Ifyo Yesu Kristu Engatwafwa

IFYO Yesu Kristu acitile ku kwafwa abantu ilyo ali pe sonde fyali ifisuma nga nshi. Ici cali ica cine, ica kuti pa numa ya kushimika ifyacitike mu bumi bwa kwa Yesu, umo uwali nsangwapo atile: “Lelo kuli na fimbi ifingi ifyo Yesu acitile, ifyo afilembwa cimo cimo, ndetila na pano isonde pene nga tapengaba na ncende ku mabuuku ayengalembwa.” (Yohane 21:25) Apo fingi Yesu acitile pe sonde, pambi kuti twaipusha ukuti: ‘Kuti atwaafwa shani ilyo ali mu muulu? Bushe inkumbu sha kwa Yesu kuti shatwaafwa ilelo?’

Icasuko cilatusansamusha kabili citulenga ukuba ne subilo. Baibolo itweba ukuti Kristu aingile “mu muulu mwine, ku kumonekela nomba ku cinso ca kwa Lesa pa mulandu wa ifwe.” (AbaHebere 9:24) Cinshi atucitile? Umutumwa Paulo alondolola ukuti: “[Kristu] apabulo mulopa wa mbushi no wa bana ba ng’ombe, kano umulopa wakwe umwine, aingilemo fye limo Umwashila [“mu muulu mwine”], no kumone cilubula ca muyayaya.”—AbaHebere 9:12; 1 Yohane 2:2.

Mwandi iyo ni mbila nsuma! Ukuya ku muulu kwalengele Yesu ukucitila abantunse ifyacilapo te kupesha umulimo wakwe uushaiwamina ku bantu. Ni pa mulandu wa kuti Lesa, mu cikuuku cakwe icikalamba ica pa fye, asontele Yesu ukuba ‘umubomfi’—shimapepo mukalamba—“ku kulyo ku cipuna ca bufumu ica Bukalamba mu myulu.”—AbaHebere 8:1, 2.

‘Umubomfi’

E co, mu myulu, Yesu ali no kuba umubomfi wa ku cintubwingi ku bantunse. Ali no kubomba umulimo uwalebombako shimapepo mukalamba uwa mu Israele ukubombelako bakapepa ba kwa Lesa aba ku kale. Kabili uyo wali mulimo nshi? Paulo alondolola ukuti: “Shimapepo mukalamba onse asontelwe ukutuule fya bupe na malambo yene; e ico no yu [Yesu Kristu uwaninine ku muulu] ali no kuba na cimo ica kutuula.”—AbaHebere 8:3.

Ico Yesu ali no kutuula cacilile pa fyo shimapepo mukalamba uwa ku kale aletuula. Nga ca kuti “umulopa wa mbushi no wa ng’ombe shilume” walelenga abena Israele ba pa kale ukusangululwako lwa ku mupashi, ‘pali bufi umulopa wa kwa Kristu, . . . ukasangulula bakampingu besu ku milimo yafwa no kutulosha mu kubombela Lesa wa mweo.’—AbaHebere 9:13, 14.

Na kabili Yesu mubomfi wa ku cintubwingi uwaibela pantu apeelwa bumunshifwa. Muli Israele wa pa kale ‘baali bashimapepo abengi, pantu imfwa yalebalesho kwikalilila.’ Lelo ni shani pa lwa kwa Yesu? Paulo alembele ukuti: “Aba na bushimapepo bwakwe ubushaluka. E ico kabili aba na maka pe aya kupusushisha abeshila muli wene kuli Lesa, pa kuba no mweo pe ku kubapaapaatila.” (AbaHebere 7:23-25; Abena Roma 6:9) Cine cine, ku kulyo kwa  kwa Lesa mu muulu, twalikwata umubomfi wa ku cintubwingi ‘uwaba no mweo pe ku kutupaapaatila.’ Tontonkanyeni ifyo ico cilepilibula kuli ifwe nomba!

Ilyo Yesu ali pe sonde, abantu balekonkomokela kuli wene ukuti abafwilishe, kabili inshita shimo baleenda intamfu ishitali pa kuti bayelomba ubwafwilisho kuli wene. (Mateo 4:24, 25) Ku muulu kuntu Yesu aba, abantu ba nko shonse kuti baafwiwa kuli wene. Kulya ku muulu aba, lyonse aba umubomfi wa ku cintubwingi.

Bushe Yesu ni Shimapepo wa Musango Nshi?

