1. Lisubilo nshi ilyo Yehova atupeela?

 YEHOVA alilenga twaba ne subilo lya kuti ku ntanshi tukekala umuyayaya. Bamo bakwata isubilo lya kwikala umuyayaya ku muulu nge fibumbwa fya mupashi. (1 Kor. 15:50, 53) Lelo abengi bakwata isubilo lya kwikala umuyayaya pe sonde ilyo bakaba ne nsansa no bumi ubwapwililika. (Ukus. 21:3, 4) Nampo nga twakwata isubilo lya kwikala umuyayaya ku muulu nelyo pano isonde, isubilo twakwata lyalicindama sana kuli ifwe.

2. Bushe isubilo lyesu lyashintilila pali cinshi, kabili mulandu nshi twingalandila ifi?

² Ishiwi lya kuti isubilo ilyo balandapo mu Baibolo, lipilibula ukulolela ifintu ifisuma ukuti fikacitika. Apo Yehova e ulenga twaba ne subilo, kuti twacetekela ukuti ifyo twenekela ukucitika ku ntanshi fikafikilishiwa. (Rom. 15:13) Twalishiba ifyo atulaya kabili twalishiba no kuti lyonse alafikilisha ifyo atulaya. (Impe. 23:19) Twalicetekela ukuti Yehova alafwaya ukufikilisha ifyo alaya kabili alikwata na maka ya kufifikilisha. Isubilo lyesu talyashintilila pa fintu ifyo twelenganya nelyo ifyo tufwaya ukuti fikacitike. Lelo lyashintilila pa fintu ifya shininkishiwa kabili ifya cine.

3. Finshi twalasambilila muli cino cipande? (Amalumbo 71:5)

³ Shifwe wa ku muulu alitutemwa kabili alafwaya twamucetekela. (Belengeni Amalumbo 71:5.) Nga twacetekela Yehova kabili isubilo lyesu lili ilyakosa, tukashipikisha amafya yonse ayo tukakwata kabili tukalasekelela. Lekeni tusambilile  ifyo isubilo litucingilila. Intanshi natumone ifyo isubilo lyaba nge nanga kabili nge cisote. Lyena twalasambilila ifyo twingacita pa kuti isubilo lyesu libe ilyakosa.

4. Bushe isubilo lyaba shani nge nanga? (AbaHebere 6:19)

⁴ Muli kalata umutumwa Paulo alembeele abaHebere alingenye isubilo lyesu ku nanga. (Belengeni AbaHebere 6:19.) Apo Paulo ale-enda sana pali bemba alishibe ukuti inanga balaibomfya pa kukanalenga ubwato ukusensenunwa. Inshita imo ali mu bwato ilyo icimwela icikalamba caimine pali bemba. Pali ilya nshita alimwene uko abaleensha ubwato bapoosele inanga muli bemba pa kucingilila ubwato ukuti bwiya mu fimabwe. (Imil. 27:29, 39-41) Isubilo nalyo lilalenga twapalama kuli Yehova pa kuti tatushile icine, ilyo twakwata amafya ayaba kwati cimwela. Isubilo lilalenga twilasakamikwa sana nga tuli na mafya pantu tulenekela ukuti yali no kupwa. Lelo muleibukisha ukuti Yesu atile bakamucusha. (Yoh. 15:20) Kanshi ukutontonkanya pa fyo Yehova atulaya kukalenga tukatwalilile ukulamubombela.

5. Bushe isubilo lyalengele shani Yesu ukukanasakamikwa nangu ca kuti alishibe ukuti bali no kumwipaya?

⁵ Isubilo lyalilengele Yesu atwalilila ukuba uwa cishinka nangu ca kuti alishibe ukuti bali no kumwipaya. Pa bushiku bwa Pentekoste 33 ninshi Yesu alibwelelamo ku muulu, umutumwa Petro alibelengele amashiwi ya busesemo ayasuma ayaba mwi buuku lya Amalumbo ayalondolwele ifyo Yesu ashasakamikwe sana, ayatile: “Nkekala mwi subilo pantu tamwakanshe mu Nshiishi nangu ukuleka uwa cishinka wenu ukubola. . . . kabili icinso cenu cikanenga ukusangalala.” (Imil. 2:25-28; Amalu. 16:8-11) Nangu ca kuti Yesu alishibe ukuti ali no kufwa, ali ne subilo lya kuti Lesa ali no kumubusha kabili alicetekele ukuti akalasekelela pantu akaba pamo na Wishi uwa ku muulu.—Heb. 12:2, 3.

