Ilyashi lya Bakabilisha ba Bufumu

Balilambwilwe pa Citetekelo Cabo

UMUTUMWA Paulo ali muntu uwa citetekelo capulamo, kabili akoseleshe abasumina banankwe ukulundulula icitetekelo. Atile: “Uupalamina kuli Lesa ali no kutetekelo kuti e ko ali, no kuti aba kalambula wa bamufwayafwaya.” (AbaHebere 11:6) Ifya kukumanya fikonkelepo ukufuma ku Mozambique filangilila fintu Yehova alambula abakwata icitetekelo cakosa na fintu asuka amapepo ya mukoosha.

• Nkashi umo mukamfwilwa uwa ku citungu ca ku kapinda ka kuso ica Niassa alisakamikwe pa fyo wene na bamwane 6 bali no kwenda pa kuya kwi Bungano lya Citungu ilya “Imikalile ya Bukapepa.” Alesangila fye umwakuliila mu kushitisha pa mushiika, lelo lintu ubushiku bwe bungano bwapaleme, akwete fye indalama sha kuninina ishitima no lupwa lwakwe ukwabula isha kubwelela. Nangu cibe fyo, apingwilepo ukucetekela mu kupayanya kwa kwa Yehova kabili alitwalilile na mapange yakwe aya kusangwako kwi bungano.

Uyu nkashi na bamwane 6 balininine ishitima. Mu nshila kondakita aishile mu kushitisha itikiti kuli nkashi. Lintu amwene baji wakwe, alefwaya ukwishiba uyu baji nga cishibilo ca nshi. Na o nkashi amwebele ukuti cali cishibilo ca kuti aleya kwi bungano lya citungu ilya Nte sha kwa Yehova. Kondakita amwipwishe ati: “Ni kwi uko ili bungano likabela?” Ilyo kondakita aumfwile ukuti ibungano lyali no kubela mu citungu icina mupalamano ica Nampula icabela ukwalepa nalimo bakilomita 300, ukwabulo kwenekela alipilishe nkashi pali citika wa mutengo wa lyonse! Lyene pali citika wa ndalama shasheleko apeelelepo nkashi no lupwa lwakwe amatikiti ya kubwelela. Mwandi alitemenwe icibi pa kuti alicetekele Yehova!—Amalumbo 121:1, 2.

• Pa myaka nalimo 25, umwanakashi umo uwatemwisha ukupepa apepele kuli Lesa ukuti amulange inshila yalungama iya kumupepelamo. Ku calici uko alepepa balekumbinkanya ukusefya kwa mipepele ne mpupo sha cishilano, kabili aletwishika ukuti ukupepa kwa musango yo kwaletemuna Lesa.

Ashimika ukuti: “Lyonse naleibukisha amashiwi ya kwa Yesu ayalembwa pali Mateo 7:7 ayatila: ‘Lombeni, kabili cilepeelwa kuli imwe; fwayeni, kabili mulesanga; kunkunsheni, kabili kuleiswilwako kuli imwe.’ Ilyo naleibukisha ili lembo, nalepepa lyonse kuli Lesa ukuti antungulule ku cine. Bushiku bumo pasta we calici lyesu aebele bonse abaleshitisha pa mushiika ukumuletela indalama shimo ne fipe fyabo fimo pa kuti engafipaala. Nalimwene ukuti ukucite fyo te ca mu malembo iyo, e co ine nshatweleko icili conse. Lintu pasta amwene ukuti nshaletele ‘umutuulo,’ atendeke ukunsaalula pa menso ya bakapepa banandi. Pali ubo bushiku nalilwike ukuti te fyo Lesa afwaya tulemupepa ifi, e co nalilekele ukupepa kuli ilyo calici. Nalyo line, nalitwalilile ukupepa pa kuti ningasanga icine.

“Nasukile napama fye no kwebako lupwa lwandi umo uuli ni Nte ya kwa Yehova. Na o alimpeele trakiti umo, kabili ilyo nabelengele wene ilyo line fye nalilwike ukuti Lesa alyaswike amapepo yandi. Mu kupita kwa nshita, umunandi na o alitendeke ukutesekesha icine ca Baibolo, kabili twalilembeshe icupo cesu. Nangu cibe fyo, umulume wandi aishilelwala sana. Lelo ukufika fye na ku mfwa yakwe, alinkoseleshe ukutwalilila mu nshila ya cine pa kuti tukakumane na kabili mu Paradise.

“Ndatasha Yehova lyonse pa kwasuka amapepo yandi no kunanga inshila yalungama iya kumupepelamo. Na kabili amapepo yandi yalyasukwa apo abana bandi bonse 8 baba ababomfi abaipeela aba kwa Yehova.”