1-2. (a) Bushe amabuteko yamo yakaanya shani ababomfi ba kwa Lesa ukulapepa Yehova, nomba finshi abantu ba kwa Yehova bacita nga babakaanya? (b) Kuti twaba shani ne nsansa nangu ca kuti baletucusha? (Moneni icikope cili pa nkupo.)

 PALI ino nshita mu fyalo ukucila 30 mwi sonde lyonse, balibinda umulimo wesu. Mu fyalo fimo umo babinda umulimo wesu, abalashi balikaka bamunyinefwe na bankashi. Finshi balufyanya pa kuti babakake? Tapaba ifyo balufyanya, Kabili ifyo fine e fyo na Yehova amona. Ifyo aba aba bwananyina bacita kuisambilisha Baibolo, ukwebako abantu ifyo basuminamo, e lyo no kulalongana pamo. Na kabili tabaitumpa mu fya calo. Te mulandu ne fyo babacusha, aba ababomfi ba kwa Lesa balitwalilila ukuba aba cishinka kuli Yehova. Kabili ukuba aba cishinka kuli Yehova kulalenga baleba ne nsansa.

² Nalimo mwalimonapo ifikope apaba aba bamunyinefwe na bankashi abashipa, ninshi balemwentula. Baliba ne nsansa pantu balishiba ukuti Yehova alasekelela pa fyo batwalilila ukuba aba cishinka kuli ena. (1 Imila. 29:17a) Yesu atile: “Balipaalwa abo bacusha pa mulandu wa bulungami,  . . . sekeleleni no kwanga, pantu icilambu cenu cikalamba.”—Mat. 5:10-12.

3. Ukulingana na Imilimo 4:19, 20, bushe abatumwa mu cilonganino ca kubalilapo bacitile shani ilyo balebacusha, kabili mulandu nshi bacitile ifyo?

³ Bamunyinefwe na bankashi baleshipikisha amafya, ayo abatumwa mu cilonganino ca kubalilapo bashipikisheko ilyo balebacusha pa mulandu wa kubila pali Yesu. Pa  miku iingi, bakapingula ba mu cilye cikalamba ica baYuda, ‘balebakonkomesha ukukanalandila nelyo fye ukusambilishisha mwi shina lya kwa Yesu.’ (Imil. 4:18; 5:27, 28, 40) Bushe abatumwa bacitile shani? (Belengeni Imilimo 4:19, 20.) Balishibe ukuti kwali uwakwete amaka ukucila aba bakapingula, ‘uwabebele ukushimikila abantu no kushimikisha ubunte’ pali Kristu. (Imil. 10:42) E mulandu wine Petro na Yohane abalelandilako Abena Kristu, bashipiile ilyo balandile ukuti bali no kunakila Lesa ukucila ukunakila balya bakapingula abalebalesha ukubila pali Yesu. Cali kwati baleipusha balya bakapingula ukuti: ‘Bushe muleti tufwile ukunakila imwe ukucila ukunakila Lesa?’

4. Nga fintu tubelenga pa Imilimo 5:27-29, cinshi abatumwa bacitile, kabili kuti twabapashanya shani?

⁴ Ifyo abatumwa bacitile, e fyo na Bena Kristu bacita muno nshiku, e kutila “ukunakila Lesa ukucila ukunakila abantu.” (Belengeni Imilimo 5:27-29.) Ilyo abatumwa babomine pa mulandu wa kuti bali aba cishinka, bafumine pa ntanshi ya cilye cikalamba ica baYuda, “balesekelela pantu basangilwe abawamina ukuculila [Yesu],” kabili balitwalilile ukubila imbila nsuma.—Imil. 5:40-42.

5. Fipusho nshi tufwile ukutontonkanyapo?

⁵ Ifyo abatumwa bacitile filalenga twalatontonkanya pa mepusho yamo. Ku ca kumwenako, bushe filya abatumwa basalilepo ukunakila Lesa ukucila ukunakila abantu, fya-ampana shani ne funde lya mu Baibolo ilitila “umuntu onse alenakila ubuteko”? (Rom. 13:1) Bushe kuti twatwalilila shani ukulaumfwila ubuteko na balashi nga filya umutumwa Paulo alandile, e lyo pa nshita imo ine twatwalila ukuba aba cishinka kuli Lesa Kateka wapulamo?—Tito 3:1.