6. Finshi munyinefwe umo alandile pa kuba ne subilo?

⁶ Isubilo lyesu ilya Bwina Kristu lyalilenga bamunyinefwe na bankashi abengi ukushipikisha amafya. Natulandeko pali munyinefwe Leonard Chinn uwali ne cishinka lintu balemucusha uwaleikala ku England. Ilyo kwali Inkondo ya Calo iya Kubalilapo balimukakile pa mulandu wa kuti alikene ukwingila ubushilika. Pa myeshi ibili balimukakile mu cifungo, lyena pa numa balemupatikisha ukubomba imilimo iyakosa. Atile: “Ifyancitikile fyalilenga namona umulandu cacindamina ukubela ne subilo pa kuti ushipikishe amafya. Twalikwata ifingi ifingalenga twaba ne subilo pamo nge fyacitikile Yesu, abatumwa, na bakasesema e lyo ne fyo Baibolo yatulaya. Fyonse ifi filalenga twaba ne subilo kabili filatupeela amaka ya kushipikisha amafya.” Isubilo lyali kwati ni nanga kuli munyinefwe Leonard, kabili kuti lyaba kwati ni nanga na kuli ifwe bene.

7. Bushe amafya yakosha shani isubilo lyesu? (Abena Roma 5:3-5; Yakobo 1:12)

⁷ Nga twashipikisha amafya kabili twamona ne fyo Yehova aletwafwa, tuleshiba ukuti aletupaala kabili cilalenga isubilo lyesu ukuba ilyakosa. (Belengeni Rom. 5:3-5; Yako. 1:12.) Kanshi isubilo lyesu lifwile ukuba ilyakosa ukucila ifyo lyali ilyo twasambilile fye icine. Satana afwaya amafya ukutubwesesha ku numa, nomba apo Yehova alatwafwa tulatwalilila ukushipikisha.

8. Bushe isubilo balipashanya shani ku cisote? (1 Abena Tesalonika 5:8)

⁸ Baibolo na kabili ilalinganya isubilo lyesu ku cisote. (Belengeni 1 Abena Tesalonika 5:8.) Umushilika alafwala icisote pa kuti  acingilile umutwe wakwe. Mu bulwi bwesu ubwa ku mupashi, na ifwe tufwile ukucingilila ifyo tutontonkanya yesu ku fya bipa ifyo Satana engalenga twalatontonkanya. Alabomfya ifintu ifyalekanalekana pa kuti atulenge tutendeke ukutontonkanya pa fyabipa. Nga filya fine icisote cicingilila umutwe wa mushilika, isubilo lyesu lilacingilila ifyo tutontonkanya pa kuti tutwalilile ukuba aba cishinka kuli Yehova.

9. Finshi ficitika nga ca kuti abantu tabali ne subilo?

⁹ Isubilo lyakwikala umuyayaya lilalenga twalapingula bwino pa fintu. Nomba nga ca kuti isubilo lyesu talili ilyakosa kabili twatendeka no kutontonkanya pa fifwaya imitima yesu, kuti twaleka ukuba ne subilo lya cine cine ilya kwikala umuyayaya pe sonde. Natumone ifyacitikile Abena Kristu bamo abaleikala mu Korinti. Balilekele ukucetekela ifyo Lesa alaile ukuti abafwa bakabuuka. (1 Kor. 15:12) Paulo atile abashasumina ukuti abafwa bakabuuka bacita fye ififwaya imitima yabo. (1 Kor. 15:32) Muno nshiku abantu abengi abashacetekela ifyo Lesa alaya balacita ifili fyonse pa kuti fye babe ne nsansa ilyo bashilafwa. Lelo ifwe twalicetekela ifyo Lesa atulaya ukuti ifintu fikawama ku ntanshi. Isubilo lyesu lyaba kwati cisote icicingilila ifyo tutontonkanya, kabili lilalenga twilabika amano kufifwaya imitima yesu ifingalenga bucibusa bwesu na Yehova bwapwa.—1 Kor. 15:33, 34.

