1. Bushe kuti twaba shani ne nsansa nga twaishiba ukuti ‘tulakabila ifya kwa Lesa’?

 INSANSA sha cine cine te kumfwa fye bwino pa kashita fye akanono, lelo umuntu kuti atwalilila ukuba ne nsansa. Mulandu nshi twalandila ifyo? Yesu mu Lyashi lya pa Lupili atile: “Balipaalwa abaishiba ukuti balakabila ifya kwa Lesa.” (Mat. 5:3) Yesu alishibe ukuti abantu balafwaisha ukwishiba no kupepa Kabumba wabo, Yehova Lesa. Kabili apo Yehova ni “Lesa wa nsansa,” na bamupepa nabo kuti baba ne nsansa.—1 Tim. 1:11.

2-3. (a) Bushe Yesu atile cinshi cimbi icingalenga twaba ne nsansa? (b) Finshi fimbi ifyo twalasambilila muli cino cipande, kabili mulandu nshi cicindamine ukusambilila pali ifyo?

² Bushe kuti twaba fye ne nsansa nga ca kuti tatukwete amafya? Awe. Yesu mu Lyashi lya pa Lupili atile na “baloosha,” e kutila abaloosha pa mulandu wa lubembu, nelyo abaleloosha pa mulandu na mafya bakwete, kuti baba ne nsansa. Na kabili atile bonse “abo bacusha pa mulandu wa bulungami,” nelyo abo ‘bapontela’ pa mulandu wa kuba abasambi ba kwa Kristu, kuti baba ne nsansa. (Mat. 5:4, 10, 11) Nomba bushe umuntu kuti aba shani ne nsansa sha cine cine, nangu ca kuti ali na mafya?

³ Yesu asambilishe ukutila tuba fye ne nsansa sha cine cine nga tulecita ifya kwa Lesa no kupalama kuli ena, nampo nga tuli na mafya nelyo iyo. (Yako. 4:8) Kuti twacita shani pa kuti tube ne nsansa sha cine cine? Muli cino cipande twalasambilila  pa fintu fitatu ifingalenga twaba ne nsansa sha cine cine.

4. Cinshi ica kubalilapo ico tufwile ukucita pa kuti tube ne nsansa sha cine cine? (Amalumbo 1:1-3)

⁴ ICA KUBALILAPO: Pa kuti tube ne nsansa sha cine cine, tufwile ukulalya ifya kulya fya ku mupashi. Abantu pa kuti batwalilile ukuba no bumi, balingile ukulalya ifya kulya, ifi fine e fyo caba na ku nama. Lelo bantu fye ebengalya ifya kulya fya ku mupashi, kabili balakabila ifi ifya kulya. E calengele Yesu alande ukuti: “Te ku fya kulya fyeka umuntu ekalila no mweo, lelo na ku mashiwi yonse ayafuma mu kanwa ka kwa Yehova.” (Mat. 4:4) E ico tulingile ukulabelenga Icebo ca kwa Lesa Baibolo cila bushiku. Uwaimbile amalumbo atile: ‘Alipaalwa umuntu uusekelela mu mafunde ya kwa Yehova, kabili uubelenga amafunde yakwe no kulayatontonkanyapo akasuba no bushiku.”—Belengeni Amalumbo 1:1-3.

5-6. (a) Finshi twingasambilila mu Baibolo? (b) Ni muli finshi fimo umo ukubelenga Baibolo kwingatwafwa?

⁵ Apo Yehova alitutemwa, alitweba muli Baibolo ifyo tufwile ukucita pa kuti tube ne nsansa sha cine cine. Tulasambilila ifyo afwaya ukuti tulecita, ifyo twingapalama kuli ena, ne fyo twingacita pa kuti aletwelela imembu. Na kabili, tulasambilila pa fisuma ifyo afwaya ukutucitila ku ntanshi. (Yer. 29:11) Ici icine ico tusambilila mu Baibolo cilalenga twaba sana ne nsansa.

⁶ Twalishiba ukuti mu Baibolo mwaliba ifingi ifingatwafwa pa fyo tulingile ukulaikala. Nga twakonka ifyo Baibolo ilanda, kuti twaba ne nsansa sha cine cine. Nga ca kuti  mwafuupuka pa mulandu wa kuti muli na mafya, mulebelenga sana icebo ca kwa Yehova kabili muletontonkanya pa fyo mulebelenga. Yesu atile: “Abapaalwa ni abo abomfwa no kukonka icebo ca kwa Lesa!”—Luka 11:28.

