1. Cinshi icacindama ico abantu balingile ukusalapo ukucita pali ino nshita?

 ABANTU balingile ukusalapo ukutungilila Yehova Lesa ukuti e walinga ukuteka, nelyo ukusalapo ukutungilila umulwani wakwe uwabipisha Satana Kaseebanya. Takwaba ukuba pa kati, bonse tulingile ukusalapo nampo nga tulefwaya ukutungilila Yehova nelyo Satana. Ifyo cila muntu asalapo e fikalenga akekale umuyayaya nelyo iyo. (Mat. 25:31-33, 46) Mu “bucushi bukalamba,” e lyo abantu bakashilwa akashilwa ka kupusuka nelyo ukonaulwa.—Ukus. 7:14; 14:9-11; Esek. 9:4, 6.

2. (a) Bushe amashiwi yaba pa AbaHebere 10:35-39 yatukoselesha ukucita cinshi? (b) Bushe ifyebo fyaba mwi buuku lya Ukusokolola kuti fyatwafwa shani?

² Belengeni AbaHebere 10:35-39. Nga ca kuti mwalisala ukulatungilila ukuteka kwa kwa Yehova ninshi mwalisala icintu icisuma. Kanshi na imwe mufwile ukwafwa abantu ukusalapo ukutungilila imitekele ya kwa Yehova. Pa kuti mubafwe ukusalapo uo balingile ukulatungilila, kuti mwabomfya ifyaba mwi buuku lya Ukusokolola. Ili ibuuku lyalilondolola ifili no kucitikila bonse abakaana Yehova, kabili lilanda ne fyo Yehova ali no kupaala bonse abatungilila ukuteka kwakwe. Natusambilile pali ifi fintu ifyacindama ifili no kucitika ku ntanshi. Nga twaishiba ifi ifintu tukalafwaya ukutwalilila ukubombela Yehova ne cishinka. Na kabili kuti twabomfya ifi fine twaishiba ukulenga bambi ukusalapo ukutungilila Yehova no kutwalilila ukulamubombela.

3. Finshi twalasambilila muli cino cipande?

³ Muli cino cipande twala-asuka ifi fipusho: Finshi fili no kucitikila abatungilila ukuteka kwa kwa Lesa? Kabili finshi fili no  kucitikila abasalapo ukutungilila iciswango icakashika ce ico balandapo mwi buuku lya Ukusokolola?

4. Libumba nshi ilyo umutumwa Yohane amwene nabeminina pamo na Yesu mu muulu?

⁴ Mu cimonwa ico umutumwa Yohane amwene, mwali amabumba yabili aya batungilila ukuteka kwa kwa Yehova kabili abo alambwile no kubapeela umweo wa muyayaya. Mwi bumba lya kubalilapo mwali abantu 144,000. (Ukus. 7:4) Babasala ukufuma pano isonde pa kuti bapange ubuteko nelyo ubufumu ubo bakateka pamo na Yesu kabili bakateka isonde. (Ukus. 5:9, 10; 14:3, 4) Mu cimonwa, Yohane amwene ba 144,000 nabeminina pamo na Yesu pa Lupili lwa Sione ulwa ku muulu.—Ukus. 14:1.

5. Cinshi cili no kucitikila abasubwa abacili pe sonde?

⁵ Ukutula mu nshita ya batumwa ukufika na pali lelo, Lesa alasala abantu aba kuba mwi bumba lya ba 144,000. (Luka 12:32; Rom. 8:17) Na lyo line Yohane bamwebele ukuti bantu fye abanono ababa muli ili bumba e bakaba aba mweo pano isonde mu nshiku sha kulekelesha. Aba ‘abashalapo’ bakapokelela ‘icifwati’ ica kulekelesha ilyo ubucushi bukalamba bushilatendeka. (Ukus. 7:2, 3; 12:17) Lyena mu bucushi bukalamba abasubwa abakaba pe sonde, bakaya ku muulu pa kuti bakayeba pamo na ba 144,000 ababa kale ku muulu abafwile ne cishinka. Bakayateka pamo na Yesu mu bufumu bwa kwa Lesa.—Mat. 24:31; Ukus. 5:9, 10.

6-7. (a) Libumba nshi limbi ilyo Yohane amwene, kabili finshi tusambilila pali bena? (b) Mulandu nshi abasubwa e lyo na baba “mwi bumba likalamba” balingile ukubikila amano ku fyaba mwi buuku lya Ukusokolola icipandwa 7?

