Tuli Abakwata Icitetekelo

Ukwebako Bambi pa lwe Subilo lya Bwina Kristu mu Senegal

ISABI ca kulya cikalamba ukufuma fye na ku kale. Abantu balipaya isabi muli babemba, abakalamba na banono na mu mimana pa myaka iingi. Abatumwa ba kwa Yesu Kristu bamo bali balondo ba pali Bemba wa Galili. Nangu ni fyo, Yesu abasambilishe umusango umbi uwa bulondo. Ubu bwali bulondo bwa ku mupashi ubwali no kunonsha abalondo pamo pene ne sabi line.

Pa lwa ici, Yesu aebele umulondo Petro ukuti: “Ukufuma pali nomba ukaba umulondo wa bantu.” (Luka 5:10) Ubu bulondo bulecitwa ne lelo mu fyalo ukucila pali 230, ukusanshako na mu Senegal. (Mateo 24:14) Kuno “abalondo ba bantu” aba ndakai, baleebako bambi pa lwe subilo lyabo ilya Bwina Kristu.—Mateo 4:19.

Senegal yabela ku masamba fye ya Afrika. Yatendekela lwa ku ncende sha fiswebebe fya musensenga ifyapakana na Sahara lwa ku kapinda ka kuso ukushinta ku mitengo ya cipuki iyabela mu ncende ya Casamance ku kapinda ka kulyo. Mu Senegal mwaba umwela wa cikabilila uufuma mu ciswebebe pamo pene na kamwela kasuma akatalala akafuma ku Atlantic. Mwaba abantu ukucila pa mamilioni 9. Abantu ba mu Senegal ba cileela sana. Abengi te Bena Kristu. Abengi ni bakacema, lelo bambi bateka ing’ombe, ingamali ne mbushi. Mwaba na balimi ba mbalala, tonge no mupunga. Ca cine, na balondo be sabi balesa na masumbu ayaisulamo isabi ukufuma mu Atlantic Ocean na mu mimana imbi iikalamba iya muli ci calo. Ubulondo mu Senegal bwalileta ubunonshi. Na kuba ica kulya cikalamba ica ici calo ni ceebu jën, ica kulya cisuma ica mupunga, isabi, no musalu.

“Abalondo ba Bantu”

Mu Senegal mwaba bakabilisha ba Bufumu bwa kwa Lesa abapimpa 850. Ubulondo bwa ku mupashi muli ci calo bwatendeke muli ba 1950. Amaofeshi yanono aya Watch Tower Society yaiswilwe mu Dakar, umusumba ukalamba, mu 1965. “Abalondo” abali bamishonari batendeke ukwisa ukufuma ku fyalo fya kutali. “Ubulondo” bwalitendeke, kabili ukwebako bambi pa lwe subilo lya Bwina Kristu mu Senegal kwalilundulwike. Mu kuya kwa nshita, amaofeshi yanono aya Watch Tower Society yalikuulilwe ku nse ya Dakar, kabili yapeelwe kuli Yehova mu June 1999. Mwandi yali ni nshita ya kusekelela!

Amafya Yabapo pa Kupokelela Icine

Abantu ba fikulilo fyalekanalekana baletununukwa libili libili, kabili bambi balankulako bwino ku bukombe bwe subilo ubusangwa mu Cebo ca kwa Lesa. Nangu cingati abengi tabaishiba Baibolo, balasekelela ukusambilila ukuti amalayo ya kwa Yehova Lesa kuli bakasesema bakwe aba busumino aba ku kale yali no kufikilishiwa nomba line.

Ilingi tukabila ukushipa pa kuti twikatilile mu kushangila ku fishinte fya Bwina Kristu, maka maka nga cabimbamo ifishilano fya lupwa ne myata. Ku ca kumwenako, impali shaliseeka sana mu Senegal. Umfweni pa lwa mwaume uwakwete abakashi babili ilyo atendeke ukusambilila Baibolo. Bushe mu kushipa ali no kupokelela icine ca Bwina Kristu no kukonka icifwaikwa ca mu Malembo ica kuba umulume wa mukashi umo? (1 Timote 3:2) Bushe ali no kushala no mukashi wa mu bulumendo bwakwe, e kuti umwanakashi abalilepo ukuupa? E fyo acitile, kabili pali ino nshita ni eluda wapimpa pali cimo ica filonganino fikalamba mu ncende ya Dakar. Umukashi wakwe uwa ntanshi na o alipokelela icine pamo pene na bana bakwe bonse 12, pali aba 10 ba mu mukashi wa ntanshi, na babili ba mu wali kale umukashi wakwe uwa bubili.

