ICIPANDE CA KUSAMBILILAMO 40
‘Ukuleta Abengi ku Bulungami’
“Na baleleta abengi ku bulungami, bakabalika nge ntanda umuyayaya, umuyayaya.”—Dan. 12:3.
ULWIMBO 151 Aketa
IFYO TWALASAMBILILA *
1. Fintu nshi ifisuma ifikacitika mu myaka 1,000 ilyo Kristu akalateka?
ALA CIKAWAMA sana ilyo abafwa bakatendeka ukubuushiwa pe sonde mu myaka 1,000 ilyo Kristu akalateka! Abantu bonse abafwilwa balupwa ne fibusa balafwaisha ukubamona na kabili. Ifi fine e fyo na Yehova afwaisha. (Yobo 14:15) Elenganyeni ifyo bonse bakatemwa pe sonde, ilyo bakamona abantu batemwa babuuka. Nga fintu twasambilile mu cipande cafumineko, “abalungama” abo amashina yabo yalembwa mwi buuku lya mweo, “bakabuukila ku mweo.” (Imil. 24:15; Yoh. 5:29) Nalimo abatemwikwa besu abengi bakaba pa bakabuushiwa pa numa fye ya nkondo ya Armagedone. * Na kabili “abashalungama” abashasambililepo pali Yehova nelyo ukumubombela ilyo bashilafwa, “bakabuukila ku bupingushi.”
2-3. (a) Nga fintu Esaya 11:9, 10 ilanda, finshi abakabuushiwa bakalabasambilisha, ilyo kukaba umulimo uukalamba uwa kusambilisha? (b) Finshi twalasambilila muli cino cipande?
2 Bonse abakabuuka bakakabila ukubasambilisha. (Esa. 26:9; 61:11) Kanshi kukaba umulimo uukalamba uwa kusambilisha abantu abakabuushiwa, uushabala aubombwapo. (Belengeni Esaya 11:9, 10.) Mulandu nshi kukabela ukubasambilisha? Umulandu umo wa kuti, abashalungama abakabuushiwa bakakabila ukusambilila pali Yesu Kristu, pa Bufumu, pa cilubula, umulandu ishina lya kwa Yehova lyacindamina, e lyo no mulandu uo Yehova alingila ukuteka. Na balungama abakabuushiwa bakakabila ukusambilila ifyo Yehova asambilishe abantu bakwe pa fyo afwaya isonde ukuba. Ababomfi ba kwa Yehova bamo bafwile akale sana, ninshi na Baibolo tailapwa ukulembwa. Kanshi fingi ifyo abalungama na bashalungama bakasambilila ilyo bakabuuka.
3 Muli cino cipande, twala-asuka ifipusho fyakonkapo: Bushe umulimo uukalamba uwa kusambilisha ukabombwa shani? Finshi fikacitika ku bakalacita ifyo bakalasambilila, kabili finshi fikacitila abashalecita ifyo bakalasambilila? Nacicindama sana ukuti twishibe ifyasuko kuli ifi fipusho. Nga fintu twalasambilila, amasesemo yamo aya mwi buuku lya kwa Daniele e lyo na mwi buuku lya Ukusokolola, yalatwafwa ukumfwikisha ifyo twalwike mu fyo twaishibe pa fikacitika ilyo abafwa bakabuuka. Natubalilepo ukulanda pa fikacitika ifyalembwa pali Daniele 12:1, 2.
‘ABALAALA MU LUKUNGU BAKASHIBUKA’
4-5. Cinshi Daniele 12:1 ilanda pa nshita ya ku mpela?
4 Belengeni Daniele 12:1. Ibuuku lya kwa Daniele lilondolola ifyo ifintu fikakonkana ukucitika mu nshiku sha ku mpela. Ku ca kumwenako, Baibolo pa Daniele 12:1 ilanda ukuti, Mikaele e kutila Yesu Kristu, ‘naimininako abantu ba kwa Lesa.’ Ubu busesemo bwalitendeke ukufikilishiwa mu 1914, ilyo Yesu bamusontele ukuba Imfumu ya Bufumu bwa kwa Lesa.
5 Na kabili Daniele bamwebele no kuti Yesu “akema,” ilyo kukaba “inshita ya kucula iya kuti tayatala aibako ukutula pa kubapo kwa luko ukufika ku nshita ilya.” Inshita ya “kucula,” e “bucushi ubukalamba” ubo Baibolo yalandapo pali Mateo 24:21. Yesu akema, nelyo akacitapo fimo pa kucingilila abantu ba kwa Lesa pa mpela ya nshita ya kucula, e kutila pa Armagedone. Ibuuku lya Ukusokolola lilanda pali aba bene bantu abo Yesu akacingilila ukuti libumba likalamba “abafuma mu bucushi bukalamba.”—Ukus. 7:9, 14.