⁶ Pa numa ya kumona ibumba lya ku muulu, Yohane amwene “ibumba ilikalamba.” Ukupusanako na ba 144,000, ili ibumba lyena likalamba icine cine. (Ukus. 7:9, 10) Finshi twaishiba pali aba bantu? Yohane bamwebele ukuti: “Aba e bafuma mu bucushi bukalamba, kabili balicapa amalaya yabo no kuyabuutusha mu mulopa wa mwana wa mpaanga.” (Ukus. 7:14) Aba mwi “bumba likalamba” nga bapusuka ubucushi bukalamba, bakekala pe sonde kabili bakapaalwa nga nshi.—Amalu. 37:9-11, 27-29; Amapi. 2:21, 22; Ukus. 7:16, 17.

⁷ Nampo nga balitusala ukuya ku muulu nelyo tukekala pe sonde, bushe tulelenganya ukuti e ko tuli ilyo ifyaba mu Ukusokolola icipandwa 7 fikalacitika? Tufwile ukulaelenganya pali ifi fintu. Iyi nshita ikaba ni nshita iisuma nga nshi ku babomfi ba kwa Yehova bonse abakaya ku muulu e lyo na bakekala pe sonde. Tukasekelela nga nshi pa mulandu wa kuti twalisalilepo ukutungilila ukuteka kwa kwa Yehova. Finshi fimbi ifyo ibuuku lya Ukusokolola lilanda pa bucushi bukalamba?—Mat. 24:21.

8. Bushe ubucushi bukalamba bukatendeka shani, kabili finshi abantu abengi bakacita?

⁸ Mu cipande cafumineko, twalisambilile ukuti amabuteko ya pano sonde nomba line yali no kusansa Babiloni Mukalamba e kutila ukupepa konse ukwa bufi. (Ukus. 17:16, 17) Babiloni nga bamusansa ninshi no bucushi bukalamba bwatendeka. Bushe ici cikalenga abantu abengi bakatendeke ukupepa Yehova? Awe nakalya. Ukusokolola icipandwa 6 kulondolola ukuti pali ilya nshita ya-afya, abantu abashibombela Yehova bakabutukila ku mabuteko e lyo na ku ba makwebo ukuti babacingilile. Baibolo yalinganya aba makwebo na mabuteko ku mpili. Apo aba bantu tabakatungilile  Ubufumu bwa kwa Lesa, Yehova akalabamona ukuti balwani bakwe.—Luka 11:23; Ukus. 6:15-17.

9. Bushe ifyo abantu ba kwa Yehova bakacita mu bucushi bukalamba fikapusanako shani ne fyo abantu bambi bakacita, kabili finshi fikacitikila abantu ba kwa Lesa?

⁹ Ifyo ababomfi ba kwa Yehova bakacita pali iyi nshita ya-afya, fikapusanako sana ne fyo abantu abengi bakacita. Ababomfi ba kwa Yehova fye beka e bakatwalilila ukumubombela kabili e bakakaana ukutungilila iciswango. (Ukus. 13:14-17) Apo bakatwalilila aba cishinka kuli Yehova, abalwani ba kwa Lesa bakakalipa icine cine. Ne cikafumamo ca kuti inko ishikomana akapi shikasansa abantu ba kwa Lesa mwi sonde lyonse. Baibolo ita uku ukusansa ukuti, ukusansa kwa kwa Goge wa ku Magoge.—Esek. 38:14-16.

10. Ukulingana na Ukusokolola 19:19-21, cinshi Yehova akacita ilyo Goge wa ku Magoge akatusansa?

¹⁰ Finshi Yehova akacita ilyo Goge wa ku Magoge akatusansa? Atulaya ukuti: “Ubukali bwandi bukema kabili nkakalipa nga nshi.” (Esek. 38:18, 21-23) Ukusokolola icipandwa 19 kulalanda pa fikacitika. Yehova akatuma Umwana wakwe ukuti akacingilile abantu bakwe no konaula abalwani bakwe. “Amabumba ya ku muulu” e kutila bamalaika aba cishinka, ba 144,000 e lyo na Yesu, bakalwa na Goge wa ku Magoge. (Ukus. 17:14; 19:11-15) Finshi fikafumamo muli ubu ubulwi? Abantu bonse e lyo na mabumba ayakaanya ukuteka kwa kwa Yehova bakayonaula umupwilapo!—Belengeni Ukusokolola 19:19-21.

