Sansamushiweni Ukufuma ku Bukose bwa kwa Yehova

“Pa kuba ayengi muli ine amatontonkanyo ya kunsakamika, ifya kusansamusha fyenu finengo kupekwa.”—AMALUMBO 94:19.

 BAIBOLO yalikwata amashiwi ya kusansamusha bonse abafwaya ukwilulukwa. Te kuti tupape sana umulandu ne citabo ca The World Book Encyclopedia cisosela ukuti “imintapendwa ya bantu balabelenga Baibolo pa kuti basansamushiwe, babe ne subilo e lyo no kutungululwa ilyo bali mu bucushi no kupelelwa.” Mulandu nshi?

Pantu Baibolo yapuutwamo na Kabumba wakwato kutemwa, “Lesa wa cisansamushi conse,” kabili E “uletusansamusha pali conse ica bucushi icituponena.” (2 Abena Korinti 1:3, 4) E “Lesa uutusansamusha.” (Abena Roma 15:5, NW) Yehova alimika ica kumwenako pa kupayanya inshila ya kuti ifwe bonse twilulukilwemo. Atumine pe sonde Umwana wakwe uwatemwikwa, Kristu Yesu ku kutupeela isubilo ne cisansamushi. Yesu asambilishe ukuti: “Lesa atemenwe aba pano isonde ukutemwa kwa kuti apeele Umwana wakwe uwafyalwa eka, ukuti onse uumutetekela eonaika, lelo abe no mweo wa muyayaya.” (Yohane 3:16) Baibolo ilanda pa lwa kwa Yehova ukuti ni “Lesa ipusukilo lyesu! ubushiku no bushiku [“atusendelako icipe,” NW].” (Amalumbo 68:19) Abantunse abatiina Lesa kuti basoso mu kucetekela ukuti: “Nabika Yehova ku ntanshi yandi pe; apo aba ku kulyo kwandi nshakatelentenshiwe.”—Amalumbo 16:8.

Aya mashiwi ya mu Baibolo aya musango yu yalangilila fintu Yehova Lesa atutemwa nga nshi fwe bantunse. Yalangilila apabuuta ukuti alafwaisha ukutusansamusha apakalamba no kutwilulula ku kukalipwa ilyo tulecula kabili alikwata na maka ya kucite co. Yehova “apeela amaka ku wapomponteka, no kufusho kucincila ku ushakosoboka.” (Esaya 40:29) E co, ni shani fintu twingasansamushiwa ukufuma ku bukose bwa kwa Yehova?

Ifyo Ukusakamana kwa kwa Yehova Kutusansamusha

Kemba wa malumbo alembele ati: “Poosa pali Yehova icisendo cobe icafina, wene alekulama; pe fye takasuminishe uwalungama ukutelententa.” (Amalumbo 55:22) Cine cine, Yehova Lesa alasakamana abantunse. Umutumwa Petro akoseleshe Abena Kristu ba mu mwanda wa myaka uwa kubalilapo ukuti: “[Lesa] asakamana imwe.” (1 Petro 5:7) Yesu Kristu akomaile pa fyo Lesa acindamika abantunse pa kusoso kuti: “Bushe inseba shisano tashishitwamo mu tumakopere tubili? Kabili talulabwapo nangu lumo mu menso ya kwa Lesa. Lelo ne mishishi ya ku mitwe yenu yalipendwa yonse. Mwilatiina, mwacilamo umutengo ku nseba ishingi.” (Luka 12:6, 7) Twaliba aba mutengo sana kuli Lesa ica kuti alishiba fye na kali konse pa lwa ifwe. Alishiba ifintu pa lwa ifwe ifyo na fwe bene tushaishiba pantu alatusakamana icine cine umuntu umo umo.

Ukwishiba ukuti Yehova alamusakamana ngo muntu e kwasansamwishe sana Svetlana, cilende wacaice uwacilandwapo mu cipande ca kubalilapo. Apene aipaye lintu Inte sha kwa Yehova shamukumenye. Lyene alisumine ukutendeka ukusambilila Baibolo kabili e kwamwafwile ukwishiba ukuti Yehova muntu uwa cine cine uufwaya ukuti abe ne nsansa. Ici calimufikile pa mutima, kabili camulengele ukwalula imikalile yakwe no kuipeela kuli Lesa. Kabili calengele Svetlana ukutendeka ukumfwa uwacindama kabili ici cintu alekabila pa kuti atwalilile ukushipikisha te mulandu na macushi akwete. Camwafwilishe ukwishiba ukuti imikalile yakwe yali no kuba fye bwino. Pali ndakai atila: “Nalishininkisha ukuti Yehova takandekeleshe. Nalisanga ukuti amashiwi yalembwa pali 1 Petro 5:7 ya cine ayatila: ‘Amasakamika yenu yonse bikeni pali [Yehova], pa kuti asakamana imwe.’”

