ICIPANDE CA KUSAMBILILAMO 23
Mwe Bafyashi, Muleafwa Abana Benu Ukutemwa Yehova
“Uletemwa Yehova Lesa obe no mutima obe onse, no mweo obe onse, no kutontonkanya kobe konse.”—MAT. 22:37.
ULWIMBO 134 Abana Bupe Lesa Aseekesha Abafyashi
IFYO TWALASAMBILILA *
1-2. Londololeni ifyo amashinte ya mafunde ya mu Baibolo yamo yengacindama sana kuli ifwe nga ca kuti ifintu fya-aluka mu bumi.
PA BUSHIKU bwa bwinga, shibwinga na nabwinga wakwe balakutikisha ilyo eluda alelanda ilyashi lya Baibolo ililanda pa cupo. Amalembo ayo balandapo mu lyashi lya bwinga, baliyeshiba kale. Nomba ukufuma bulya bushiku, yalya Malembo yalacindama sana kuli bena. Mulandu nshi? Pantu apo nomba nabopana bakulabomfya sana aya Malembo.
2 Ifi fine e fyo ciba na ku Bena Kristu abaupana nga batendeka ukukwata abana. Pa myaka iingi bafwile balyumfwa amalyashi ayengi ayalanda pa fya kukusha abana. Nomba nga batendeka ukukwata abana, amalyashi ayalanda pa fya kukusha abana yalacindama sana kuli bena pantu nomba ninshi nabaikwatila abana aba kukusha. Ala uyu ulaba mulimo uukalamba! Kanshi Amalembo yamo aya mu Baibolo yalacindama sana kuli ifwe nga ca kuti ifintu fya-aluka mu bumi. E mulandu wine ababomfi ba kwa Yehova babelengela Amalembo no kulatontonkanyapo “inshiku shonse” ilyo bali no mweo, nga filya fine imfumu shaleteka abena Israele bashebele ukulacita.—Amala. 17:19.
3. Finshi twalasambilila muli cino cipande?
3 Mwe bafyashi, mwalikwata ishuko ilikalamba ilya kusambilisha abana benu pali Yehova. Nomba tamulingile ukweba fye abana benu ifishinka fimo pali Lesa. Lelo mufwile no kubasambilisha ukutemwa sana Yehova. Finshi mwingacita pa kuti musambilishe abana benu ukutemwa Yehova? Muli cino cipande, twalalanda pa mashinte ya mafunde ya mu Baibolo 4 ayengafwa mwe bafyashi ukusambilisha abana benu. (2 Tim. 3:16) Twalasambilila ne fyo abafyashi bamo banonkelamo mu kukonka ukufunda kwaba mu Baibolo.
AMASHINTE 4 AYENGAFWA ABAFYASHI
Bushe ukulomba ukuti Yehova alemutungulula e lyo no kuba ne mibele iisuma kuti kwa-afwa shani abana benu? (Moneni amaparagrafu 4 na 8)
4. Lishinte nshi limo ilya mu Baibolo ilingafwa abafyashi ukusambilisha abana babo ukutemwa Yehova? (Yakobo 1:5)
4 Ishinte 1: Mulelomba ukuti Yehova alemutungulula. Mulelomba Yehova ukuti amupeele amano pa kuti musambilishe abana benu ukutemwa Yehova. (Belengeni Yakobo 1:5.) Ewingamupanda fye amano pa fya kukusha bwino abana. Kwaliba imilandu iingi iyo twalandila ifi. Nomba twalalandako fye pali ibili. Umulandu wa kubalilapo wa kuti apo Yehova na o mufyashi, alishiba bwino sana ifya kukusha bwino abana. (Amalu. 36:9) Umulandu walenga bubili wa kuti mu fyo atupandako amano mulafuma ifisuma.—Esa. 48:17.
5. (a) Finshi icilonganino ca kwa Yehova catupekanishisha ifingafwa abafyashi ukukusha bwino abana? (b) Nga fintu mwatambile muli video, finshi mwasambilile ku fyo munyinefwe na nkashi Amorim bakushishe abana babo?
5 Yehova alabomfya Icebo cakwe e lyo ne cilonganino, ukupeela abafyashi ifyebo ifingi ifingabafwa ukusambilisha abana babo ukutemwa Yehova. (Mat. 24:45) Ku ca kumwenako, kuti mwasanga ifyebo ifingi mu fipande ifyaleti “Ifingafwa Indupwa,” ifyalefuma muli Loleni! pa myaka iingi nomba pali ino nshita ifi fipande fyaba pa Intaneti. Na kabili pa jw.org paliba amavidio ayengi umwaba ukulanshanya nelyo ayo ba-angala nge fyangalo ayalanda pa fya kukusha abana, ayengafwa abafyashi ukukonka ukufunda kwa kwa Yehova pa fyo balingile ukukusha abana. *—Amapi. 2:4-6.
