‘Mwe Lesa, Tumeni Ulubuuto Lwenu’
‘Mwe Lesa, Tumeni Ulubuuto Lwenu’
“Tumeni ulubuuto lwenu ne cine cenu. Lekeni fintungulule.”—AMALUMBO 43:3, NW.
1. Yehova asokolola shani imifwaile yakwe?
YEHOVA alalangulukilako sana ababomfi bakwe mu nshila abalenga ukwishibilamo imifwaile yakwe. Mu cifulo ca kutusokolwela icine pa muku fye umo ukutusanika ica kuti twafilwa no kumona bwino, alatushilimuna panono panono. Ulwendo lwesu mu nshila ya ku bumi kuti lwapashanishiwa ku mulendo uleenda mu kashila akalepa. Aima ku maca ilyo talatendeka no kumwenekesha. Cilya akasuba kaya kaletula, umulendo atendeka ukumonako fimo fimo ifili mu nshila. Ifyashala alefimwena mu filubwalubwa. Lelo cilya akasuba kalesansama, atendeka ukumwenekesha ifili ukutali. E fyo caba na ku lubuuto lwa ku mupashi ulo Lesa apayanya. Tatusuminisha ukwiluka ifintu fyonse pa muku umo. E fyo no Mwana wa kwa Lesa, Yesu Kristu, alecita pa kushilimuna lwa ku mupashi. Natubebete ifyo Yehova ashilimwine abantu bakwe ku kale na fintu abashilimuna pali lelo.
2. Yehova aleshilimuna shani mu nshita ilyo kushilaba UbuKristu?
2 Abalembele Ilumbo 43 bafwile bali bana baume ba kwa Kora. Apo bali bena Lebi, bali ne shuko lya kusambilisha abantu Amalango ya kwa Lesa. (Malaki 2:7) Na kuba, Yehova ali ni Kasambilisha wabo Uwakulisha, kabili bashintilile pali wene nge Ntulo ya mano yonse. (Esaya 30:20) Kemba wa malumbo apepele ati: “Mwe Lesa, . . . tumeni ulubuuto lwenu ne cine cenu. Lekeni fintungulule.” (Amalumbo 43:1, 3) Ilyo abena Israele bali aba busumino kuli Yehova, alebasambilisha imibele yakwe. Pa numa ya myaka iingi, Yehova abatumiine ulubuuto ne cine ifya musango uwapulamo. Lesa acitile fyo lintu atumine Umwana wakwe pano isonde.
3. AbaYuda baeshiwe shani ku cisambilisho ca kwa Yesu?
3 Pamo ngo muntunse Yesu Kristu, Umwana wa kwa Lesa aali “lubuuto lwa calo.” (Yohane 8:12) Asambilishe abantu “ifintu ifingi mu milumbe”—abasambilishe ifipya. (Marko 4:2) Aebele Ponti Pilato ati: “Ubufumu bwandi te bwa pano isonde.” (Yohane 18:36) Ico cali cintu icipya ku bena Roma na ku baYuda abatemwishishe uluko lwabo, pantu baletontonkanyo kuti Mesia ali no kufumyapo Ubuteko bwa ciRoma no kubwesesha Israele ubukata ubo akwete intanshi. Yesu alesanika ulubuuto ukufuma kuli Yehova, lelo bakateka ba ciYuda “abatemenwe ukutashiwa ukufuma ku bantu ukucilo kutashiwa ukufuma kuli Lesa,” tabatemenwe ifyo alandile. (Yohane 12:42, 43) Abengi basalilepo ukulambatila ku cishilano ca bantunse ukucila ukupokelela ulubuuto lwa ku mupashi ne cine ukufuma kuli Lesa.—Amalumbo 43:3; Mateo 13:15.
4. Twaishiba shani ukuti abasambi ba kwa Yesu bali no kutwalilila ukulunduluka mu kumfwikisha?
4 Nangu cibe fyo, abaume na banakashi abafumacumi abafulilako, mu buseko bapokelele icine ico Yesu asambilishe. Batwalilile ukulunduluka mu kumfwikisha imifwaile ya kwa Lesa. Nangu cingati ubumi bwa pe sonde ubwa kwa Kasambilisha wabo bwapalamine ku mpela, bali bacili nabakwata ifingi ifya kusambilila. Yesu abebele ati: “Ncili na fyo ifingi ifya kusosa kuli imwe, lelo te kuti mufyumfwe nomba.” (Yohane 16:12) Ca cine, abasambi bali no kutwalilila ukulunduluka mu kumfwikisha icine ca kwa Lesa.
