Ubumi Bwabo

Ukwangusha Imikalile ku Kubombela Yehova

NGA FINTU CASHIMIKWA NA BA CLARA GERBER MOYER

Ndi ne myaka 92 kabili nyenda fye panono, lelo nalikwata umuntontonkanya usuma. Ndatasha pa kukwata ishuko lya kubombela Yehova ukutula ku bwaice! Ukwangusha imikalile kwalilenga ukuti nkwate ilyo shuko lya mutengo.

NAFYELWE pa August 18, 1907, mu Alliance, mu musumba wa Ohio, ku United States of America. Nine nali umukalamba pa bana basano. Ilyo nali ne myaka 8, umutumikishi wa nshita yonse uwa Basambi ba Baibolo, nga fintu Inte sha kwa Yehova shaleitwa pali ilya nshita, aishile pa ncinga kwi farmu lyesu ilya ng’ombe sha mukaka. Akumene na bamayo, ba Laura Gerber, pa mwinshi no kubepusha nga ca kuti balishibe umulandu ububi bwasuminishiwilwa. Bamayo lyonse baletontonkanya pali ico cintu.

Pa numa ya kwipusha batata, abali mu butala, bamayo bapangile orda uwa mavolyumu 6 aya Studies in the Scriptures. Baliipakishe ukubelenga aya mavolyumu kabili icine ca mu Baibolo ico balesambilila calibafikile pa mutima. Basambilile volyumu 6, The New Creation, kabili baumfwikishe ubucindami bwa lubatisho lwa Bwina Kristu ubwa kwibishiwa mu menshi. Apo tabaishibe ukwa kusanga Abasambi ba Baibolo, baebele batata ukubabatisha mu kamana kali pa farmu, nangu cingati wali mweshi wa mpepo uwa March 1916.

Ilyo papitile inshita inono, bamayo babelengele mu nyunshipepala ukuti kwali no kubako ilyashi mu ciyanda ca Daughters of Veterans Hall mu musumba wa Alliance. Ilyashi lyaleti “The Divine Plan of the Ages.” Balyankwileko ilyo line, apo Volyumu 1 uwa fitabo fya Studies in the Scriptures akwete umutwe umo wine ngo wa ili lyashi. Icikocikala calipekanishiwe, kabili ulupwa lonse lwaile ku kulongana kwa kubalilapo mu cikocikala ca bakabalwe. Ukutula lilya twalesangwa ku kulongana mu  mayanda ya bamunyina pa Mulungu na pali Citatu icungulo. Pa numa ya kashita kanono, bamayo balibatishiwe na kabili ku mwiminishi wa cilonganino ca Bwina Kristu. Batata abo lyonse baleba nabapamfiwa no mulimo wa pe farmu, basukile batendeka ukusambilila Baibolo, kabili babatishiwe pa numa ya myaka inono.

Ukukumana na Baletungulula

Pa June 10, 1917, munyina J. F. Rutherford, uwali ni presidenti wa Watch Tower Society pali ilya nshita, atandalile ku Alliance ku kulanda ilyashi lyakwete umutwe waleti “Mulandu Nshi Inko Shilwila?” Nali ne myaka 9 kabili twalisangilweko na bafyashi bandi ne ndume shandi shibili, Willie na Charles. Twalikwete ibumba ilisuma ilya bantu ukucila pali 100 abasangilweko. Pa numa ya lyashi lya kwa Munyina Rutherford, abengi abasangilweko balikopelwe icikope pa nse ya cikuulwa ca Columbia Theater umo ili lyashi lyapeelelwe. Umulungu wa konkelepo, pa cifulo cimo cine, A. H. Macmillan alandile ilyashi lyakwete umutwe waleti “Ubufumu bwa kwa Lesa Ubuleisa.” Lyali lishuko ukutandalilwa na ba bamunyina mwi tauni lyesu ilinono.

Amabungano ya Ntanshi Ayashingalabwa

Ibungano lya kubalilapo ilyo nasangilweko lyali ni mu 1918 pa Atwater, mu musumba wa Ohio, amakilomita ayanono ukufuma ku Alliance. Bamayo baipwishe umwiminishi wa Sosaite kulya nga kuti nabatishiwa. Naleyumfwa ukuti naliipeela kuli Lesa ku kucita ukufwaya kwakwe, e co nalisuminishiwe ukubatishiwa bulya bushiku mu kamana mupepi na malimino ya maapele. Nafwele ifya kufwala fimbi mwi tenti ilyo bamunyina baimikiile ulya mulimo no kubatishiwilwa mwi laya lya kusendama nalyo ilya kale, kabili ilyafina.

