ICIPANDE CA KUSAMBILILAMO 20
Ifyo Tusambilila mwi Buuku lya Ukusokolola Ifikacitikila Abalwani ba kwa Lesa
“Fyashilonganike ku cifulo iciitwa mu ciHebere Armagedone.”—UKUS. 16:16.
ULWIMBO 150 Fwayeni Lesa pa Kuti Mukapusuke
IFYO TWALASAMBILILA *
1. Finshi ibuuku lya Ukusokolola lyalanda pa ficitikila abantu ba kwa Lesa?
MWI BUUKU lya Ukusokolola tusambililamo ukuti Ubufumu bwa kwa Lesa bwalitendeka ukuteka ku muulu kabili Satana balimutamfya ku muulu. (Ukus. 12:1-9) Ifi Satana bamutamfya, fyalilenga ku muulu kwaba umutende lelo pano isonde pena paliba amafya. Mulandu nshi? Pantu Satana aba ne cipyu kabili alasansa ababombela Yehova ne cishinka pano isonde.—Ukus. 12:12, 15, 17.
2. Cinshi icingatwafwa ukutwalilila aba cishinka kuli Yehova?
2 Kuti twatwalilila shani ukuba aba cishinka kuli Yehova nangu ca kuti Satana alatusansa? (Ukus. 13:10) Cimo icingatwafwa, kwishiba ifikacitika ku ntanshi. Ku ca kumwenako, mwi buuku lya Ukusokolola umutumwa Yohane alilanda pa mapaalo ayo tuli no kupokelela nomba line. Cimo ico Lesa ali no kutucitila pa kuti tukakwate amapaalo, konaula abalwani bakwe. Lekeni nomba tumone ifyo ibuuku lya Ukusokolola lilondolola aba balwani, e lyo ne fyo ali no kubonaula.
ABALWANI BA KWA LESA BABALONDOLOLA UKUBOMFYA “IFISHIBILO”
3. Fishibilo nshi fimo ifyo balandapo mwi buuku lya Ukusokolola?
3 Mu cikomo ca kubalilapo mwi buuku lya Ukusokolola Baibolo itila ifyo twalatendeka ukubelenga, bafilondolola ukubomfya “ifishibilo,” e kutila fyalikwata ifyo fimininako. (Ukus. 1:1) Tulabelenga pa fiswango ifingi ifimininako abalwani ba kwa Lesa. Ku ca kumwenako, kwali ‘iciswango icalefuma muli bemba.’ Cakwete ‘insengo 10 ne mitwe 7.’ (Ukus. 13:1) Pa numa ya ici ciswango, pakonkele ‘iciswango cimbi icafumine mu mushili.’ Calelanda nge cing’wena kabili “calelenga no mulilo ukufuma mu muulu.” (Ukus. 13:11-13) Lyena pakonkele iciswango “icakashika ce” kabili cilende aikele pa muulu wa ciko. Ifi fiswango fitatu fimininako abalwani abalwisha Yehova Lesa e lyo no Bufumu bwakwe pa myaka iingi. Kanshi nacicindama ukwishiba aba abalwani ba kwa Lesa.—Ukus. 17:1, 3.
IFISWANGO 4 IFYAKULISHA
“Fyalefuma muli bemba.” (Dan. 7:1-8, 15-17) Fimininako amabuteko ayatekelepo abantu ba kwa Lesa nelyo ukubacusha, ukutendekela mu nshiku sha kwa Daniele. (Moneni paragrafu 4 na 7)
4-5. Bushe ifyalembwa pali Daniele 7:15-17 filenga shani twaishiba umo ifishibilo fyalola?