Ulubuuto Lwatwalilila Ukubalika
5. Cipusho nshi caimine mu mwanda wa myaka uwa kubalilapo, kabili ni bani bali no kucikalulula?
5 Pa numa ya kufwa no kubuushiwa kwa kwa Yesu, ulubuuto ukufuma kuli Lesa lwalibalikishe ukucila kale lyonse. Mu cimonwa capeelwe kuli Petro, Yehova asokolwele ukuti Abena fyalo bashasembululwa bali no kusanguka abakonshi ba kwa Kristu. (Imilimo 10:9-17) Mwandi ico cali cintu icipya! Nangu cibe fyo, pa numa kwabele icipusho ca kuti: Bushe Yehova alefwaya Abena fyalo ba musango yo ukusembululwa ilyo basanguka Abena Kristu? Ico cipusho tacayaswikwe mu cimonwa, kabili Abena Kristu balikansene nga nshi pali uyo mulandu. Walekabila ukukalululwa, epali waonaula ukwikatana kwabo ukwaumo mutengo. E ico, mu Yerusalemu “abatumwa na bakalamba balongene ku kutontonkanyo lwa cebo ici.”—Imilimo 15:1, 2, 6.
6. Ni nshila nshi abatumwa na bakalamba bakonkele lintu babebetele icipusho pa lwa kusembululwa?
6 Abasangilweko kuli kulya kukumana bali no kwishiba shani ifyo Lesa alefwaya ku Bena fyalo? Yehova tatumine malaika ku kutekesha kulya kukumana, nangu ukupeela abasangilweko icimonwa. Nalyo line, abatumwa na bakalamba tabashele fye ababula ubutungulushi. Babebetele ubunte bwa Bena Kristu ba ciYuda abamweneko fintu Lesa atendeke ukubisha abena fyalo, no kupongolola umupashi wakwe uwa mushilo pa Bena fyalo bashasembululwa. Na kabili basapike ubutungulushi bwa mu Malembo. E ico, ifyo umusambi Yakobo atubulwile fyashimpilwe pe lembo lya kushilimuna. Ilyo baletontonkanya pali ubo bushininkisho, ukufwaya kwa kwa Lesa kwalimoneke apabuuta. Abena fyalo tabalekabila ukusembululwa pa kuti bengasenaminwa na Yehova. Mu kwangufyanya abatumwa na bakalamba balembele ifyapingwilwe pa kuti fingatungulula Abena Kristu banabo.—Imilimo 15:12-29; 16:4.
7. Abena Kristu ba mu mwanda wa myaka uwa kubalilapo balundulwike shani?
7 Ukupusanako na bashimapepo ba ciYuda abalambatile ku fishilano fya fikolwe fyabo, Abena Kristu ba ciYuda abengi balisekelele lintu bapokelele uku kumfwikisha kupya ukushaiwamina ukwa mifwaile ya kwa Lesa ukulosha ku Bena fyalo, nangu cingati ukupokelela kwene kwakabile ukwalula fintu balemona Abena fyalo. Yehova alibapaalile pa kuicefya kwabo, kabili ‘inkuta shalikoshiwe mu citetekelo, shalesanduluka impendwa ubushiku no bushiku.’—Imilimo 15:31; 16:5.
8. (a) Twaishiba shani ukuti ulubuuto na lumbi lwali no kubalika ilyo umwanda wa myaka uwa kubalilapo wapwile? (b) Fipusho nshi ifyalinga ifyo twalalandapo?
8 Ulubuuto lwa ku mupashi lwatwalilile ukubalika mu mwanda wa myaka onse uwa kubalilapo. Lelo Yehova tasokolwele imbali shonse isha mifwaile yakwe ku Bena Kristu ba mu kubangilila. Umutumwa Paulo aebele abasumina banankwe aba mu mwanda wa myaka uwa kubalilapo ati: “Pali nomba tumwena nga mu cilola ifilubwalubwa.” (1 Abena Korinti 13:12) Ifintu tafyalemoneka bwino pa cilola ca musango yo. Pali ilya nshita, pa kubalilapo fye, ukumfwikisha ulubuuto lwa ku mupashi kwali no kuba ukwapelebela. Ilyo abatumwa bafwile, ulubuuto lwalishibantukile pa nshita imo, lelo pali ndakai ukwishiba Amalembo kwalifulilako. (Daniele 12:4) Bushe Yehova ashilimuna shani abantu bakwe ilelo? Kabili tulingile ukwankulako shani lintu atanununa ukumfwikisha kwesu ukwa Malembo?