6. Cinshi cikacitika ilyo ibumba likalamba bakapusuka ubucushi bukalamba? Londololeni. (Moneni ne cipande cileti “Amepusho Ukufuma ku Babelenga” icilelanda pa kubuukila ku mweo, muli ino ine magazini.)
6 Belengeni Daniele 12:2. Cinshi cikacitika ibumba likalamba nga lyapusuka inshita ya kucula? Ubu busesemo tabulanda pa kubuuka kwa mampalanya, nelyo ukubuuka kwa ku mupashi ukubako mu nshiku sha kulekelesha nga fintu twaishibe kale. * Lelo aya mashiwi yalanda pa kubuuka ukukacitika mu calo cipya. Mulandu nshi twingalandila ifyo? Ishiwi lya kuti “ulukungu” e lyo babomfya na pali Yobo 17:16, ilipilibula ukuti “Inshiishi.” Kanshi ici cilolele mu kuti, amashiwi ayaba mwi buuku lya kwa Daniele 12:2 yalanda pa kubuuka ukukabako ilyo inshiku sha kulekelesha shikapwa, kabili pa numa ya nkondo ya Armagedone.
7. (a) Bushe ukubuukila ku “mweo wa muyayaya” kwalola mwi? (b) Mulandu nshi uku kukabela ‘kubuuka kwawamapo’?
7 Nomba bushe amashiwi ayaba pali Daniele 12:2, ayalanda ukuti bamo bakabuukila ku “mweo wa muyayaya” yalola mwi? Yalola mu kuti mu myaka 1,000 ilyo Yesu akalateka, abakabuushiwa no kwishiba Yehova, nelyo abakatwalilila ukumwishiba, ukumumfwila no kumfwila Yesu, bakapokelela umweo wa muyayaya. (Yoh. 17:3) Uku kukaba “kubuuka ukwawamapo” ukucila ukwacitike kale. (Heb. 11:35) Mulandu nshi twalandila ifi? Pantu abo babuushishe ku kale balifwile na kabili.
8. Bushe bamo bakabushiwilwa shani “ku kuseebana kabili ku kusuulwa kwa muyayaya”?
8 Te bonse abakabuuka abakasumina ukubasambilisha pali Yehova. Ubusesemo bwalembwa muli Daniele butila bamo bakabuukila “ku kuseebana kabili ku kusuulwa kwa muyayaya.” Pa mulandu wa kuti tabakalefwaya ukulacita ifyo balesambilila, amashina yabo tayakalembwe mwi buuku lya mweo kabili tabakabe no mweo wa muyayaya. Lelo ‘bakasuulwa umuyayaya’ nelya bakonaulwa. Kanshi amashiwi yaba pali Daniele 12:2, yalanda pali bonse abakabuushiwa ukulingana ne fyo bakalacita pa numa ya kubuuka. * (Ukus. 20:12) Bamo bakapokelela umweo wa muyayaya, e lyo bambi bakonaulwa.
“BALELETA ABENGI KU BULUNGAMI”
9-10. Finshi fimbi ifikacitika pa numa ya bucushi bukalamba, kabili ni bani “bakabalika ngo kubalika kwa lwelele”?
9 Belengeni Daniele 12:3. Finshi fimbi ifikacitika pa numa ya “nshita ya kucula”? Ukulunda pa fyo Daniele 12:2 ilanda, icikomo 3 cena cilanda pa fikacitika pa numa ya bucushi bukalamba.
10 Ni bani “bakabalika ngo kubalika kwa lwelele”? Amashiwi Yesu alandile yalembwa pali Mateo 13:43 yalasuka ici cipusho, yatila: “Pa nshita ilya abalungama bakabalika kwati kasuba mu bufumu bwa kwa Shibo.” Ilyo Yesu alandile aya mashiwi, alelanda pa “bana ba bufumu,” e kutila abasubwa abo akateka nabo mu Bufumu bwa ku muulu. (Mat. 13:38) Kanshi amashiwi yaba pali Daniele 12:3 yafwile yalanda pa basubwa na pa mulimo bakabomba mu myaka 1,000 iyo bakateka na Kristu.
Ba 144,000 bakabombela pamo na Yesu Kristu ukutungulula umulimo uukalamba uwa kusambilisha, uukabako pano isonde mu myaka 1,000 (Moneni paragrafu 11)
11-12. Mulimo nshi uo ababa mwi bumba lya ba 144,000 bakabomba mu myaka 1,000?
