Ni Shani Fintu Umupashi wa kwa Lesa Ubomba Pali Lelo?

ALI uwalemana ukufuma fye mwi fumo lya kwa nyina. Cila bushiku aleikala pa mpongolo ya pe tempele apaleitwa ati Apayemba pa kuti alelomba ifya nkumbu ku baleingila mwi tempele. Nangu cibe fyo, kasuba kamo uyu kalombalomba walemana apokelele ica bupe icacilile pa tumakobili utunono. Balimundepe!—Imilimo 3:2-8.

Nangu ca kuti umutumwa Petro na Yohane ‘balimwimishe’ pa kuti ‘amakasa yakwe yakose,’ bene tabafwaile lumbo pa kumundapa. Mulandu nshi? Petro umwine alondolwele ukuti: “Mwe baume ba kwa Israele, nga cinshi mwasungukila pali uyu? Nga cinshi mwatontela amenso pali ifwe, nga fwe bamulengelo kwenda mu maka yesu atemwa kuli bukapepa bwesu?” Cine cine Petro na Yohane balishibe ukuti, te ku maka yabo ica musango yu cingacitilwa, lelo ni ku mupashi wa mushilo uwa kwa Lesa.—Imilimo 3:7-16; 4:29-31.

Pali ilya nshita, “ifisunguko” fyabeleleko ku kulangilila ukuti Lesa e waleyafwilisha icilonganino ca Bwina Kristu icipya. (AbaHebere 2:4) Lelo, pa numa fyabombele mifwaile ya fiko, umutumwa Paulo atile, fyali no ‘kufubalishiwa.’ * (1 Abena Korinti 13:8) E co ilelo tatumona ukundapa ukuli konse ukwapeelwa na Lesa, tatumona ukupeelwa amashiwi ya kusesema, nelyo kutamfye fibanda mu cilonganino ca cine ica Bwina Kristu.

Lelo bushe ici cilepilibulo kuti umupashi wa mushilo uwa kwa Lesa taubomba ilelo? Awe iyo! Natumone inshila shimo umo umupashi wa mushilo uwa kwa Lesa wabombele mu mwanda wa myaka uwa kubalilapo ne fyo ubomba mu nshiku shesu.

“Umupashi wa Cine”

Umulimo umo untu umupashi wa mushilo wa kwa Lesa ubomba waba kwishibisha, ukusanikila, ukusokolola icine. Lintu kwashele inshita inono ilyo Yesu talafwa, aebele abasambi bakwe ukuti: “Ncili na fyo ifingi ifya kusosa kuli imwe, lelo te kuti mufyumfwe nomba. Lelo ilyo akesa ulya, Umupashi wa cine, akamutungulwila mu cine conse.”—Yohane 16:12, 13.

“Umupashi wa cine” walipongolwelwe pa Pentekoste mu 33 C.E. lintu abasambi mupepi na 120 abalongene mu ng’anda ya pa muulu mu Yerusalemu babatishiwe no mupashi wa mushilo. (Imilimo 2:1-4) Umutumwa Petro alisangilwepo pali uyu mutebeto wa pa mwaka. Pa kwisulamo no mupashi wa mushilo, Petro ‘alimine,’ no kulondolola icine pa lwa kwa Yesu ukuti cumfwike. Ku ca kumwenako, ashimike ifyo “Yesu umwina Nasarete,” ‘asansabikwe ku kwa kulyo kwa kwa Lesa.’ (Imilimo 2:14, 22, 33) Kabili umupashi wa mushilo wa kwa Lesa walengele Petro ukubilisha mu kushipa ku baYuda abalemukutika ukuti: “E ico lekeni bonse aba ng’anda ya kwa Israele beshibe bwino bwino, ukuti, Yesu uo imwe [mwapoopeele pa cimuti ca kucushiwilwapo, NW], Lesa acita wene Shikulu kabili Kristu.” (Imilimo 2:36) Icafuminemo muli aya mashiwi yapuutwamo aya kwa Petro cali ca kuti abantu mupepi na 3,000 ‘balipokelele icebo cakwe’ no kubatishiwa. Umupashi wa mushilo wa kwa Lesa muli ifyo walibafwilishe pa kubatungulula mu cine.—Imilimo 2:37-41.

Umupashi wa mushilo uwa kwa Lesa na kabili wali nga kasambilisha kabili kebulula. Yesu atile: “Lelo Ubukota, Umupashi wa mushilo uo Tata akamutumina mwi shina lyandi, wene akamusambilisha fyonse, no kumwibulula fyonse ifyo nasosele kuli imwe.”—Yohane 14:26.

