Ilyashi lya Bakabilisha Ba Bufumu

“Mwalishiba Ifingi Nga Nshi Ifyaba mu Baibolo”

LINTU Yesu, uwali ne myaka 12 alandile mu kushipa kuli bashimapepo mu Yerusalemu, “bonse abaleumfwa kuli wene balepapa ku mucetekanya wakwe ne myasukile yakwe.” (Luka 2:47) Na pali lelo, ababomfi ba kwa Yehova abacaice abengi balaba abashipa lintu balelanda kuli bakafundisha wabo na ku bana be sukulu banabo pa lwa kwa Lesa na Baibolo, kabili ilingi line balaba ne cimwemwe ku fya kufumamo fisuma.

Tiffany, uwa myaka 14, alekutika kuli kafundisha lintu alesambilisha pa lwa kusesema kwa mu Baibolo ukwaba pali Daniele 9:24-27 apalumbulwa imyaka 7 ukufushiwa imiku 70. Kafundisha alondolwele fye ifi fikomo patali patali ukwabula ukuti alondolole bwino ifyo fyalepilibula.

Pa kubala, Tiffany aleshingashinga ukwimya ukuboko. Atila: “Lelo icancushishe sana ca kuti tabalondolwele ifi fikomo mu kumfwika. Nalubile ne canjimishe ukuboko.” Kafundisha alipapile lintu amwene ukuti umwana we sukulu umo ali ne fya kulandapo pali lilya isambililo ilyo abana be sukulu bambi bashaumfwikishe.

Ilyo Tiffany bamusuminishe ukulanda, aliminine no kulondolola fye ku mutwe fintu ukusesema kwalepilibula. Lintu apwishishe ukulanda, bonse mu kalasi baikele fye tondolo. Tiffany aumfwileko umwenso panono. E lyo bonse mu kalasi baishiletoota inshita yatantalilako.

Kafundisha atashishe Tiffany imiku yafulilako ukuti: “Walondolola bwino, Tiffany, walondolola bwino.” Asumiine ukuti aalishibe ukuti kwalishele na bumbi ubulondoloshi kuli filya fikomo, lelo Tiffany e wabalilepo ukulondolola bwino kuli ulya kafundisha. Lintu bainwike, kafundisha aipwishe Tiffany icalengele ukuti eshibe ifintu ifingi ifya mu Baibolo.

Tiffany ayaswike ukuti, “Ni pa mulandu wa kuti ndi Nte ya kwa Yehova, abafyashi bandi balinondolwela uku kusesema imiku iyafulilako pa kuti ningomfwikisha.”

Na bana be sukulu banankwe na bo balipapile fintu Tiffany aishiba Baibolo. Uwalesambilila na Tiffany umo amwebele ukuti: “Nomba naishiba umulandu mwe Nte sha kwa Yehova mwatemenwa ukuya ku ng’anda ne ng’anda; ni co mwalishiba ifingi nga nshi ifyaba mu Baibolo.” Bambi bamulaile no kuti tabakatale abamuseka na kabili pa fintu asuminamo.

Lintu Tiffany ashimikile abafyashi bakwe ifyacitike ku sukulu, bamukoseleshe ukuyashalika icitabo ca Ukwishiba Uko Kutungulula ku Mweo wa Muyayaya kuli kafundisha wakwe. Ilyo Tiffany atwele icitabo no kulangilila kafundisha icipande calondolola ukusesema kwa kwa Daniele, kafundisha alipokele icitabo ukwabula ukushingashinga kabili alitashishe.

Cine cine, lintu abacaice baba abashipa no kulanda fintu abafyashi babasambilisha pali Lesa na Baibolo, balalumbanya no kucindika Yehova kabili balapaalilwapo nga nshi pali ci.—Mateo 21:15, 16.