Ulubuuto Lulebalikilako Panono Panono
9. Ni nshila nshi iyaibela kabili iya kusambililamo bwino Baibolo yabomfiwe na Basambi ba Baibolo aba mu kubangilila?
9 Mu nshita sha ndakai, ulubuuto lwine lwine ulwa kubalilapo lwatendeke ukubalika mu myaka 25 iya kulekelesha mu mwanda wa myaka uwalenga 19 ilintu ibumba lya baume na banakashi ba Bwina Kristu batendeke ukusambilila Amalembo mu mukoosha. Basangile inshila ya kusambililamo bwino Baibolo. Umo nga aipusha icipusho; ibumba lyonse lyaleceeceeta Amalembo yonse ayaampeneko. Lintu camoneke kwati icikomo cimo ica mu Baibolo calepilikana ne cibiye, aba Bena Kristu bafumaluka baleesha ukufikatanya. Ukupusanako na bashimapepo abaliko pali ilya nshita, Abasambi ba Baibolo (nga fintu Inte sha kwa Yehova shaleitwa pali iyo nshita) bapampamine pa kutungululwa na Malembo ya Mushilo, te cishilano nelyo icifundisho ca buntunse iyo. Pa numa ya kubebeta ubushininkisho bonse ubwa mu Malembo, balelemba ifyo balesanga. Muli yo nshila, batendeke ukumfwikisha ififundisho ifingi ifya kutendekelako ifya mu Baibolo.
10. Fitabo nshi ifya kwafwa ukusambilila Baibolo fintu Charles Taze Russell alembele?
10 Charles Taze Russell e walumbwikepo pa Basambi ba Baibolo. Alembele ifitabo 6 ifyakonkana ifya kwafwa ukusambilila Baibolo ifyaleitwa Studies in the Scriptures. Munyina Russell alefwaya ukulemba volyumu walenga 7, uwali no kulondolola amabuuku ya mu Baibolo aya kwa Esekiele na Ukusokolola. Atile: “Ilyo nkasanga ulufungulo nkalemba Volyumu Walenga 7.” Nangu cibe fyo, alundilepo ati: “Nga Shikulu apeela umuntu umbi ulufungulo, ninshi e ukalemba.”
11. Inshita no kumfwikisha kwesu imifwaile ya kwa Lesa fyaampana shani?
11 Ifi fyebo ifyo C. T. Russell alandile filangilila ukuti inshita yalicindama pa kuti twingomfwikisha amalembo yamo mu Baibolo. Munyina Russell alishibe ukuti tali no kupatikisha ulubuuto ukusanikila pe buuku lya Ukusokolola nga fintu umulendo uusakamikwe ashingapatikisha akasuba ukutula ilyo inshita yalingwa ishilafika.
Ukusokololwa—Lelo mu Nshita ya kwa Lesa Iyalingwa
12. (a) Ni lilali twingomfwikisha bwino ukusesema kwa mu Baibolo? (b) Ca kumwenako nshi cilangilila ukuti ukumfwikisha kwesu ukusesema kwa mu Baibolo kwashintilila pa nshita intu Lesa atantika? (Moneni utulembo twa pe samba.)
12 Nga fintu abatumwa baumfwikishe ukusesema ukwingi pa lwa kwa Mesia pa numa ya kufwa no kubuushiwa kwa kwa Yesu, Abena Kristu ilelo bomfwikisha bwino ukusesema kwa mu Baibolo pa numa kwafikilishiwa. (Luka 24:15, 27; Imilimo 1:15-21; 4:26, 27) Ukusokolola libuuku lya kusesema, e co tulingile ukwenekela ukulyumfwikisha bwino ilintu ifyalondololwamo fyacitika. Ku ca kumwenako, C. T. Russell tali no kumfwikisha bwino ubupilibulo bwa ciswango cakashika ica mampalanya icalumbulwa mu Ukusokolola 17:9-11, apantu utubungwe utwimininako ici ciswango, e kutila, League of Nations na United Nations, twaishileko pa numa ya mfwa yakwe. *
13. Cinshi limo limo cicitika lintu ulubuuto lwasanikila pa mulandu umo uwa mu Baibolo?
13 Lintu Abena Kristu ba mu kubangilila baishibe ukuti Abena fyalo kuti baba abasumina banabo, uko kwaluka kwaletele icipusho na cimbi pa lwa kusembululwa kwa bena fyalo. Ici calengele abatumwa na bakalamba ukubebeta cipya cipya umulandu onse uwa kusembululwa. E fyo caba na pali lelo. Lintu ulubuuto ulwabengeshima lwasanikila pa mulandu umo uwa mu Baibolo limo limo cilenga ababomfi basubwa aba kwa Lesa, “umusha wa cishinka kabili uwashilimuka,” ukubebeta cipya cipya imilandu iyaampanako, nga fintu ica kumwenako cakonkapo ica nomba line cilelangilila.—Mateo 24:45.
