Pali 1 Abena Korinti 15:8, Paulo atile: “Mu kulekelesha amoneke kuli ine, ne wali ngo mwana uwafyalwa bwangu ilyo inshita ya kufyalwa tailafika.” Kale twalelondolola ukuti ilyo Paulo alandile aya mashiwi, afwile alelanda pa fyacitike ilyo Yesu uwali ku muulu amoneke kuli ena mu cimonwa. Cali kwati alifyelwe, nelyo ukubuushiwa mu mupashi ilyo inshita tailafika, imyaka iingi ilyo tabalatendeka ukubuukila mu mupashi. Nomba pa numa ya kusambililapo sana pali ili lembo, cilemoneka ukuti tufwile ukwaluka mu fyo twalelondolola ici cikomo.

Ca cine ukuti Paulo alelanda pa fyamucitikile ilyo ayalwike ukuba Umwina Kristu. Nomba ni mwi aloseshe ilyo atile ali “ngo mwana uwafyalwa bwangu ilyo inshita ya kufyalwa tailafika”? Nalimo aloseshe mu kuti:

Alyalwike bwangu ukuba Umwina Kristu. Cilapapusha nga ca kuti umwana afyalwa ilyo inshita ya kufyalwa tailafika. Ilyo Sauli (uo baishiletendeka ukwita ukuti Paulo) ali pa lwendo lwa kuya ku Damaseke ku kucusha Abena Kristu, tale-enekela ukutila kuti amona icimonwa ca kwa Yesu uwabuushiwa. Paulo umwine e lyo na Bena Kristu aba mu Damaseke abo aleya mu kucusha balipapile ilyo ayalwike no kuba Umwina Kristu. Na kabili, ici cacitike calimupawishe ica kuti alitalile aleka no kumona.—Imil. 9:1-9, 17-19.

Aishileba Umwina Kristu “pa nshita iishali bwino.” Ishiwi lya ciGriki ilyo bapilibula ukuti “uwafyalwa bwangu ilyo inshita ya kufyalwa tailafika,” kuti balipilibula no kuti, “uwafyalwa pa nshita iishili bwino.” Baibolo ya The Jerusalem Bible yena itila: “Nali ngo wafyalwa ilyo bashalenjenekela.” Ilyo Paulo aleba Umwina Kristu, ninshi Yesu aliya kale ku muulu. Paulo tamweneko Yesu ilyo abuushiwe, lelo abo alandilepo mu fikomo fyafumineko bena balimumwene. (1 Kor. 15:4-8) Kanshi filya Yesu amoneke kuli Paul, calengele Paulo amumone pa numa ya kubuushiwa kwakwe, nangu ca kuti camoneke kwati cali ni “pa nshita iishali bwino.”

Aleicefya fye pa kulanda. Abasambilila bamo batila, amashiwi Paulo abomfyeshe yalelangilila fye kuti aleimona ukuti taali uwacindama. Ici nga cine, ninshi Paulo alelanda fye ukuti talingile ukuba umutumwa. Na kuba alandile no kuti: “Pantu nine nacepesha pa batumwa, kabili nshalinga ukwitwa umutumwa, pa mulandu wa kuti nacushishe icilonganino ca kwa Lesa. Lelo icikuuku ca kwa Lesa e calenga ukuti mbe fino ndi.”—1 Kor. 15:9, 10.

Kanshi ilyo Paulo alandile aya mashiwi, cimoneka kwati alelosha kuli filya ashale-enekela ukuti Yesu alamonekela kuli ena kabili aisaba no Mwina Kristu, kuli filya aishileba Umwina Kristu pa nshita iishali bwino, nelyo pa mulandu wa kuti alemona kwati talingile ukumona icimonwa amwene. Te mulandu ne calengele alande aya mashiwi, Paulo aletasha sana pali ifi fyamucitikile. Fyalengele ashininkishe ukuti Yesu alibuushiwe. E calengele alelanda sana pali ifi fyacitike ilyo alebila imbila nsuma ku bantu pa kubuuka kwa kwa Yesu.—Imil. 22:6-11; 26:13-18.