Isubilo Lyaba mu Baibolo Lilasansamusha

Inshila yawamisha imo intu Lesa atusansamushishamo yaba kupitila mu Cebo cakwe icalembwa, umwaba isubilo lya ku ntanshi ilyawamisha. Umutumwa Paulo alembele ati: “Fyonse ifyalembelwe kale fyalembeelwe ku kutusambilisha, ukuti mu kutwalilila kabili mu kutukoselesha kwa malembo [“cisansamushi cifuma mu malembo,” NW] e mo tube [“ne subilo,” NW].” (Abena Roma 15:4) Paulo alondolwele bwino bwino fintu isubilo ne cisansamushi ifya cine cine fyendela pamo lintu alembele ukuti: ‘Awe . . . Lesa Shifwe uwatutemenwe no kutupeelo kusansamuka kwa muyayaya [“ne subilo lisuma,” NW] mu kusenamina, akoseleshe imitima yenu no kuiikasha mu mulimo onse usuma ne cebo conse cisuma.’ (2 Abena Tesalonika 2:16, 17) Ili “subilo lisuma” lisanshamo imikalile ya nshita ya ku ntanshi iyapwililika, kabili iya nsansa iya muyayaya mu paradise wa pe sonde.—2 Petro 3:13.

 Ili subilo line line ilisansamusha e lyakoseleshe Laimanis, uwacilandwapo mu cipande cifumineko uwali cakolwa uwalemana. Ilyo abelengele ifitabo fyashimpwa pali Baibolo ifya Nte sha kwa Yehova, alisekelele pa kusambilila pa lwa calo cipya icikalatekwa no Bufumu bwa kwa Lesa, kabili umo akaba umutuntulu na kabili. Abelengele mu Baibolo ubu bulayo busansamusha ubwa kuposha mu cisungusho ubutila: “E lyo yakashibulwa amenso ya mpofu, na matwi ya bankomamatwi yakakomonwa; e lyo uwalemana amolu akacilauka nge nsebula, no lulimi lwa kwa cibulu lukaula.” (Esaya 35:5, 6) Laimanis alyalwike apakalamba pa kuti engalinga ukwikala mu Paradise. Alilekele ukunwa ubwalwa, kabili abena mupalamano na bamwishiba balimwene fintu ayalwike. Pali nomba alasambilishako abengi Baibolo, no kwebako abantu fintu isubilo lyaba mu Baibolo lisansamusha.

Ifyo Ipepo Lisansamusha

Lintu tuli no bulanda mu mutima pa mulandu wa bwafya tukwete, kuti twasansamushiwa ukupitila mu kupepa kuli Yehova. Ukupepa kuti kwafumyapo icisendo pali ifwe. Ilyo tulepaapaata Lesa, kuti twasansamushiwa pa kwibukisha ifintu fyaba mu Cebo ca kwa Lesa. Ilumbo lyalepesha pali yonse mu Baibolo lyaba nge pepo ilisuma nga nshi. Uwalilembele aimbile ukuti: “Naibukishe fya bupingushi fyenu ifyafuma umuyayaya, mwe Yehova, no kuisansamusha.” (Amalumbo 119:52) Ilyo tuli mu bucushi ubukalamba sana, maka maka nga natulwalisha, ilingi line tapaba ne cingacitwa pa bucushi bonse. Te kuti twishibe ne fya kucita pa lwesu. Abengi balisanga ukuti lintu baesha apapela amaka ya buntunse, ukupepa kuli Lesa kulabasansamusha apakalamba kabili napamo no kupikulula ubwafya mu nshila iyo bashatontonkenyenapo.—1 Abena Korinti 10:13.

Pat, uo babutushishe ku muputule wa ku cipatala umo batwala abalwalishe alisansamushiwe ukupitila mwi pepo. Ilyo apolele atile: “Nalipepele kuli Yehova kabili nalishibe bwino bwino ukuti nali no kutuula ubumi bwandi mu maka yakwe, no kumucetekela ukucita ukufwaya kwakwe. Pali ilya nshita yonse, naumfwile na ku matwi tondolo. Nakwete umutende wa kwa Lesa uwalumbulwa pa Abena Filipi 4:6, 7.” Fintu ifi fikomo fingatusansamusha ifwe bonse! Pali ifi fikomo Paulo atukonkomesha ukuti: “Mwisakamikwa nangu kamo, lelo mu fintu fyonse lekeni ifya kulomba fyenu fiishibikwe kuli Lesa mu kupepa no kupaapaata pamo no kutootela; no mutende wa kwa Lesa uwapulamo mu kwiluka konse, wakulalinde mitima yenu na mapange yenu muli Kristu Yesu.”