11 Bushe abasubwa bakaleta shani “abengi ku bulungami”? Abasubwa bakabombela pamo na Yesu Kristu ilyo bakulatungulula umulimo uukalamba uwa kusambilisha, uukabako pano isonde mu myaka 1,000. Ba 144,000 tabakabe fye ishamfumu, lelo bakaba na bashimapepo. (Ukus. 1:6; 5:10; 20:6) Kanshi bakafwilishako ‘ukundapa inko,’ ilyo bakala-afwilisha abantu panono panono ukuba abapwililika. (Ukus. 22:1, 2; Esek. 47:12) Ala abasubwa bakasekelela nga nshi ilyo bakalabomba uyu mulimo!
12 Ni bani abakaba pa “bengi” abo bakaleta ku bulungami? Pali aba pakaba bonse abakabuushiwa na bakapusuka inkondo ya Armagedone, e lyo na bana abakafyalilwa mu calo cipya. Pa mpela ya myaka 1,000, bonse abakalaikala pe sonde bakaba abapwililika. Nomba ni lilali amashina yabo yakalembwa mwi buuku lya mweo ukubomfya inki?
UBWESHO BWA KULEKELESHA
13-14. Finshi abantu bonse pe sonde bakakabila ukucita pa kuti bakapokelele umweo wa muyayaya?
13 Tufwile ukwibukisha ukuti ukuba abapwililika tacipilibula ukuti ninshi umuntu nakwata no mweo wa muyayaya. Tontonkanyeni pali Adamu na Efa. Bali abapwililika lelo balingile no kulanga ukuti bali ne cumfwila kuli Lesa ilyo bashilapokelela umweo wa muyayaya. Ku ca bulanda, tabaumfwilile ukumfwila Lesa.—Rom. 5:12.
14 Nomba cikaba shani kuli bonse abakaba pe sonde pa numa ya myaka 1,000? Bonse bakaba abapwililika. Bushe abantu bonse abakaba abapwililika bakatungilila ukuteka kwa kwa Yehova umuyayaya? Ne lyo bushe bamo bakaba nga Adamu na Efa, abashaumfwilile Lesa nangu ca kuti bali abapwililika? Kuti twaishiba shani ifyasuko kuli ifi fipusho?
15-16. (a) Ni lilali abantu bakalanga nampo nga ba cishinka kuli Yehova nelyo iyo? (b) Finshi fikacitika pa numa ya bwesho bwa kulekeleshako?
15 Satana bakamukaka pa myaka 1,000. Pali ilya nshita takakwate amaka ya kulufya abantu. Nomba pa numa ya myaka 1,000, Satana bakamukakula. Pali iyi nshita yena, akesha na maka ukulufya abantu abapwililika. Ilyo Satana akalaesha abantu bapwililika, ifyo bakalacita e fikalanga nampo nga balitemwa ishina lya kwa Lesa ne mitekele yakwe nelyo iyo. (Ukus. 20:7-10) Ifyo cila muntu akalacita pali ilya nshita, e fikalanga nampo ishina lyakwe bakalilemba mwi buuku lya mweo umuyayaya, nelyo iyo.
16 Abantu bamo abashaishibikwa impendwa, bakacita ifyacitile Adamu na Efa, e kutila bakakaana imitekele ya kwa Yehova. Cinshi cikabacitikila? Baibolo pa Ukusokolola 20:15 itila:“Bonse abashalembelwe mwi buuku lya mweo bapooselwe muli bemba wa mulilo.” Aba bacipondoka bakabonaula umuyayaya. Lelo abantu abengi bakaba abacishinka ilyo bakeshiwa ubu bwesho bwa kulekeleshako. Amashina yabo bakayalemba mwi buuku lya mweo umuyayaya.
IFIKALACITIKA MU “NSHITA YA KU MPELA”
17. Finshi Daniele bamwebele ukuti efikalacitika muno nshiku? (Daniele 12:4, 8-10)
17 Tulaba sana ne nsansa nga twatontonkanya pali fyonse ifili no kucitika ku ntanshi! Na lyo line, malaika alyebele Daniele fino ifyacindama ifili no kulacitika muno nshiku, e kutila mu “nshita ya ku mpela.” (Belengeni Daniele 12:4, 8-10; 2 Tim. 3:1-5) Malaika aebele Daniele ukuti: “Ukwishiba kwine kwine kukafula.” Abantu ba kwa Lesa e bengomfwikisha fye amashiwi ya busesemo ayaba muli ili buuku. Malaika alandile no kuti, “ababifi bakabifya, kabili takuli ababifi nangu bamo abakeluka.”