10. Bushe isubilo kuti lyatucingilila shani, pa kuti tatuletontonkanya pa bufi ubo Satana abepa?

¹⁰ Isubilo lyesu ilyaba nge cisote lilatucingilila ukukanatontonkanya ukuti te kuti tulenge Yehova ukulasekelela. Ku ca kumwenako, bamo kuti batila: ‘nshakabe pa bantu abakekala umuyayaya pantu nshili muntu umusuma. Te kuti nkumanishe ukucita ifyo Lesa enekela ukuti ndecita. Ibukisheni ukuti na Elifasi uwalekoselesha Yobo na o e fyo aletontonkanya. Atile: “Bushe umuntunse umwina kufwa nani uwa kuti asanguluke?” Na kabili alandile pa Lesa ukuti: “Mona! Tatetekela aba mushilo bakwe, ne myulu na yo tayasanguluka mu menso yakwe.” (Yobo 15:14, 15) Ifi alandile bwali bufi bwafita fititi! Muleibukisha ukuti ni Satana e ufwaya ukuti tuletontonkanya ifyo. Alishiba ukuti nga twatwalilia ukutontonkanya ifyo, kuti twaleka ukuba ne subilo. Kanshi natulekaana ifyo Satana atubepa no kubika amano ku fyo Lesa atuya. Mwilatwishika ukuti Yehova afwaya ukuti mukekale umuyayaya, kabili akamwafwa pa kuti mukabe pa bantu abakekala umuyayaya.—1 Tim. 2:3, 4.

11. Mulandu nshi tulingile ukubela abatekanya ilyo tulelolela Yehova ukufikilisha ifyo atulaya?

¹¹ Te lyonse canguka ukuba ne subilo lyakosa. Nalimo kuti twafilwa ukutekanya ilyo tulelolela ukuti Lesa akafikilishe ifyo atulaya. Na lyo line, apo Yehova abako umuyayaya, ifyo twamona ukuti na fikokola ukucitika kuli ena ninshi tafikokwele. (2 Pet. 3:8, 9) Akafikilisha fyonse ifyo alaya, lelo nalimo te kuti ficitike pa nshita tuleenekela. Finshi twingacita pa kuti tube ne subilo ilyakosa kabili no kuba abatekanya, ilyo tulelolela ukuti Lesa akafikilishe fyonse ifyo atulaya?—Yako. 5:7, 8. 

12. Ukulingana na AbaHebere 11:1, 6, bushe isubilo lyapalana shani ne citetekelo?

¹² Kuti twaba ne subilo ilyakosa nga twalilila ukupalama kuli Yehova pantu e ukalenga fyonse ifyo atulaya ukucitika. Nomba pa kuti tube ne subilo tufwile ukucetekela ukuti Yehova e ko aba, kabili “alalambula abamufwaisha.” (Belengeni AbaHebere 11:1, 6.) Nga  twacetekela ukuti Yehova e ko aba, tukashininkisha ukuti akafikilisha fyonse ifyo atulaya. Lekeni tusambilile pa fyo twingacita pa kuti tukoshe bucibusa bwesu na Yehova, e lyo ne fyo twingacita pa kukosha isubilo lyesu.

13. Kuti twapalama shani kuli Lesa?

¹³ Mulepepa kuli Yehova kabili mulebelenga Icebo cakwe. Nangu ca kuti te kuti tumone Yehova, kuti twapalama kuli ena. Kuti twalanda nankwe mwi pepo no kucetekela ukuti ala-asuka ipepo lyesu. (Yer. 29:11, 12) Kuti twakutika kuli Lesa nga tulebelenga Icebo cakwe no kutontonkanya pa fyo tulebelenga. Nga tulebelenga pa fyo Yehova asakamene ababomfi bakwe aba cishinka ku kale, isubilo lyesu likakoselako. Fyonse ifyaba mu Cebo ca kwa Lesa “fyalembelwe ku kutufunda, pa kuti mu kushipikisha kwesu na mu cisansamushi ca mu Malembo tube ne subilo.”—Rom. 15:4.

