Ubumi Bwabo

Yehova E Cubo Kabili Ubukose Bwandi

NGA FINTU CASHIMIKWA NA MARCEL FILTEAU

“Nga ukoopwa kuli ulya, uli no kuya ku cifungo.” Aya e mashiwi abantu baleeba umwanakashi nalefwaya ukuupa. Kantale nshimike umulandu balelandila aya mashiwi ilyo nshilaya kutali.

ILYO nafyelwe mu 1927, icitungu ca Quebec conse mu Canada caiswilemo fye baKatolika. Pa numa ya myaka mupepi na ine, Cécile Dufour, kashimikila wa mbila nsuma uwa nshita yonse kabili Inte ya kwa Yehova, atendeke ukututandalila ku ng’anda mu musumba wa Montreal. Ilingi line, abena mupalamano besu balemutiinya. Na kuba, balimwikete no kumucusha imiku iingi pa mulandu wa kushimikila ubukombe bwa mu Baibolo. E co mu kwangufyanya twasambilile fintu amashiwi ya kwa Yesu yapilibula icine cine ayatila: “Mukaba abapatwa ku nko shonse pa mulandu we shina lyandi.”—Mateo 24:9.

Pali ilya nshita, nga ca kuti ulupwa lwa mu Canada ulwalelanda iciFrench lwafuma mu Calici lya ciKatolika caleba buwelewele. Nangu cingati abafyashi bandi tababatishiwe no kusanguka Inte sha kwa Yehova, ukushininwa kwena balishininwe ukuti ifisambilisho fya mu Calici lya ciKatolika tafyaleumfwana na fintu Baibolo ilanda. E co fwe bana bonse 8 batukoseleshe ukubelenga impapulo shasabankenye baNte, kabili bonse fwe basalilepo ukumfwile cine ca mu Baibolo twalyafwilishiwe bwino.

Ukuba Abashipa mu Nshita Shayafya

Mu 1942, ninshi ncili pa sukulu, natemwishishe ukusambilila Baibolo. Pali ilya nshita Inte sha kwa Yehova shalibindilwe mu Canada pa mulandu wa kuti balekonka ica kumwenako ca Bena Kristu ba kubalilapo kabili nelyo fye ni mu mbuli sha nko tabaibimbilemo. (Esaya 2:4; Mateo 26:52) Umukalamba wandi, Roland, apooselwe mu kamba umwali ukubombe incito ya cibe pantu  alikeene ukulwako inkondo ya calo conse.

Pali iyi ine nshita, e lyo na batata bampele ibuuku lyalembelwe mu ciFrench ililanda pa macushi Inte sha kwa Yehova ku Germany shaculileko pa mulandu wa kukanaibimba mu bulwi bwa kwa Adolph Hitler. * Ifyo nabelengele fyanengele ukuyumfwa ukuti mfwile na ine ukuba pa bantu bashipa kabili aba bumpomfu nga balya, e co nayambile ukusangwa ku kulongana kwa Nte sha kwa Yehova ukwalebela mu ng’anda ya kwa munyina fye. Bwangu bwangu bandaalike ukulaya mu kushimikila. Ukwishiba kwena nalishibe ukuti nangu ndesumina ukuya mu kushimikila, bushiku bumo nkekatwa no kubikwa mu cifungo.

Pa numa ya kupepela ubukose, nakunkushishe pa ng’anda ya kubalilapo. Umwanakashi uwalemoneka uwatekanya alyaswike, kabili lintu napwile ukumweba ishina lyandi, namubelengeele amashiwi yaba pali 2 Timote 3:16 ayatila: “Amalembo yonse yantu yapuutwamo kuli Lesa, kabili ya mulimo.”

E lyo namwipwishe ukuti: “Bushe kuti mwatemwa ukusambilila ifyafulilako pa lwa Baibolo?”

Umwanakashi ayaswike ukuti, “ee.”

Namulaile ukubwelelako na cibusa wandi uwaishibe Baibolo ukucila ine, na kabushe ifyo fine e fintu nacitile umulungu wakonkelepo. Pa numa ya ici, nalikoseleko, no kusambilila icishinka ca kuti tatubombela umulimo ku maka yesu. Nga fintu umutumwa Paulo alandile, Yehova e utwaafwa. Cine cine, calicindama ukulaibukisha ukuti “ukucishamo kwa maka kube kwa kwa Lesa, kabili te kuntu kwafuma kuli ifwe.”—2 Abena Korinti 4:7.