18. Finshi fili no kucitikila ababifi?
18 Muno nshiku kuti calamoneka kwati tapali nangu cimo icili no kucitikila abantu abacita ifyabipa. (Mal. 3:14, 15) Lelo nomba line, Yesu ali no kupingula ababa nge mbushi, kabili akabapaatula kubaba nge mpaanga. (Mat. 25:31-33) Aba ababifi tabakapusuke ubucushi bukalamba, kabili tabakabuushiwe ukwikala mu calo cipya. Amashina yabo tayakabe mwi “buuku lya kwibukisha” ilyalembwa pali Malaki 3:16.
19. Finshi tulingile ukulacita pali ino nshita, kabili mulandu nshi? (Malaki 3:16-18)
19 Ino nshita e lyo tulingile ukulalanga ukuti tatwaba nga ababifi. (Belengeni Malaki 3:16-18.) Yehova alelonganika bonse abo amona ukuti baba nge ‘cipe caibela,’ e kutila abo amona ukuti balicindama. Ukwabula no kutwishika tulefwaisha sana ukuba pa bo Yehova alelonganika.
Ala tukasekelela nga nshi ilyo tukamona Daniele, balupwa lwesu abo twatemwa ne fibusa e lyo na bambi, uko ‘bakema,’ mu calo cipya! (Moneni paragrafu 20)
20. Finshi Daniele bamulaile mu kulekelesha, kabili mulandu nshi tufwaila ukuti fikacitike?
20 Ukwabula no kutwishika tuleikala mu nshita ya nsansa. Lelo kuli na fimbi ifisuma ifili no kucitika nomba line. Tuli no kumona ilyo ifyabipa fyonse fili no kufumapo. Lyena tuli no kumona ifyo Yehova alaile Daniele, ilyo atile: “Ukema no kuya ku cipendwilo cobe ku mpela ya nshiku.” (Dan. 12:13) Bushe mulafwaisha ukubako ilyo Daniele, pamo na balupwa lwenu abo mwatemwa ne fibusa fyenu, ‘bakema’ na kabili? Ifi nga e fyo mufwaya, namutwalilile ukulabombesha, twalilileni ukuba aba cishinka, kabili kuti mwacetekela ukuti ishina lyenu likatwalilila ukuba mwi buuku lya kwa Yehova ilya mweo.
ULWIMBO 80 “Sondeni no Kumona Ukuti Yehova Musuma”
^ Muli cino cipande twalasambilila pa fyalwike pa fyo twaishibe pa mulimo uukalamba uwa kusambilisha abantu pano isonde uo balandapo pali Daniele 12:2, 3. Twalasambilila ilyo uyu mulimo wa kusambilisha ukabombwa e lyo nabakabomba uyu mulimo. Twalasambilila ne fyo uyu mulimo wa kusambilisha ukalenga abantu bakaipekanye, ilyo ubwesho bwa kulekeleshako bushilacitika ubukabako pa mpela ya myaka 1,000 ilyo Kristu akalateka.
^ Ababomfi ba kwa Yehova aba cishinka abafwile mu nshiku sha kulekelesha, nalimo e bakabalilapo ukubuushiwa. Lyena pakakonke aba mu nkulo shimbi ishali ku numa, mpaka bonse abo Yehova ebukisha bakabuushiwe. Ifi nga e fikalacitika, ninshi aba mu nkulo imo na imo bakalasengela abafwa abakabuuka abo baishibe. Te mulandu ne nshila abafwa bakabuukilamo Amalembo yalanda pa bena Kristu abakabuukila ku muulu ukuti, “onse akabuuka ukulingana ne bumba abamo.” Kabili ifi fine nalimo e fyo cikaba ku bakabuukila pe sonde. Takwakabe icimfulumfulu.—1 Kor. 14:33; 15:23.
^ Ifi e fyalwike pa fyo twaishibe kale ifyaba mu citabo citila Angweniko ku Kusesema kwa kwa Daniele! Icipandwa 17, na mu Ulupungu lwa kwa Kalinda ulwa July 1, 1987, amabu. 21-25.
^ Nomba amashiwi ya kuti “abalungama”, na “abashalungama” ayaba pa Imilimo 24:15 na mashiwi ya kuti “abalecita ifisuma” e lyo na ya kuti “abalecita ifyabipa” ayaba pali Yohane 5:29, yalanda pa fyo abakabuushiwa balecita ilyo bashilafwa.