6. (a) Bushe ishiwi lya kuti “ubuteko” ilyo balandapo pa Abena Roma 13:1, lilosha kuli bani, kabili tufwile ukulabamona shani? (b) Cinshi twaishiba pa maka ayo bakateka abantunse bakwata?

⁶ Belengeni Abena Roma 13:1. Pali ici  cikomo, ishiwi ya kuti “ubuteko” lilosha kuli bakateka abantunse abakwata amaka ya kuteka abantu. Abena Kristu balingile ukulanakila ubuteko. Pantu ubuteko bulashininkisha ukuti mu calo mwaba umutende, bulapanga na mafunde ayo abantu bafwile ukulakonka, kabili inshita shimo bulacingilila na bantu ba kwa Lesa. (Ukus. 12:16) E ico tufwile ukulabapeela imisonko, ukulababela akatiina, e lyo no kulabacindika. (Rom. 13:7) Na lyo line, amaka amabuteko yakwata, ni pa mulandu wa kuti Yehova aliyasuminisha. Yesu alilengele ici cishinka caumfwika ilyo aaswike ifyo umulashi Ponti Pilato alemwipusha. Ilyo Pilato atile alikwete amaka ya kuti Yesu bamwipaye nelyo ukulesha ukumwipaya, Yesu amwaswike ukuti: “Tamwingaba na maka nangu yamo pali ine kano yapeelwa kuli imwe ukufuma ku muulu.” (Yoh. 19:11) Kanshi amaka amabuteko yakwata pali ino nshita, tayacila amaka ya kwa Lesa, nga filya fine cali kuli Pilato.

7. Ni lilali tushifwile ukumfwila bakateka abantunse, kabili cinshi aba bakateka bafwile ukulaibukisha?

⁷ Abena Kristu balomfwila amafunde ayo amabuteko ya bantunse yapanga, ayashipusana na mafunde ya kwa Lesa. Na lyo line, te kuti tumfwile bakateka abantunse nga batweba ukucita fimo ifyo Lesa alesha, nelyo nga batulesha ukucita fimo ifyo Lesa afwaya ukuti tulecita. Ku ca kumwenako, kuti balafwaya abaume abaice ukwingila ubushilika no kulwako inkondo. * Nelyo nalimo kuti babinda Baibolo ne mpapulo shilanda pali Baibolo, kabili kuti batulesha no kupepela capamo. Nga ca kuti bakateka abantunse babomfya bubi bubi amaka ayo bakwata, pa kuti bacushe abasambi ba kwa Kristu, bafwile ukwibukisha ukuti bakalubulula kuli Lesa. Pantu Yehova alamona ifyo bacita!—Luk. Mil. 5:8.

8. Bupusano nshi bwaba pali Yehova “Uwapulamo” na ‘mabuteko’?

⁸ Nangu ca kutila ‘amabuteko’ yalikwata amaka kabili tulingile ukuyanakila, tayakwata amaka yonse. Baibolo ilanda ukuti Yehova aliyacila amaka, pantu itila e “Wapulamo.” Ili lumbo lya kwa Lesa ilya kuti e “Wapulamo,” lyalilembwa imiku 4 mu Baibolo.—Dan. 7:18, 22, 25, 27.

9. Finshi kasesema Daniele amwene mu cimonwa?

⁹ Kasesema Daniele alimwene icimonwa icalelangilila ifyo Yehova akwatisha amaka ukucila amabuteko. Ica kubalilapo, Daniele amwene ifiswango ifikalamba 4, ifyaleimininako ifyalo ifyakwatishe amaka ifyatekelepo. E kutila, Babiloni, Madai na Persia, Grisi, Roma, e lyo no buteko bwa Anglo-America ubuteka muno nshiku. (Dan. 7:9, 10) Lyena Daniele amwene Yehova Lesa naikala pa cipuna ca Bufumu mu muulu. (Dan. 7:9, 10) Nomba ifyo Daniele akonkeshepo ukumona, fyakusoka bakateka muno nshiku.

10. Ukulingana na Daniele 7:13, 14, 27, ni nani uo Yehova apeela amaka ya kuteka pano isonde, kabili cinshi citusambilisha pali Yehova?

