Ilyashi lya Bakabilisha ba Bufumu

Ukwaafwa Abantu ba Misango Yonse ku Netherlands

ABRAHAMU ali muntu uwakwete icitetekelo caibela. Umutumwa Paulo atile “ilyo aitilwe,” Abrahamu aumfwilile ishiwi lya kwa Lesa kabili “alifumine ukwabulo kwishiba uko aleya.” Ilyo akuushishe ulupwa lwakwe lonse, Abrahamu “aikalile umulebeshi mu calo icalailwe” pa myaka 100 iyasheleko iya bumi bwakwe.—AbaHebere 11:8, 9.

Na lelo line, Inte sha kwa Yehova ishingi shalisumina ukucita icintu cayafya ica kuya ku calo cimbi ukwaba ukukabila kukalamba ukwa bakashimikila. Bambi balisambilila ululimi lumbi pa kuti bengalashimikila abafuma ku fyalo fimbi abaisa mu calo cabo. Nga fintu ifya kumwenako fikonkelepo filelangilila, uku kubomba kushaiwamina kwalisula “umwinshi ukalamba kabili uwa kubombeshamo” ku Netherlands ukwaba abantu amamilioni 15 , kabili abantu milioni umo bafuma ku fyalo fimbi.—1 Abena Korinti 16:9.

◻ Bahram uwali kale kafundisha wa fya kulwa Kung Fu, afumine ku calo ca ku Middle East. Alipokele Baibolo ne fitabo fya Watch Tower Society. Mu mweshi fye umo, Bahram alilwike ukuti alisangile icine. Alitendeke ukusambilila Baibolo no mukashi wakwe. Lelo ubwafya bakwete bwali bwa kuti uwalebasambilisha Baibolo taishibe ukulanda ululimi balanda. Balebomfya fye ifishibilo, kabili batile balelandila “ku maboko na ku makasa.” Ilyo papitile inshita, Bahram no mukashi wakwe balisangile icilonganino uko balanda ululimi lwabo, kabili balilundulwike bwangu. Nomba Bahram ni Nte yabatishiwa.

◻ Bapainiya baupana abena Holland balandile no mwaume uwafuma ku calo ca Indonesia uwaiminine ku ntanshi ye tuuka likalamba. Alipapile icine cine lintu abaupana bamusoseshe mu lulimi alanda. Lyene balitantike ukumutandalila ku mwakwe. Baishileishiba ukuti alikeleko ku Russia pa myaka 20, kabili e nshita abele incenshi yaishiba amalwele ya banakashi. Aleitunga ukuba mukanalesa, lelo alisumine ukuti lyonse lintu aleafwilisha banamayo ukupaapa, alesunguka sana no kutila “Iye, fintu umubili wa muntunse wapwililika! Mwandi cipapwa!” Alisumine ukusambilila Baibolo kabili aishilesumina ukuti kwaliba Kabumba uusakamana abantunse. (1 Petro 5:6, 7) Alibatishiwa pali nomba kabili alongana ku cilonganino icilanda icina Indonesia mu musumba wa Amsterdam.

◻ Ku Rotterdam, icishi caba pa fishi ifyakulisha mwi sonde, ibumba lya bapainiya lyaliba ilyalamuka ukushimikila ku bantu abalanda indimi shapusanapusana abesa ne fimaato cila bushiku. Pa mulandu wa mibombele ya ili bumba lyacincimuka ilya bakashimikila, ababombela ku fimaato abengi ukusanshako no mukalamba wa bensha fimaato, no mulashi wa baume ba fimaato no wali kale kalinda wa muntu umbi balisambilila icine. Pali nomba baleafwilishako ukushimikila konse konse imbila nsuma ya Bufumu bwa kwa Lesa.—Mateo 24:14.

Nga fintu fye caba mu ncende shimbi mu calo, Inte sha kwa Yehova ku Netherlands shalipampamina pa kubomba umulimo wa kushimikila imbila nsuma ku luko lonse, umukowa, ululimi na bantu.—Ukusokolola 14:6.