1-2. Mulandu nshi umo uo tulingile ukubikila amano ku fyaba mwi buuku lya Ukusokolola?

 BUSHE umuntu umo alibala amupeelapo ifikope pa kuti mutambe? Ilyo muletamba ifikope, abantu abengi abo mulemona tamwabeshiba. Lelo kwaba icikope cimo ico mwalolekeshapo. Mulandu nshi? Pantu e po muli pali ico icikope. Ilyo mulelolekesha icikope, mule-esha no kwibukisha ilyo mwakopelwe e lyo no ko mwakopeelwe. Na kabili mule-esha no kwibukisha na bonse abalipo. Ici icikope e co mwatemwa sana pantu e po muli.

² Ibuuku lya Ukusokolola lyaba kwati ni co icikope. Mulandu nshi twingalandila ifyo? Umulandu wa kubalilapo wa kuti, ibuuku lya Ukusokolola ni fwe balembeele. Mu cikomo ca kubalilapo tubelenga ukuti: “Ifyasokololwa muli lino ibuuku fintu ifyo Lesa asokolwelele Yesu Kristu pa kutila Yesu alange abasha bakwe ifili no kucitika bwangu bwangu.” (Ukus. 1:1) Kanshi ifyalembwa mwi buuku lya Ukusokolola te fya bantu fye abali bonse lelo balembeele fwe babomfi ba kwa Lesa abaipeela. Apo tuli bantu ba kwa Lesa tatupapa nga twasanga ukuti amasesemo ayalembwa muli ili buuku yalitukuma.

3-4. Ukulingana ne buuku lya Ukusokolola, ni lilali aya amasesemo yafikilishiwa kabili finshi tulingile ukucitapo?

³ Umulandu walenga bubili uo tulingile ukutemenwa sana amasesemo yaba mwi buuku lya Ukusokolola, ni pa mulandu wa nshita yali no kufikilishiwa. Umutumwa Yohane alilondolwele ilyo aya masesemo yali no kufikilishiwa ilyo atile: “Ilyo napokelele umupashi wa mushilo naishileba mu bushiku bwa  kwa Shikulu.” (Ukus. 1:10) Ilyo Yohane alembele aya mashiwi nalimo mu 96 ninshi Yesu alibwelelamo ku muulu, pali no kupita imyaka iingi pa kuti “ubushiku bwa kwa Shikulu” butendeke. (Mat. 25:14, 19; Luka 19:12) Ukulingana ne fyo Baibolo yasobele, bulya bushiku bwatendeke mu 1914 ilyo Yesu bamubikile pa Bufumu mu muulu. Ukufuma ilya nshita amasesemo ayaba mu Ukusokolola ayakuma abantu ba kwa Lesa yalitendeke ukufikilishiwa. Ca cine, tuleikala “mu bushiku bwa kwa Shikulu.”

⁴ Apo tuleikala muli ubu bushiku, ni fwe tulekabila ukubika sana amano ku mashiwi yaba pa Ukusokolola 1:3 ayatila: “Alipaalwa uubelenga, na bomfwa amashiwi ya muli uku kusesema, na bakonka ifyalembwamo; pantu inshita naipalama.” Ca cine tulingile ‘ukubelenga,’ ‘ukumfwa amashiwi ya muli uku ukusesema,’ no ‘kukonka ifyalembwamo.’ Bushe mashiwi nshi yamo ayo tulingile ukukonka?

5. Bushe ifyaba mwi buuku lya Ukusokolola filenga shani twaishiba umulandu tulingile ukulapepela Yehova ukulingana ne fyo afwaya?

⁵ Mu cipandwa ca kubalilapo mwi buuku lya Ukusokolola, tusambilila ukuti Yesu alishiba fyonse ificitika mu filonganino umwaba abantu bakwe. (Ukus. 1:12-16, 20; 2:1) Amashiwi Yesu atumine ku filonganino 7 ifya mu Asia Minor e yalangilila ukuti alishiba ificitika mu filonganino. Mu mashiwi atumine, alyebele abali muli filya filonganino ifyo balingile ukucita pa kuti Yehova alepokelela ukupepa kwabo. Kabili ifyo alandile fyalikuma na bantu ba kwa Lesa muno nshiku. Finshi twingasambililako? Kristu Yesu intungulushi yesu aleshiba ifyo bucibusa bwesu na Yehova buli. Yesu alatutungulula no kutucingilila kabili alamona fyonse ificitika. Aleshiba ifyo tulekabila ukucita pa kuti tutwalilile ukuba ifibusa fya kwa Yehova. Finshi alandile ifyo tufwile ukukonka muno nshiku?

6. (a) Ukulingana na Ukusokolola 2:3, 4, bushe Yesu atile bwafya nshi aba mu cilonganino ca mu Efese bakwete? (b) Finshi tulesamblilako?

