Ibuuku lya kwa Daniele Lyalondololwa!

ABASANGILWE kwi bungano balefwaisha ukupokako kope wabo uwa citabo cipya icafumine ica mabuula 320, icaleti Angweniko ku Kusesema kwa kwa Daniele! Bushe bayumfwile shani pa lwa ici citabo? Natumone ifyo bamo basosele.

Anya atila: “Nga bapungwe abengi, nshiipakisha ukubelenga ilyashi lya kale. E co lintu napokelele kope wandi uwa ici citabo cipya icaleti Angweniko ku Kusesema kwa kwa Daniele! nshalefwaisha ukucibelenga, lelo nalicibelengele. Mwandi nali ne mimwene yalubana! Pa fitabo ifisuma ifyo nabelengapo ici cawamisha. Te kuti ufwaye ukuleka ukucibelenga nga watendeka! Nomba nalileka ukumfwa kwati ndebelenga ilyashi lyacitike kale sana. E muku wa kubalilapo ukutendeka ukuyumfwa nga Daniele. Kuti naelenganya ifyo cingaba ukufuma ku lupwa, ukutumwa ku calo cimbi, na bumpomfu bobe ukweshiwa cila nshita. Ndetasha nga nshi pali ici citabo.”

Chester atila: “Icingafwa sana bukombe bwaumfwika ubwa kuti Yehova alalama ifikuma abantu bakwe. Mu fimonwa fya kwa Daniele ne filoto ne fya bambi ifyo alongwele, nacumfwika ukuti Yehova lyonse alenga ifintu ukucitika ukulingana ne mifwaile yakwe. Ici cikosha isubilo twakwata mu kusesema kusangwa mu Baibolo pa lwa calo cakwe icipya.”

Joy atila: “Nalitemenwe ifyo mwalondolwele Daniele. Naishilemwishiba bwino pa mulandu wa nshila mwalondolwelelemo ifyo alesakamana ne fyalemusakamika. Naumfwikishe umulandu Yehova amutemenwe. Mu mesho yakwe yonse no kupakaswa, taimwene ngo wacindama. Ayangilwe kuli Yehova na kwi shina Lyakwe ilishaiwamina. Ndemutasha pa kulondolola ifi fishinka.”

Mark atila: “Ici e co twalelolela! Tatwabalalangwapo ifyo ibuuku lya kwa Daniele lyakuma umo umo muli uyu musango. Pa numa ya kubelenga ifingi muli ici citabo cipya mu cungulo bushiku, pa bushiku nacipokelele, natalile naleka ukubelenga pa kuti ntashe Yehova mwi pepo.”

Bethel atila: “Tatwaishibe ukuti ici citabo cali no kukuma abana besu. Umo ali ne myaka isano e lyo umbi ali ne myaka itatu. . . . Nangu cingati pa malyashi batemwa aya mu Icitabo Candi ca Malyashi ya mu Baibolo paba na ya kwa Daniele, Hanania, Mishaele, na Asaria, ifyo balondololwa mu citabo ca Ukusesema kwa kwa Daniele fyalibakumine mu nshila tushaenekele. Nangu cingati baice, balapashanya aba balumendo ba bulungami. Mwandi baba fipasho fisuma ku bana besu! We cisolobelo ubusuma mwatupeela! Ndetasha sana!”

Lydia atila: “Naumfwile kwati nali pamo na balya balumendo ba ciHebere ilyo icitetekelo cabo caleeshiwa; kabili ico canengele ukubebeta icitetekelo candi. Umukululo wa kupitulukamo uutila “Finshi Mwailukamo?” ulenga umo ukumfwikisha ifili mu cipandwa. Na kabili ndetasha pali ici citabo na cimbi icishaiwamina.”