4 Ilyo tatulaishiba aba abalwani ba kwa Lesa, intanshi tufwile ukwishiba ifyo iciswango e lyo na cilende fimininako. Baibolo fye e ingalenga twaishiba umo ifi fyalola. Ifishibilo ifingi ifyaba mwi buuku lya Ukusokolola, balifilondolola mu mabuuku yambi aya mu Baibolo. Ku ca kumwenako, kasesema Daniele alilotele iciloto umo amwene ‘ifinama 4 ifyakulisha filefuma muli bemba.’ (Dan. 7:1-3) Daniele alilembele ifyo ifi finama fyaleimininako. Ifinama 4 ifyakulisha fimininako “ishamfumu” nelyo amabuteko. (Belengeni Daniele 7:15-17.) Ifi Daniele alondolwele mu nshila iyaumfwika, fyalilenga twaishiba ukuti ifiswango ifyo balandapo mwi buuku lya Ukusokolola na fyo fine fimininako amabuteko.
5 Lekeni nomba tulande pa fishibilo fimo ifyo balandapo mwi buuku lya Ukusokolola. Ilyo tulelanda pa cishibilo cimo na cimo, twakulamona ne fyo Baibolo ingatwafwa ukwishiba ifyo cimininako. Natubalilepo ukulanda pa fiswango. Ica kubalilapo, twalalanda pa fyo fimininako. Lyena twalalanda na pa fili no kucitikila ifi fiswango. Na mu kulekelesha, twalalanda na pa fyo twingasambililako.
ABALWANI BA KWA YEHOVA BAISHIBIKWA
ICISWANGO ICAKWATA IMITWE 7
Cafumine “muli bemba” kabili cali ne nsengo 10, imitwe 7, ne fisote fya bufumu 10. (Ukus. 13:1-4) Cimininako amabuteko yonse ayatekapo abantu ukufika pali ino nshita. Imitwe 7 imininako amabuteko ayatekelepo abantu ba kwa Lesa nelyo ukubacusha. (Moneni amaparagrafu 6-8)
6. Bushe iciswango icakwata imitwe 7 ico balandapo pa Ukusokolola 13:1-4, cimininako cinshi?
6 Bushe iciswango icakwata imitwe 7 cimininako cinshi? (Belengeni Ukusokolola 13:1-4.) Ici ciswango cimoneka kwati ni mbwili lelo cakwata amakasa ya kwa bere, akanwa kwati ni nkalamo kabili caba ne nsengo 10. Ifinama 4 ifyalandwapo muli Daniele icipandwa 7 na fyo fine fyalemoneka nge finama ifyaba muli ici ciswango. Ifinama 4 ifyo Daniele amwene, mwi buuku lya Ukusokolola mwena, e fyapanga iciswango cimo. Kanshi iciswango tacimininako ubuteko bumo nelyo ubuteko ubwakwatisha amaka. Yohane atile ici ciswango cilateka “pa mitundu yonse na pa bantu bonse na pa ba ndimi shonse na pa nko shonse.” Kanshi cifwile ukukwata amaka sana ukucila ubuteko ubuli bonse. (Ukus. 13:7) E ico ici ciswango cifwile ukwimininako amabuteko yonse aya maka ayatekapo abantu ukufika pali lelo. *—Luk. Mil. 8:9.
7. Bushe imitwe 7 iya ciswango imininako cinshi?
7 Bushe imitwe 7 iya ici ciswango imininako cinshi? Amashiwi ayaba mu Ukusokolola icipandwa 17 kuti yatwafwa ukwishiba umo iyi mitwe yalola, pantu yalondolola icimpashanya ca ciswango ico balandapo mu Ukusokolola 13. Pa Ukusokolola 17:10 tubelenga ukuti: “Kuli imfumu 7: shisano shaliwa, imo icilipo, imbi icili tailaisa, lelo ilyo ikesa ikekala fye inshita iinono.” Pa mabuteko yonse ayo Satana abomfyapo, ayali 7 e yakwatishepo amaka kabili e yemininako “imitwe.” Aya amabuteko yalitekapo abantu ba kwa Lesa nelyo ukubacusha. Ilyo Yohane ali uwa mweo, ninshi amabuteko 5 yalitekapo, e kutila ubuteko bwa Egupti, ubwa Asiria, ubwa Babiloni, ubwa Madai na Persia no bwa Grisi. Ilyo Yohane bamulangile icimonwa ca kusokolola, ninshi ubuteko bwalenga 6 ubwakwatishe amaka ubwa bena Roma e bwaleteka. Buteko nshi ubwa kulekeleshako ubwali no kukwatisha amaka kabili ubwalenga 7, nelyo umutwe?