11. Cintu nshi icacindama sana icikacitika ico ibuuku lya Ukusokolola lyalandapo?

¹¹ Elenganyeni ifyo ababomfi ba kwa Lesa bakomfwa ilyo bakapusuka Lesa nga aonaula abalwani bakwe! Pali iyo nshita bonse aba pano isonde bakasekelela nga nshi! Nangu ca kuti aba ku muulu bakasekelela ilyo Babiloni Mukalamba bakamonaula, kuli na cimbi icikacitika icikalenga bakasekelele sana. (Ukus. 19:1-3) Kukacitika icintu icacindama sana ico ibuuku lya Ukusokolola lyalandapo, ne ci “bwinga bwa Mwana wa Mpaanga.”—Ukus. 19:6-9.

12. Ukulingana na mashiwi yaba pa Ukusokolola 21:1, 2, ni lilali kukaba ubwinga bwa Mwana wa Mpaanga?

¹² Ni lilali kukaba ubu ubwinga? Ilyo inkondo ya Armagedone ishilatendeka ninshi ba 144,000 bonse nabaya ku muulu. Na lyo line iyi tayakabe ni nshita ilyo ubwinga bwa Mwana wa Mpaanga bukabako. (Belengeni Ukusokolola 21:1, 2.) Ubwinga bwa Mwana wa Mpaanga bukabako pa numa ya nkondo ya Armagedone kabili pali iyi nshita ninshi abalwani ba kwa Lesa bonse nababonaula.—Amalu. 45:3, 4, 13-17.

13. Cinshi cikacitika ilyo kukaba ubwinga bwa Mwana wa Mpaanga?

¹³ Cinshi cikacitika ilyo kukaba ubwinga bwa mwana wa mpaanga? Ubwinga bulalenga umwaume no mwanakashi ukuba pamo. Ifi fine e fyo no bwinga bwa Mwana wa Mpaanga bukalenga Imfumu Yesu Kristu e lyo na “nabwinga” wakwe, ba 144,000 ukuba pamo. Ubu bwinga bukalenga Yesu na ba 144,000 bakatendeke ukuteka pa myaka 1,000.—Ukus. 20:6.

14-15. Bushe Ukusokolola icipandwa 21 kulinganya ba 144,000 kuli cinshi? (Moneni icikope cili pa nkupo.)

¹⁴ Icipandwa 21 ice buuku lya Ukusokolola, cilinganya ba 144,000 ku musumba uusuma sana uwitwa ukuti “Yerusalemu Mupya.” (Ukus. 21:2, 9) Uyu musumba  wakwata amabwe ya mufula 12 apalembwa “amashina 12 aya batumwa 12 aba Mwana wa Mpaanga.” Mulandu nshi Yohane atemenwe ifyo amwene? Pantu alimwene ishina lyakwe nabalilemba pe libwe limo pali yalya amabwe 12. Ili lyali lishuko nga nshi!—Ukus. 21:10-14; Efes. 2:20.

¹⁵ Uyu umusumba wa mampalanya walipusanako ne fyo imisumba imbi imoneka. Bushe wapusana shani? Umusebo uukalamba uwa muli uyu musumba baupangila na golde iisuma sana, impongolo 12 bashipangila na margariti, ilinga e lyo no mufula wa uyu umusumba bafipangila na mabwe yauma umutengo kabili baliupima bwino bwino. (Ukus. 21:15-21) Lelo Yohane amwene ukuti kwali cimo icabulilemo muli uyu umusumba! Umfweni ifyo Yohane alandile, atile: “Nshamwenemo itempele, pantu Yehova Lesa Uwa Maka Yonse e tempele lya uko, kabili umusumba taukabila ulubuuto lwa kasuba nangu ulwa mweshi, pantu ubukata bwa kwa Lesa bwaliubuutusha, ne nyali ya uko Mwana wa Mpaanga.” (Ukus. 21:22, 23) Aba muli Yerusalemu Mupya bakaba pamo na Yehova. (Heb. 7:27; Ukus. 22:3, 4) Kanshi Yehova na Yesu e tempele ilya uyu musumba.