7. Kuti mwacita shani pa kuti mulenonkelamo ilyo mulebelenga Baibolo?

⁷ Ilyo mulebelenga Baibolo, mwilabelenga ulubilo, lelo muletekanya ilyo mulebelenga. Natulangilile, tutile umuntu amwipikila ifya kulya mwatemwa, nomba mulelya ulubilo pa mulandu wa kuti tamukwete inshita iikalamba iya kuti mulye. Nelyo ilyo mulelya muletontonkanya pa fintu fimbi, ica kuti mwafilwa no kubika amano ku fyo ifya kulya fileumfwika. Ilyo mwapwisha ukulya, mwaumfwa kwati ifya kulya tafikele, kabili mwatendeka no kutontonkanya ukuti kanshi nga nacitekanya ilyo nacilalya. Ifi fine e fyo caba na lintu tulebelenga Baibolo. Nalimo na imwe mwalibelengapo Baibolo ulubilo, ica kuti mwafilwa no kumfwikisha ifyo mulebelenga. Muleteka umutima ilyo mulebelenga Icebo ca kwa Lesa, mule-elenganya ifilecitika, muleumfwa ifiunda na mashiwi ilyo mulebelenga, kabili muletontonkanya na pa fyo mulebelenga. Nga mulecita ifi, mukaba ne nsansa sha cine cine.

8. Bushe “umusha wa cishinka kabili uwashilimuka” alebomba shani umulimo bamupeela? (Moneni na futinoti.)

⁸ Yesu alisontele “umusha wa cishinka kabili uwashilimuka” ukulatupekanishisha ifya kulya pa nshita yalinga, kabili ifi fine e fyo umusha acita. * (Mat. 24:45) Fyonse ifyo umusha atupeela fifuma mu Malembo ya mushilo. (1 Tes. 2:13) Nga fintu Baibolo ilanda, ifya kulya fya ku mupashi ifyo umusha atupekanishisha, filalenga twaishiba ifyo Yehova atontonkanya. E mulandu wine tubelengela Ulupungu lwa kwa Kalinda na Loleni! ne fipande fya pa jw.org. Tulapekanya ukulongana kwa Mikalile, e lyo no kwa pa mpela ya mulungu. Kabili cila mweshi tulatamba na JW Broadcasting^®. Ukubelenga e lyo no kuisambilisha Baibolo, kukalenga tukacite icintu calenga bubili ico tufwile ukucita pa kuti tube ne nsansa sha cine cine.

9. Cinshi icalenga bubili ico tufwile ukucita pa kuti tube ne nsansa sha cine cine?

⁹ ICALENGA BUBILI: Pa kuti tube ne nsansa sha cine cine, tufwile ukulacita ifyo Yehova afwaya. Uwaimbile amalumbo atile: “Alipaalwa onse uutiina Yehova, uwenda mu mibele yakwe.” (Amalu. 128:1) Ukutiina Yehova kwalola mu kuti, tufwile ukumucindika no kukanacita fyonse ifingalenga afulwa. (Amapi. 16:6) Kanshi lyonse tufwile ukulakonka ifyalungama ifyo Yehova atweba ukucita, ifyaba mu Baibolo. (2 Kor. 7:1) Tukaba ne nsansa nga tulecita ifyo Yehova atemwa, no kukanacita ifyo apata.—Amalu. 37:27; 97:10; Rom. 12:9.

10. Ukulingana na Abena Roma 12:2, cinshi tufwile ukucita?

¹⁰ Belengeni Abena Roma 12:2. Umuntu kuti aishiba ukuti ifi e fyo Yehova atemwa, kabili ifi e fyo apata, lelo alingile ukusalapo ukulacita ifyo Lesa atemwa. Ku cakumwenako, umuntu kuti aishiba ukuti ubuteko bwalikwata insambu sha kweba banamutekenya apo balingile ukubutushisha imyotoka. Nomba nalimo te kuti asumine ukukonka ilyo ifunde, kuti alabutusha na motoka ukucila ne fyo alingile ukubutusha. Ifyo tucita e filanga nampo nga twalicetekela ukuti ifyo Yehova atweba ukucita fyalilungama, nelyo iyo. (Amapi. 12:28) Ifi fine e fyo Davidi aumfwile ilyo aebele Yehova ukuti: “Mukanenga ukwishiba inshila ya ku bumi. Ukusekelela kwafikapo kufuma ku cinso cenu; ubusuma buli mu kuboko kwenu ukwa kulyo pe na pe.”—Amalu. 16:11.