8. Buteko nshi ubwimininako umutwe wa ciswango uwalenga 7?
8 Nga fintu twalamona, amasesemo yaba mwi buuku lya kwa Daniele yalatwafwa ukwishiba umutwe walenga 7 kabili uwa kulekeleshako uwa ciswango. Buteko nshi ubwakwatisha amaka ubuteka muli shino nshiku sha ku mpela, nelyo mu “bushiku bwa kwa Shikulu?” (Ukus. 1:10) Buteko ubwapangwa na mabuteko yabili, e kutila United Kingdom na United States of America, mu bwipi, buteko ubwakwatisha amaka ubwa Anglo-America. Kanshi kuti twasondwelela ukuti ubuteko bwa Anglo-America e mutwe walenga 7 uwa ciswango uo Ukusokolola 13:1-4 kwalandapo.
ICISWANGO ICABA NE NSENGO SHIBILI NGO MWANA WA MPAANGA
Cafumine “mu mushili” kabili calelanda “nge cing’wena.” “Calelenga no mulilo ukufuma mu muulu” kabili calecita ifipesha amano nga “kasesema wa bufi.” (Ukus. 13:11-15; 16:13; 19:20) Iciswango icaba ne nsengo shibili ico beta no kuti kasesema wa bufi cimininako ubuteko bwa Anglo-America, pantu bulalufya aba pano isonde bonse no kubeba “ukupanga icimpashanya ca ciswango” icakwata imitwe 7 ne nsengo 10. (Moneni paragrafu 9)
9. Bushe iciswango icali ne “nsengo shibili ngo mwana wa mpaanga” cimininako cinshi?
9 Mu Ukusokolola icipandwa 13 tusambililamo ukuti umutwe walenga 7 uwa ciswango, e kutila ubuteko bwa Anglo-America ubwakwatisha amaka, bwaba kwati ciswango icaba ne ‘nsengo shibili ngo mwana wa mpaanga lelo icatendeke ukulanda nge cing’wena.’ Ici ciswango “calecita ifipesha amano ifikalamba. Calelenga no mulilo ukufuma mu muulu no kuponena pe sonde ninshi na bantu balemonako.” (Ukus. 13:11-15) Ukusokolola icipandwa 16 na 19, kulondolola ici ciswango ukuti ni “kasesema wa bufi.” (Ukus. 16:13; 19:20) Daniele na o alilandileko fimo ifyapalana ne fi ilyo atile ubuteko bwa Anglo-America bwali no ‘konaula mu cipesha amano.’ (Dan. 8:19, 23, 24) Ifi fine e fyacitike ilyo kwali Inkondo ya Calo Iyalenga Bubili. Amabomba yabili ayakalamba ayalengele ukuti Inkondo ya Calo iya Bubili ipwe, yapangilwe na basayantisti aba ku Britain e lyo na ba ku America. Ifi ubuteko bwakwatisha amaka ubwa Anglo-America bwapangile ibomba, cali kwati ‘bwalenga umulilo ukufuma ku muulu no kuponena pe sonde.’