16. Finshi fikacitikila abantu ba kwa Lesa mu myaka 1,000 ilyo Ubufumu bwa kwa Lesa bukalateka?

¹⁶ Abasubwa balomfwa bwino sana ukutontonkanya pali uyu musumba. Na bakwata isubilo lya kwikala pano isonde nabo bene bafwile ukulatontonkanya pali uyu musumba. Ilyo ubufumu bwa kwa Lesa bukalateka pa myaka 1,000, Yerusalemu Mupya akalenga abantu bakapaalwe nga nshi. Yohane amwene aya mapaalo yalepita kwati “mumana wa menshi ya mweo.” Mu mbali ya mumana mwali “imiti ya mweo” iyakwete amabuula “aya kundapilako inko.” (Ukus. 22:1, 2) Abantunse bonse abakabako pali ilya nshita bakakwata ishuko lya kupokelela aya mapaalo. Mu kuya kwa nshita bonse abomfwila Yehova bakapwililika. Takwakabe ukulwala, ukukalipwa, e lyo no kuloosha.—Ukus. 21:3-5.

17. Ukulingana na mashiwi yaba pa Ukusokolola 20:11-13, ni bani abakaipakisha amapaalo mu myaka 1,000 iya kuteka kwa Bufumu bwa kwa Lesa?

¹⁷ Ni bani bakaipakisha amapaalo yonse aya? Aba kubalilapo, libumba likalamba abakapusuka Armagedone e lyo na bana bonse abakafyalwa mu calo cipya. Nomba Ukusokolola 20 kutulaya no kuti abafwa bakabuuka. (Belengeni Ukusokolola 20:11-13.) Abantu  aba cishinka e kutila “abalungama” abafwile kale, e lyo na “bashalungama” e kutila abashakwete ishuko lya kusambilila pali Yehova, nabo bene bakabuuka. (Imil. 24:15; Yoh. 5:28, 29) Bushe ici cilolele mu kuti bonse abafwa bakabushiwa mu myaka 1,000 iya kuteka kwa Bufumu bwa kwa Lesa? Awe. Bonse abakwete ishuko lya kubombela Yehova lelo abakeene ku mufulo fye ukumubombela ilyo tabalafwa, tabakabuuke. Filya bakeene ukubombela Lesa ilyo bakwete ishuko lya kumubombela fyalangile fye ukuti tabalinga ukwikala mu paradaise.—Mat. 25:46; 2 Tes. 1:9; Ukus. 17:8; 20:15.

18. Bushe abantu bakaba shani pa mpela ya myaka 1,000?

¹⁸ Ilyo imyaka 1,000 ikalapwa ninshi bonse abakalaikala pano isonde nabapwililika. Pali ilya nshita tapakabe nangu umo ukaba no lubembu ulwafumine kuli Adamu. (Rom. 5:12) Ulubembu ulwaletelwe na Adamu lukafumishiwapo umupwilapo. Kanshi ici cilolele mu kuti bonse abakaba pano sonde ‘bakaba no mweo’ pantu bakaba abapwililika ilyo imyaka 1,000 ikapwa.—Ukus. 20:5.

19. Mulandu nshi kukabela ubwesho bwa kulekeleshako?

¹⁹ Twalishiba ukuti Yesu alitwalilile ukuba uwa cishinka kuli Lesa na lintu Satana amweseshe. Nomba bushe abantu bonse pano isonde abakaba abapwililika bakatwalilila ukuba aba cishinka kuli Yehova ilyo Satana akabesha? Cila muntu akayasukila ici cipusho ilyo Satana bakamukakula pa mpela ya myaka 1,000. (Ukus. 20:7) Bonse abakaba ne cishinka kuli Yehova ilyo bakeshiwa ubwesho bwa kulekeleshako, bakaba no mweo wa muyayaya kabili bakalubuka icine cine. (Rom. 8:21) Abakapondokela Yehova bakabonaula pamo na Satana ne fibanda fyakwe.—Ukus. 20:8-10.

20. Bushe mwaumfwa shani pa masesemo ayo twasambilila mwi buuku lya Ukusokolola?

²⁰ Bushe mwaumfwa shani pa numa ya kusambilila fimo ifyaba mwi buuku lya Ukusokolola? Bushe tamutemenwe ukwishiba ukuti ifyo aya masesemo yalandapo fyalimukuma? Ukwabula no kutwishika ici cilelenga mulefwaisha ukwebako abantu ukuti bese tulepepela pamo mu kupepa ukwasanguluka. (Ukus. 22:17) Apo nomba twasambilila pa fintu ifili no kucitika ku ntanshi, natutemwa sana kabili kuti twalanda nge fyo umutumwa Yohane alandile ukuti: “Ameni! Iseni, mwe Shikulu Yesu.”—Ukus. 22:20.