¹⁰ Belengeni Daniele 7:13, 14, 27. Yehova kuti apoka amabuteko ya bantunse amaka ya kuteka, no kuyapeela ku wakwata amaka ukubacila. Nani uyo wine? Ni Yesu Kristu “Uwaba ngo mwana wa muntu,” kabili “aba mushilo aba Wapulamo” e kutila ba 144,000 bakateka nankwe “umuyayaya.” (Dan. 7:18) Ukwabula no kutwishika Yehova e ‘Wapulamo,’  pantu e wakwata fye amaka ya kucita ifi.

11. Finshi fimbi Daniele alembele ifilanga ukuti Yehova alikwata amaka ukucila ishamfumu?

¹¹ Ifyo Daniele amwene mu cimonwa filomfwana sana ne fyo alandile pa kubala. Atile: “E ufumyapo ishamfumu no kubikapo ishamfumu shimbi.” Alandile no kuti: “Uwapulamo e uteka mu bufumu bwa bantunse kabili abupeela ku o atemenwe.” (Dan. 2:19-21; 4:17) Bushe kwaliba inshita imo ilyo Yehova afumishe imfumu pa bufumu no kubupeela ku muntu umbi? Ee, eko yali!

12. Landeni pa fya kumwenako fya ku kale ifya shamfumu isho Yehova afumishe pa bufumu. (Moneni icikope.)

¹² Ukwabula no kutwishika Yehova alilanga ukuti e wakwatisha amaka ukucila ‘amabuteko.’ Natulandeko pa fya kumwenako fitatu. Farao imfumu ya Egypt alisungile abantu ba kwa Lesa mu busha, kabili pa miku iingi alebakaanya ukuti baleya. Lelo Lesa alibalubwile mu busha, kabili alipeye na Farao pali Bemba Wakashika. (Ukufu. 14:26-28; Amalu. 136:15) Belshasari imfumu ya Babiloni alikwete umutebeto, kabili ‘ali-ikushishe pali Shikulu wa mu muulu. . . . alitashishe na balesa ba fye aba silfere na ba golde,’ ukucila ukutasha Yehova. (Dan. 5:22, 23) Lelo Lesa alisalapwile uyu mwaume wa cilumba. “Muli ilya ine nshita ya bushiku,” Belshasari balimwipeye kabili ubufumu bwakwe babupeele ku bena Madai na bena Persia. (Dan. 5:28, 30, 31) Imfumu Herode Agripa 1 iyaleteka icalo ca Palestine yalipeye Yakobo, kabili yalibikile no mutumwa Petro mu cifungo pantu yalefwaya ukumwipaya. Nomba Yehova talekele Herode ukucita ifyo alefwaya. “Malaika wa kwa Yehova alimuumine” kabili alifwile.—Imil. 12:1-5, 21-23.

13. Landeni pa fya kumwenako ifya shamfumu shaumene akapi isho Yehova acimfishe.

¹³ Yehova alilanga ukuti alikwata amaka ukucila ne shamfumu ishumene akapi. Alyafwile abena Israele ukucimfya ishamfumu 31 ishaumene akapi, isha bena Kanaani. Kabili alibafwile no kupoka incende iikalamba iya calo ico abalaile. (Yosh. 11:4-6, 20; 12:1, 7, 24) Yehova na kabili alyafwile abena Israele ukulwisha imfumu Ben-hadadi, ne shamfumu shimbi 32 isha bena  Siria ishaishile mu kulwisha abena Israele.—1 Isha. 20:1, 26-29.

14-15. (a) Finshi imfumu Nebukadnesari ne mfumu Dariusi balandile pa maka ayo Yehova akwata aya kuteka? (b) Finshi uwaimbile amalumbo alandile pali Yehova e lyo no luko lwakwe?

¹⁴ Pa myaka iingi, Yehova alitwalilila ukulanga ukuti e Wapulamo! Ilyo imfumu Nebukadnesari yaleilumba pa ‘maka ayakalamba, ubukata e lyo no bucindami’ ubo yakwete, mu cifulo ca kutasha Yehova uwalinga ukulumbanya, Lesa alimulengele apena. Ilyo Nebukadnesari apolele, alicindike “Uwapulamo,” kabili alisumine ukuti “ukuteka kwakwe [Yehova] kuteka kwa muyayaya.” Alandile no kuti: “Takuli uwingalesha ukuboko kwakwe” (Dan. 4:30, 33-35) Ilyo Daniele atwalilile ukuba uwa cishinka kuli Yehova, kabili Yehova amupususha na mu cilindi ca nkalamo, imfumu Dariusi yatile: “Abantu baletutuma kabili baletiina Lesa wa kwa Daniele. Pantu ena ni Lesa wa mweo kabili aikalilila umuyayaya, no bufumu bwakwe tabwakonaulwe.”—Dan. 6:7-10, 19-22, 26, 27.