14-16. Ukuteulula fintu twaishibe pa lwe tempele lya ku mupashi kwayalwile shani ifyo twaleumfwikisha Esekiele ifipandwa 40 ukufika ku 48?
14 Mu 1971 ukulondolola kwa kusesema kwa kwa Esekiele kwalisabankanishiwe mu citabo ca “The Nations Shall Know That l Am Jehovah”—How? Icipandwa cimo muli ico citabo calandile panono pa cimonwa ce tempele ica kwa Esekiele. (Esekiele, ifipandwa 40-48) Pali iyo nshita, babebetele fintu icimonwa ce tempele ica kwa Esekiele cali no kufikilishiwa mu calo cipya.—2 Petro 3:13.
15 Nangu cibe fyo, ifipande fibili ifyasabankanishiwe mu Ulupungu lwa kwa Kalinda lwa ciNgeleshi ulwa December 1, 1972, fyayalwile ifyo twalemona icimonwa ca kwa Esekiele. Fyalandile pe tempele lya ku mupashi ilikulu ilyo umutumwa Paulo alondolwele mu AbaHebere icipandwa 10. Ulo Ulupungu lwa kwa Kalinda lwalondolwele ukuti Umwashila na mu lubansa lwa mu kati ulwa mwi tempele lya ku mupashi filosha ku mibele ya basubwa ilyo bacili pe sonde. Lintu bapitulwike muli Esekiele ifipandwa 40 ukufika ku 48 mu myaka yakonkelepo, balilwike ukuti nga fintu ilelo kwabe tempele lya ku mupashi, ninshi ne tempele lintu Esekiele amwene mu cimonwa lifwile nalyo line e ko lyaba. Mu nshila nshi?
16 Mu cimonwa ca kwa Esekiele, bashimapepo bamonwa balepitana mu mansa she tempele ilintu balebombela aba mikowa ishili ya bushimapepo. Cilemoneke fyo aba bashimapepo baleimininako “bushimapepo bwa bufumu,” ababomfi basubwa aba kwa Yehova. (1 Petro 2:9) Nangu cibe fyo, tabakalebombela mu lubansa lwa pe sonde ulwa mwi tempele mu Kuteka kwa Myaka Ikana Limo Ukwa kwa Kristu. (Ukusokolola 20:4) Mu ciputulwa cikalamba ica ilya nshita, nalimo mu ciputulwa conse fye, abasubwa bakalabombela Lesa Umwashilisha mwi tempele lya ku mupashi, “mu muulu mwine.” (AbaHebere 9:24) Apo bashimapepo bamonwa baleingila no kufuma mu mansa she tempele lya kwa Esekiele, ico cimonwa cifwile cilefikilishiwa ilelo, ilyo abasubwa bamo bacili pe sonde. E ico, magazini uwa March 1, 1999, alangishe imimwene yateululwa pa lwa uyu mulandu. Muli fyo, ukufika fye na ku mpela ya mwanda wa myaka uwalenga 20, ulubuuto lwa ku mupashi lwalisanikile pa kusesema kwa kwa Esekiele.
Beni Abaitemenwa Ukuteulula Imimwene Yenu
17. Mwateulula shani imimwene yenu ukutula apo mwaishibila icine, kabili mwanonkelamo shani?
17 Onse uulefwaya ukwishiba icine afwile ukuitemenwa ukutwala “amapange yonse muli bunkole ku cumfwila ca kuli Kristu.” (2 Abena Korinti 10:5) Ukucite co te lyonse kwayanguka, pali bufi nga imimwene yesu naishikama sana. Ku ca kumwenako, ilyo mushilasambilila icine ca kwa Lesa, nalimo imwe no lupwa lwenu mwaleipakisha ukusefya inshiku shimo isha mwikalwe isha mipepele. Ilyo mwatendeke ukusambilila Baibolo, mwalilwike ukuti uku kusefya kwa busenshi. Pa kubala, nalimo mwalishimunwike ukubomfya ifyo mwalesambilila. Lelo, mwasukile mwatemwapo Lesa ukucila ifisumino fya mipepele, kabili mwalilekele ukuitumpa mu fya kusefya ififulwisha Lesa. Bushe Yehova tapaalile ukupingulapo kwenu?—Linganyeniko AbaHebere 11:25.
