka. Tulomfwikisha umo Paulo aloseshe, lintu alingenye ifyo umwana akula ku fyo tulunduluka mu fya kwa Lesa. Umwana nga afyalwa, abafyashi bakwe balatemwa icine cine. Lelo umwana tatwalilila fye ukuba akanya, afwile ukukula. Kabili ilyo alekula afwile ukuleka “ifya bwaice.” (1 Kor. 13:11) E fyo caba na kuli fwe Bena Kristu. Nga twabatishiwa, tufwile ukutwalilila ukulunduluka. Lekeni tulandeko pali fimo ifingatwafwa ukulunduluka.

4. Cinshi tufwile ukucita pa kuti tube abakalamba mu fya kwa Lesa? Londololeni. (Abena Filipi 1:9)

⁴ Muletemenwako Yehova. Nangu ca kuti mwalitemwa Yehova, kwaliba ifyo mwingacita pa kuti mumutemenweko. Finshi ifyo fine? Umutumwa Paulo alilandile pali fimo ifyo mwingacita ifyalembwa pa Abena Filipi 1:9. (Belengeni.) Paulo apepele ukuti ukutemwa uko abena Filipi bakwete “kulekulilako fye.” Kanshi kuti twatemenwako Yehova. Finshi twingacita pa kuti tumutemenweko? Tufwile ukwishiba bwino Yehova no kwiluka ukufwaya kwakwe. Nga twaishiba bwino Yehova tukamutemenwako, tukatemwa ne mibele yakwe ne fyo acita. Tukalafwaya ukulenga alesekelela kabili tatwakalecita ifingalenga aba no bulanda. Na kabili tukatwalilila ukwishiba ifyo afwaya, ne fyo twingalacita ukufwaya kwakwe.

5-6. Bushe kuti twacita shani pa kuti tutemwe sana Yehova? Londololeni.

⁵ Yesu alepashanya sana Yehova. Kanshi nga twaishiba bwino Yesu, tukatemenwako Yehova. (Heb. 1:3) Nga tulefwaya ukwishiba bwino Yesu, tufwile ukulabelenga amabuuku 4 aya Mbila Nsuma. Nga ca kuti tamubelenga Baibolo cila bushiku, kuti cawama mwatendeka ukubelenga. Ilyo mulebelenga amalyashi ayalanda pali Yesu, mulebika sana amano ku mibele iyo akwata. Abantu tabaleumfwa umwenso wa kulanda nankwe, kabili alitemenwe abana. (Marko 10:13-16) Yesu ali uwa cikuuku sana kabili abasambi bakwe balemweba fye fyonse ifili ku mutima. (Mat. 16:22) Ifi Yesu alecita, alepashanya Wishi wa ku muulu. Ici cilelangilila ukuti na Yehova taifinya. Kuti twapepa kuli ena kabili ilyo tulepepa kuti twamweba ifyo tuletontonkanya e lyo ne fyo tuleumfwa. Twalicetekela ukuti nga twamweba ifili ku mutima takamone ukuti natulufyanya pantu alitutemwa kabili alatusakamana.—1 Pet. 5:7.

⁶ Yesu aleumfwila abantu uluse. Umutumwa Mateo alembele ukuti: “Ilyo amwene amabumba, abomfwilile uluse pantu balebacusha kabili bali abapaswa nge mpaanga ishabula kacema.” (Mat. 9:36) Inga Yehova ena omfwa shani? Yesu atile: “Ifyo fine na Tata uwaba mu muulu tafwaya ukuti umo pali aba abanono alobe.” (Mat. 18:14) Aya mashiwi yalatusansamusha nga nshi pantu yatulanga fye ukuti Yehova alitutemwa icine cine! Nga twaishiba bwino Yesu tukatemwa sana Yehova.

7. Finshi mwingasambililako nga mulesangwa na Bena Kristu abakalamba mu fya kwa Lesa?

⁷ Na cimbi ico mufwile ukucita nga mulefwaya ukutemenwako Yehova e lyo no kulalunduluka, kuba pamo na bakalamba mu fya kwa Lesa ababa mu cilonganino cenu. Abakalamba mu fya kwa Lesa ababa mu cilonganino cenu baliba ne nsansa kabili tabalanguluka pa fyo basalilepo ukubombela Yehova. Mulebepushako pa fisuma ifyo basanga ilyo babombela Yehova. Nga pali fimo ifyo mulefwaya ukupingulapo, kuti mwabepushako pa kuti bamupandeko amano. Muleibukisha  ukuti “ukuli abapanda amano abengi amapange yalafikilishiwa.”—Amapi. 15:22.