Ukutula lilya, ukushimikila, ukwikatwa no ku pooswa mu cifungo e fyalencitikila. E mulandu wine no mwanakashi nalefwaya ukuupa balemwebela abati, “Nga ukoopwa kuli ulya, uli no kuya ku cifungo”! Nangu line, ifi fintu tafyancimfishe. Nga ca kuti twalaala mu cifungo ubushiku bumo, ilingi line Munyina aleisa no kulipila indalama pa kuti batufumye.

Ukupingulapo Kwacindama

Mu April 1943, naliipeele kuli Yehova no kubatishiwa mu menshi. Kabili mu August 1944, nalisangilwe na ku kulongana kukalamba pa muku wa kubalilapo, ukwabelele mu Buffalo, New York, United States, bushilya bwa mupaka wa Canada. Abasangilweko baali 25,000, kabili amalyashi yaliko yabimbwile ukufwaisha kwandi ukwa kuba painiya, e fintu bakabomba ba nshita yonse aba Nte sha kwa Yehova babeta. Icibindo pa mulimo wa Nte sha kwa Yehova mu Canada cafumishiwepo mu May 1945, e co umweshi wakonkelepo natendeke bupainiya.

Nangu cibe fyo, ilyo umulimo wa kushimikila waleya pa muulu, no kutwalwa ku cifungo libili libili kwacilileko. Bushiku bumo ine na Mike Miller batubikile mu kalyati kamo kene. Uyu mwaume  aali ne citetekelo, kabili aali nabombela Yehova imyaka iingi. Twaikele pa nshi no kulanshanya. Ukulanshanya kwesu kwalinkuulilile no kunkoselesha sana lwa ku mupashi. Nangu cibe fyo, limbi limbi fye, natendeke ukuipusha mu mutima ukuti, ‘Nomba fino tuli babili nga ca kuti twapusana no kuleka ukusoshanya kuti caba shani?’ E ico inshita yonse naikele no yu munyina mu cifungo yansambilishe icintu cimo icacindamisha mu bumi bwandi ica kuti tulakabila bamunyinefwe kabili tufwile ukulaelela no kubelela bambi uluse. Nakana nga te ifyo, fintu umutumwa Paulo alembele e fingacitika. Atile: “Nga mulasumana no kufunsana, cenjeleni epali mwaonana.”—Abena Galatia 5:15.

Mu September 1945, banjitile ukuyabombela pa maofeshi ya Watch Tower Society mu Toronto, Canada, apetwa ukuti Bethel. Programu wa ku mupashi nasangile kulya aali wa kukuulilila kabili uwa kukosha icitetekelo. Umwaka wakonkelepo, bampeele umulimo wa kubombela mwi famu lya pa Bethel, ilyabelele lwa ku kapinda ka ku kuso aka maofeshi ya Sosaite, apalepele bakilomita mupepi na 40. Lintu nalesaba ifisabo na Anne Wolynec, nkashi wacaice, nakumbilwe imipangilwe yakwe no kupimpa kwakwe mu mulimo wa kwa Yehova. Twalanshenye pa lwa kuupana, kabili mu January 1947 twalyupene.

Pa myaka ibili na hafu iyakonkelepo, twabombele bupainiya mu London, na mu Ontario, kabili lintu twafumine kulya twailebombela pa cishi ca Cape Breton, apo twayafwilisheko ukupanga icilonganino. E lyo, mu 1949, balitwitile ukuyasangwa mwi kalasi lyalenga 14 ilya Watchtower Bible School of Gilead, umo twailekanshiwa ukuba bamishonari.

Ukubomba Bumishonari mu Quebec

Ababalilepo ukupwisha amakalasi ya Gileadi mu Canada mu myaka ya ku numa babatumine ukuyatendeka umulimo wa kushimikila mu Quebec. Mu 1950, ifwe na bambi 25 ukufuma mwi kalasi lyalenga 14 batutumine kulya kwine. E ico kwali ukwingilishiwako ku mpendwa ya bamishonari ica kuti no mulimo walilundulwike, lelo ici calengele bashimapepo ba ciKatolika ukusonga abantu ukutendeka ukutupakasa no kutwimine bungwe.