Ifyo Yesu Kristu alondololwa mu Malandwe fitulenga ukushininkisha ukuti alaafwa kabili wa nkumbu. Mwandi aleipusula! Imiku iingi, balemupumfyanya ilyo wene na basambi bakwe balefwaya ukutuusha. Mu cifulo ca kumfwa ukuti balemupusula inshita ya kuba eka apabula aba kumupumfyanya, ‘aikatilwe inkumbu’ abantu abalefwaya ukuti abaafwe. Na lintu Yesu ali nanaka, ilyo ali ne nsala, ne cilaka, ‘alebasengela’ kabili ali uwaipeelesha ukukanalya nga ca kuti ali no kwafwa ababembu bafumaluka.—Marko 6:31-34; Luka 9:11-17; Yohane 4:4-6, 31-34.

Pa kubekatilwe nkumbu, Yesu aafwile abantu lwa ku mubili, lwa mu nkuntu, na lwa ku mupashi. (Mateo 9:35-38; Marko 6:35-44) Na kabili, abasambilishe ukusanga ukutusha kubelelela ne cisansamushi. (Yohane 4:7-30, 39-42) Ku ca kumwenako, ukulaalika kwakwe kulatucebusha nga nshi ukwa kuti: “Iseni kuli ine, bonse mwe bacucutika kabili abafinwa, na ine nalamupeelo kutusha. Sendeni ikoli lyandi no kusambilila kuli ine, pa kuti ndi wafuuka kabili uwapetama umutima; e lyo mwalasango kutusha ku mitima yenu.”—Mateo 11:28, 29.

Yesu alitemenwe abantu sana ica kuti asukile afwila abantunse ababembu. (Abena Roma 5:6-8) E co, Paulo apelulwile ukuti: ‘[Yehova Lesa] taciikile Mwane wine, lelo amupooseele ifwe bonse, bushe akaleka shani ukutupeelo bupe ifintu fyonse pamo nankwe? . . . Ni Kristu Yesu uwafwile, ne cacilako uwabuushiwe ku bafwa, uuli ku kwa kulyo kwa kwa Lesa, kabili uutupaapaatila.—Abena Roma 8:32-34.

Shimapepo Mukalamba Uwaba ne Cililishi

Pamo ngo muntunse, Yesu aleumfwa insala, icilaka, ukunaka, ubulanda, ubukali, kabili alifwilepo. Ukutitikisha na macushi fintu ashipikishe fyamupangeshe mu nshila yaibela ku kubomba nga Shimapepo Mukalamba uwa bantunse balecula. Paulo alembele ukuti: “[Yesu] afwile ukupalana na bamunyina mu fintu fyonse, ukuti abe shimapepo mukalamba uwa luse kabili uwa cishinka mu fya kwa Lesa, ku kukonsolole membu sha bantu. Pantu umo aculile umwine pa kweshiwa, e mo aishibilo kwafwa abeshiwa.”—AbaHebere 2:17, 18; 13:8.

Yesu alangilile ukuti aliba uwafikapo kabili uwaipeelesha ukwaafwa abantu ukupalama kuli Lesa. Lelo, bushe ici cilepilibula ukuti alingile ukunashanasha Lesa umukalushi kabili uushakwata luse uushifwaya ukwelela? Iyo, pantu Baibolo itulaya ukuti: ‘Shikulu, musuma, alalekelela.’ Isosa no kuti: “Nga tuyebelele membu shesu, wene wa cishinka kabili mulungami ukuti atulekelele imembu, no kutusangulula ku kuulungana konse.” (Amalumbo 86:5; 1 Yohane 1:9) Na kuba, amashiwi ya kwa Yesu aya kutemwa ne ncitilo filangilila inkumbu, uluse, no kutemwa Wishi akwata.—Yohane 5:19; 8:28; 14:9, 10.

Bushe Yesu alenga shani ababembu abalapila ukutusha? Kupitila mu kubaafwa ukusanga  insansa mu kubombesha kwabo ukwa bufumacumi ukwa kutemuna Lesa. Ilyo alelembela Abena Kristu banankwe abasubwa, Paulo asupawile iyi mibele mu kusosa ukuti: “E ico pa kuba na shimapepo mukalamba uwacilamo, uwapula mu myulu, Yesu Umwana wa kwa Lesa, twikatishe ifya kulumbula kwesu. Pantu tatuli na shimapepo mukalamba uushingatusakamana ku kunaka kwesu; lelo uwaeshiwe kuli fyonse ifyo fine na ifwe tweshiwako, no kubulo kubembuka. E ico tupalamine no kupama ku cipuna ca bufumu ica kusenamina, ukuti tumone uluse no kusango kusenamina ku kutwafwa pa nshita ya kukabila kwesu.”—AbaHebere 4:14-16.