8. Cinshi mwingacita nga mulatwishika ukuti ifyo Baibolo ilanda fya cine?

⁸ Mwilatwishika. Nga fintu twacilandapo mu  paragrafu 2, Satana tafwaya ukuti mulelunduluka mu fya kwa Lesa. Cimo ico engacita, kumulenga mwalatwishika fimo ifyo musambilila mu Baibolo. Ku ca kumwenako, abantu kuti balamweba ukuti Lesa te watubumbile, twaishilebako fye pantu ifintu fyasangwike fye. Nalimo ilyo mwali abaice tamwaletontonkanyapo pali ili lyashi, lelo apo nomba namukula, ku sukulu bakulamusambilisha ukuti ifintu fyasangwike fye. Nalimo ifyo bakafundisha bamufunda kuti fyalamoneka kwati fya cine. Nomba aba bakafundisha nalimo tabafwailishanapo ifishinka ifilangilila ukuti kwaliba uwatubumbile. Muleibukisha ishinte lye funde ilyaba pa Amapinda 18:17 ilitila: “Uwabalilapo ukulubulula amoneka umulungami; lelo umunankwe aisa no kumulengulula.” Mu nshita ya kusumina fye fyonse ifyo bamusambilisha ku sukulu, mufwile ukufwailisha mu Cebo ca kwa Lesa pa kuti musange icine. Mulefwailishako na mu mpapulo shesu kabili muleipushako na bamunyinefwe na bankashi abasumine ukuti ifintu fyasangwike fye. Mulebepusha icalengele bashininkishe ukuti kwaliba Kabumba uwatutemwa. Ukulanshanya na ba bwananyina pali ili lyashi kukalenga mukashininkishe ukuti kwaliba uwatubumbile.

9. Finshi mwasambilila ku fyacitikile ba Melissa?

⁹ Nkashi Melissa alisambilile pa filanga ukuti kwaliba Kabumba, kabili ici calengele aleke ukutwishika. * Atile: “Bakafundisha nga balesambilisha ukuti ifintu fyasangwike fye, ifyo balondolola fyumfwika kwati fya cine. Pa kubala, naletiina ukufwailishapo pali ili lyashi pantu naletontonkanya ukuti nalimo ifyo balanda fya cine. Lelo naishileiluka ukuti Yehova afwaya twaishiba icishinka pa fyo twasuminamo. E ico nalitendeke ukufwailisha ifishinka. Nalibelengele icitabo citila Is There a Creator Who Cares About You? e lyo na broshuwa itila, Was Life Created? na The Origin of Life—Five Questions Worth Asking. Ifyo nabelengele fyalinkoseleshe sana. Kanshi nga kale nafwailishepo pali ili lyashi!”

10-11. Cinshi mwingacita pa kuti tamucitile ubulalelale? (1 Abena Tesalonika 4:3, 4)

 ¹⁰ Mwilaba ne mibele yabipa. Ilyo muli abaice, e lyo kuba ukufwaya sana ukulaala no mwaume nelyo umwanakashi. Kabili nalimo abanenu kuti balamupatikisha ukucita ubulalelale. Ifi fine e fyo Satana afwaisha ukuti mucite. Cinshi mwingacita pa kuti tamucitile ubulalelale? (Belengeni 1 Abena Tesalonika 4:3, 4.) Ilyo mulepepa, mule-eba Yehova fyonse ifyo muleumfwa kabili mulemulomba ukuti alemukosha. (Mat. 6:13) Muleibukisha ukuti ico Yehova afwaisha, kumwafwa te kumukanda iyo. (Amalu. 103:13, 14) Na cimbi ico mwingacita pa kukaana amatunko, kulabelenga Icebo ca kwa Lesa Baibolo. Ba Melissa abo tulandilepo kale calebakosela ukuleka ukutontonkanya pa kucita ubulalelale. Batile: “Ukubelenga Baibolo cila bushiku kwalingafwile ukukanacita ubulalelale. Na kabili kwalilengele ndeibukisha ukuti ndi cibusa wa kwa Yehova kabili ndafwaya no kumubombela.”—Amalu. 119:9.