Ni shani fintu umupashi wa mushilo wabombele nga kasambilisha? Umupashi wa kwa Lesa walengele amatontonkanyo ya basambi ukwiluka fintu baumfwile kuli Yesu mu kubangilila, lelo ifyo bashaumfwikishe bwino. Ku ca kumwenako, pa nshita Yesu alelubulula, abatumwa balishibe ifyo aebele kateka wa ciRoma uwa Yudea, Ponti Pilato ati: “Ubufumu bwandi te bwa pano isonde.”  Lelo lintu Yesu alenina ukuya ku muulu pa numa ya nshiku 40, abatumwa bacili bakwete itontonkanyo lya kuti Ubufumu bukemikwa pano pene pe sonde. (Yohane 18:36; Imilimo 1:6) Cimoneka ukuti abatumwa tabaumfwikishe umo amashiwi ya kwa Yesu yalolele ukufikila pa Pentekoste mu 33 C.E. lintu umupashi wa mushilo wa kwa Lesa wapongolwelwe pali bene.

Mu kulundapo umupashi wa mushilo wa kwa Lesa wali nga kebulula mu kubebukishako ifintu ifyapusapusana ifyo Yesu abasambilishe. Ku ca kumwenako, ukusesema kwakuma ku mfwa ya kwa Kristu no kubuuka kwakwe fyaishileumfwikishiwa bwino ukupitila mu kwafwa kwa mupashi wa mushilo. (Mateo 16:21; Yohane 12:16) Ukulaibukisha fintu Yesu abasambilishe, kwalengele abatumwa ukulanda mu kushipa pa ntanshi ya shamfumu, abapingushi, na bashimapepo.—Marko 13:9-11; Imilimo 4:5-20.

Umupashi wa mushilo wa kwa Lesa walyafwilishe Abena Kristu ba mu kubangilila ukuya na mu fifulo fya kushimikilamo umwalefuma ukulunduluka. (Imilimo 16:6-10) Umupashi wa kwa Lesa na kabili walengele Abena Kristu ba mu kubangilila ukulembako Icebo ca kwa Lesa, Baibolo, pa kuti abantu bonse bamwenemo. (2 Timote 3:16) Cine cine umupashi wa mushilo kanshi walibombele mu nshila ishingi mu mwanda wa myaka uwa kubalilapo. Tawapeelwe fye ku kucita ifipesha mano epela.

Umupashi wa Mushilo mu Nshiku Shesu

Umupashi wa mushilo walitwalilila ukubombela Abena Kristu ba cine ilelo mu nshila  yapalako. Ici caishilemonekela pa kalibumba kanono aka Abasambi ba Baibolo mu Allegheny, ku Pennsylvania, mu U.S.A., mu lubali lwa kulekelesha ulwa mwanda wa mwaka uwalenga 19. Aba basambi ba Baibolo aba mukoosha bafulwike ukwishibe “cine.”—Yohane 8:32; 16:13.

Bamo pali aba, baCharles Taze Russell basosele ukukuma ku kufwailisha kwabo ukwa cine ca mu Malembo ati: “Nalepepa . . . ukuti mfumye impatila iili yonse mu mutima na mu mano iingancilinganya, e lyo no kuti ntungululwe no mupashi wakwe ukuti ng’umfwikishe bwino.” Lesa alyaswike ili pepo lya kuicefya.

Ilyo baRussell na bakubishanya na bo balesokota mu Malembo, ifyebo balefwailisha fyalitendeke ukulaumfwika. BaRussell batile: “Twasangile ukuti pa myanda ya myaka iingi ifyakaniko fyalekanalekana fyalyakene ififundisho fya mu Baibolo, ukutobenkanya ififundisho no mutunganya kabili ne filubo fya buntunse. Ici cafuminemo ico bainike ukuti “ukulufye cine.” Icine ca mu Malembo cine cine calishiikilwe mu mwina wa fisambilisho fya cisenshi ifyasokelele mu Kristendomu pa myanda iingi. Lelo baRussell bena bapampamine pa kwishiba no kubilishe cine.

Ukupitila muli Zion’s Watch Tower and Herald of Christ’s Presence, baRussell na bakubishanya na bo mu kushipa balisenwike ififundisho fya mipepele ya bufi ifyalebepesha Lesa. Mu kupusana ne fyo aba mu mipepele iingi basumine, bena bailwike ukuti umweo ulafwa, no kuti abantu nga bafwa baya ku nshishi, kabili no kuti Yehova e Lesa wa cine eka no kuti taba muli Balesa Batatu.

