Amaka ye Pepo

Akasuba kaleya kalewa lwa mu musumba wa Nahore ku Middle East. Eliesere umwina Syria afika pa cishima cali ku nse ya musumba no mulalo wa ngamali 10. Nangu cingati nanaka kabili ali ne cilaka, Eliesere nayangwako sana ku kukabila kwa bambi. Eshile ukufuma ukutali kabili alefwaya umukashi wa mwana wa kwa shikulu wakwe. Kabili, uyu mukashi afwile ukufuma muli balupwa ba kwa shikulu wakwe. Bushe alabomba shani uyu mulimo wayafya?

ELIESERE alitetekele amaka ye pepo. Ne citetekelo caibela, ukupala ica mwaice, apaapaata mu kuicefya ati: “Mwe Yehova, Lesa wa kwa shikulu Abrahamu, shi lengeni ukuti nshuke buno bushiku, mubelele uluse na kuli shikulu Abrahamu. Moneni, njiminine pa kamfukumfuku ka menshi; kabili abana banakashi ba bakaaya balafumina ku kutapa amenshi. Nomba muleke umukashana uo nalati kuli wene, Shi isha umutondo obe, no kuleka nwepo; na o alati, Nwenipo, ne ngamali shenu na sho ndeshinwensha—muleke wene abe uo mwalingilo mubomfi wenu Isaki. Kabili e mo ndeishibilo kuti namubelelo luse kuli shikulu.”—Ukutendeka 24:12-14.

Icitetekelo ca kwa Eliesere mwi pepo tacili ca fye. Umwabela ipepo lyakwe, umwanakashi wa ntanshi ukwisa ku cishima mwishikulu wa kwa munyina Abrahamu! Ishina lyakwe ni Rebeka, kabili mushimbe, uwa musangwela, kabili uwayemba. Awe apeela Eliesere amenshi ya kunwa e lyo mu cikuuku anwensha ne ngamali shakwe shonse. Pa numa, lintu balanshanya no lupwa, Rebeka asumina ukuya na Eliesere ku calo ca kutali ku kuyaba umukashi wa kwa Isaki, mwana Abrahamu. Fintu icasuko kwi pepo lya kwa Eliesere camonekeshe ilya nshita lintu Lesa alebombela pa milandu imo mu cipesha mano!

Kuti twasambililako ifingi kwi pepo lya kwa Eliesere. Lyalangilile icitetekelo caibela, ukuicefya, no kwangwako kwabula bukaitemwe pa lwa kukabila kwa bambi. Ipepo lya kwa Eliesere lyalangilile na kabili ukunakila kwakwe ku nshila Yehova alebombelamo na bantu. Ukwabula no kutwishika alishibe pa lwa bucishinka bwa kwa Lesa kuli Abrahamu pamo pene no bulayo Bwakwe ubwa kuti abantunse baali no kupaalilwa muli Abrahamu. (Ukutendeka 12:3) E mulandu wine Eliesere atendekele ipepo lyakwe na mashiwi ya kuti: “Yehova Lesa wa kwa shikulu Abrahamu.”

Yesu Kristu ali ni ntuntuko ya kwa Abrahamu uo abantu bonse aba cumfwila bali no kupaalilwamo. (Ukutendeka 22:18) Nga tulefwaya amapepo yesu ukwasukwa ilelo, tufwile mu kuicefya ukwishiba inshila Lesa abombelamo na bantu ukupitila mu Mwana wakwe. Yesu Kristu atile: “Nga mwaikala muli ine, ne fyebo  fyandi fyaikala muli imwe, lombeni ico mulefwaya, na co cikamucitilwa.”—Yohane 15:7.

Umukonshi wa kwa Yesu uwaimwenene ukuti aya mashiwi ya cine ali mutumwa Paulo. Icitetekelo cakwe mu maka ye pepo tacali ca fye nangu panono. Akoseleshe Abena Kristu banankwe ukutuulila Lesa amasakamika yabo yonse mwi pepo kabili apeele ubunte bwa kuti: “Ndi na maka ya kucite fintu fyonse mu ulenkoselesha.” (Abena Filipi 4:6, 7, 13) Bushe ici cilepilibula ukuti Lesa alepeela Paulo fyonse ifyo alelomba mwi pepo? Natumone.