14. Mulandu nshi tulingile ukulatontonkanishisha pa fyo Yehova acitila abantu bambi?

¹⁴ Muletontonkanya pa fyo Yehova afikilisha ifyo alaya. Natulande pa fyo Yehova acitiile Abrahamu na sara. Balikotele sana ica kuti te kuti bakwate abana. Na lyo line, Lesa alibalaile ukuti bali no kukwata umwana. (Ukute. 18:10) Bushe Abrahamu acitile shani? Baibolo itila: “Ali ne citetekelo, pa kuti abe wishi wa nko ishingi.” (Rom. 4:18) Nangu ca kuti Abrahamu taishibe ifyo Yehova ali no kufikilisha ifyo amulaile, alitwalilile ukucetekela Yehova. Ifyo bamulaile fyalicitike. (Rom. 4:19-21) Ilyashi lya kwa Abrahamu litusambilisha ukuti lyonse kuti twacetekela ukuti ifyo Yehova atulaya fikafikilishiwa, te mulandu no kuti tulemona kwati te kuti fifikilishiwe.

15. Mulandu nshi tulingile ukulatontonkanishisha pa fyo Lesa atucitila?

¹⁵ Muletontonkanya pa fyo Yehova amucitila. Tontonkanyeni pa fyo mwanonkelamo  mu fyo amalayo yaba mu Cebo ca kwa Lesa yafikilishiwa. Ku ca kumwenako Yesu alilaya ukuti Wishi akamupeela fyonse ifyo mukabila. (Mat. 6:32, 33) Kabili alimulaya no kuti Yehova akamupeela mupashi wa mushilo nga mwalomba. (Luka 11:13) Yehova alatwalilila ukufikilisha aya malayo. Nalimo kuti mwatontonkanya pa malayo yamo ayo afikilishapo. Ku ca kumwenako, alimulaya ukuti akalamwelela, akalamusansamusha, kabili akalamupeela fyonse ifyo mulekabila pa kuti mutwalilile ukuba ifibusa fyakwe. (Mat. 6:14; 24:45; 2 Kor. 1:3) Nga muletontokanya pa fyo Yehova amucitila, mukakosha isubilo lyenu no kucetekela ukuti fyonse ifyo atulaya fikafikilishiwa.

16. Mulandu shi isubilo lyabela bupe ubusuma?

¹⁶ Isubilo lya kwikala umuyayaya bupe ubusuma ubo Lesa atupeela. Tulalolela ifintu ifisuma ifyo atulaya ku ntanshi, ifyo twacetekela ukuti fikacitika. Isubilo lyaba kwati ni nanga, lilalenga tulekwata amaka ya kushipikisha amafya, ukulashipikisha ilyo baletucusha e lyo tatutiina no kufwa. Na kabili isubilo lyaba kwati cisote, lilacingilila ifyo tutontonkanya pa kuti tulekaana ukucita ifyabipa no kulacita ifyalungama. Ili isubilo ilyo Baibolo ilandapo lilalenga twaishiba bwino Lesa kabili lilalenga twaishiba ne fyo atutemwa. Tulapaalwa nga nshi nga twalenga isubilo lyesu ukuba ilyakosa.

17. Mulandu nshi twingalandila ukuti isubilo lilalenga tulesekelela?

¹⁷ Muli kalata umutumwa Paulo alembeele abena Roma abakoseleshe ukuti: “Sekeleleni mwi subilo.” (Rom. 12:12) Paulo alesekelela pantu alishibe ukuti nga atwalilila ukuba uwa cishinka, ali no kwikala umuyayaya ku muulu. Na ifwe kuti twasekelela pa mulandu ne subilo twakwata, pantu twalicetekela ukuti Yehova akafikilisha ifyo atulaya. Uwaimbile amalumbo alembele ukuti: “Alipaalwa uo Lesa wa kwa Yakobo e kaafwa wakwe, Uwaba ne subilo muli Yehova Lesa wakwe uwa cishinka umuyayaya.”—Amalu. 146:5, 6.