Lintu twafikile mu musumba wa Rouyn, papitile fye inshiku shibili ukutula apo twatendekele bumishonari, Anne balimwikete bamubika na muli motoka wa bakapokola. Kuli Anne uyu wali e muku wa ntanshi ukwikatwapo, pantu afumiine ku kamushi kabelele mu citungu ca Manitoba, mu Canada, uko bakapokola bashalemoneka libili libili. Ukuba kwena alyumfwile umwenso sana, kabili aibukishe amashiwi ya kuti, “Nga ukoopwa kuli ulya, uli no kuya ku cifungo.” Lelo, lintu motoka talati ateuke, bakapokola bamwene uko naleisa no kunjikata bampoosa na muli motoka walimo Anne. Anne ayawike no kusosa ati: “Natemwa ukumumona!” Lelo, aalemoneka ukukanasakamikwa ilyo aalesosa ukuti, “Kwena, ifi fine fyatucitikila e fyacitikile na batumwa ilyo baleshimikila pa lwa kwa Yesu.” (Imilimo 4:1-3; 5:17, 18) Lelo pa numa ya kulipila indalama balitulekeleko.

Papitile mupepi no mwaka umo ukutula apo filya fyacitikile, kabili bushiku bumo nali mu bunte bwa ku ng’anda ne ng’anda mu cifulo cesu ica kubombelamo icipya mu Montreal, e lintu naumfwile congo mu musebo. Kuti ukumona awe libumba lya bantu nabakalipa balepoosa na mabwe. Ilyo nati kampalame uleke mpokololeko Anne no mubiye, ala mukwai ni mu kanwa nkokwele namona fye bakapokola bafika apo pene. Lelo icapapwishe ca kuti mu cifulo ca kwikata bamo pa bantu balepanga icongo, baikete Anne no munankwe! Ilyo baali mu cifungo, Anne acinkwileko Nte mupya ukuti filya Yesu alandile cine cine fyalecitika kuli bena, pantu atile: “Mukaba abapatwa ku bantu bonse pa mulandu we shina lyandi.”—Mateo 10:22.

Limo kwali imilandu mupepi na 1,700 intu bapeele Inte sha kwa Yehova kabili ishalelolela ukulubulula mu Quebec. Imilandu yonse baletupeela yali ya kuti twalesabankanya impapulo shalelanda pa kwimina ubuteko no kukaanapoka ulusa lwa kwananishishapo ishi mpapulo. E ico, Icipani cilolesha pa mafunde ya calo ica Watch Tower Society catwele ubuteko bwa mu Quebec ku cilye. Pa numa ya kulubulula imyaka iingi, Yehova atupeele ukucimfya kubili mu milandu yalubulwilwe mu Cilye Cikalamba ica mu Canada. Mu December 1950, umulandu wa kuti twalesabankanya impapulo shalelanda pa kwimina ubuteko  walipwile, kabili mu October 1953, batubweseshe nsambu shesu isha kusabankanya impapulo ukwabula ukupoka ulusa ku uuli onse. Na muli fyo twalimwene icine cine fintu Yehova aba “icubo kabili ubukose, mu fya kumanama asangwa ukwafwa apakalamba.”—Amalumbo 46:1.

Icawemeko cali ca kuti, Inte sha kwa Yehova mu Quebec shalifulileko ukufuma pali 356 mu 1945, lintu natendeke bupainiya, ukufika ku bacilile 24,000 pali ndakai! Ifi fyacitika fifikilisha ukusesema kwa mu Baibolo ukutila: “Icilwilo conse icafulilwa iwe tacakashuke; no lulimi lonse ulwaimina iwe mu kupingula ukalufulunganya.”—Esaya 54:17.