Uku kusansalika ififundisho fya bufi nga fintu mwingelenganya, kwalikalifye bashimapepo ba mu Kristendomu. Pa kufwaisha ukwikatilila ku fifulo fyabo ifya maka, bashimapepo ba ciKatolika na ba ciProtestanti abengi batendeke amakampeni ya kusuusha baRussell. Lelo baRussell na bo balebishanya na bo tabanenwike. Bacetekele mu mupashi wa kwa Lesa ku kubatungulula. BaRussell batile: “Ukwebekesha ukufuma kuli Shikulwifwe kwa kuti . . . umupashi wa mushilo uwa kwa Shifwe uwatumwa pa mulandu wa kupaapaata kwa kwa Yesu Ndubulwila wesu, Kawikishanya, kabili Umutwe wesu, uli no kuba e kasambilisha wesu.” Kabili cine cine walibasambilishe! Aba Abasambi ba Baibolo abafumaluka balitwalilile ukunwa amenshi yasanguluka aya cine ca mu Baibolo no kuyasabankanya mwi sonde lyonse.—Ukusokolola 22:17.

Ukuteyanya kwa muno nshiku ukwa Nte sha kwa Yehova kwatwalilila ukwankulako ku butungulushi bwa mupashi wa mushilo wa kwa Lesa ukucila pa myaka 100 nomba. Ilintu umupashi wa kwa Yehova ubasanikila panono panono, Inte mu kuitemenwa shilaiteulula mu kumfwana no kumfwikisha ukupya.—Amapinda 4:18.

“Mukabe Nte Shandi”

Yesu asokolwele ku basambi bakwe na cimbi ica kwishibilako umupashi wa kwa Lesa lintu abebele ati: “Mukapokelela amaka ilyo ukeso Mupashi wa mushilo pali imwe; kabili mukabe nte shandi . . . no kufika ku mpela ya pano nse.” (Imilimo 1:8) Ubulayo buntu Yesu alaile abasambi bakwe ubwa kubapa “amaka” no “mupashi wa mushilo”  pa kuti bengapwishishisha umulimo untu bapeelwe ukufuma kuli Lesa ne lelo line bulabomba.

Nge bumba, Inte sha kwa Yehova shaishibikilwa ku mibombele ya shiko iya kushimikila. (Moneni ifili mu kabokoshi.) Cine cine, Inte sha kwa Yehova shilabilisha ubukombe bwa cine mu fyalo ukucila pali 230 ukusanshako na mu fishi. Te mulandu ne mibele, ukusanshako no kuibika mu kapoosa mweo mu fifulo umwabe nkondo ya mutatakuya, Inte mu kushipa shilatwalilila ukusosa mu kutungilila Ubufumu bwa kwa Lesa. Ukupimpa kwabo mu butumikishi bwa Bwina Kristu kwaba bushininkisho ubwakosa ukulangilila ukuti umupashi wa mushilo ulabomba pali lelo. Kabili nacimonekesha ukutila Yehova Lesa alebapaala pa kubombesha kwabo.

Ku ca kumwenako umwaka wapwile, babombele amaawala ukucila pali bilioni umo ukushimikila imbila nsuma iya Bufumu bwa kwa Lesa. Cinshi cafuminemo? Abantu 323,439 balangishe ukuipeela kwabo kuli Lesa ukupitila mu kubatishiwa mu menshi. Na kabili, amasambililo ya Baibolo aya mulungu no mulungu 4,433,884 yalitungulwilwe ku balesekelela. Nga twalonganika pamo, ifitabo 24,607,741, bamagazini 631,162,309, e lyo na babroshuwa no tutabo 63,495,728 fyalishalikwe. Mwandi bunte bwakulisha ubwa kuti umupashi wa kwa Lesa ulabomba!

Umupashi wa kwa Lesa na Imwe

Ngo muntu apokelela imbila nsuma, ayalula no bumi bwakwe mu kumfwana ne fipimo fya kwa Lesa, kabili alangilila icitetekelo mu kupayanya kwa cilubula, ninshi kuti aba uwasanguluka pa ntanshi ya kwa Lesa. Umutumwa Paulo aebele aba musango yo, ati ‘Lesa apeela umupashi wakwe wa mushilo kuli imwe.’—1 Abena Tesalonika 4:7, 8; 1 Abena Korinti 6:9-11.