“Ukutwafwa pa Nshita ya Kukabila Kwesu”

Lelo, cinshi twingacita lintu twaba na mafya ayo twamona ukuti tatwingacimfya—ukulwalilila, icisendo cikalifya ica kuyumfwa uwa mulandu, ukufuupulwa, no kupopomenwa? Kuti twabomfya ukupayanya uko Yesu umwine aleshintililapo sana—ishuko lyawamisha ilye pepo. Ku ca kumwenako, icungulo bushiku ilyo ashilatufwila, ‘alepepa no kupimpo kwacila; na mabe yakwe yaba nga matoni yakalamba ya mulopa ayaleponena pa nshi.’ (Luka 22:44) Yesu alishiba ifyo cumfwika ukupepa kuli Lesa no kupimpo kwacila. ‘Aninike ukulomba no kupaapaata pamo no kukuuta kwa kalanda ne filamba ku wali na maka ya kumutuula ku mfwa; kabili aumfwilwe pa mulandu wa kutiina Lesa.’—AbaHebere 5:7.

Yesu alishiba ifyo cipilibula ku bantunse ‘ukumfwilwa’ no kukoshiwa. (Luka 22:43) Na kabili, alaile ukuti: “Nga mukalombe cintu kuli Tata, akamupeela mwi shina lyandi. . . . Lombeni, kabili mukapokelela, ukuti ukusansamuka kwenu kufikepo.” (Yohane 16:23, 24) E ico, kuti twapaapaata Lesa no kucetekela ukuti akasuminisha Umwana wakwe ukubomfya amaka yakwe no mutengo we lambo lyakwe ilya cilubula kuli ifwe.—Mateo 28:18.

Kuti twashininkisha ukuti pa kuba na maka akwata ku muulu, Yesu akatwafwa pa nshita ya kukabila kwesu. Ku ca kumwenako, nga ca kuti twacita ulubembu ulo twayumfwilapo ubulanda mu bufumacumi, kuti twasansamushiwa ku bulayo bwa kuti “natukwato Bukota kuli Shifwe, Yesu Kristu umulungami.” (1 Yohane 2:1, 2) Kaafwa wesu kabili Kasansamusha akatupaapaatilako ukuti amapepo yesu mwi shina lyakwe na mu kumfwana na Amalembo yakaasukwe.—Yohane 14:13, 14; 1 Yohane 5:14, 15.

 Ukutasha pa Bwafwilisho bwa kwa Kristu

Fingi fyabimbwamo ukucila fye pa kupaapaata Lesa ukupitila mu Mwana wakwe. Pa mutengo wa cilubula ce lambo lyakwe, “Kristu [pa kushita, NW]” aishileba, nga ‘cibinda uwashitile’ abantunse. (Abena Galatia 3:13; 4:5; 2 Petro 2:1) Kuti twalangilila ukuti tulatasha pali fyonse ifyo Kristu atucitila ukupitila mu kwishiba ukuti e cibinda wesu kabili mu buseko ukwankula ku bwite bwakwe ubwa kuti: “Umuntu nga atemwo kunkonka, aikanye umwine, asende ne capindama cakwe ubushiku no bushiku, alenkonka.” (Luka 9:23) ‘Ukuikanya’ te ca kulanda fye pa kanwa ukuti umuntu ali na cibinda umbi. Na kuba, Kristu “afwilile bonse ukuti abali no mweo beikalila abene, lelo bekalile uwabafwilile no kubuuka pa mulandu wabo.” (2 Abena Korinti 5:14, 15) E co ukutasha pa cilubula kukalula sana imimwene yesu, amabuyo, ne mikalile. Imisha ya ciyayaya iyo twakwata kuli “Yesu Kristu, uwaipeele pali ifwe,” ilingile ukutulenga ukusambilila ifingi pali wene na Wishi uwa kutemwa, Yehova Lesa. Tulingile no kukosha icitetekelo cesu, ukukonka ifipimo fya kwa Lesa ifinonsha, no ‘kucincilile milimo isuma.’—Tito 2:13, 14; Yohane 17:3.

Mu cilonganino ca Bwina Kristu e mo tupokelela ica kulya ca ku mupashi, ukukoselesha, no butungulushi pa nshita iyene. (Mateo 24:45-47; AbaHebere 10:21-25) Ku ca kumwenako, nga kuli abali bonse abalwele lwa ku mupashi, kuti ‘baita abakalamba [baeluda basontwa] aba cilonganino.’ Yakobo alaya no kuti: “Ne pepo lya citetekelo likapususho mulwele, na Shikulu akamubuusha; kabili imembu isho acita shikalekelelwa kuli wene.”—Yakobo 5:13-15.