⁶ Belengeni Ukusokolola 2:3, 4. Tatufwile ukuleka ukutemwa Yehova nge fyo twamutemenwe pa kutendeka. Amashiwi Yesu alembeele aba mu cilonganino ca mu Efese, yalelangilila ukuti baleshipikisha amafya bakwete kabili baletwalilila ukutemwa Yehova temulandu na mafya. Na lyo line, balilekele ukutemwa Yehova nga filya bamutemenwe pa kutendeka. E ico balingile ukutemwa Yehova nga fintu bamutemenwe pa kutendeka pa kuti alepokelela ukupepa kwabo. Na muno nshiku mwine tatulingile ukupelela fye pa kushipikisha amafya, lelo tulingile ukwishiba no mulandu tuleshipikishisha ayo amafya. Lesa wesu tabika fye amano ku fyo tulecita lelo alabika na mano ku mulandu tulecitila ifyo fintu. Yehova alibika amano ku mulandu tumubombela pantu enekela ifwe ukulamupepa pa mulandu wa kuti twalimutemwa kabili tulatasha pali fyonse ifyo atucitila.—Amapi. 16:2; Marko 12:29, 30.

7. (a) Ukulingana na Ukusokolola 3:1-3, bwafya nshi ubo Yesu amwene ubo abali mu cilonganino ca mu Sarde bakwete? (b) Finshi tulingile ukucita?

⁷ Belengeni Ukusokolola 3:1-3. Tufwile ukutwalilila ukuba abalola. Abali mu cilonganino ca mu Sarde bena ubwafya bakwete bwalipuseneko. Nangu ca kuti ku numa balebombesha, balilekele ukucita ifyo. E co Yesu abebele ukuti ‘shibukeni.’ Finshi  tulesambililako? Ca cine ukuti Yehova takalabe imilimo yesu. (Heb. 6:10) Na lyo line, tatufwile ukutontonkanya ukuti apo twalebombela Yehova ku numa pali ino nshita tatulingile ukulabombesha. Nangu ca kuti pali ino nshita kwaliba ifingi ifitulenga ukukanalabombesha nge fyo twalebomba kale, tulingile ukutwalilila ukulabombesha “mu mulimo wa kwa Shikulu” no kutwalilila abalola mpaka na ku mpela.—1 Kor. 15:58; Mat. 24:13; Marko 13:33.

8. Finshi tusambilila ku mashiwi ayo balembeele aba bwananyina mu Laodikea ayaba pa Ukusokolola 3:15-17?

⁸ Belengeni Ukusokolola 3:15-17. Tulingile ukulabombesha no kulabomba no mweo onse umulimo wa kwa Lesa. Amashiwi Yesu alandile ku ba mu cilonganino ca mu Laodikea, yalangilila ukuti nabo balikwete ubwafya. Bali aba “cifulefule” ilyo balepepa Yehova. Pa mulandu ne fyo bali, Yesu abebele ukuti bali ‘inkumbabulili kabili abalanda.’ Balekabila ukuba abacincila mu mulimo wa kwa Lesa. (Ukus. 3:19) Finshi twingasambililako? Nga ca kuti natuleka ukuba abacincila, tufwile ukulatasha pali fyonse ifyo Yehova e lyo ne cilonganino cakwe batupeela. (Ukus. 3:18) Tatufwile ukulafwaisha ukwikala bwino ica kuti twalamona kwati ukupepa Yehova takwacindama kuli ifwe.

9. Nga fintu amashiwi Yesu alandile ku Bena Kristu ba mu Pergamo e lyo na mu Tuatira yalangilila, finshi ifyo tulingile ukucenjelako?

⁹ Tatulingile ukulakutika ku fyo abasangu basambilisha. Yesu alikalipile abali mu cilonganino ca mu Pergamo pantu baleleta amalekano e lyo balepanga no tumabumba. (Ukus. 2:14-16) Alitashishe sana abali mu cilonganino ca mu Tuatira abakeene “ifyashika ifya kwa Satana,” kabili abakoseleshe “ukwikatisha” icine. (Ukus. 2:24-26) Abena Kristu abanaka abatendeke ukukonka ifisambilisho fya bufi balekabila ukulapila. Nga ifwe muno nshiku cinshi tufwile ukucita? Tatufwile ukusumina ifisambilisho ifili fyonse ifishumfwana ne fyo Lesa alanda. Abasangu “bamoneka kwati ni bakapepa” lelo ‘balikaana amaka ya bukapepa.’ (2 Tim. 3:5) Cilanguka ukwishiba e lyo no kukaana ifisambilisho fya bufi nga ca kuti tulaisambilisha Baibolo.—2 Tim. 3:14-17; Yuda 3, 4.