6. Bushe umufyashi umo e lyo no mwina mwakwe, bomfwa shani pa fyo Yehova atupekanishisha ifitwafwa ukukusha bwino abana?
6 Abafyashi abengi balatasha pa fyo Yehova atupeela ukupitila mu cilonganino cakwe, ifibafwa ukukusha bwino abana. Ba Joe abafyashi batile: “Taca-anguka ukusambilisha bana batatu ukutemwa Yehova. Ine na bena mwandi lyonse tulapepa kuli Yehova pa kuti aletwafwa ukukusha bwino abana. Ilingi tusanga ukuti ifyebo fimo ifiba mu mpapulo nelyo mu mavidio, fiisa fye pa nshita tulefikabila. Twashintilila pali Yehova ukuti aletutungulula.” Ba Joe na bena mwabo basanga ukuti amalyashi ayaba mu mpapulo e lyo na mavidio, yalalenga abana babo balepalama sana kuli Yehova.
7. Mulandu nshi abafyashi balingile ukubikila amano ku fyo bacita? (Abena Roma 2:21)
7 Ishinte 2: Mulecita ifingalenga abana balemupashanya. Abana balamona ifyo abafyashi bacita kabili ilingi balabapashanya. Ukulanda fye icishinka, takwaba umufyashi uwapwililika. (Rom. 3:23) Na lyo line abafyashi bafwile ukulabombesha ukulacita ifisuma pa kuti abana balebapashanya. (Belengeni Abena Roma 2:21.) Umufyashi umo atile: “Abana baba kwati butonge, ubonka ifili fyonse ifyo mwabubikamo.” Alandile no kuti: “Balatwebelapo nga ca kuti ifyo tulecita, filepusana ne fyo tulebasambilisha.” Kanshi nga tulefwaya ukusambilisha abana ukutemwa Yehova, fwe bafyashi tufwile ukubalilapo ukumutemwa kabili abana bafwile ukumona ukuti twalitemwa Yehova.
8-9. Finshi mwasambilila ku fyo munyinefwe Andrew e lyo na bankashi Emma balandile?
8 Abafyashi kuti basambilisha abana babo ukutemwa Yehova mu nshila ishalekanalekana. Munyinefwe Andrew uuli ne myaka 17 atile: “Abafyashi lyonse baletweba umulandu cacindamina ukupepa. Lyonse icungulo bushiku, batata balepepela pamo na ine nangu ca kuti nimpepa kale. Abafyashi besu lyonse baletweba ati: ‘Kuti twalanda na Yehova inshita iili yonse.’ Ici calilenga ndemona ukuti ukupepa kwalicindama icine cine, kabili pali ino nshita tacinkosela ukupepa kuli Yehova no kumumona ukuti ni Shifwe uwatutemwa.” Mwe bafyashi muleibukisha ukuti ifyo mwatemwa Yehova kuti fyalenga na bana benu nabo ukumutemwa.
9 Tontonkanyeni pa fyacitikile ba Emma. Ilyo bawishi bashiile ulupwa lwabo, balishile banyina mu nkongole ishingi. Ba Emma batile: “Kwaleba inshita shimo ilyo bamayo bashalekwata indalama, lelo lyonse balelanda pa fyo Yehova asakamana ababomfi bakwe. Ifyo bamayo balecita fyalengele nashininkisha ukuti balicetekele ukuti Yehova alasakamana ababomfi bakwe. Bamayo balecita ifyo balelanda.” Finshi twingasambililako? Abafyashi kuti basambilisha abana babo ukupitila mu fyo bacita na lintu bali na mafya.—Gal. 6:9.
10. Ni lilali abafyashi abena Israele balelanshanya na bana babo pali Yehova? (Amalango 6:6, 7)
10 Ishinte 3: Mulelanda na bana lyonse. Yehova aebele abafyashi abena Israele ukulasambilisha abana lyonse pali ena. (Belengeni Amalango 6:6, 7.) Abafyashi abena Israele balikwete utushita utwalekanalekana uto balebomfya ukusambilishishamo abana babo ukutemwa Yehova. Ku ca kumwenako, umwana umulumendo umwina Israele kuti alebomba mu mabala na bawishi, balebyala nelyo balesombola. Nkashi yakwe na o alebombela pamo na banyina inshita iikalamba. Alebafwa ukubila, ukupikula, e lyo ne milimo imbi iya pa ng’anda. Ilyo abafyashi balebombela pamo na bana, balelanda pa malyashi ayengi ayalekanalekana. Ku ca kumwenako, nalimo balelanda pa mibele iisuma iya kwa Yehova ne fyo Yehova aleafwa ulupwa lwabo.