Ukulangilila: Umuntu uwakakilwe mu cifungo mu South Africa alembele eluda wa pa cilonganino ukutasha “Inte sha kwa Yehova shonse ishilebomba umulimo uusuma uo Yesu Kristu atendeke mu kwaafwa abantu ukulola ku Bufumu bwa kwa Lesa.” Lyene alembele ukuti: “Nalitemenwe nga nshi pa kupokelela kalata wenu. Ukwangwako kwenu ukwa kuti  ndubulwe lwa ku mupashi nakumfika pa mutima. No mulandu wa kuti ntendeke ukumfwila ubwite bwa kwa Yehova Lesa ubwa kulapila. Pa myaka 27 naliipununa no kukanaishiba ukwa kulola pa mulandu wa lubembu, ubucenjeshi, ifintu fishili fya mwi funde, bucisenene, ne mipepele ya bufi. Pa numa ya kwishiba Inte sha kwa Yehova, ng’umfwa ukuti ninsuka ninsanga inshila—e kuti inshila ya cine! Ico mfwile fye ukucita kukonka iyi ine nshila.”

Ubwafwilisho na Bumbi ku Ntanshi Nomba Line

Imibele ya mu calo iileya ilebipilako bushininkisho bwaumfwika ubwa kuti tuleikala pa nshita yakakala ilyo “Ubucushi bukalamba” bushilatendeka. Pali nomba, ibumba likalamba ukufuma ku nko shonse, imikowa, ne misango ya bantu na bantu, na ba ndimi ‘balesamba amalaya yabo, no kuyabuutusha mu mulopa wa Mwana wa mpaanga.’ (Ukusokolola 7:9, 13, 14; 2 Timote 3:1-5) Ukupitila mu kutetekela mu cilubula ce lambo lya kwa Yesu, balelekelelwa imembu shabo kabili baleafwiwa ukulaumfwana na Lesa—na kuba, ukuba ifibusa fyakwe.—Yakobo 2:23.

Umwana wa mpaanga Yesu Kristu, ‘akacema [abakapusuka ubucushi bukalamba] no kubatungulula baye pa tumfukumfuku twa menshi ya mweo; kabili Lesa akafuute filamba fyonse ku menso yabo.’ (Ukusokolola 7:17) Lyene Kristu akabomba imilimo yakwe nga Shimapepo Mukalamba ukufika ku kupwisha uyo mulimo. Akaafwa ifibusa fya kwa Lesa fyonse ukumwenamo mu kukumanina mu “tumfukumfuku twa menshi ya mweo”—lwa ku mupashi, lwa ku mubili, lwa mu muntontonkanya, na lwa mu nkuntu. Ico Yesu atendeke mu 33 C.E. ne fyo atwalilila ukucita ku muulu ukutula lilya lyene fikafika ku kupwililika.

E co, mwinenuka, mu kulanga ukutasha kukalamba pali fyonse ifyo Lesa na Kristu bacita—ne fyo baletucitila. Umutumwa Paulo akonkomeshe ukuti: “Sekeleleni pe muli Shikulu; . . . Mwisakamikwa nangu kamo, lelo mu fintu fyonse lekeni ifya kulomba fyenu fiishibikwe kuli Lesa mu kupepa no kupaapaata pamo no kutootela; no mutende wa kwa Lesa uwapulamo mu kwiluka konse, wakulalinde mitima yenu na mapange yenu muli Kristu Yesu.”—Abena Filipi 4:4, 6, 7.

Kuli inshila yacindama iya kulangilamo ukuti mulatasha Yesu Kristu, Kaafwa wesu uwa mu muulu. Pa numa ya kuwa kwa kasuba pali Citatu, pa April 19, 2000, Inte sha kwa Yehova mwi sonde lyonse bakabungana ku Cibukisho ca Mfwa ya kwa Kristu. (Luka 22:19) Ili likaba lishuko lya kutasha sana pa cilubula ce lambo lya kwa Kristu. Mulelaalikwa ukusangwako no kumfwa ifyo ukutantika kwa kwa Lesa ukushaiwamina ukwe pusukilo ukupitila muli Kristu kwingamunonsha ku ciyayaya. Shi ipusheni Inte sha kwa Yehova ku cifulo mwaba pa lwa nshita lintu uku kukumana kukatendeka na ku cifulo kukabela.

[Icikope pe bula 7]

Yesu alishiba ifyo cumfwika ukupepa mu kupimpa kuli Lesa

[Ifikope pe bula 8]

Kristu akatwaafwa ukucimfya amafya ayo tushingacimfya fweka

[Icikope pe bula 9]

Kristu alatwaafwa ukupitila muli baeluda ba kutemwa