Mu September 1919, abafyashi bandi na ine twaile ne shitima ku Sandusky, Ohio, pali Bemba wa Erie. Kulya twapateme mwi shitima lya pa menshi, kabili mu kashita fye kanono, twafikile pa Cedar Point apo twakwatile ibungano lyesu ilishingalabwa. Ilyo twafumine mwi shitima, pali icifulo apo bashitishisha ica kulya ca kasuba pa citesheni ce shitima pene. Nabulilepo hamburger, iyali cintu ca mutengo kuli ine muli shilya nshiku. Yaleumfwika bwino sana! Impendwa ya basangilweko bonse kuli ili bungano lyesu ilya nshiku 8 yali ni 7,000. Apo takwali ifisoselo, nalekabila ukukutikisha.

Pali ili bungano magazini ali no kulafumina pamo no wa The Watch Tower, uwaleti The Golden Age (nomba uwitwa Loleni!), alifumine. Pa kuti ningasangwa kuli lilya ibungano, nshaileko ku sukulu mu mulungu wa kubalilapo, lelo nalikwete umulandu wacindama uwa kukanailako. Cedar Point cali cifulo ca kukokolokelako, kabili balikwete abaleipika ku ncende ya kuliilamo abalepekanishisha abaleisa ku kulongana ica kulya. Lelo pa mulandu umo, aba baleipika na baweteleshi balikene ukubomba imilimo, e co bamunyina ba Bwina Kristu abaishibe ukwipika e batendeke ukupekanishisha abaishile kwi bungano ica kulya. Pa myaka iingi iyakonkelepo, abantu ba kwa Yehova baleipekanishisha ica kulya pa kulongana kukalamba na pa mabungano.

Kabili twalikwete ne shuko lya kubwelela ku Cedar Point mu September 1922 kwi bungano lya nshiku 9 ukwasangilwe abantu ukucila pali 18,000. Uku eko Munyina Rutherford atukoseleshe ukuti “sabankanyeni, sabankanyeni, sabankanyeni, Imfumu no bufumu bwakwe.” Lelo, ubutumikishi bwandi bwatendeke no kwananya amatrakiti na magazini wa The Golden Age pa myaka iingi ninshi tatulakwata na ili bungano.

Ukutesekesha Ubutumikishi

Mu kutendeka kwa 1918, nalibombeleko umulimo wa kwananya trakiti aleti The Fall of Babylon ku mafarmu ya mupepi. Pa mulandu wa kutalala, twalekafya ilibwe lya soapstone pa citofu ca nkuni ku ng’anda no kulisenda mu cikocikala pa kuti tulekafyako amakasa. Twalefwala amajeketi yafina ne fisote, pantu icikocikala cakwete fye umutenge wakupwako ne nsalu mu mbali ukwabula imbabula. Lelo isho shali ni nshita sha nsansa.

Mu 1920 ukulembwa kwaibela ukwa The Finished Mystery, ukwaleitwa ZG, kwalembelwe nga magazini. * Ine na bafyashi bandi twalyendawike mu musumba wa Alliance no lu lupapulo. Muli shilya nshiku bonse baleya ku mayanda ya bantu  umo umo, e co mwenso mwenso naninine pa mutefwe wa ng’anda apo paikele abantu abengi. Pa numa ya kusosa ubukombe bwandi, umwanakashi umo atile: “Ili lyashi lyakwe ilipi lyawama,” kabili alipokelele no lupapulo. Nashalike impapulo sha ZG 13 bulya bushiku, uwali muku wa kubalilapo ukulanda pa nshita iitali ku ng’anda ne ng’anda.

Ilyo nali mu gredi 9, bamayo balwele akalaso kabili balelala fye ukucila na pa mweshi umo. Umwaice wandi umwanakashi umonono pali bonse, Hazel, ali kanya, e co nalilekele isukulu ku kwafwilishako mu milimo ya pa farmu no kusakamana abana. Nalyo line, ulupwa lwesu lwalepoosako amano ku cine ca mu Baibolo, kabili lyonse twalesangwa ku kulongana kwa pa cilonganino.

Mu 1928 pa Cibukisho ca mfwa ya kwa Kristu, trakiti waleti “Where Are the Nine?” apeelwe kuli bonse abasangilweko. Uyu trakiti alelanda pali Luka 17:11-19, apo Baibolo itila umo fye pa ba fibashi 10 abasangulwilwe e watashishe Yesu mu kuicefya pa kuposhiwa mu cipesha mano. Ico calimfikile pa mutima. Naipwishe ukuti, ‘Bushe ndatasha?’