11. Ni lilali abafyashi Abena Kristu bengalalanshanya na bana babo?
11 Pali ino nshita ifintu tafyaba nge fyo fyali kale. Mu fyalo ifingi, abafyashi na bana tabakwata sana inshita ya kuba pamo. Abafyashi kuti nalimo bali ku ncito, lyena abana nabo bali ku sukulu. Kanshi abafyashi bafwile ukusangako inshita ilyo bengalanshanya na bana babo. (Efes. 5:15, 16; Fil. 1:10) Pa mapepo ya lupwa e nshita mwingalalanshanya na bana. Munyinefwe umwaice Alexander atile: “Batata lyonse balapekanya pa kuti tukwate amapepo ya lupwa. Kabili tabaleka icili conse capumfyanya ifyo batantike. Nga twapwisha ukusambilila, tulatendeka ukwisha.”
12. Finshi umutwe wa lupwa afwile ukulaibukisha ilyo bali pa mapepo ya lupwa?
12 Nga ca kuti muli mutwe wa lupwa, finshi mwingacita pa kuti abana benu baletemwa ukukwata amapepo ya lupwa? Kuti mulesambilila na bana benu mu citabo icipya icitila Kuti Mwaba ne Nsansa Umuyayaya! Ici citabo kuti calenga mulelanshanya bwino na bana. Apo mufwaya abana benu ukulamweba ifyo baleumfwa ne filebasakamika, kanshi tamufwile ukubomfya inshita ya mapepo ya lupwa ku kubalengulula nelyo ukubakalipila. Mwilafulwa nga ca kuti ilyo mulelanshanya abana benu balanda ifyapusana ne fyo Baibolo isambilisha. Muletasha nga ca kuti abana bamweba ifyo baletontonkanya. Nga ca kuti tamulefulwa nga bamweba, cikalenga abana belatiina ukumweba ifyo baletontonkanya. Kuti mwa-afwa bwino abana nga ca kuti namwishiba ifilebacitikila.
Bushe abafyashi kuti basambilisha shani abana pa mibele ya kwa Yehova ukubomfya ifyo abumba? (Moneni paragrafu 13)
13. Ni nshita nshi imbi iyo abafyashi bengasambilisha abana babo ukupalama sana kuli Yehova?
13 Mwe bafyashi mulebomfya inshita yonse iyo mwashukila ilyo muli pamo na bana benu, ukubasambilisha ukutemwa Yehova. Tamufwile ukulolela fye ubushiku ubo mwatantika ubo musambilila nabo Baibolo, ukuti mubasambilishe pali Lesa wesu uwatutemwa. Umfweni ifyo ba Lisa abafyashi balandile, batile: “Twalesambilisha abana besu ukutemwa Yehova ukubomfya ifyo abumba. Ku ca kumwenako, imbwa yesu nga yacita ifintu ifyalenga abana baseka, twalebeba ukuti ifi filelangilila fye ukuti Yehova ni Lesa wa nsansa kabili afwaya na ifwe tuleba ne nsansa.”
Mwe bafyashi, bushe mwalishiba ifibusa fya bana benu? (Moneni paragrafu 14) *
14. Mulandu nshi cacindamina ukuti abafyashi baleafwa abana babo ukusala bwino ifibusa? (Amapinda 13:20)
14 Ishinte 4: Muleafwa abana benu ukusala ifibusa ifisuma. Icebo ca kwa Lesa calilanda ukwabula ukupita mu mbali ukuti ifibusa kuti fyalenga twalacita ifintu ifisuma nelyo ifyabipa. (Belengeni Amapinda 13:20.) Mwe bafyashi, bushe mwalishiba ifibusa fya bana benu? Bushe mwalimonanapo nabo no kwisha nabo? Finshi mwingacita pa kwafwa abana benu ukukwata ifibusa abatemwa Yehova? (1 Kor. 15:33) Kuti mwa-afwa abana benu ukusala ifibusa ifisuma nga muleitako aba bwananyina abatemwa Yehova pa kuti mucitile ifintu pamo.—Amalu. 119:63.
15. Finshi abafyashi bengacita pa kwafwa abana babo ukukwata ifibusa ifisuma?
15 Natulande pali ba Tony. Balondolwele ifyo bena na bena mwabo bacita pa kuti baafwe abana babo ukukwata ifibusa ifisuma, batile: “Pa myaka iingi ine na bena mwandi tuletako aba bwananyina abapusanapusana ku ng’anda, abaice e lyo na bakalamba. Nga baisa tulaliila pamo ica kulya kabili tulakwatila pamo amapepo ya lupwa. Ifi tucita fyalilenga twaishiba bwino aba bwananyina abatemwa Yehova kabili abamubombela ne nsansa. Ilingi mu ng’anda mu mwesu tulapokelela ba kangalila ba muputule, bamishonari, e lyo na ba bwananyina bambi. Abana besu balisambililako ifingi kuli aba bwananyina ku fyo bashimika, ku fyo baabombela Yehova, na ku fyo babombesha mu mulimo wakwe. Ifi fyonse fyalilenga abana besu bapalama kuli Yehova.” Mwe bafyashi, mule-esha na maka ukwafwa abana benu ukukwata ifibusa ifisuma.