11-12. (a) Nga ca kuti tuli na mafya nelyo natufuupuka, cinshi ico tatufwile ukucita? (b) Bushe kuti twabomfya shani amashiwi yaba pa Abena Filipi 4:8, ilyo tulesala ifya kuleseshamo icitendwe?

 ¹¹ Nga tuli na mafya nelyo natusakamana, nalimo kuti twamona ukuti tulingile ukucitapo cimo pa kuti tuleke ukusakamana pa mafya tukwete. Kwena ca cifyalilwa ukumona ifyo, na lyo line, tufwile ukushininkisha ukuti ifyo tulefwaya ukucita te fyo Yehova apata.—Efes. 5:10-12, 15-17.

¹² Muli kalata umutumwa Paulo alembele abena Filipi, abakoseleshe ukutwalilila ukulatontonkanya “pali fyonse ifyalungama, pali fyonse ifyasanguluka, pali fyonse ifyatemwikwa,  . . . na pali conse icisuma icabako.” (Belengeni Abena Filipi 4:8.) Nangu ca kuti ifyo Paulo alelanda tafyalelanda pa fyo tufwile ukucita ilyo tulelesha icitendwe, aya mashiwi kuti yatwafwa ukusala bwino ifya kuleseshamo icitendwe. Kanshi lyonse tuleshininkisha ukuti inyimbo isho tulekutika, amafilimu tuletamba, ifitabo ifyo tulebelenga, e lyo ne fyangalo ifyo tuleangalako nafilingana na mashiwi ayo umutumwa Paulo alembele Abena Kristu ba mu Filipi. Ukucita ifi kuti kwalenga mwaishiba ifyo Lesa atemwa, e lyo ne fyo apata. Tulefwaya ukulacita ifyo Yehova amona ukuti fyalilungama. (Amalu. 119:1-3) Nga twacita ifyo Lesa amona ukuti fyalilungama, tukaba na kampingu iisuma kabili ici kuti calenga twacita icalenga butatu icingalenga twaba ne nsansa.—Imil. 23:1.

13. Cinshi icalenga butatu ico tufwile ukucita pa kuti tube ne nsansa sha cine cine? (Yohane 4:23, 24)

¹³ ICALENGA BUTATU: Pa kuti mube ne nsansa sha cine cine, mufwile ukubika amano ku kucita ifya kwa Lesa. Apo Yehova e watubumbile, e o tulingile ukulapepa. (Ukus. 4:11; 14:6, 7) Kanshi icacindama sana ico tufwile ukubikako amano, kupepa Yehova ukulingana ne fyo afwaya ukuti tulemupepa, e kutila “mu mupashi na mu cine.” (Belengeni Yohane 4:23, 24.) Tulafwaya umupashi wa Lesa uwa mushilo watutungulula, pa kuti tulemupepa ukulingana ne cine icaba mu Cebo Cakwe. Nangu ca kuti twikala mu calo umo babinda umulimo wesu, tulingile ukubika amano ku kupepa Lesa. Pali ino nshita, bamunyinefwe ukucila pali 100 balibakaka, pa mulandu wa kuba Inte sha kwa Yehova. * Nangu balibakaka, balatwalilila ukuba ne nsansa ilyo nga balesangako inshita ya kupepa, ukuisambilisha, e lyo no kwebako abantu pali Lesa na pa Bufumu bwakwe. Tulatwalilila ukuba ne nsansa nangu abantu batupumya nelyo batucusha, pantu Yehova alalenga tuleshipikisha.—Yako. 1:12; 1 Pet. 4:14.

