Tulakabila Ukuteyanya kwa kwa Yehova

BUSHE mwalyumfwapo umuntu asosa ukuti, “Nalisumina muli Lesa lelo nshifwaya ukuteyanya kwa mipepele”? Abalande fi ilingi line ni balya aba kuti pa kashita kamo balitemenwe sana ukuya ku calici nomba pali ndakai tabayako pa mulandu wa kuti icalici baleyako talyabekwishe lwa ku mupashi. Te mulandu no ku kufuupulwa, abengi balafwaisha ukupepa Lesa. Lelo basoobolapo ukupepa beka mu nshila intu balefwailamo mu cifulo ca kuya ku calici atemwa ukuba mu kuteyanya kumo.

Bushe Baibolo yalandapo shani? Bushe Lesa afwaya Abena Kristu ukuba mu kuteyanya?

Abena Kristu ba Kubangilila Balimwenenemo mu Kuteyanya

Pa Pentekoste ya mu 33 C.E., Yehova apongolwele umupashi wakwe uwa mushilo pa baume na banakashi abalongene “palya pene,” e kuti, mu muputule wa pa muulu mu Yerusalemu, tacitile fyo ku muntu umo umo lelo kwi bumba lya bantu. (Imilimo 2:1) Ni pali iyi ine nshita, e pantu icilonganino ca Bwina Kristu capangilwe, kabili uku kuteyanya kwalundulwike ukufika na ku fyalo fimbi. Lyali lipaalo ilikalamba ku basambi ba kubalilapo. Mulandu nshi? Pa mulandu wa kuti bapeelwe umulimo wacindama uwa kushimikila imbila nsuma ya Bufumu bwa kwa Lesa iyo mu kupita kwa nshita yali no kubilwa “ku fyalo fyonse.” (Mateo 24:14) Abakokole mu cilonganino balesambilisha abapya ifya kubomba umulimo wa kushimikila.

Mu kwangufyanya imbila ya Bufumu yabililwe mu Yerusalemu na mu ncende shimbi. Pa kati ka ba 62 na 64 C.E., umutumwa Petro alembele kalata wakwe uwa kubalilapo ku Bena Kristu “basalangana ba mu Ponte, mu Galatia, mu Kapadokia, mu Asia, na mu Bitunia,” ishi ncende shonse shaba mulya ilelo mwitwa Turkey. (1 Petro 1:1) Bambi baali mu Palestine, mu Lebanone, mu Suria, mu Kupro, mu Yabani, mu Krete, na mu Italia. Nga fintu Paulo alembele ku bena Kolose mu 60-61 C.E., imbila nsuma ‘yalibililwe ku cibumbwa conse mwi samba lya muulu.’—Abena Kolose 1:23.

Abali mu kuteyanya balimwenenemo na kabili ukupitila mu kukoseleshanya na Bena Kristu banabo. Ukusangwa mu kulongana kwabapeele ishuko lya kumfwa amalyashi ya kukoselesha, ukusambilila Amalembo ya Mushilo capamo, ukushimika amalyashi ya kukoshe citetekelo pa fintu bapitilemo, no kupepela pamo na bamunyinabo. (1 Abena Korinti, icipandwa 14) Kabili abaume bafikapo ‘bacemene umukuni wa kwa Lesa.’—1 Petro 5:2.

Abena Kristu ba kubalilapo balishibene no kutemwana apantu bali mu cilonganino cimo. Kabili  tabamwene ukuba mu cilonganino nge cisendo, lelo nge ca kubafwa ukukuulilila no kukosha icitetekelo cabo.—Imilimo 2:42; 14:27; 1 Abena Korinti 14:26; Abena Kolose 4:15, 16.

Umulandu umbi uo icilonganino calekabilwa pa bantu baikatana mu calo conse, atemwa ukuteyanya, wali wa kukosha ukumfwana pa kati kabo. Abena Kristu basambilile ‘ukusosa akanwa kamo kene.’ (1 Abena Korinti 1:10) Ici cali icakabilwa. Mu cilonganino mwali abantu ba masomo yapusanapusana kumo ne fikulilo. Ne ndimi balelanda shali ishalekanalekana, nelyo buntu bwine ukwabula ukutwishika bwali ubwapusana. (Imilimo 2:1-11) Limo limo kwaleba ukupusana kwafumaluka ukwa mimwene ya fintu. Nangu line, Abena Kristu abene beka mu cilonganino e balefumyapo ukupusana pa kati kabo.—Imilimo 15:1, 2; Abena Filipi 4:2, 3.