Twaya mu Kubombela ku France

Mu September 1959, ine no mwina mwandi Anne batwitile ukuyabombela pa Bethel mu Paris, ku France, kabili umulimo bampeele wali wa kwangalila ukupulinta. Ilyo tushilaya kulya, impapulo shalepulintwa na kampani ka makwebo, ukufika na lintu twaile kulya mu January 1960. Apo Ulupungu lwa kwa Kalinda lwalibindilwe mu France, twatendeke ukupulinta umusango wa magazini umo pa mweshi uwalemoneka nga akatabo ka mabula 64. Uyu magazini aleitwa ati: Ilyashi lya Nte sha kwa Yehova, kabili aaleba ne fipande fyonse ifya kusambililamo mu filonganino umweshi onse. Ukutula mu 1960 ukushinta mu 1967, impendwa ya balefumina mu mulimo wa kushimikila mu France yaingilishiweko ukufuma pali 15,439 ukufika kuli 26,250.

Mu kupita kwa nshita, bamishonari abengi batuminwe ku ncende shimbi, bamo baile ku fyalo fya mu Afrika umulandwa iciFrench lelo bambi babwelelemo ku Quebec. Pa mulandu wa kuti Anne alilwele kabili alefwaikwa ukuyabombelwa, twabwelelemo ku Quebec. Pa numa ya kundapwa imyaka itatu, Anne alipolele. Natuminwe mu muputule, no kutendeka ukutandalila ifilonganino fyapusanapusana cila mulungu no kukosha bamunyina lwa ku mupashi.

Ukubomba Bumishonari mu Afrika

Pa numa ya myaka iinono, mu 1981, twalisekelele lintu twatuminwe nga bamishonari ku Zaire, ukwitwa ilelo Democratic Republic of Congo. Abantu baali abapiina, kabili balecula ku mitekele ya buluku. Lintu twafikile, mwali Inte sha kwa Yehova 25,753, lelo pali ndakai balicila pali 113,000, na 446,362 e basangilwe ku Cibukisho ca mfwa ya kwa Kristu mu mwaka wa 1999!

Mu 1984 ubuteko bwatupeeleko amahekita 200 apa kukuula amaofeshi ya Watchtower Society. Kabili mu December 1985, kwali ukulongana kwa pa kati ka nko mu musumba wa bwangalishi, Kinshasa, na basangilweko baali 32,000 ukufuma mu fyalo fyalekanalekana. Ilyo ukulongana kwapwile, bashimapepo batunkile abantu ukwimya lulu wa kufulunganya umulimo wesu mu Zaire. E ico, pa March 12, 1986, bamunyina bapokelele kalata ukufuma ku buteko uwa kulesha umulimo wa Nte sha kwa Yehova mu Zaire. Uyu kalata asainwe no muyashi Mobutu Sese Seko uo pali ilya nshita e waleteka cilya calo.

Pa mulandu wa ifi fyonse ifyacitike mu kupumikisha fye, twakonkele ukufunda kwa mu Baibolo ukwa kuti: “Uwacenjela amono bubi no kubelama.” (Amapinda 22:3) Twafwaileko inshila shimo isha kusangilamo amapepala, inki, ifikope, ifya kubomfya mu kupulinta, ne miti ibomfiwa mu kupulinta ukufuma ku fyalo fimbi no kuleta mu Kinshasa pa kuti tuleipulintila fwe bene. Twafwaileko ne nshila ya kwananishamo. Ilyo twatile tushishiba fye incito bwino, twacilile ne mibombele ya posti ofeshi wa buteko!

BaNte abengi balikeetwe, no kubakanda icabipisha. Nangu cibe fyo, abengi balishipikishe kabili balitwalilile ne citetekelo cabo. Na ine wine balinjikete kabili naileimwena fintu bamunyina bacushiwe mu fifungo. Imiku iingi twalicushiwe monse monse kuli bakapokola bashifwala mayunifomu kumo na balashi, lelo Yehova lyonse aletulanga inshila ya kupusukilamo.—2 Abena Korinti 4:8.

Twafishile ifibokoshi fya mpapulo mupepi na 3,000 mu cikuulwa muntu shimakwebo umo alesungila ifipe. Nangu cibe fyo, mu kupita kwa nshita, umubomfi wakwe umo aileseba kuli bakapokola bashifwala mayunifomu, kabili baikete shimakwebo. Lelo pa kuya ku cifungo, bankumenye mu nshila ninshi apo ndi na motoka wandi. Shimakwebo asontelele bakapokola ukuti uyu wine e o nalanshenye na o pa fya kusunga shilya mpapulo. Bakapokola baiminike motoka no kunjipusha  pa lwa mpapulo, kabili bampeele umulandu wa kusungila impapulo shabindwa mu muputule wa kusungilamo ifipe fya kwa shimakwebo.