TE KWESHA UKUNENUKA!
16. Bushe kuti mwacita shani nga ca kuti umwana wenu amweba ukuti talefwaya ukulabombela Yehova?
16 Kuti mwacita shani nga ca kuti mwabombesha ukusambilisha abana benu, e lyo umo pa bana benu atila talefwaya ukubombela Yehova? Mwilatontonkanya ukuti namufilwa ukumusambilisha. Yehova alipeela fwe bantu bonse, ukubikako fye no mwana wenu, insambu sha kuisalila nampo nga kubombela Lesa nelyo iyo. Nga ca kuti umwana wenu asalapo ukusha Yehova, tamufwile ukunenuka. Mulesubila ukuti bushiku bumo kuti abwela. Muleibukisha icilangililo ca mwana uwapondweke. (Luka 15:11-19, 22-24) Ulya mwana alicitile ifintu ifingi ifyabipa, nomba ilyo alapile, alibwelele kuli wishi. Lelo bamo kuti batila, “ici cilangililo fye ico Yesu aleshimika. Bushe umwana wandi kuti abwela kuli Yehova?” Ee kuti abwela. Na kuba ifi fine e fyacitikile ba Elie.
17. Bushe ifyacitikile ba Elie fyamukoselesha shani?
17 Ba Elie batile: “Abafyashi bandi balyeseshe na maka ukunsambilisha ukutemwa Yehova ne Cebo cakwe, Baibolo. Lelo ilyo naishileba umulumendo, naishilesanguka cintomfwa.” Ba Elie baishiletendeka ukulacita ifintu ifyabipa mu bumfisolo, abafyashi babo balibafwile pa kuti bapalame sana kuli Yehova. Na lyo line ba Elie tabaumfwile. Ilyo bafumine pa ng’anda, balitendeke ukucita ifyabipa. Nangu balecita ifyabipa, inshita shimo balelanshanya no munabo pa fya mu Baibolo. Ba Elie batile: “Icalecitika ca kuti, nga nashimikilako umunandi pa fya kwa Lesa, e lyo naletontonkanya sana pali Yehova. Panono panono, icine ca mu Baibolo ico abafyashi bandi bamfundile, calitendeke ukukula na kabili.” Pa numa, ba Elie balibwelele kuli Yehova. * Elenganyeni ifyo abafyashi babo baumfwile bwino ilyo baishibe ukuti balibombeshe ukusambilisha ba Elie ukutemwa Yehova ilyo bali fye abaice!—2 Tim. 3:14, 15.
18. Bushe mumfwa shani pa bafyashi ababombesha ukusambilisha abana ukutemwa Yehova?
18 Mwe bafyashi, Yehova alimupeela umulimo uusuma uwa kukusha inkulo imbi iya bakapepa ba kwa Yehova, e kutila abana benu. (Amalu. 78:4-6) Ala uyu mulimo tawayanguka! Kanshi tulemutasha icine cine pa fyo mubombesha ukusambilisha abana benu. Nga ca kuti mwatwalilila ukusambilisha abana benu ukulatemwa Yehova, no kubakusha ukulingana no kusalapula kwakwe, Shifwe wa ku muulu Yehova uwatutemwa akalasekelela.—Efes. 6:4.
ULWIMBO 135 Yehova Aleti: “We Mwana Wandi, Ube na Mano”
^ para. 5 Abafyashi Abena Kristu balitemwa abana babo icine cine. Balabombesha pa kuti balepeela abana babo fyonse ifyo bakabila e lyo na pa kuti baleba ne nsansa. Ne cacilapo ukucindama ca kuti balasambilisha abana babo ukutemwa sana Yehova. Muli cino cipande twalasambilila pa mashinte 4 aya mu Baibolo ayengafwa abafyashi ukusambilisha abana babo ukutemwa Yehova.
^ para. 5 Tambeni vidio pa jw.org iitila Yehova Alitusambilishe Ifya Kukusha Abana Besu.
^ para. 17 Moneni icipande citila “Baibolo Ilaalula Abantu” icaba mu Ulupungu lwa kwa Kalinda ulwa April 1, 2012.
^ para. 57 UBULONDOLOSHI BWA CIKOPE: Pa kuti umufyashi eshibe bwino cibusa wa mwana wakwe, ena, umwana wakwe e lyo na cibusa wa mwana wakwe balete-ela pamo basketball.
