Ifipusho Ukufuma Ku Babelenga

Pa Abena Roma 12:19, bushe umutumwa Paulo alelangilila ukuti Abena Kristu tabalingile ukukalipa lintu asosele ukuti: “Mwiba abalandula, mwe batemwikwa, lelo peeleni ubukali bwa kwa Lesa apa kupita”?

Awe, te fyo alelangilila. Umutumwa Paulo pano alelosha ku bukali bwa kwa Lesa. Kwena, tacilole mu kuti te mulandu Abena Kristu kuti bakalipa. Baibolo ilatufunda bwino bwino ukuti twilakalipa. Moneni ukufunda kwa bulesa kumo kumo uko itufunda.

“Nashako ubukali, no kuleke cipyu; wilalunguluka, calola fye ku kubifya.” (Amalumbo 37:8) “Onse uucito bukali ku munankwe akabo wa mulandu ku bupingushi.” (Mateo 5:22) “Imilimo ya bumubili ili pa mbilibili, ni yi, ubulalelale, ukukowela, bucilende, ukupepo tulubi, ubuloshi, ulupato, ifikansa, akalumwa, icipyu.” (Abena Galatia 5:19, 20) “Icilulo conse ne cipyu no bukali ne ciwowo ne miponto, fumyeni pali imwe.” (Abena Efese 4:31) “Umuntu onse abe uwayanguka ku kuumfwa, uwakokola ku kulanda, uwakokola ku kukalipa.” (Yakobo 1:19) Ukulundapo, ibuuku lya Amapinda mu kubwekeshabwekeshapo lilatufunda ukuti twilakalipa bwangu nelyo ukukalipa pa tumilandu utunono na pa filubo ifinono ifya bantunse.—Amapinda 12:16; 14:17, 29; 15:1; 16:32; 17:14; 19:11, 19; 22:24; 25:28; 29:22.

Ifilelandwapo pa Abena Roma 12:19 fileumfwana no ku kufunda. Paulo atubulwile ukuti ukutemwa kwesu kubulwe bumyalumyalu, ukuti tulepaala abatupakasa, tuletontonkanya ifisuma pa lwa bambi, twilabwesesha ububi pa bubi, kabili tuletukuta ukuba aba mutende kuli bonse. Lyene, acincishe ati: “Mwiba abalandula, mwe batemwikwa, lelo peeleni ubukali bwa kwa Lesa apa kupita; pantu calembwa, aciti, Icilandushi candi, ine nkabweseshapo: e fyo Shikulu asosa.”—Abena Roma 12:9, 14, 16-19.

Tatulingile ukulaleka ubukali buletulenga ukulandula. Ifyo twingeshiba ne fyo twingapingula tafyapwililika. Nga ca kuti tuleleka ubukali buletulenga ukulandula, ilingi tukalalufyanya. Ico cikalenga tulecita ifyo Icibambe ca kwa Lesa, Kaseebanya afwaya. Pe lembo limbi, Paulo alembele ati: “Kalipeni, lelo mwibembuka; mwileka kasuba kawe mucili no bukali, kabili mwipeela Kaseebanya apa kwikala.”—Abena Efese 4:26, 27.

Iciwamapo ukucita, kabili ica mano, kuleka Lesa apingula ilyo akalandula abawamina ukukandwa. Kuti acite fyo pantu aleshiba ifishinka fyonse, kabili ifyo engalandula fikalangilila ubupingushi bwakwe ubwapwililika. Kuti twamona ukuti ici e co Paulo alelandapo pa Abena Roma 12:19 lintu twabebeta fintu aloseshe ku Amalango 32:35, 41, apasangwa amashiwi ayatila: “Icilandushi candi, no kulambula.” (Linganyeniko AbaHebere 10:30.) E ico, nangu ca kuti amashiwi ya kuti “bwa kwa Lesa” tayasangwa mu malembo ya ciGriki, bakapilibula ba muno nshiku abafulilako baliyalundako pa Abena Roma 12:19. Ici calenga kubeko amabupilibulo ayatila “lekeni Lesa alandule” (The Contemporary English Version); “peeleni ubukali bwa kwa Lesa apa kwikala” (American Standard Version); “lekeni Lesa akande nga alefwaya” (The New Testament in Modern English); “peeleni icilandushi ca bulesa apa kupita.”—The New English Bible.

Na lintu fye abalwisha icine batuseebanya nelyo ukutupakasa, kuti twacetekela amashiwi ayalondolwele imibele ya kwa Yehova Lesa ayo Mose aumfwile, aya kuti: ‘Yehova, Yehova, Lesa wa nkumbu kabili uusenamina, uukokolo kukalipa, kabili uwafulisho luse ne cishinka; uusungila aba makana uluse, uulekelela amampuulu no bupulumushi no lubembu: kabili ababi takabalinge aba kaele nangu pamo.’—Ukufuma 34:6, 7.