Apo nomba ifintu fyali bwino pa ng’anda kabili nali no bumi busuma ukwabula ne milimo iya kumpumfyanya, napingwilepo ukufuma pa ng’anda no kutendeka bupainiya, nga fintu ubutumikishi bwa nshita yonse bwitwa. Abafyashi bandi balinkoseleshe ukucite co. E co, ine na Agnes Aleta uo twalebomba nankwe, twapeelwe icifulo ca kubombelamo, kabili pa August 28, 1928, twaninine ishitima pa 21:00hrs. Umo umo twakwete sutikesi na kacola aka kusendelamo impapulo sha Baibolo. Pa citesheni, bankashi nandi na bafyashi bandi, na ifwe twalililile. Natontonkenye ukuti napamo nshakabale bamonapo na kabili, pantu twasumine mu kuti Armagedone naipalama. Ubushiku bwakonkelepo ulucelo, twafikile mu cifulo cesu ica kubombelamo mu Brooksville, mu musumba wa Kentucky.

Twalesonkela umuputule unono mu cikuulwa ca maliila no kushita utukopo twa spaghetti kabili twaleipangila na masangweci. Ubushiku bumo na bumo twalelola ukwapusanapusana, nalebomba neka no munandi alebomba eka kabili twaletambika abene mayanda ifitabo 5 pa musangulo wa dola umo na masenti 98. Panono panono twalishimikile mwi tauni lyonse, ukukumanya abantu abengi abatemenwe Baibolo.

Mu myeshi napamo itatu, twali natushimikila kuli bonse abali mu Brooksville na matauni ya mupepi pamo nga Augusta. E co twalikuukile ku kuyabombela mu matauni ya Maysville, Paris, na Richmond. Mu myaka itatu iyakonkelepo, twabombele mu fitungu ifingi mu Kentucky umushali ifilonganino. Ilingi abaletwafwilisha fibusa na balupwa abalefuma ku Ohio no kubombako na ifwe mu butumikishi pa mulungu umo nelyo no kucilapo cila nshita lintu baisa.

Amabungano Yambi Ayashingalabwa

Ibungano mu Columbus, Ohio, pa July 24 ukufika ku 30, 1931, lyali ilishingalabwa cine cine. Eko babilishishe ukuti nomba twali no kwishibikilwa kwi shina lyashimpwa pali Baibolo, ilya Inte sha kwa Yehova. (Esaya 43:12) Ilyo iyo nshita ishilafika, abantu nga baipusha uko tupepa, twaletila tuli, “Basambi ba Baibolo aba mu Fyalo Fyonse.” Lelo ico tacatulekenyeko bwino pantu kwali abasambi ba Baibolo abali mu mipepele yimbi.

Agnes, uo nalebomba nankwe alyupilwe, kabili nashele fye neka; e co nalisansamwike lintu babilishe ukuti abalefwaya painiya wa kubomba na o bafwile ukuya ku cifulo cimo ifi. Kulya nakumene na Bertha na Elsie Garty na Bessie Ensminger. Bakwete bamotoka babili kabili balefwaya nkashi painiya uwalenga bune uwa kubomba na o. Twafumine pe bungano pamo, nangu cingati wali e muku wa kubalilapo ukukumana.

Mu lusuba twabombele mu musumba wa Pennsylvania. Lyene, ilyo akapepo kanono kalepalamina, twalombele ukuti batutume ku fitungu fyakabako ifya ku kapinda ka ku kulyo ifya North Carolina, Virginia, na Maryland. Muli shinde twabwelele ku kapinda ka ku kuso. Uyo wali e mwata wa bapainiya pali ilya nshita. Mu 1934, John Booth na Rudolph Abbuhl, abalekonka uyu mwata, basendele Ralph Moyer no mwaice wakwe umwaume Willard ku Hazard, mu Kentucky.

Twalimonenepo na Ralph imiku iingi, kabili twaishileishibana bwino pe bungano likalamba mu Washington, D.C., ilyaliko pa May 30 ukufika pa June 3, 1935. Ine na Ralph twaikele pamo mu lukungu ilyo ilyashi lyalelandwa pa lwe “bumba likalamba.” (Ukusokolola 7:9-14) Ukufikila  ilya nshita twasumine mu kuti abe bumba likalamba bali lubali lwe bumba lya ku muulu abo abashakwete icitetekelo cacila ba 144,000. (Ukusokolola 14:1-3) E co nshalefwaya ukuba pali bene!