ICISWANGO ICAKASHIKA CE
Cilende, e kutila Babiloni Mukalamba, alinina pali ici ciswango. Ici ciswango bacilondolola ukuti ni mfumu iyalenga 8. (Ukus. 17:3-6, 8, 11) Pa kubala cilende e waletungulula ici ciswango, lelo pa numa calimwipeye. Cilende emininako imipepele yonse iya bufi. Iciswango muno nshiku cimininako akabungwe ka United Nations, akatungilila amabuteko mwi sonde lyonse. (Moneni amaparagrafu 10, 14-17)
10. Bushe “icimpashanya ca ciswango” cimininako cinshi? (Ukusokolola 13:14, 15; 17:3, 8, 11)
10 Ibuuku lya Ukusokolola lilanda na pa ciswango na cimbi. Ici ciswango cimoneka kwati ciswango icakwata imitwe 7 nomba cena calikashika ce. Baciita ukuti “icimpashanya ca ciswango” kabili bacilondolola no kuti “ni mfumu iyalenga 8.” * (Belengeni Ukusokolola 13:14, 15; 17:3, 8, 11.) Yohane alondolwele ukuti iyi “mfumu” e po yali pa kashita kamo, yalishilefumapo, lyena yalibwelele na kabili. Aya mashiwi yalondolola fye akabungwe ka United Nations, akatungilila amabuteko mwi sonde lyonse. Pa kubala, aka kabungwe baleketa ukuti League of Nations. Lyena ilyo kwali Inkondo ya Calo iya Bubili, kalilobele. Lyena pa numa kalibwele nga kabungwe ka United Nations.
11. Finshi amabuteko yacita, kabili mulandu nshi tushilingile ukutiinina?
11 Iciswango nelyo amabuteko yalakoselesha abantu ukulwisha Yehova e lyo na bantu bakwe. Yohane atile cali kwati ‘ishamfumu sha ba pano isonde shonse baleshilonganika’ ku nkondo ya Armagedone, e kutila “inkondo ya bushiku bukalamba ubwa kwa Lesa Wa Maka Yonse.” (Ukus. 16:13, 14, 16) Lelo tatwakatiine. Lesa wesu Yehova, akapususha bonse abatungilila ukuteka kwakwe.—Esek. 38:21-23.
12. Finshi fili no kucitikila ifiswango fyonse?
12 Finshi fili no kucitikila ifiswango fyonse? Ukusokolola 19:20 kulanda ukuti: “Iciswango caliketwe, pamo na kasesema wa bufi uwacitile ifishibilo pa ntanshi ya ciswango ifyo alufiishemo abapokelele icishibilo ca ciswango na bapepa icimpashanya ca ciko. Ilyo ficili ifya mweo, fyonse fibili fyapooselwe muli bemba wa mulilo umwaba amabwe ya mingu ayabilima umulilo.” Kanshi ilyo aya mabuteko yacili yaleteka, aba abalwani ba kwa Lesa bali no kubonaula umuyayaya.
13. Mafya nshi yamo ayo amabuteko yaleta pa Bena Kristu?
13 Finshi tulesambililako? Apo tuli Bena Kristu tufwile ukuba aba cishinka kuli Lesa e lyo na ku Bufumu bwakwe. (Yoh. 18:36) Pa kuti tube aba cishinka kuli Lesa na ku Bufumu bwakwe, tatufwile ukuitumpa mu fikansa fya calo. Kwena tacayanguka ukukanaitumpa mu fikansa fya calo, pantu amabuteko yafwaya ukuti tuleyatungilila mu fyo tusosa na mu fyo tucita. Bonse abatungilila amabuteko balapokelela icishibilo ca ciswango. (Ukus. 13:16, 17) Onse uwapokelela ici icishibilo, Yehova akaleka ukumupaala kabili takabe no mweo wa muyayaya. (Ukus. 14:9, 10; 20:4) Kanshi nacicindama ukuti tutwalilile ukukanaitumpa mu fikansa fya calo nangu ca kuti amabuteko yakulatupatikisha ukuti tuleyatungilila.
