Abapya Balundwako kwi Bumba Litungulula

PA CIBELUSHI, pa October 2, 1999, Ukukumana kwa pa Mwaka ukwa Watch Tower Bible and Tract Society of Pennsylvania kwapwile no kubilisha kushaleenekelwa. Abasangilweko nelyo ukumfwila pa foni, abaali 10,594 balisekelele nga nshi ukumfwa ukuti bamunyina bane balilundilweko kwi Bumba Litungulula ilya Nte sha kwa Yehova. Aba bapya, bonse bene abali Bena Kristu basubwa ni ba Samuel F. Herd; ba M. Stephen Lett; ba Guy H. Pierce; na ba David H. Splane.

• Ba Samuel Herd batendeke bupainiya mu 1958, kabili babombele mu muputule na mu citungu ukufuma mu 1965 ukufika mu 1997. Ukufume lyo, baba mu lupwa lwa Bethel ulwa ku United States capamo na bakashi ba Gloria, kabili ba Herd babomba mu Dipartimenti ya Mulimo. Baleyafwilishako na mu Komiti ya Mulimo iye Bumba Litungulula.

• Ba Stephen Lett batendeke bupainiya mu December 1966, kabili ukufuma mu 1967 ukufika mu 1971, balebomba pa Bethel wa ku United States. Mu October 1971, baupile abakashi bali na bo, ba Susan, e lyo baile na muli bupainiya bwaibela. Ukutula mu 1979 mpaka 1998, bali bakangalila wa muputule. Ukutula mu April 1998, baishileba mu lupwa lwa Bethel ulwa ku United States capamo na bakashi ba Susan. Ba Lett balibomba mu Dipartimenti ya Mulimo kabili baleafwilisha muli Komiti ya Kusambilisha uwe Bumba Litungulula.

• Ba Guy Pierce batalile bakusha abana e lyo baishiletendeka bupainiya na bakashi babo mu April 1982. Bali bakangalila wa muputule ukufuma mu 1986 ukufika 1997, ilintu baishileba mu lupwa lwa Bethel ulwa ku United States capamo na bakashi ba Penny. Munyina Pierce aleyafwilishako mu Komiti ya Bakabomba iye Bumba Litungulula.

• Ba David Splane batendeke bupainiya mu September wa 1963. Basambilile mwi sukulu lya Gileadi ilyalenga 42, kabili bailebomba bumishonari ku Senegal, muno Afrika, lyene pa myaka 19 bali bakangalila wa muputule ku Canada. Ukutula mu 1990, balibomba mu Bethel wa ku United States na bena myabo ba Linda, uko Munyina Splane aabomba mu dipartimenti ya Mulimo ne ya Kulemba. Ukufuma mu 1998, balafwilishako Komiti ya Kulemba iye Bumba Litungulula.

Ukusanshako aba bapya bane, Ibumba Litungulula nomba lilimo na ba C. W. Barber, ba J. E. Barr, ba M. G. Henschel, ba G. Lösch, ba T. Jaracz, ba K. F. Klein, ba A. D. Schroeder, ba L. A. Swingle, na ba D. Sydlik. Bonse tulepepa ukuti Yehova atwalilile ukupaala Ibumba Litungulula ilikuliileko nomba no kulikosha, ilyo liletwalililo kwangalila abantu ba kwa Lesa mwi sonde lyonse no kubabombela ifya ku mupashi.