Lintu Munyina Rutherford alondolwele ukuti abe bumba likalamba bali libumba lya pe sonde ilya ba busumino abakapusuka pa Armagedone, abengi balipapile. Lyene aebele bonse abe bumba likalamba ukwima. Kwena, nshaimine, lelo Ralph alimine. Ku ntanshi, natendeke ukumfwikisha ifintu bwino, e co mu 1935 wali e mwaka wa kulekelesha kuli ine ukulyako umukate wa cimpashanya no mwangashi pa Cibukisho ca mfwa ya kwa Kristu. Lelo, bamayo balitwalilile ukulyako ukufikila imfwa yabo mu November 1957.

Uwa Kubomba Nankwe Ukufikila Imfwa

Ine na Ralph twalitwalilile ukulembeshanya. Nalebombela mu cifulo ca Lake Placid, New York, wene ali mu Pennsylvania. Mu 1936 apangile icikuliko cinono ico alekulika kuli motoka wakwe. Acisendele ukufuma ku Pottstown, Pennsylvania, ukucitwala ku Newark, New Jersey, kwi bungano ilyaliko pa October 16 ukufika pa 18. Pa numa ya programu icungulo cimo, bapainiya abengi pamo na ine twaile mu kumona icikuliko cipya ica kwa Ralph. Ine na wene twali natwiminina mu kati ka ici cikuliko mupepi no mwa kusamfisha imbale ilyo anjipwishe ukuti, “Bushe icikuliko candi naucitemwa?”

Lintu nasumine, anjipwishe ukuti, “Bushe ulefwaya ukulaikalamo?”

Nayaswike ukuti “ee,” kabili alintomwene bwino ica kuti nshakalabe. Pa numa ya nshiku shinono, twapokele imicato. Pa October 19, ubushiku bwakonkelepo pa numa ye bungano, twaile ku Brooklyn no kutandala ku cifulo uko ba Watch Tower Society balepulintila. Lyene twalombele ukuti batupeele icifulo ca kubombelamo. Grant Suiter e walebombela ku kupeela ififulo, kabili aipwishe abali no kulabombelamo. Ralph atile, “Kuti twabombelamo nga ca kuti twaupana.”

Munyina Suiter atile, “Nga mwabwela pa 17:00hrs, kuti twapekanya.” E co, cilya cungulo twalyupene mu ng’anda ya kwa Nte umo mu Brooklyn Heights. Twalile ica kulya ne fibusa fimo fimo pa cifulo ca kuliilapo ica muli iyo ncende no kunina ifimbayambaya fya cintubwingi ku kuya ku cikuliko ca kwa Ralph mu Newark, New Jersey.

Ilyo papitile inshita inono, twatolele ubulendo bwa ku Heathsville, mu musumba wa Virginia, uko twabombele bupainiya capamo umuku wa kubalilapo. Twabombele mu Northumberland County lyene no kuya ku fitungu fya Fulton na Franklin mu Pennsylvania. Mu 1939, Ralph apeelwe umulimo wa kwangalila icitungu twaleikalamo, umulimo umo twali no kulatandalila ifilonganino fimo fimo lyonse. Twabombele ifilonganino mu musumba wa Tennessee. Umwaka wakonkelepo umwana wesu umwaume, Allen, alifyelwe, kabili mu 1941 umulume wandi alilekele umulimo wa kwangalila icitungu. Lyene twatuminwe ku Marion, mu musumba wa Virginia, nga bapainiya baibela. Muli shilya nshiku, ico calepinda ukubomba amaawala 200 cila mweshi mu butumikishi.

 Ukuteuluka

Mu 1943, naishilecimona icalinga ukuleka bupainiya bwaibela. Ukwikala mu cikuliko cinono, ukusakamana umwana umunono, ukupekanya ifya kulya, ukulacapa, no kubomba amaawala mupepi na 60 cila mweshi e fyo nalekumanisha fye ukucita. Lelo Ralph alitwalilile ukubomba bupainiya bwaibela.

Twabwelele ku Alliance, Ohio, mu 1945, twashitishe icikuliko ico twaikelemo pa myaka 9, no kukuukila mu ng’anda ya pa farmu umwaleikala abafyashi bandi. Kulya eko umwana wesu umwanakashi Rebekah afyalilwe pa mutefwe wa ng’anda uwa ku ntanshi. Ralph atendeke ukubomba incito ya nshita lubali no kutwalilila nga painiya wa nshita yonse. Nalebomba pa farmu no kucita apo ningapesha ku kumwafwa ukutwalilila muli bupainiya. Nangu cingati ulupwa lwandi lwatupeele impanga apa fye ne ng’anda, Ralph alikeene. Alefwaya ukwangusha ubumi pa kuti atungilile ifya Bufumu mu kufikapo.