Amepusho yakosa ayo baeluda mu cilonganino balefilwa ukwasuka baleipusha bakangalila benda abafikapo, pamo nga Paulo. Lelo imilandu yaafya iyakumine ifisambilisho yena baleipusha ibumba lyaletungulula mu Yerusalemu. Pa kwamba abatumwa ba kwa Yesu Kristu beka beka e bapangile bumba litungulula lelo mu kupita kwa nshita abakalamba ukufuma mu cilonganino ca mu Yerusalemu balilundilweko. Ifilonganino fyonse fyacindike ubulashi Lesa apeele kwi bumba litungulula na beminishi ba liko mu kutungulula umulimo, ukusonta abaume aba kwangalila umulimo, no kupikulula imilandu yakumine ifisambilisho. Lintu ibumba litungulula lyapikulula umulandu, ifilonganino fyaleumfwila kabili “basekelele pa cisansamushi icaletelwe.”—Imilimo 15:1, 2, 28, 30, 31.

Cine cine, Yehova abomfeshe ukuteyanya mu mwanda wa myaka uwa kubalilapo. Nga ilelo?

Tulakabila Ukuteyanya Ilelo

Ukupala abanabo ba mu mwanda wa myaka uwa kubalilapo, Inte sha kwa Yehova ilelo balikatamika umulimo bapeelwa uwa kushimikila imbila nsuma ya Bufumu. Inshila imo iyo babombelamo uyu mulimo yaba kwananya amaBaibolo ne mpampulo shafwilisha ukumfwikisha Baibolo, e ico, pa kubomba bwino ukuteyanya kulakabilwa.

Impapulo sha Bwina Kristu shifwile ukulembwa bwino, ukupitulukwamo no kumona ukuti fyonse nafilungama, ukupulintwa, no kutwala mu filonganino. Kabili Umwina Kristu umo umo mu kuitemenwa alasenda impapulo no kutwalila abengafwaya ukubelenga. Muli iyi nshila ubukombe bwa Bufumu bwalibilwa ku bantu abengi. Bakabilisha ba mbila nsuma balesha na maka ukubomba umulimo mu muyano, ukumona ukuti ififulo fya mulimo fyonse fyabombwamo. Fyonse ifi fyatantawilwa fikabila ukuteyanya.

Apo “Lesa taba na kapaatulula ka bantu,” amaBaibolo ne mpapulo shilanda pali Baibolo fifwile ukupilibulwa. (Imilimo 10:34) Pali ndakai, ino magazini ipilibulwa mu ndimi 132, na Loleni!, mu ndimi 83. Pa kuti amabumba ya bakapilibula mu calo conse yabombe bwino ukuteyanya kulakabilwa.

Ilyo ababa mu cilonganino balesangwa ku kulongana kwa Bwina Kristu ukunono no kukalamba balakoseleshiwa. Pantu kulya e ko bomfwa amalyashi ya Baibolo ayakoselesha, e ko basambilila Amalembo capamo, ukushimikilako bambi ifya kukumanya fya kukuulilila, no kupepa na basumina banabo. Kabili ukupala bamunyinabo aba mu mwanda wa myaka uwa kubalilapo, lintu bakangalila benda kabili ababa no kutemwa babatandalila icitetekelo cabo cilakoselako. Na muli fyo, Abena Kristu ba lelo babo “mukuni umo, umucemi umo.”—Yohane 10:16.

Inte sha kwa Yehova tashapwililika, nga filya fine Abena Kristu banabo aba kubalilapo bashapwililike. Nangu cibe fyo, balabombela pamo. Na muli fyo, umulimo wa kushimikila pa lwa Bufumu ulepwishishiwa mu calo conse.—Imilimo 15:36-40; Abena Efese 4:13.

[Icikope pe bula 31]

Abena Kristu ba lelo babo “mukuni umo, umuceni umo”