¹⁵ Uwaimbile amalumbo atile: “Yehova nafulunganya amapange ya nko; Nalesha amatontonkanyo ya bantu na bantu.” Alandile no kuti: “Lwalipaalwa uluko ulo Yehova e Lesa wa luko, Abantu abo asala ukuba abakwe.” (Amalu. 33:10, 12) Kanshi e mulandu wine tufwile ukutwalilila ukuba aba cishinka kuli Yehova.

16. Cinshi twingacetekela ukuti e cikacitika ilyo kukaba “ubucushi bukalamba,” kabili mulandu nshi? (Moneni icikope.)

¹⁶ Twamona ifyo Yehova acitile ku kale. Nomba finshi tule-enekela ukucitika ku ntanshi? Kuti twacetekela ukuti Yehova ali no kupususha ababomfi bakwe aba cishinka ilyo kuli no kuba “ubucushi ubukalamba.” (Mat. 24:21; Dan. 12:1) Ali no kupususha  abantu bakwe, ilyo Goge wa ku Magoge, e kutila inko ishikomana akapi, shikasansa abantu ba kwa Yehova aba cishinka isonde lyonse. Nangu ca kuti ifyalo 193 ifyaba mu kabungwe ka United Nations fyonse fikomane akapi, tafyakacimfye Uwapulamo ne bumba lya bashilika aba ku muulu. Yehova atulaya ukuti: “Nkaikusha no kuilenga ukuba uwa mushilo no kuilenga ukwishibikwa pa menso ya nko ishingi; e lyo shikeshiba ukuti nine Yehova.”—Esek. 38:14-16, 23; Amalu. 46:10.

17. Finshi Baibolo yalanda ukuti e fikacitikila ishamfumu sha pano isonde, kabili finshi fili no kucitika ku bakatwalilila ukuba ne cishinka kuli Yehova?

¹⁷ Ukusansa kwa kwa Goge, kukalenga kukabe inkondo ya Armagedone ilyo Yehova akonaula “ishamfumu sha ba pano isonde shonse.” (Ukus. 16:14, 16; 19:19-21) Lelo “abalungama e bakekala pa calo, na ba kaele e bakashalapo.”—Amapi. 2:21.

18. Finshi Abena Kristu abengi aba cishinka baitemenwa ukucita, kabili mulandu nshi? (Daniele 3:28)

¹⁸ Pa myaka iingi Abena Kristu aba cishinka, balabika ubumi bwabo mukaposa mweo, pantu balitemwa Yehova Kateka wabo. Aba Bena Kristu balafwaisha ukuba aba cishinka kuli Yehova. Balafwaisha ukupashanya abaHebere batatu abatwalilile ukuba aba cishinka ku Wapulamo, kabili uwabapuswishe ilyo babapoosele mu mulilo.—Belengeni Daniele 3:28.

19. Finshi Yehova akalafwaisha ukumona mu bantu ilyo ashilabapingula, kabili cinshi tufwile ukutwalilila ukucita?

¹⁹ Davidi uwaimbile amalumbo, alandile pa mulandu cacindamina ukubela aba cishinka kuli Lesa. Atile: “Mpinguleni, mwe Yehova, ukulingana no bulungami bwandi kabili ukulingana na bukaele bwandi ubuli muli ine.” (Amalu. 7:8) Na kabili Davidi atile: “Lekeni bukaele no bulungami fininde.” (Amalu. 25:21) Icintu icisuma ico twingacita kutwalilila ukuba aba cishinka kuli Yehova, te mulandu na mafya ayali yonse ayo twingakwata. Nga twacita ifi, tukomfwa nge fyo kemba wa malumbo aumfwile, uwalembele ukuti: “Balipaalwa aba kaele . . . , abenda mu mafunde ya kwa Yehova.”—Amalu. 119:1.