Mu 1950 twakuukile ku Pottstown na kabili, mu musumba wa Pennsylvania, no kulasonkela ing’anda pa madola 25 cila mweshi. Pa myaka 30 iyapitilepo, umusonko wafikile fye ku madola 75. Twayumfwile ukuti Yehova aletwafwilisha ukwikala ubumi bwayanguka. (Mateo 6:31-33) Ralph alebomba pa nshiku shitatu cila mulungu nga kabeya wa mushishi. Cila mulungu twalesambilila Baibolo na bana besu babili, ukuya ku kulongana kwa pa cilonganino, no kushimikila imbila nsuma iya Bufumu ngo lupwa. Ralph ali ni kangalila wa kutangilila mu cilonganino twalimo. Ukupitila mu kwangusha ubumi, twalicitile ifingi mu mulimo wa kwa Yehova.

Imfwa ya Mulume Wandi Uwatemwikwa

Pa May 17, 1981, twali natwikala mu Ng’anda ya Bufumu tulekutika ku lyashi lya cintubwingi. Ralph atendeke ukumfwa ububi, aile ku numa ya ng’anda ya Bufumu, no kutuma kapyunga ukundetela kalata uwaleti aya ku ng’anda. Uyu tawali musango wa kwa Ralph e co naebele umo ukuntwala muli motoka ku ng’anda ilyo line. Ralph afwile kuli lupuma uwabipisha ninshi ne awala limo talilapwa ukutula apo amwikatile. Ilyo isambililo lya Ulupungu lwa kwa Kalinda lyapwile bulya bushiku ulucelo, balibilishe ku cilonganino ukuti nafwa.

Muli ulya mweshi Ralph kale kale ali nabomba amaawala ukucila pali 50 mu butumikishi. Abombele umulimo wa nshita yonse uwa bupainiya ukucila pa myaka 46. Atungulwile amasambililo ya Baibolo ku bantu ukucila pali 100 abo basukile baba ni Nte shabatishiwa isha kwa Yehova. Amapaalo ya ku mupashi ayo twapokelele yacilile pali fyonse ifyo twaipuswileko mu myaka yonse iyi.

Ndatasha pa Mashuko Yandi

Pa myaka 18 iyapitapo, njikala fye neka, ndasangwa ku kulongana, ukushimikila bambi ukulingana na papelele amaka yandi, no kusambilila Icebo ca kwa Lesa. Nomba njikala mu cikuulwa basungila abakote. Nakwata fye utupe tunono kabili nshifwaya ukukwata televishoni. Lelo ndaipakisha kabili naba ne cuma ca ku mupashi. Abafyashi bandi ne ndume shandi shibili baali aba busumino ukufikila imfwa shabo, kabili inkashi shinandi shibili shiletwalilila mu busumino mu nshila ya cine.

Ndasekelela ukuti umwana wandi, Allen, ni eluda wa Bwina Kristu. Pa myaka iingi alibika ifisoselo mu Mayanda ya Bufumu na mu Fiyanda fya Kulonganinamo kabili alibombela na ku kubika ifisoselo pa mabungano ya mu lusuba. Umukashi wakwe mubomfi wa cishinka uwa kwa Lesa, kabili abana babo babili ni baeluda. Umwana wandi, Rebekah Karres, abomba pa myaka ukucila pali 35 mu butumikishi bwa nshita yonse, ukusanshako ne myaka ine pa maofeshi yakalamba aya Nte sha kwa Yehova mu Brooklyn. Wene no mulume wakwe pa myaka 25 iyapitapo babomba umulimo wa kwenda mu fifulo fyalekanalekana mu United States.

Yesu atile Ubufumu bwaba nge cuma cafiswa icingasangwa. (Mateo 13:44) Ndatasha ukuti ulupwa lwandi lwasangile cilya cuma kale sana. Lishuko ukwibukisha imyaka ukucila pali 80 iyapitapo iya mulimo wa kuipeela kuli Lesa—ukwabula ukulangulushiwa! Nga ca kuti nali no kubwelela ku bwaice na kabili, kuti naikala ifi fine naikala, pantu cine cine ‘uluse lwa kwa Lesa lwaliwamo kucilo mweo.’—Amalumbo 63:3.

[Futunoti]

[Icikope pe bula 23]

Twakutike ku lyashi lya kwa Munyina Rutherford mu 1917 mu Alliance, Ohio

[Icikope pe bula 23]

Na Ralph ku ntanshi ya cikuliko apangile

[Icikope pe bula 24]

Na bana bandi babili ilelo