Bushe Ukupeela Ifya Bupe kwa mu Malembo?

BAIBOLO tayakaanya ukupeela ifya bupe mu bufumacumi. Ukutula fye na kale abantu balikatamike ukupeela ifya bupe. Ilyo amwene ubushinino bwa kuti Yehova alisalile Rebeka ukuba umukashi wa kwa Isaki, umubomfi wa cikoloci uwa kwa Abrahamu amupeele ifya bupe fya golde. (Ukutendeka 24:13-22) Kabili ilyo Labani na Betuele basuminishe icupo, umubomfi wa kwa Abrahamu apeele Rebeka ifya bupe na fimbi kabili “apeele ne fikankaala ku ndume yakwe na kuli nyina.”—Ukutendeka 24:50-53.

Napamo wali mwata mu nshita sha fikolwe ukupeela ifya bupe ku bantu abaponenwa amacushi. Lintu Yehova afumishepo amacushi pali Yobo, bamunyina ne nkashi shakwe, na bamwishibe kale baile mu kumusansamusha kabili bamupeele “ulwa golde lumo, kabili umuntu onse inindamunwe ya golde.”—Yobo 42:10, 11.

Ifya Bupe Kuti Fyalenga Uulepeela Ukumwenamo

Ilingi abantu balepeela bambi ifya bupe pa kusanga ico balefwaisha. Yakobo apekanishishe Esau ica bupe cawamisha ica fitekwa pa kuti engasanga ububile mu menso ya kwa munyina. (Ukutendeka 32:13-18; 33:8) Icingalenga ukumfwikisha umulandu Yakobo akoselepo ukuti Esau apoke ica bupe icali mwata wa ku Kabanga, uwa kuti ngo muntu akaana ukupoka ica bupe, ninshi tapali ububile.—Ukutendeka 33:10.

Ipinda lilanda ifyo umuntu uulepeela amwenamo. Litila: “Ica bupe ca muntu cimutangwila apapabuka, no kumutwala ku cinso ca bakulu.” (Amapinda 18:16) Ica bupe kuti canasha icipyu, lelo te kuti cinashe icipyu ca mwaume ku wacita ubucende no mukashi wakwe, nangu ica bupe cingakula shani ico umucende engafwaya ukumupeela.—Amapinda 21:14; 6:32-35.

Ifya Bupe Ifyalepeelwa ku Mfumu, Bakasesema na Bambi

Wali mwata wa baleya mu kumona imfumu ukuitwalila ifya bupe. “Aba bucinangwa” abashacindike Shauli balilandwapo ukuti tabamutwalile ifya bupe. Abalefuma ukutali ukwisa mu kumfwa amano ya kwa Solomone maka maka balemupeela ifya bupe ifingi nga nshi.—1 Samwele 10:27; 1 Ishamfumu 10:10, 24, 25.

Uyu e mwata abapendule ntanda balekonka ilyo baishile mu kumona ‘uwafyelwe Imfumu ya baYuda,’ no kupeela umwana Yesu ifya bupe. (Mateo 2:1, 2, 11) Inshita shimo na baleya kuli kasesema mu kwipusha fimo balemutwalila ifya bupe. (2 Ishamfumu 8:8, 9) Lelo bakasesema ba kwa Lesa tabaleenekela nelyo ukufwaisha ifya bupe ilyo babomba imilimo yabo nga fintu twingamona ifyo Elisha akene ukupoka “aka bupe.”—2 Ishamfumu 5:15, 16.

Ilingi abalebomba imilimo imo bwino balepeelwa ifya bupe. (Daniele 2:6, 48) Ukulingana ne funde, umusha uwalubwilwe  taali na kuya minwe mikutwa lelo alepeelwa ica bupe pa sha mu mukuni, ne fya mu cipuumino, no mwa kukamine myangashi na mafuta. (Amalango 15:13, 14) Kabili kwaleba ukupeela ifya bupe pa nshita sha kusekelela kukalamba.—Estere 9:20-22; linganyeniko Ukusokolola 11:10.

Ukupeela Umwashila

Lesa abulile abena Lebi ukuba ica bupe ku ng’anda ya kwa Aarone, nga bapeelwa kuli Yehova ku kubombe milimo ya mwashila. (Impendwa 18:6, 7) Kabili abena Gibeone na bambi abalebomba umwashila baleitwa ati abena Netinimu, ishiwi ilipilibula “Abapeelwa.”—Esra 8:20, NW.

Yehova e mwine ifintu fyonse pantu e wafibumbile. E co lintu umuntu apeela ifikwatwa ku kwafwilisha ukupepa kwa cine, abwekeshapo fye ifyo Lesa amupeele.—1 Imilandu 29:14.

Ukukonkomesha pa lwa fya Bupe

Apo ifya bupe fya mafisakanwa kuti fyaonaula umutima no kusendeka ubulungi, Amalembo yatukonkomesha ukupata ifya bupe fya musango yo. Abafwaisha ukupeelwa ifya bupe baliluba.—Amalango 16:19, 20; Esaya 1:23.

Ukulundapo, “umuntu uutakishishe fya bupe ashapeela,” no kufilwa ukupeela ifyo aleitakishishapo apashaniwa kuli fubefube no mwela umushaba imfula. (Amapinda 25:14) Uulepeela ifya bupe kuti akwata ifibusa ifingi, lelo ukupeela te kuti kumulenge ashininkishe ukuti akakwata ifibusa ifishakatale afimutaluka.—Amapinda 19:6.

Amalembo ya Bwina Kristu aya ciGriki yalilengulula sana ifintu fimo ificitwa pa kupeela ifya bupe. Yesu alilengulwile bakalemba na baFarise pa kusuula ifunde lya kucindika bashibo na banyinabo. Bena baleti ngo muntu apeela ifikwatwa fyakwe nge ca bupe kuli Lesa, taali na kubulapo no kupeelako abafyashi bakwe, nangu cingati umwine alitwalilile ukufibomfya.—Mateo 15:1-6.

Calilubana ngo muntu apeela bambi no kwenekela ukuti na bo bakamupeeleko. (Luka 14:12-14) Pa kuti ukupeela kutemune Yehova, takufwile ukuba ukwa bukaitemwe nangu ukwa mataki.—Mateo 6:2-4.

Ifyo Abena Kristu Bapeela

Abena Kristu ba mu kubangilila balepeela bamunyina ifya bupe, nelyo imisangulo. Lelo fyonse ifi ifya bupe fyali fya kuitemenwa, nga fintu Paulo alandile ukuti: “Onse acite umo apangile mu mutima wakwe; te kupeela no mutimako nangu mu kupatikishiwa, pantu Lesa atemwo mupe wa nsansa.” (2 Abena Korinti 9:7) Ukulundapo, baleafwilisha abaipeeleshe sana mu butumikishi bwa Bwina Kristu nge fyo umutumwa Paulo aipeeleshe. Nangu cingati aletasha sana pa fya bupe bamunyinabo balemupeela, Paulo talefwaisha ifya bupe.—Abena Filipi 4:15-17.

Abena Kristu kuti bapeela ifintu ifyacila pa fya bupe fya ku mubili. Kuti babomfya inshita yabo na fintu balamukamo ku kusambilisha bambi no kubakoselesha lwa ku muntontonkanya na lwa ku mupashi, ico cileta insansa ishingi. Ica bupe cakulisha umuntu engapeela umbi kumwaafwa ukumfwikisha Icebo ca kwa Lesa, pantu kuti calenga uwacumfwikisha ukuba no bumi bwa muyayaya.—Yohane 17:3.