18. Tulingile ukucita shani lintu imimwene yesu iya Malembo yamo yateululwa?
18 Lyonse tulanonkelamo mu kucita ifyo Lesa afwaya. (Esaya 48:17, 18) E co lintu imimwene yesu pa lwa Malembo yamo yateululwa, natusekelele pa kuti icine cilelunduluka! Cine cine, ilyo tuletwalilila ukushilimunwa cishininkisha ukuti tuli mu nshila yalungama. Ni “nshila ya balungami,” iyaba ngo “lubuuto ulwabalika, ululeya no kubuuta kasuka akasuba kasaama.” (Amapinda 4:18) Cine cine, pali nomba tumona imbali shimo isha mifwaile ya kwa Lesa ‘mu filubwalubwa.’ Lelo lintu inshita ya kwa Lesa iyalingwa ikafika, tukamona iciyembo conse ica cine, kulila fye inkasa shesu tashipaaswike ukufuma mu “nshila.” Pali ino nshita, shi natusekelele pa cine ico Yehova alenga ukumfwika, ilyo tulelolela akasanikile pa cine ico tucili tatulaumfwikisha.
19. Ni nshila nshi imo twingalangilamo ukuti twalitemwa icine?
19 Kuti twalangilila bwino shani ukuti twalitemwa ulubuuto? Inshila imo kupitila mu kubelenga lyonse Icebo ca kwa Lesa—cila bushiku nga cingacitika. Bushe mulakonka programu uwa kubelenga Baibolo lyonse? Bamagazini ba Ulupungu lwa kwa Kalinda na Loleni! na bo bene balatupayanishisha ica kulya ca ku mupashi icisuma kabili icapaka ico tuipakisha. Ifitabo, babroshuwa, ne mpapulo na fyo fine fyabelako ku kutunonsha. Kabili ni shani pa lwa malipoti ya mulimo wa kushimikila pa lwa Bufumu ayasabankanishiwa muli Yearbook of Jehovah’s Witnesses?
20. Ulubuuto ne cine ukufuma kuli Yehova fyaampana shani no kusangwa kwesu ku kulongana kwa Bwina Kristu?
20 Ca cine, Yehova mu nshila ya kusungusha alyasuka ipepo ilyaba pa Amalumbo 43:3. Ku mpela ya ico cikomo, tubelengapo ati: “[Ulubuuto lwenu ne cine cenu] fimfishe ku lupili lwenu lwa mushilo, na ku mekalo yenu.” Bushe mulafuluka ukupepa Yehova, mwi bumba lya bantu bambi? Ifya ku mupashi ifisambilishiwa ku kulongana kwesu fyaba ni nshila yacindama iyo Yehova atushilimwinamo ilelo. Cinshi twingacita pa kuti twingatesekesha sana ukulongana kwa Bwina Kristu? Tulemulaalika ukubebeta uyu mulandu mu kubamo ipepo mu cipande cikonkelepo.
[Futunoti]
^ para. 12 Pa numa ya mfwa ya kwa C. T. Russell, ulupapulo ulwaishibikwe nga volyumu walenga 7 uwa Studies in the Scriptures lwalilembelwe ku kwesha ukulondolola amabuuku ya kwa Esekiele na Ukusokolola. Lubali lumo, uyu volyumu ashimpilwe, pa fyebo ifyo Russell alandilepo pali ayo mabuuku. Nangu cibe fyo, inshita ya kusokolola ubupilibulo bwa uko kusesema yali tailafika, kabili ifingi, ifyalondolwelwe muli uyo volyumu wa Studies in the Scriptures fyali mu filubwalubwa. Mu myaka yakonkelepo, uluse lwa kwa Yehova ne fyatendeke ukucitika mwi sonde fyalisuminisha Abena Kristu ukwiluka bwino sana ubupilibulo bwa ayo mabuuku ya kusesema.
Bushe Kuti Mwayasuka?
• Mulandu nshi Yehova asokolwela panono panono imifwaile yakwe?
• Abatumwa na bakalamba mu Yerusalemu bakalulwile shani umulandu wa kusembululwa?
• Ni nshila nshi iya kusambililamo Baibolo Abasambi ba Baibolo aba mu kubangilila babomfeshe, kabili mulandu nshi yabelele iyaibela?
• Langilileni fintu ulubuuto lwa ku mupashi lusokololwa mu nshita yalingwa iya kwa Lesa.
[Amepusho]
[Icikope pe bula 12]
Charles Taze Russell alishibe ukuti ulubuuto lwali no kusanikila pe buuku lya Ukusokolola mu nshita ya kwa Lesa iyalingwa