10. Finshi fimbi twingasambilila ku fyo Yesu alandile ku filonganino fya mu Pergamo na mu Tuatira?

¹⁰ Tufwile ukukaana kabili tatulingile ukutekelesha imisango yonse iya bulalelale. Aba bwananyina mu Pergamo e lyo na mu Tuatira  balikwete ubwafya na bumbi. Yesu alikalipile bamo muli ifi ifilonganino abafililwe ukukaana ubulalelale. (Ukus. 2:14, 20) Finshi twingasambililako? Yehova te kuti atekeleshe bulalelale, nangu ca kuti twalimubombela pa myaka iingi kabili pali ino nshita tulebomba ne milimo iingi iyaibela. (1 Sam. 15:22; 1 Pet. 2:16) Enekela ifwe ukuba ne mibele iisuma iyo afwaya temulandu no kuti imibele yabipa ilebipilako fye muli cino calo.—Efes. 6:11-13.

11. Finshi twasambilila? (moneni na kabokoshi akaleti “ Ifyo Tusambililako Muno Nshiku.”)

¹¹ Bushe kuti twasupula shani ifyo twasambilila ukufika pano? Natusambilila ukutila tulingile ukushininkisha ukuti tulepepa Yehova ukulingana ne fyo afwaya. Nga ca kutila tulecita ifintu ifingalenga Lesa alakaana ukupokelela ukupepa kwesu, tulingile ukwaluka nomba line. (Ukus. 2:5, 16; 3:3, 16) Yesu na kabili alilandilepo pa fintu na fimbi mu mashiwi alembeele ifilonganino. Finshi ifyo fine alandile?

12. Finshi twingasambilila ku mashiwi Yesu aebele aba bwananyina ba mu Smurna e lyo na mu Filadelfia?

¹² Lekeni nomba tulande pa mashiwi Yesu aebele aba mu cilonganino ca mu Smurna e lyo na mu Filadelfia. Aebele Abena Kristu aba muli ifi filonganino ukuti tabalingile ukulatiina ukubacusha pantu Yehova ali no kubalambula nga batwalilila aba cishinka. (Belengeni Ukusokolola 2:10; 3:10) Cinshi twingasambililako ku fyo Yesu abebele? Tulesambililako ukuti tufwile ukwenekela ukuti abantu bakulatucusha kabili tufwile ukuitemenwa ukushipikisha ilyo baletucusha. (Mat. 24:9, 13; 2 Kor. 12:10) Mulandu nshi tulingile ukulaibukishisha ifi?

13-14. Finshi fyacitikila abantu ba kwa Lesa pa mulandu ne fyacitika ifyalembwa mwi buuku lya Ukusokolola icipandwa 12?

¹³ Ibuuku lya Ukusokolola litweba ukuti abantu ba kwa Lesa bakalabacusha muno nshiku e kutila, mu “bushiku bwa kwa Shikulu.” Mu Ukusokolola icipandwa 12 tubelenga ukuti mu muulu mwabukile ubulwi ilyo Yesu atendeke ukuteka. Mikaele, e kutila Yesu Kristu ilyo abwelelemo ku muulu, na bamalaika bakwe balwile na Satana ne fibanda fyakwe. (Ukus. 12:7, 8) Abalwani ba kwa Lesa balibacimfishe kabili babapoosele pano isonde apo balenga abantu abengi ukulacula. (Ukus. 12:9, 12) Ifi abalwani ba kwa Lesa babapoosele pano isonde, cinshi cacitikila abantu ba kwa Lesa?

¹⁴ Ibuuku lya Ukusokolola, lilatweba ne fyo Satana acitile ilyo bamupoosele pano isonde. Apo te kuti abwelelemo ku muulu, pali ino nshita alasansa ababomfi ba kwa Yehova  abasubwa abacili pe sonde. Aba bemininako Ubufumu bwa kwa Lesa kabili ‘balikwata umulimo wa kushimikila pali Yesu.’ (Ukus. 12:17; 2 Kor. 5:20; Efes. 6:19, 20) Bushe ubu ubusesemo bwafikilishiwa shani?

15. Ni bani bemininako ‘inte shibili’ ishalembwa mu Ukusokolola icipandwa 11, kabili finshi fyabacitikile?

¹⁵ Satana alengele abalwani ba kwa Lesa ukusansa bamunyinefwe abasubwa abaletungulula umulimo wa kubila imbila nsuma. Aba baume baleimininako “inte . . . shibili” isho balandapo mwi buuku lya Ukusokolola ukuti balishipeye. * (Ukus. 11:3, 7-11) Mu 1918 bamunyinefwe 8 abaletungulula umulimo wa kubila imbila nsuma balibekete no kubapeela imilandu ya bufi kabili babapingwile ukwikala mu cifungo imyaka iingi. Abantu abengi batontonkenye ukuti apo aba abasubwa balibakakile, umulimo balebomba walipwile.