14. Cinshi cacitikile munyinefwe uwa ku Tajikistan, kabili mulandu nshi?

¹⁴ Aba bwananyina bamo balitwalilila ukuba ne nsansa, te mulandu no kuti balikwatapo amafya ayakalamba. Ne calenga batwalilile ukuba ne nsansa, kucita ifintu fitatu ifyo tulandilepo. Natulandeko ifyacitikile ba Jovidon Bobojonov, abali ne myaka 19, aba ku Tajikistan ilyo bakeene ukwingila ubushilika. Pa 4 October, 2019, bailebafumya ku ng’anda ku mwabo, no kubatwala ku cifungo uko babasungile pa myeshi iingi, kabili balebasunga fye kwati cipondo. Ifi babafyengele balifilandilepo na pa mulabasa, mu fyalo ifingi. Abalesabankanya ilyashi balandile ukuti munyinefwe balimumine icine cine, pa kuti fye bamupatikishe ukuti alape umulapo wa kwingila ubushilika, e lyo no kufwala unifomu ya bashilika. Pa  numa ya ifi icilye calimupingwile ukuti afwile ukukakwa, e ico balimukakile mu cifungo. Mpaka ilyo kateka wa muli cilya calo aishilemufumya. Ilyo ifi fyonse fyalecitika, ba Jovidon balitwalilile ukuba aba cishinka, kabili bali ne nsansa. Cinshi calengele babe ne nsansa? Lyonse balebika amano ku fya kwa Lesa.

15. Bushe ba Jovidon baleisambilisha shani ifya kwa Lesa ilyo bali mu cifungo?

¹⁵ Ba Jovidon balitwalilile ukusambilila pali Yehova, nangu ca kuti tabakwete Baibolo nelyo impapulo shilanda pali Baibolo. Bakumanishe shani ukutwalilila ukusambilila? Bamunyinefwe na bankashi abaletwalila ba Jovidon ifya kulya, balelemba ilembo lya bushiku pa fyola balesendelamo ifya kulya. Ici calengele balebelenga Baibolo no kutontonkanya pa fyo balebelenga cila bushiku. Ilyo bafumine mu cifungo, balekoseleshako aba bwananyina abo bashacushishepo ukuti: “Calicindama ukuti ilyo mucili no buntungwa, mulebomfya inshita yonse iyo mwakwata ukwishiba bwino Yehova, ilyo mulebelenga Icebo Cakwe ne mpapulo ishilanda pali Baibolo.”

16. Finshi ba Jovidon baletontonkanyapo sana ilyo bali mu cifungo?

¹⁶ Munyinefwe Jovidon alecita ifyo Yehova afwaya. Taletontonkanya pa fyabipa nelyo  ukufwaya ukucita ifyabipa, lelo abikile amano kukufwaya ukucita ifyo Yehova afwaya. Ba Jovidon baletemwa sana ukumona ifyo Lesa abumba. Lyonse nga bashibuka ulucelo baleumfwa uko utuni tulelila. Lyena ubushiku, balelolesha mu muulu no kutamba umweshi ne ntanda. Batile: “Ifi fyonse ifyo Yehova atupa, fyalenkosha sana kabili fyalelenga ndeba ne nsansa.” Nga tuletasha Yehova pa fya kulya fya ku mupashi atupeela, ne fyo abumba ifyo tumona na menso, kuti twaba ne nsansa kabili isho nsansa e shingalenga twashipikisha amafya.

17. Bushe amashiwi yaba pali 1 Petro 1:6, 7 kuti ya-afwa shani umuntu uukwete amafya nga ayo ba Jovidon bakwete?

¹⁷ Ba Jovidon balibikile na mano ku kucita ifya kwa Lesa. Balishibe ukuti calicindama ukuba uwa cishinka kuli Lesa wa cine. Yesu atile: “Yehova Lesa obe e o ulepepa, kabili eka fye e o ulebombela.” (Luka 4:8) Abakalamba ba bashilika e lyo na bashilika, balefwaya ukuti ba Jovidon baleke ukuba Inte ya kwa Yehova. Lelo ba Jovidon balepepa kuli Yehova cila bushiku, akasuba no bushiku. Kabili balelomba Yehova ukuti abafwe pa kuti benenuka. Te mulandu ne fyo balebacusha, ba Jovidon balitwalilile ukuba aba cishinka. Ifi balebacusha fyalilenga baba ne citetekelo icakosa.—Belengeni 1 Petro 1:6, 7.

18. Kuti twatwalilila shani ukuba ne nsansa?

¹⁸ Yehova alishiba fyonse ifyo tukabila pa kuti tube ne nsansa sha cine cine. Nga mulecita ifintu fitatu ifyo tulandilepo ifingalenga mwaba ne nsansa sha cine cine, mukatwalilila ukuba ne nsansa te mulandu na mafya. Lyena naimwe bene mukalanda ukuti: “Balipaalwa abantu abo . . . Yehova e Lesa wabo!”—Amalu. 144:15.