¹¹ Mwilatontonkanya ukuti mwe bene kuti mwapwisha amafya mukwata. Mule-ebako abafyashi benu amafya mulekwata. Kwena calikosa ukwebako abafyashi amafya mulekwata, lelo calicindama ukubebako. Ba Melissa batile: “Nalipepele kuli Yehova ukuti nshipe kabili nalyebele batata ubwafya nakwete. Ilyo nabebele, nalyumfwile bwino sana. Nalishibe ukuti Yehova alitemenwe ifyo nacitile.”

12. Cinshi mwingacita pa kuti mulesala bwino ifya kucita?

¹² Mulekonka amashinte ya mafunde aya mu Baibolo. Ilyo mwile mulekula, abafyashi benu bakalamusuminisha ukusalapo ifya kucita mwe bene. Na lyo line, kwaliba ifingi ifyo mushaishiba. Kuti mwacita shani pa kuti ifyo mwasalapo ukucita tafilengele bucibusa bwenu na Yehova bwapwa? (Amapi. 22:3) Bankashi Kari balilondolwele ifyalengele ukuti balesala bwino ifya kucita. Balishibe ukuti Abena Kristu abakalamba mu fya kwa Lesa tabakabila amafunde pali fyonse ifyo balefwaya ukucita. Batile: “Nalingile ukwishiba amashinte ya mafunde aya mu Baibolo ukucila ukwishiba fye amafunde.” Ilyo mulebelenga Baibolo muleyipusha amuti: ‘Cinshi nasambilila pa fyo Yehova atontonkanya ku fyo ndebelenga? Bushe muli amashinte ya mafunde ayenganjafwa ukulacita ifyalungama? Nga ca kuti ndecita ifyo Baibolo ilanda, fisuma nshi fikancitikila?’ (Amalu. 19:7; Esa. 48:17, 18) Nga mulebelenga Baibolo kabili muletontonkanya na pa mashinte ya mafunde ayaba mu Baibolo, mukalasalapo bwino ifya kucita ifikalalenga Yehova akalesekelela. Ilyo muletwalilila ukulunduluka, mukeshiba ukuti tamukabila amafunde pali fyonse fye ifyo mulefwaya ukucita, pantu mukeshiba bwino ifyo Yehova atontonkanya pa fintu.

13. Bushe ifibusa ifisuma kuti fyamwafwa shani? (Amapinda 13:20)

¹³ Mulesala ifibusa abatemwa Yehova. Nga fintu tulandilepo, abo musala ukuba ifibusa fyenu kuti balenga mwaba abakalamba mu fya kwa Lesa. (Belengeni Amapinda 13:20.) Bankashi Sara balilekele ukuba ne nsansa. Lelo kwali ifyacitike ifyalengele babe ne nsansa. Batile: “Naishilekwata ifibusa ifyali ne mibele iisuma. Kwali umukashana uo twalepekanishisha pamo Ulupungu lwa kwa Kalinda. Lyena cibusa wandi umbi alingafwile ukutendeka ukwasukapo pa kulongana. Pa mulandu wa kuti naleangala na bali ne mibele iisuma, nalitendeke ukulaisambilisha Baibolo e lyo no kulapepa lyonse. Natendeke ukupalama sana kuli Yehova, ne ci calengele naba ne nsansa na kabili.”

14. Bushe ba Julien bapangile shani ifibusa ifisuma?

 ¹⁴ Bushe kuti mwasanga shani ifibusa ifingalamwafwa? Ba Julien baeluda batile: “Ilyo nali umwaice, nalipangile ifibusa na ba bwananyina abo naleya mu kubila nabo imbila nsuma. Ifi ifibusa fyalebombesha kabili fyalingafwile no kutemwa sana umulimo wa kubila imbila nsuma. Nalitendeke ukutontonkanya pa kubomba umulimo wa nshita yonse. Na kabili naishileishiba ukuti icalengele nikwata ifibusa ifisuma, ni co nalefwaya fye ifibusa abo nalingene nabo. Ilyo papitile inshita nalikwete ifibusa ababombela pa Bethel. Ifyo balecita fyalengele nalasala bwino ifya kuleseshamo icitendwe kabili napalama sana kuli Yehova.”