16. Finshi ifya kupapusha ifyacitike mu 1919, lelo finshi Satana atwalilila ukucita?

¹⁶ Ubusesemo bwaba mu Ukusokolola icipandwa 11 bwalandile no kuti “inte . . . shibili” shali no kuba no bumi na kabili pa numa ya nshita inono. No mwaka tawapwile ukutula apo aba babwananyina babakakile, kwali ica kupapusha icacitike. Mu March mu 1919, aba bamunyinefwe abasubwa bali bafumishe mu cifungo kabili ne milandu babapeele yalipwile. Ilyo babafumishe tabaikete na ku cani balitendeke ukubomba umulimo wa kubila imbila nsuma e lyo no kusambilisha abantu. Na lyo line Satana talekele ukusansa abantu ba kwa Lesa. Ukufuma ilya nshita alaleta amafya ayaba kwati “mumana” pa bantu ba kwa Lesa. (Ukus. 12:15) Kanshi ifwe bonse tulekabila ‘ukulashipikisha no kuba ne citetekelo.’—Ukus. 13:10.

17. Bushe abantu ba kwa Lesa babafwa shani ku bantu abo bashile-enekela nangu ca kuti Satana alabasansa?

¹⁷ Ukusokolola icipandwa 12 kulangilila ukuti abantu abo bashale-enekela bali no kwafwa abantu ba kwa Lesa. Nga ca kuti abantu abo bashile-enekela ba-afwa abantu ba kwa Lesa abo balecusha, ciba kwati “isonde” lyamina “umumana.” (Ukus. 12:16) Ifi fine e fyacitika. Inshita shimo, abantu bamo aba muli ici calo icitungululwa na Satana pamo nga aba mu filye balafwa abantu ba  kwa Lesa. Imiku iingi ababomfi ba kwa Yehova balacimfya imilandu mu cilye kabili balakwatako ubuntungwa bwa kupepa. Bushe babomfya shani ubuntungwa bakwata? Balabomfya bwino iyi nshita ku kubomba umulimo uo Yehova abapeela. (1 Kor. 16:9) Finshi fyaba mu mulimo uo babomba?

18. Mulimo nshi uukalamba uo tubomba muli shino nshiku sha kulekelesha?

¹⁸ Yesu asobele ukuti abantu bakwe bakabila ‘imbila nsuma iya bufumu’ mwi sonde lyonse ilyo impela ishilaisa. (Mat. 24:14) Nga baleshimikila, malaika nelyo ibumba lya bamalaika balabatungilila. Baibolo ibalondolola ukuti ‘baliba ne mbila nsuma ya muyayaya iya kubila ku baikala pe sonde, na ku nko shonse na ku mitundu yonse na ku ba ndimi shonse na ku bantu bonse.’—Ukus. 14:6.

19. Ni mbila nshi na imbi iyo abantu abatemwa Yehova bafwile ukubila?

¹⁹ Imbila nsuma ya bufumu te mbila fye yeka iyo abantu ba kwa Lesa babila. Balatungilila no mulimo uo bamalaika babomba uo balandapo mwi buuku lya Ukusokolola icipandwa 8 ukufika ku 10. Aba bamalaika balabilisha ifyabipa ifili no kucitikila bonse abakaana Ubufumu bwa kwa Lesa. Inte sha kwa Yehova balabila imbila ya bupingushi iyaba kwati ni “mfula ya mabwe no mulilo” ilyo balelondolola ifyo Lesa akonaula icalo ca kwa Satana icabipa. (Ukus. 8:7, 13) Abantu balingile ukwishiba ukuti impela naipalama pa kuti baaluke na pa kuti bakapusuke ubukali bwa kwa Yehova. (Sefa. 2:2, 3) Lelo abantu tabatemwa imbila tubila e ico pa kubila iyi mbila tufwile ukushipa. Mu bucushi bukalamba imbila ya bupingushi iyo tukalabila ikacila napo ukufulwisha abantu.—Ukus. 16:21.

20. Finshi tukasambilila mu fipande fibili ifikonkelepo?

²⁰ Tulingile ukukonka “amashiwi ya muli uku ukusesema” ayaba mu Ukusokolola pantu yalitukuma. (Ukus. 1:3) Nomba kuti twacita shani pa kuti tutwalilile ukuba aba cishinka ilyo baletukanya e lyo no kutwalilila abashipa ilyo tulebila iyi mbila? Ifintu fibili e fingatukosha. Ica kubalilapo kuti twakoseleshiwa nga twatontonkanya pa fyo ibuuku lya Ukusokolola lilondolola ukuti e fikacitikila abalwani ba kwa Lesa. E lyo icalenga bubili kuti twakoseleshiwa nga twatontonkanya pa mapaalo tukapokelela nga twatwalilila ukuba aba cishinka. Tukasambilila pali ifi fibili mu fipande fibili ifikonkelepo.