Icipindami cimbi ku kupokelela isubilo lya Bwina Kristu kuti caba kukanaishiba ukulemba no kubelenga. Bushe ici cilepilibula ukuti umuntu uushaishiba ukubelenga no kulemba te kuti asambilishe icine? Iyo. Moneni ica kumwenako ca kwa Marie, uwakwata abana 8 abanono. Mu kwangufyanya alimwene ubucindami bwa kulanshanya ilembo ukufuma mu Baibolo na bana bakwe abaice cila bushiku ilyo bashilaya ku sukulu na o talaya ku ncito. Lelo ali no kucita shani ico apo taishibe kubelenga? Cila lucelocelo, alesenda akatabo ka Ukubebeta Amalembo no kwiminina mu kashila kapitile  ku ntanshi ya ng’anda yakwe. Ilyo abantu balepita, alebepusha nga balishiba ukubelenga. Nga asanga uwaishiba ukubelenga, alemupeela akatabo no kulanda mu bufumacumi ukuti: “Nshaishiba kubelenga, shi mbelengeleniko apa ilelo.” Alekutikisha ku fyo balebelenga. Pa numa ya ico aletasha umupita nshila no kwingila mu ng’anda mu kwangufyanya ku kulanshanya ilembo na bana bakwe ilyo bashilaya ku sukulu!

Abantu ba Misango na Misango Balekutika

Mu Senegal, abantu balasangwa mu misebo baleshitisha isabi, umusalu, nelyo ifisabo pa maliketi nangu ukwikala mwi samba lya cimuti ca baobab balenwa tii uwakantuka uo beta ati ataya. Pa kupampamina ukuti bebeko bonse abo balekumanya pa lwa mbila nsuma, bamunyina babili balandile ku mwaume uwalemana uwaleikala mu nshila alelombelesha. Pa numa ya kumuposha, batile: “Abengi balamupeela indalama lelo tabeminina ku kulanda na imwe. Twaisa ku kulanda na imwe pa cintu cimo icacindama sana icikumine inshita yenu iya ku ntanshi.” Uyu kalombalomba alisungwike. Bamunyina batwalilile ukuti: “Tulefwaya ukumwipushako icipusho. Bushe mulandu nshi mu calo mwabela amafya yafule fi?” Kalombalomba ayaswike ati, “Kufwaya kwa kwa Lesa.”

Lyene bamunyina bapelulushenye nankwe ukufuma mu Malembo no kumulondolwela Ukusokolola 21:4. Uyu kalombalomba alitemenwe nga nshi ubu bukombe bwe subilo na pa mulandu wa kuti kwali uwamutemenwe sana ica kuti aliminine no kulanda na wene pa lwa Baibolo. Amenso yakwe yaiswilemo ifilamba. Mu cifulo ca kulomba indalama, apaapeete bamunyina ukuti basende amakobili yonse ayali mu cikopo alesungilamo indalama sha kulomba! Alibapatikishe ica kuti na bonse abalepita mu nshila balimwene. Bamunyina bakoselepo fye ukuti ashale na shilya ndalama. Mu kupelako alisumine lelo abakonkomeshe ukuti bakamutandalile na kabili.

Yuniversiti ikalamba iya ku Darkar na yo naisanshiwa pe sabi ililefwa mwi sumbu lya ku mupashi. Jean-Louis uwalesambilila ifya budokota pali lilya isukulu atendeke ukusambilila Baibolo. Mu kwangufyanya alipokelele icine, aipeela kuli Yehova, no kubatishiwa. Alefwaisha sana ukubombela Lesa mu mulimo wa nshita yonse uwa bupainiya, lelo pa nshita imo imo alitemenwe amasambililo yakwe aya budokota. Pa mulandu wa fyo asuminishenye ne calo ca ku mwabo, alekabila ukupwisha amasambililo yakwe. Nangu ni fyo, atendeke ukubomba bupainiya bwa kwafwilisha uku no kusambilila. Pa numa fye ya kupoka diploma nga dokota wafikapo, alitilwe ku kubombela pa ng’anda iikalamba iya Bethel mu Afrika nga dokota wa lupwa lwa Bethel. Umulumendo na umbi uwashimikilwe ninshi ali pa Dakar University pali nomba abombela pa Bethel ku calo ca ku mwabo.

Muli ifilambu icine cine mu bulondo bwa ku mupashi mu Senegal. Ifitabo fyashimpwa pali Baibolo ifya Nte sha kwa Yehova fyalitemwikwa nga nshi kabili pali nomba filepulintwa mu lulimi lwa cikaya ulwa Wolof. Ukumfwa imbila nsuma mu lulimi lwabo lwine kwalikoselesha abengi aba mitima ya bufumacumi ukukutika ku mbila nsuma no kutasha. Ukwabula ukutwishika ipaalo lya kwa Yehova, lilelenga ukuti isabi lya cimpashanya ilingi lileikatwa lintu “abalondo ba bantu” abapimpa mu Senegal baletwalilila ukwebako bambi pa lwe subilo lya Bwina Kristu mu citetekelo kabili mu kushipa.

[Mapu ne Cikope pe bula 31]

(Nga mulefwaya ukumona mapu, moneni muli magazini)

SENEGAL

[Icikope]

Ukwebako bambi pa lwe subilo lya Bwina Kristu mu Senegal

[Abatusuminishe]

Mountain High Maps® Copyright © 1997 Digital Wisdom, Inc.