Umfwileni Ukusoka!

PA JUNE 3, 1991, ulupili lwa Fugen mu Japan lwapuulike na puu! Icipuki ne mito ifyakaba nga nshi fyalifumfumwike no kukonkolokela mwi samba lya lupili. Kabili abantu 43 balifwile. Kumfwa abengi abapuswike kwempe balipiile icabipisha. Bamo balilile no kupunda abati “amenshi, amenshi, twapaapaata.” Abashimya umulilo na bakapokola balibutukileko pa kuti bengapususha aba bantu.

IMILUNGU ibili ilyo ulupili lushilapuulika, abalashi na bekashi balimwene imisolilo pa muulu wa lupili lwa Fugen, kabili bonse bene baali abaibukila. Lintu kwali kucili umulungu umo ne nshikupo ilyo ubu busanso bushilacitika, babilile mbila ya kusoka abantu ukuti bengafuma muli ilya ncende. Nangu fye lintu kwashele ubushiku bumo, bakapokola baebele bakalemba wa lyashi ukuti tabafwile ukuya mu ncende yaleshiwa. Nangu cibe fyo, abantu 43 tabafumine muli ilya ncende ukufika fye na lintu bulya busanso bwacitike.

Mulandu nshi abengi bailile kuli ilya ncende atemwa cinshi bashafumineko? Abalimi bamo bamo abaali nabafulumuka no kusha amayanda yabo babwelulwike ukuyamona ifipe na mabala. Abasoma ifya kupuulika kwa mpili batatu bapalamine sana apo ulupili lwalefumisha imisolilo pa kuti bengasambililapo ifyalundwako. Bakalemba wa lyashi na bakakopa wa fikope bacilwike umwa kupelela no kupalama sana ku lupili pa kuti bengalemba ilyashi pa fyo ukupuulika kwa mpili kuba. Banamutekenya batatu abo bakalemba wa lyashi baimishe na bo bene e po baali. Bakapokola e lyo na baipeele ukushimya umulilo baali pa ncito. E ico, onse uwali kuli iyi ncende ya busanso alikwete umulandu abelele kulya—lelo icafuminemo ni mfwa.

Bushe Muli mu Ncende ya Busanso?

Napamo twikala ukushaba impili shipuulika. Lelo, ni shani nga ca kuti twalolenkene na kayofi ka calo conse, e kuti ukuba kwati isonde lyonse lili mu ncende ya busanso? Ibuuku lyashininkishiwa kabili intulo yashintililwapo iya kusesema litusoka pa lwa bonaushi buleisa ku calo conse kabili lilondolola ubu bonaushi muli iyi nshila: “Akasuba kakafiishiwa, no mweshi tawakabalike, intanda shikapona mu muulu, ne fya maka fya mu muulu  fikatenkaniwa. . . . Ne nko shonse sha pano isonde shikapumapo imisowa.” (Mateo 24:29, 30) Pano ifi finjelengwe fya mu muulu ifikacitika mu calo conse fyalondololwa ukuti fikaponene “nko shonse sha pano isonde.” Mu mashiwi yambi, uku kusesema kulanda pa lwa kayofi kakumine umuntunse onse.

Ili buuku lya kusesema kwashintililwapo lyaba ni Baibolo. Na kuba, ilembo lilumbwilwe pa muulu lyalilondolola mu kumfwika ifyo ifintu fikaba ukufika fye na pa kalume ka nshita ya bonaushi ubukesa ku calo conse. Nga fintu imisolilo ne fishibilo fimbi ifya kupuulika kwa lupili fyalengele abalashi ba mu musumba wa Shimabara ukwinika ilya ncende ukuti ya busanso, e fintu na Baibolo na yo yapayanya imilandu isuma intu tufwile ukubela abalola kabili abaipekanya pa kuti tukesepusuka. Kuti twasambililako isambililo ku busanso bwacitike pa lupili lwa Fugen no kwishiba bwino bwino ubusanso buli ku ntanshi.

 [Abatusuminishe Ukubomfya Icikope pe bula 2]

INKUPO: Yomiuri/Orion Press/Sipa Press

[Abatusuminishe Ukubomfya Icikope pe bula 3]

Yomiuri/Orion Press/Sipa Press