CILENDE MUKALAMBA BALI NO KUMONAULA
14. Cinshi ico umutumwa Yohane amwene icamupapwishe ico alondolwele pa Ukusokolola 17:3-5?
14 Umutumwa Yohane alandile no kuti ‘alipapile no kupeshiwa amano nga nshi’ pa fyo amwene. Finshi ifyo fine amwene? Amwene umwanakashi nanina pa ciswango ica kutiinya. (Ukus. 17:1, 2, 6) Uyu mwanakashi bamulondolola ukuti ni “cilende mukalamba” kabili bamwita ukuti “Babiloni Mukalamba.” Acita “ubulalelale” ne “shamfumu sha pe sonde.”—Belengeni Ukusokolola 17:3-5.
15-16. Bushe “Babiloni Mukalamba” emininako nani, kabili twaishiba shani?
15 Bushe “Babiloni Mukalamba” ni cinshi? Uyu mwanakashi temininako utubungwe twa mapolitiki pantu Baibolo yamulondolola ukuti acita ubulalelale ne shamfumu sha pano isonde. (Ukus. 18:9) Kabili, apo bamulondolola ukuti anina pa ciswango, cilangilila ukuti alafwaya ukutungulula ishamfumu. Na kabili temininako aba makwebo ababa muli ici calo ca kwa Satana pantu bena babalandapo pambi mwi buuku lya Ukusokolola kabili babeta ukuti “bashimakwebo ba pe sonde.”—Ukus. 18:11, 15, 16.
16 Mu Baibolo, ishiwi lya kuti “cilende” lilabomfiwa na ku kulondolola abantu abatila balapepa Lesa lelo abapepa utulubi nelyo ababa ifibusa ne calo. (1 Imila. 5:25; Yako. 4:4) Baibolo itila bonse abapepa Lesa mu cishinka ‘balisanguluka’ nelyo ‘banacisungu.’ (2 Kor. 11:2; Ukus. 14:4) Mu musumba wa Babiloni mwali sana ukupepa kwa bufi. Kanshi Babiloni Mukalamba, emininako ukupepa konse ukwa bufi. Na kuba, mipepele ya bufi yonse.—Ukus. 17:5, 18; moneni icipande ca pa Intaneti icitila, “Bushe Babiloni Mukalamba ni Cinshi?”
17. Cinshi cili no kucitikila Babiloni Mukalamba?
17 Cinshi cili no kucitikila Babiloni Mukalamba? Baibolo pa Ukusokolola 17:16, 17 itila: “Insengo 10 ne ciswango ifyo wacimona, fikapata cilende no kumupokolola fyonse ukumusha ubwamba, kabili fikalya umubili wakwe no kumoca fye onse mu mulilo. Pantu ni Lesa e walengele imitima ya fiko ukuti icite ifyo umwine alefwaya.” Ca cine, Yehova akalenga inko ukubomfya iciswango icakashika ce, e kutila, akabungwe ka United Nations ukwimina ukupepa konse ukwa bufi no kukonaula umupwilapo.—Ukus. 18:21-24.
18. Finshi tufwile ukucita pa kuti twilatungilila Babiloni Mukalamba mu nshila iili yonse?
18 Finshi tulesambililako? Tulingile ukutwalilila ukuba mu “mipepele iyasanguluka kabili iishakowela mu menso ya kwa Lesa wesu.’ (Yako. 1:27) Tatufwile ukulakutika ku fisambilisho fya bufi, ukulasefyako imitebeto iyafuma ku bantu abashalepepa Lesa wa cine nelyo ukuba ne mibele yabipa. Kabili tatufwile no kucitako fye fyonse ifyaba muli Babiloni Mukalamba. Tufwile ukutwalilila ukweba abantu ‘ukufuma muli ena’ pa kuti nabo bene bekawila mu membu shakwe.—Ukus. 18:4.