Ukukwata umupashi wa kwa Lesa kulaleta amapaalo ayengi. Mapaalo nshi? Ica ntanshi, Icebo ca kwa Lesa icapuutwamo citwebo kuti: “Ifisabo fya mupashi kutemwa, ukusekelela, umutende, ukutekanya, icongwe, ubusuma, icishinka, ukunakilila, ukuteko mutima.” (Abena Galatia 5:22, 23) Kanshi umupashi wa mushilo uwa kwa Lesa waliba cibombelo ca maka ku kuletako ubusuma, ukwafwa umo ukulangishe mibele ya bukapepa.

Mu kulundapo, nga mulebelenga Baibolo no kulabomfya fintu musambilila, mukafwilishiwa no umupashi wa kwa Lesa ukukula mu mano, mu kwishiba, mu kushilimuka, mu kupingula, na mu maka yenu aya kutontonkanya. Imfumu Solomone yapeelwe “amano no mucetekenya uwafulisha, no kwishiba kwa mutima ukwine kwine” pa mulandu wa kuti yalefwaya ukusekesha Lesa ukucila ukusekesha abantu. (1 Ishamfumu 4:29) Nga Yehova alipeele Solomone umupashi wa mushilo, cine cine ne lelo te kuti atane umupashi wa mushilo ku bafwaya ukumusekesha.

Umupashi wa mushilo uwa kwa Lesa na kabili ulafwilisha Abena Kristu ukulwisha Satana ne fibanda, ukucimfya ubwikashi bwabipa, e lyo no kulwisha ukulemenena ku lubembu kuntu bakwata mu mibili iibembu. Kuti bacimfya shani? Umutumwa Paulo ayasuko kuti: “Ndi na maka aya kucite fintu fyonse mu ulenkoselesha.” (Abena Filipi 4:13) Umupashi wa mushilo napamo te kuti useshepo amesho nelyo amatunko; lelo kuti wamwafwilisha ukushipikisha. Nga twashintilila pa mupashi wa kwa Lesa, kuti twakwata “ukucishamo kwa maka” ku kubomba no bwafya no kumanama ukuli konse.—2 Abena Korinti 4:7; 1 Abena Korinti 10:13.

Nga twatontonkanya pa bushinino ubu bonse, te kuti tutwishike ukuti umupashi wa kwa Lesa ulabomba ilelo. Umupashi wa kwa Yehova ulakosha ababomfi bakwe ukucitilo bunte pa lwa mifwaile yakwe yapulamo. Ulatwalilila ukulenga ulubuuto ukusaama, no kukosha icitetekelo cesu, ukutwafwa ukutwalilila aba cishinka kuli Kabumba wesu. Fintu twaba aba kutasha pa kuti Lesa talekulukamo mu bulayo bwakwe lelo alapeela umupashi wa mushilo ku babomfi bakwe aba busumino lelo!

[Futunoti]

[Akabokoshi pe bula 10]

Ifyo Bambi Basosa pa lwa Nte sha kwa Yehova

“Ilintu amacalici yambi yalengisha aba ncito aba kubasembelekelako abantu pa kuti basangwe ku macalici yabo nelyo ukukwata aba kubalandilako mu milandu ya muno nshiku pamo nga iya kulaalana kwa baume beka beka na banakashi beka beka, nangu pa lwa kuponya amafumo, Inte tashisuminishako ku kwaluka ukwa mu calo. Shitwalilila fye muli kampeni wa shiko uwa kushimikila mwi sonde lyonse.”—E fyasosele inyunshipepala ya The Orange County Register iya ku Citungu ca Orange, ku California, mu U.S.A.

“Utubungwe twa mapepo utwapimpa mu kubilisha icitetekelo ukupala Inte sha kwa Yehova tatwafula.”—E fyasosele inyunshipepala ya The Republic of Columbus, iya ku Indiana, mu U.S.A.

“[Inte sha kwa Yehova] e beka fye abaya ku ng’anda ne ng’anda ukutwale ‘mbila nsuma,’ no kubomfya ifishinte fya mu Baibolo.”—E fyasosele inyunshipepala ya Życie Literackie, iya ku Poland.

“Pali kampeni waishibikwa ukuti e wakulisha mu kushimikila, Inte sha kwa Yehova shalitwala ubukombe bwa kwa Yehova mwi sonde lyonse.”—E fyasosele inyunshipepala ya News-Observer, Tamaqua, ku Pennsylvania, mu U.S.A.

[Ifikope pe bula 9]

Umupashi wa mushilo uwa kwa Lesa ulatubuutusha lwa ku mupashi,

. . . ulatwafwa ukulundulula imibele isuma iya Bwina Kristu,

. . . no kututungilila mu mulimo wa kushimikila mwi sonde lyonse