Finshi Fingalenga Umo Ukutunguluka?

BASHIMAKWEBO babili abalumendo balebombela pali mashini umupya uwali no kupita mu bwesho bwacindeme. Mu kupumikisha, icipuupu capuupile pali ici cipe canaka, ukucipuupila mu muulu, no kuciponesha pa nshi ninshi ciishile ciletobaika. Apo balifuupwilwe, aba baume baiminine fye tondolo. Ico bapooseleko amano na maka ilyo balebombelapo nomba cashele fye mwina wa mbao sheka sheka ne nshimbi.

Kuli Orville na Wilbur Wright, icacitike pali bulya bushiku bwa mu October 1900 tacali e ca kubalilapo mu kubabwesesha ku numa mu mulimo wabo uwa kupanga mashini uupupuka uwafina ukucila umwela. Kale kale bali nabapoosapo imyaka ne ndalama ishingi mu kweshaesha.

Lelo, kuli pele pele, balilambwilwe pa mute wabo. Pa December 17, 1903, pa Kitty Hawk, North Carolina, ku United States, aba bamunyina babili ba mwana Wright balipupwishe cilya cimbayambaya pa masekondi 12—nga kulinganya ku fyo indeke shipupuka ilelo iyo yali ni nshita iinono, lelo yali ni nshita iitali iya kwalwilamo icalo ku ciyayaya!

Mu fintu ifingi, ukutunguluka kushintilila sana pa kutekanya no mupampamina. Nampo nga kusambilila ululimi, ukusambilila umulimo, nelyo fye ukulundulula bucibusa, ifingi ifyacindama fisako fye ukupitila mu kubombesha. Kalemba Charles Templeton atila: “Ilingi ukutunguluka kushintilila mu kulungatika pa cintu cimo: ukubombesha.” Kalemba wa mikululo Leonard Pitts, Jr., atila: “Tulanda pa lwa kulamuka, tutila lishuko, lelo ilingi, tusuula ifintu ifyacindamisha. Ukubombesha no kukanatunguluka mu fingi. Ukubomba amaawala ayengi.”

Ici cishininkisha ifyo Baibolo yalandilepo kale ukuti: “Ukuboko kwa bacincila kukateka.” (Amapinda 12:24) Ukupikintika kupinda ukuba no mupampamina mu mibombele yesu. Ici cilakabilwa nga tuli no kutunguluka mu fyo tulecita. Bushe umupampamina cinshi? Kuti twaba shani no mupampamina mu fyo twapanga ukucita, kabili ni muli finshi tulingile ukuba no mupampamina? Ifi fipusho fili no kwasukwa mu cipande cikonkelepo.

[Abatusuminishe Ukubomfya Icikope pe bula 3]

Icikope ca ba U.S. National Archives