IFYO BALI NO KUPINGULA UMULWANI MUKALAMBA UWA KWA LESA
ICING’WENA ICIKALAMBA ICAKASHIKA
Satana e upeela iciswango amaka. (Ukus. 12:3, 9, 13; 13:4; 20:2, 10) Satana e mulwani mukalamba uwa kwa Yehova, kabili bali no kumupoosa mu cilindi cabula impela kabili akekalamo imyaka 1,000. Pa numa Satana bakamupoosa “muli bemba wa mulilo umwaba na mabwe ya mingu.” (Moneni amaparagrafu 19 na 20)
19. Bushe nani emininako “icing’wena cikalamba icakashika”?
19 Ibuuku lya Ukusokolola lilalanda na pa “cing’wena icikalamba icakashika.” (Ukus. 12:3) Cilalwa na Yesu e lyo na bamalaika bakwe. (Ukus. 12:7-9) Cilasansa abantu ba kwa Lesa, kabili e cipeela na mabuteko amaka. (Ukus. 12:17; 13:4) Nani emininako icing’wena? “Cisoka ca pa kutendeka, iciitwa Kaseebanya kabili Satana.” (Ukus. 12:9; 20:2) E utungulula bonse abalwani ba kwa Yehova.
20. Cinshi cili no kucitikila icing’wena?
20 Cinshi cili no kucitikila icing’wena? Baibolo pa Ukusokolola 20:1-3 ilondolola ukuti malaika ali no kupoosa Satana mu cilindi icabula impela, kabili ici cilindi cili no kuba kwati cifungo ca kwa Satana. Ilyo Satana bakamupoosa mu cilindi icabula impela, ‘takalufye na kabili inko mpaka imyaka 1,000 ikapwe.’ Pa kulekelesha, Satana ne fibanda fyakwe bali no kubapoosa muli “bemba wa mulimo umwaba na mabwe ya mingu,” e mu kuti bali no kubonaula umupwilapo. (Ukus. 20:10) Kuti mwaelenganya ifyo cikawama ukwikala mwi sonde umwabula Satana ne fibanda fyakwe. Ala ikaba ni nshita iisuma icine cine!
21. Mulandu nshi twingabela ne nsansa pa fyo twabelenga mwi buuku lya Ukusokolola?
21 Tulakoseleshiwa sana nga twaishiba umwalola ifishibilo ifyalembwa mwi buuku lya Ukusokolola. Natusambilila pa balwani ba kwa Lesa, natubeshiba no kubeshiba, kabili natwishiba ne fili no kubacitikila. Ca cine, “alipaalwa uubelenga, na bomfwa amashiwi ya muli uku kusesema.” (Ukus. 1:3) Nomba ilyo abalwani ba kwa Lesa bali no kubonaula, mapaalo nshi abantu aba cishinka bakapokelela? Ici e co tuli no kusambilila mu cipande ca kulekeleshako muli ifi ifipande fitatu.
ULWIMBO 23 Yehova Atendeka Ukuteka
^ para. 5 Ibuuku lya Ukusokolola, lilasokolola abalwani ba kwa Lesa ukubomfya ifishibilo. Lyena ibuuku lya kwa Daniele, lilalenga twaishiba ifyo ifishibilo fipilibula. Muli cino cipande, twalalinganya amasesemo yaba mwi buuku lya kwa Daniele ku masesemo yamo ayapalana na yaba mwi buuku lya Ukusokolola. Ici calalenga twishibe abalwani ba kwa Lesa. Lyena twalasambilila ne fikacitikila abalwani ba kwa Lesa.
^ para. 6 Na cimbi icilangilila ukuti ici ciswango icakwata imitwe 7 cimininako amabuteko yonse ayakwata amaka, ni co cakwata “insengo 10.” Mu Baibolo nga babomfya inambala 10, ilingi ninshi balelanda pa cintu icakumanina.
^ para. 10 Ici ciswango calipusanako ne ciswango ca kubalilapo pantu cena tacakwata “ifisote fya bufumu” ku nsengo. (Ukus. 13:1) Icalenga ukuti cikwata ifisote fya bufumu, ni co catuntuka muli ishi shamfumu 7 kabili eko cifumya na maka ya ciko.—Moneni icipande icaba pa Intaneti icitila, “Bushe Iciswango Icakashika Icalandwapo mu Ukusokolola Icipandwa 17 ni Cinshi?”