Nabepwishe ukuti, “Bushe namukwatako icitabo cimo pali ifyo fine mulelandapo?”

E lyo bayaswike ukuti, “Sana fye.”

Nabepwishe nati, “Bushe kuti mwananga ncimone?”

Baleteleko cimo, kabili nabalangile ibula lya mu kati, palya patila: “Calembwa mu United States of America kuli Watch Tower Bible & Tract Society.”

Nabacinkwileko ukuti, “Ici citabo mwikete mu minwe ca ku Amerika te ca muno Zaire. Ubuteko bwenu bwalibinda imilimo ya Nte sha kwa Yehova muno Zaire lelo tabwabinda Watch Tower Bible & Tract Society iya ku United States. Kanshi tamufwile ukonaula isho mpapulo.”

Apo icilye tacabapeele nsambu sha kunjikata balindekele. Mu nshita ya bushiku twaile ne fimbayambaya fibili no kwingila mu muputule walimo impapulo no kusenda fye shonse. Ubushiku bwakonkelepo abalashi baile kulya kabili ilyo bafikile balipapile sana pa kukanasanga ulupapulo nelyo lumo. Pali iyi nshita balemfwaya, pantu balipokele nsambu ku cilye ukuti bese banjikate. Kwena ukunsanga balinsangile, lelo tabakwete motoka, e co naitwele fye ne mwine ku cifungo na motoka wandi! Naile na Nte umo uwa kuyabweshako motoka pa kuti tabaikatile kumo.

Pa numa ya kunjipusha pa maawala 8, bampingwile ukuntamfya mu calo. Lelo nabalangile kalata ubuteko bwampeele uwa kunsuminisha ukushitisha ifipe fya pa maofeshi ya Nte sha kwa Yehova mu Zaire. E ico, bansuminishe ukutwalilila ne milimo ya pa Bethel.

Pa numa ya kubomba no kutitikishiwa kwa cibindo mu Zaire pa myaka ine, nayambile ukulwala ifilonda mu mala cikanga ne mfwa. Bamunyina bapingwilepo ukuntwala mu kundapwa ku South Africa, kulya na ko nalisakamenwe kuli bamunyina ba pa Bethel, kabili nalipolele. Pa numa ya kubombela mu Zaire imyaka 8, iyali iya kucincimusha icine cine twakuukiile ku maofeshi ya mu South Africa mu 1989. Mu 1998 twabwelelemo ku mwesu ku Canada na nomba line tucili kuno e ko tubombela pa Bethel.

Ndatasha pa Kubomfiwa

Lintu ntontonkanya pa myaka 54 nabomba umulimo wa nshita yonse, ndatasha sana pantu nabomfeshe amaka ya bulumendo bwandi mu mulimo wacindama uwa kwa Yehova. Nelyo cingati Anne alyeshiwa apakalamba nga nshi, tailishanyapo lelo alingafwilisha sana mu milimo yandi yonse. Ine na Anne, twalikwete ishuko lya kwafwa abantu ukwishiba Yehova, kabili abengi pali ndakai balebombako umulimo wa nshita yonse. Cilaleta insansa ukumona abana babo kumo na beshikulu babo balebombela Lesa wesu uwapulamo, Yehova!

Nalishininwa ukuti takuli nelyo cimo muno calo icingalinganishiwa ku mashuko na mapaalo yantu Yehova atupeela. Cine cine, twalishipikisha amesho ayengi, lelo fyonse fi fyalitwaafwa ukukuulilila icitetekelo cesu no kushintilila pali Yehova. Aba lupungu lwa bukose bwesu, kabili cubo cesu, kabili alaafwa apakalamba mu fya kumanama.

[Futunoti]

[Ifikope pe bula 26]

Ukubomba bupainiya na Anne mu 1947; na ndakai

[Icikope pe bula 29]

Abantu twakumene na bo mu Zaire balitemenwe icine ca mu Baibolo