Umulandu Abantu Bakabila Kaafwa

UMUNTU umo uwali kale uwa cilumba kabili uwa lukaakala atile, ‘nali kalamata uwakaluka.’ Ali uwa miponto, uwalecusha no kusansa abakonshi ba kwa Yesu Kristu abatiina Lesa. Ilyo aletasha atile: “Lelo nabelelwe uluse.” Nangu cingati cilemoneka ica kupapusha, uyu kalamata ushaibipila aishileba Paulo, umutumwa wa Bwina Kristu uwa busumino.—1 Timote 1:12-16; Imilimo 9:1-19.

Te bonse abaacita ifintu Paulo acitile. Lelo, ifwe bonse tulafilwa ukufika pa fipimo fya kwa Lesa. Mulandu nshi? Pantu ‘bonse balibembuka, kabili balipelebela ku bukata bwa kwa Lesa.’ (Abena Roma 3:23) Kabili calyanguka nga nshi ukuba abapelelwa icine cine, nalimo ukulatontonkanya ukuti twalibipisha ica kuti Lesa te kuti atubelele uluse. Ilyo aletontonkanya pa fyo alemenene ku lubembu, Paulo umwine atile: “Iye, ne muntu wa nkumbabulili ne! Ni ani akampokolola ku mubili uno uwa mfwa?” Ilyo aleyasuka icipusho cakwe alembele ukuti: “Kube ukutootela kuli Lesa muli Yesu Kristu Shikulwifwe!”—Abena Roma 7:24, 25.

Ni shani fintu Kabumba uwalungama engalabomba na babembu? (Amalumbo 5:4) Moneni ukuti Paulo atile: ‘Kube ukutootela kuli Lesa muli Yesu Kristu Shikulwifwe.’ Na umbi uo Lesa abelele uluse alondolwele ukuti: “Ngo muntu abembuka, natukwato Bukota [“kaafwa,” NW] kuli Shifwe, Yesu Kristu umulungami: kabili wene e cikonsolwelo ca pa membu shesu; kabili te ca pa shesu sheka, lelo ne ca pa membu sha ba pano isonde bonse.”—1 Yohane 2:1, 2.

Mulandu nshi Yesu Kristu etilwa “ubukota kuli Shifwe”? Kabili ni shani fintu Yesu aba “icikonsolwelo” ca pa membu shesu?

Umulandu Tukabila Kaafwa

Yesu aishile pe sonde ku “kupeelo mweo wakwe icilubula ca pa bengi.” (Mateo 20:28) Icilubula cintu cilipilwa ku kulubula, umo nelyo icintu. Verbu we shiwi lya ciHebere ilyapilibulwa “icilubula” alangilila imfundo ya kufimbapo, nelyo ukukonsolwela, imembu. (Amalumbo 78:38) Ishiwi lya ciGriki nga lilya lisangwa pali  Mateo 20:28, lyabomfiwe maka maka ku kulanda pa filipilwa ku kulubula abafungwa bekatwa mu nkondo nelyo abasha. Pa kuti pabe ubulungi, icintu cimo cilapeelwa pa kulubula cimbi icikwete umutengo umo wine.

Abantunse baishileba abasha pa mulandu wa kuti umuntu wa kubalilapo apondokele Lesa. Nga fintu calangililwa mu Ukutendeka icipandwa 3, ulya muntu wapwililika—Adamu—asalilepo ukupondokela Yehova Lesa. Mu kucite fyo, aliishitishe ku busha bwa lubembu ne mfwa pamo no bufyashi bwakwe ubwali bushilafyalwa. Kuli wene no bufyashi bwakwe bonse, Adamu alufishe ubupe bwa bumi bwapwililika.—Abena Roma 5:12, 18, 19; 7:14.

Muli Israele wa pa kale, Lesa atantike ukuti kuleba amalambo ya nama aya kukonsolwela nelyo ukufimba pa membu sha bantu. (Ubwina Lebi 1:4; 4:20, 35) Na kuba, ubumi bwa nama yalepeelwa nge lambo bwalepeelwa ukupyana pa bumi bwa mubembu. (Ubwina Lebi 17:11) Kuli pele pele, “ubushiku bwa kukonsolwela” kuti bwaitwa na kabili ukuti “ubushiku bwa cilubula.”—Ubwina Lebi 23:26-28.

Lelo, apo inama tashacila abantunse, “umulopa wa ng’ombe shilume ne mbushi te kuti usende imembu [umupwilapo].” (AbaHebere 10:1-4) Pa kuti ilambo likwate amaka yakumanina aya kukonsolwela, nelyo ukufumyapo, imembu umupwilapo, lilekabila ukulingana ne fyo Adamu alufishe. Ubulungi bwalekabila umuntu wapwililika (Yesu Kristu) ukulingana ne fyo umuntu umbi uwapwililika (Adamu) alufishe. Umuntu wapwililika e wali fye no kulipila icilubula ku kulubula ubufyashi bwa kwa Adamu mu busha umo shibo wa ntanshi abashitishe. “Umweo pa mulandu wa mweo” wali no kufika pa cipimo ca bulungi bwa cine.—Ukufuma 21:23-25.

Lintu Adamu abembwike no kupingulwa ukufwa, ubufyashi bwakwe ubwali bushilafyalwa bwali bucili mu musana wakwe e co na bo bwafwile na wene. Umuntu wapwililika Yesu, “Adamu wa kupelelekesha,” asalilepo ukukanakwata ulupwa. (1 Abena Korinti 15:45) Alikwete ubufyashi bushilafyalwa mu musana wakwe lintu afwile nge lambo lyapwililika ilya buntunse. E co, kuti twatila ubufyashi bwa bantunse ubwali mu musana wakwe bwafwile na wene. Yesu asendele ulupwa lwa kwa Adamu ulwa lubembu kabili ulwina kufwa ngo lwakwe. Alisuulileko ku kukwata ulupwa lwakwe. Ukupitila mu kupeela ubumi bwakwe ubwapwililika nge lambo, Yesu ashitile abantunse bonse abafumine kuli Adamu pa kuti babe ulupwa Lwakwe, Ukumulenga abe ‘Shibo uwa nshita pe.’—Esaya 9:6, 7.

Ilambo lya cilubula ca kwa Yesu lyalengele abantunse ba cumfwila ukupokelela uluse lwa kwa Lesa no kukwata umweo wa muyayaya. E co, umutumwa Paulo alembele ukuti: “Icilambu ca lubembu ni mfwa; lelo ica bupe ca kwa Lesa mweo wa muyayaya muli Yesu Kristu Shikulwifwe.” (Abena Roma 6:23) Pali ico, tulalumbanya Yehova pa kutemwa no luse ifyo alangile ukupitila mu cilubula, ico apeele pa kucululuka nga nshi uko acululwike no Mwana wakwe uo atemwa nga nshi. (Yohane 3:16) Kabili cine cine Yesu ali “bukota kuli Shifwe” ilyo abuushiwe ku bumi bwa mu muulu no kulipila umutengo we lambo lya cilubula kuli Lesa mu muulu. * (AbaHebere 9:11, 12, 24; 1 Petro 3:18) Lelo ni shani fintu Yesu Kristu nomba aba kaafwa wesu mu muulu?

[Futunoti]

[Icikope pe bula 4]

Ubumi bwapwililika ubwa kwa Yesu ilyo ali umuntunse bwaishileba ca kulubwilako ubufyashi bwa kwa Adamu