Te fya Kulomba Fyonse Lesa Apeela

Mu butumikishi bwakwe ubwa mweo onse, Paulo alicushiwe ku co aleita ukuti “umuunga mu mubili.” (2 Abena Korinti 12:7) Napamo uku kwali kucushiwa kwa ku muntontonkanya na mu nkuntu ukwalefuma kuli bakakaanya na “ba bwananyina ba bufi.” (2 Abena Korinti 11:26; Abena Galatia 2:4) Nelyo kuti pambi cali bulwele bwa mutatakuya ubwa menso. (Abena Galatia 4:15) Te mulandu na cintu ico cali, uyu “muunga mu mubili” walecusha Paulo. Alembele ukuti, “Napaapaatile Shikulu imiku itatu, ukuti acifumye kuli ine.” Lelo, Paulo tapeelwe cintu alombele. Paulo bamulondolwele ukuti, amapaalo ya ku mupashi yantu apokelele kale ukufuma kuli Lesa, pamo nga maka ya kushipikisha ifya kwesha, yalifikilepo. Na kabili, Lesa atile: “Mu kunaka e mo amaka yandi yalengwo kufikapo.”—2 Abena Korinti 12:8, 9.

Finshi tulesambililako ku fya kumwenako fya kwa Eliesere na Paulo? Yehova Lesa cine cine alakutika ku mapepo ya bafwaya ukumubombela mu kuicefya. Lelo ici tacipilibula ukuti alabapeela fyonse ifyo balomba pantu Lesa wena alamona ifingi sana. Alishiba bwino icingatuwamina ukucila fintu twaishiba. Ne cacilapo, lyonse abomba ukulingana ne mifwaile yakwe iyalembwa mu Baibolo.

Inshita ya Kundapa kwa ku Mupashi

Lesa alilaya ukundapa abantu ku malwele yonse aya ku mubili, ku muntontonkanya, na mu nkuntu mu Kuteka kwa Myaka Ikana Limo Ukwa Mwana wakwe pano isonde. (Ukusokolola 20:1-3; 21:3-5) Abena Kristu bene bene balolela iyi nshita ya ku ntanshi umwabela ubulayo. Balitetekela umupwilapo amaka ya kwa Lesa aya kulenga ici ukucitika. Nelyo bashenekela ukundapwa mu cipesha mano pali nomba, balapepela icisansamushi ca kwa Lesa no bukose ubwa kubomba na mesho. (Amalumbo 55:22) Lintu balwala, kuti bapepela no butungulushi bwa kwa Lesa pa kuti basange umuti wa kundapilwako uo bengakumanisha ukushita.

Imipepele imo ikoselesha abalwele ukupepa pa kuti bondapwe pali nomba, filya Yesu na batumwa bakwe baleundapa mu cipesha amano. Lelo filya fipesha amano fyalikwete imifwaile yaibela. Fyabeleleko ku kushinina ukuti Yesu Kristu ali e Mesia wa cine no kulangilila ukuti ububile bwa kwa Lesa bwalifumine pa luko lwa ciYuda no kwisa pa cilonganino cinono ica Bwina Kristu. Pali ilya nshita, ifipesha mano fyalekabilwa pa kukosha icitetekelo ca cilonganino ca Bwina Kristu icipya. Lintu ici cilonganino cashikatele no kukosa, ifipesha amano ‘fyalifubalishiwe.’—1 Abena Korinti 13:8, 11.

Pali ino nshita yayafya, Yehova Lesa aletungulula bakapepa bakwe mu mulimo wacindama uwa kundapa kwa ku mupashi. Ilyo bacili ne nshita, abantu balekabila ukwangufyanya ukumfwila ubwite bwa kuti: “Fwayeni Yehova ilyo engasangwa, mulilileni ilyo ali mupepi. Imbifi ileke imibele ya iko, ne ncitatubi amapange ya iko; babwelele na kuli Yehova, na o akabacite nkumbu, babwelele na kuli Lesa wesu, pantu akabalekelela apakalamba.”—Esaya 55:6, 7.

Uku kundapa kwa ku mupashi ukwa babembu abalapila kulebombwa ukupitila mu kushimikila imbila nsuma iya Bufumu bwa kwa Lesa. (Mateo 24:14) Pa kukosha ababomfi bakwe ku kubomba uyu mulimo wa kupususha imyeo, Yehova Lesa aleyafwa abengi ukufuma mu nko shonse ukulapila ku membu shabo no kuba ifibusa fyakwe ilyo buno bwikashi bwabipa bushilafumishiwapo. Bonse abapepela uku kundapa kwa ku mupashi mu kufumaluka na bonse abapepela ukwafwa pa kuti babombe uyu mulimo, amapepo yabo yaleyasukwa icine cine.

[Abatusuminishe Ukubomfya Icikope pe bula 3]

Eliesere na Rebeka/The Doré Bible Illustrations/Dover Publications