15. Cinshi Paulo afundile Timote pa kupanga ifibusa? (2 Timote 2:20-22)

¹⁵ Cinshi mwingacita nga mwasanga ukuti ukula-angala no wa bwananyina umo mu cilonganino kuti kwalenga bucibusa bwenu na Yehova bwapwa? Paulo alishibe ukuti Abena Kristu bamo mu cilonganino ca kubalilapo tabali ne mibele iisuma. E mulandu wine afundile Timote ukuti talingile ukuba ifibusa na ba musango uyu. (Belengeni 2 Timote 2:20-22.) Bucibusa bwesu na Yehova bwalicindama. Tatufwile ukuleka umuntu nangu umo alenga bucibusa ubwakosa ubo twakwata na Shifwe wa ku muulu bwapwa.—Amalu. 26:4.

16. Finshi mwingapanga ukucita?

¹⁶ Mulepanga ifya kucita. Mulepanga ukucita ifingalenga icitetekelo cenu cakoselako kabili mwaba Abena Kristu abakalamba mu fya kwa Lesa. (Efes. 3:16) Ku ca kumwenako, kuti mwapanga ukulaisambilisha no kulabelenga Baibolo lyonse. (Amalu. 1:2, 3) Nelyo kuti mwapanga ukulapepa lyonse amapepo ya kufuma pa nshi ya mutima. Na kabili kuti mwapanga ukulasala bwino ifya kuleseshamo icitendwe e lyo ne fyo mwingalabomfya bwino inshita. (Efes. 5:15, 16) Yehova akasekelela nga nshi nga amona mulefwaisha ukulunduluka.

17. Mukanonkelamo shani nga muleafwako abantu?

¹⁷ Mukakula mu fya kwa Lesa nga ca kuti muleafwilisha abantu bambi. Yesu atile:  “Mwaba insansa ishingi mu kupeela ukucila ishaba mu kupokelela.” (Imil. 20:35) Muli no kuba sana ne nsansa nga mulebomfya inshita yenu na maka mwakwata ku kwafwilisha bambi. Ku ca kumwenako, kuti mwapanga ukwafwilishako abakoloci e lyo na balwalilila abo mwaba nabo mu cilonganino. Nalimo kuti mwayabashitilako ifintu nelyo ukubalangako ifyo bengabomfya foni nelyo tabuleti yabo. Nga ni mwe bamunyinefwe, kuti mwapanga ukuba ababomfi batumikila pa kuti mukalebombela aba bwananyina. (Fil. 2:4) Kuti mwalanga ukuti mwalitemwa abantu abo tushipepa nabo nga mulebila imbila nsuma kuli bena. (Mat. 9:36, 37) Nga kuti mwakumanisha, kuti mwapanga ukubombako umulimo wa nshita yonse.

18. Bushe ukubombako umulimo wa nshita yonse kuti kwalenga shani mwaba abakalamba mu fya kwa Lesa?

¹⁸ Umulimo wa nshita yonse kuti walenga mwaba abakalamba mu fya kwa Lesa. Ukubombako bupainiya bwa nshita yonse kuti kwalenga mwasangwa kwi Isukulu lya Bakabila ba Bufumu. Kuti mwabombako pa Bethel nelyo imilimo ya makuule. Kaitlyn painiya umwaice atile: “Ukulabomba umulimo wa kubila imbila nsuma na bamunyinefwe na bankashi abakalamba mu fya kwa Lesa kwalilenga nakoselako pa numa ya kubatishiwa. Ifyo bacita fyalilenga nalabelenga sana Baibolo kabili nalishiba ne fya kusambilisha bwino.”

19. Mapaalo nshi mukaipakisha nga mwatwalilila ukulunduluka?

¹⁹ Nga mwatwalilila ukulalunduluka Yehova akamupaala. Tamwakonawile ubulumendo bwenu ku fintu ifishacindama. (1 Yoh. 2:17) Tamwakabale amumfwapo ububi ubo umuntu omfwa nga acita ifyabipa. Lelo mukaba ne nsansa sha cine cine. (Amapi. 16:3) Imibele yenu iisuma ikalakoselesha bamunyinefwe na bankashi abaice na bakalamba. (1 Tim. 4:12) Ne cacilapo ukucindama, mukaba no mutende uo umuntu akwata nga aba cibusa wa kwa Yehova kabili nga alecita ifilenga Yehova alesekelela.—Amapi. 23:15, 16.