Ifipusho Ukufuma ku Babelenga

Amalandwe yatatu yalishimika pa lwa kuilishanya kwaimineko lintu Yesu asubilwe amafuta yaumo mutengo. Bushe abatumwa abailishenye bali abengi nelyo bushe ni Yuda epela?

Tusanga ili lyashi mu Malandwe ya kwa Mateo, Marko, na Yohane. Cimoneka kwati Yuda e watendeke ukuilishanya, e lyo abatumwa bamo bamo bamusuminisha. E mulandu wine kanshi twingabela aba kutasha pa kukwata Amalandwe yane. Cintu kalemba umo na umo alembele cali icalungika, lelo bonse tabapeele ubulondoloshi bwapalana. Pa kulinganya ubulondoloshi bwalekanalekana pa lwa ici, e lyo twingomfwikisha sana ifingi ifyacitike.

Ubulondoloshi bwaba pali Mateo 26:6-13 bulatweba kuntu fyacitikile, ukuti ni mu ng’anda ya kwa Simone uwa fibashi, mu Betani, lelo tabwalumbula umwanakashi uwaitiile amafuta yaumo mutengo pa mutwe wa kwa Yesu. Mateo atila: ‘Lelo abasambi pa kumona, balifulilwe’ no kuilishanya ukuti amafuta nga yashitilwemo indalama ishingi no kupeelwa ku babusu.

Ubulondoloshi bwa kwa Marko bwalilanda pa fingi ifya ifi. Lelo bushimika no kuti atobele umusashi. Mwali amafuta ya “nardi ayene yene” ayo nalimo yashitilwe ku India. Pa lwa kuilishanya, Marko ashimika ukuti ‘Awe e po bali bamo abafulilwe,’ kabili ‘balailishanisha pa mwanakashi.’ (Marko 14:3-9) E co ubulondoloshi bubili bwalangilila ukuti abatumwa abengi baliilishenye, te umo fye. Lelo, bushe catendeke shani?

Yohane uwali nsangwapo, alondolola ifyebo na fimbi ifyacindama. Alumbula ishina lya mwanakashi, ukuti ni Maria, nkashi kwa Marita na Lazaro. Yohane apayenye ne fi fyebo fyalundwapo, nge fya kutwafwa ukumfwikisha ilyashi, te fya kupilika iyo: ‘Asubile amakasa ya kwa Yesu, no kumufuuta amakasa ku mushishi wakwe.’ Nga twabelenga ubulondoloshi bwalekanalekana, kuti twamona ukuti Maria afwile asubile amakasa no mutwe wa kwa Yesu na mafuta ayo Yohane ashininkishe ukuti yali mafuta “yene yene ya nardi.” Yohane ali cibusa wapalamisha sana uwa kwa Yesu kabili ilingi alekalipa pa tuntu utunono uto bambi balecita kuli Yesu. Tubelenga ukuti: “Yuda Iskariote, umo wa pa basambi bakwe, uwasungamino kumufutuka, atile, Nga cinshi ico amafuta aya tayashitilwemo indalama imyanda itatu, no kupeela ababusu?”—Yohane 12:2-8.

Kwena, Yuda ali “umo uwa pa basambi bakwe,” lelo kuti mwamona ifyo Yohane afulilwe ilyo uwakwete cilya cifulo apaangile ukufutuka Yesu. Pa lwa kwa Yohane 12:4, kapilibula, Dokota C. Howard Matheny alandilepo ukuti: “Amashiwi ya kuti ‘ukusungamina uku’ [nelyo ‘uwasungamino ku’] na mashiwi ya kuti ‘alemufutuka’ [nelyo “uwasungamino kumufutuka”] yonse yalanda pa cintu icicitika mu kukonkana nelyo mu kutwalilila. Ici cilelangilila ukuti Yuda tapaangile ukufutuka Yesu mu bushiku fye bumo pantu alitontonkenyepo no kupaanga ukucicita pa nshiku ishingi.” Yohane alundapo kuti Yuda tailishenye “pantu asakamana ababusu; lelo asosele pantu ali mupupu, kabili pa kuba na kacipao ka ndalama, alebuulamo ifyalepooswamo.”

E co, cilemoneka ukuti Yuda, umupupu e wabalamwine ukuilishanya pantu nga ca kuti yalya mafuta yaumo mutengo yashitilwemo indalama no kushipoosa mu cipao alesunga nga alibile ishafulilako. Ilyo Yuda atendeke ukuilishanya, abatumwa bambi bafwile baliilishenye ukusuminisha cintu bamwene nge cishinka sana. Nangu ni fyo, Yuda e wali kasongelekanya mukalamba uwa kulya kuilishanya.