Umupashi wa Mushilo ni Kasansamusha

Ubushiku bwa kuti mailo akafwa, Yesu aebele abasambi bakwe inshita ya bushiku ukuti ali mupepi no kubasha. Ici calibasakamike no kubaletelo bulanda. (Yohane 13:33, 36; 14:27-31) Pa kwishiba ukuti balekabila ukutwalilila ukusansamushiwa, Yesu abalaile ukuti: “Nkalomba kuli Tata, na o akamupo Bukota bumbi [nelyo, kasansamusha], ukuti bwikale na imwe umuyayaya.” (Yohane 14:16, utulembo twa pe samba, NW) Cintu Yesu alelandapo pano cali mupashi wa mushilo. Pa fintu ifyo umupashi wa mushilo uwa kwa Lesa wacitile abatumwa pa kubasansamusha ilyo balepita mu fya kwesha no kubakosha ukutwalilila ukucita ukufwaya kwa kwa Lesa.—Imilimo 4:31.

Angie, untu umulume wakwe apene afwe ilyo ali mu busanso bwa pa musebo, alishipikishe ubucushi bonse no bulanda akwete. Cinshi camwafwile? Asoso kuti: “Ala nga tatwashipikishe ubucushi twakwete no kuba abakosa akubula umupashi wa mushilo uwa kwa Yehova. Cine cine, ubukose bwa kwa Yehova bwalimonekele mu kunaka kwesu, kabili aliba e cubo cesu mu nshita ya kumanama.”

Bamunyina Abatusansamusha

Te mulandu na fintu umuntu pambi acula mu mikalile yakwe, te mulandu na macushi engapitamo ayamulengo bulanda sana, kuti asanga icisansamushi kuli bamunyina baba mu cilonganino ca kwa Yehova. Aba bamunyina balatungilila lwa ku mupashi ababamo no kubafwilisha. Umo kuti asangamo ifibusa fyakwato kutemwa, ifisakamana, kabili ifisansamusha, ifyaiteyanya lyonse  ukwafwilisha no kusansamusha bambi abali no bucushi kabili fyaliitemenwa ukucite co.—2 Abena Korinti 7:5-7.

Ababa mu cilonganino basambilishiwa ‘ukubombe icisuma kuli bonse, no kucishamo ku ba bwananyina [baba na bo] mu citetekelo.’ (Abena Galatia 6:10) Amasomo ya mu Baibolo yantu basambilila yabalenga ukutemwa ababwananyina kabili no kuba abatemwanisha. (Abena Roma 12:10; 1 Petro 3:8) Bamunyina na bankashi aba ku mupashi aba mu cilonganino balengwa ukuba ne cikuuku, icisansamushi, ne cililishi sana.—Abena Efese 4:32.

Joe na Rebecca, abo ku ca bulanda umwana mwaume wabo afwile, balisansamushiwe ku kukoselesha kwa baba mu cilonganino ca Bwina Kristu. Batila: “Yehova ne cilonganino cakwe icakwato kutemwa balitwafwilishe ukushipikisha ubucushi bwatuponene. Twalipokelele amakardi ayengi, amakalata na mafoni. Ici citulenga ukutesekesha fintu ubwananyina bwawama icine cine. Ilyo twali natupelenganishiwa ne mfwa ya mwana, bamunyina mu filonganino ifingi balishile mu kutwafwilisha, batupayanishishe ifya kulya no kuwamya ing’anda.”

Shi Sansamushiweni!

Lintu ubwafya bwabipa nge cipupu cikalamba, kabili lintu ubucushi bwakula nge mfula ikalamba iya mabwe, Lesa aliiteyanya lyonse ukutucingilila mu cisansamushi. Ifi e fintu ilumbo limo limulondolola nga kacingilila wa cisansamushi ukuti: “Mu tulume twa ngala twakwe alekucingilila, na mwi samba lya mapindo yakwe e mo uleuba.” (Amalumbo 91:4) Icilelangililwa pano kuti caba ni kapumpe. Cilelangilila icuni icailuka ukuti calasanswa kabili lyene cafukatila abana ba ciko mu mapindo. Yehova aba Kacingilila wa bonse abauba muli wene ukucila na fintu icuni cifukatila.—Amalumbo 7:1.

Nga mulefwaya ukusambilila na fimbi pa lwa kwa Lesa, imibele yakwe, ne mifwaile yakwe, na fintu akwata amaka ya kutusansamusha, tulemukoselesha ukusambilila Icebo cakwe. Inte sha kwa Yehova shikatemwa ukumwafwilisha ukusambilila. Cine cine, na imwe bene kuti mwasansamushiwa ukufuma ku bukose bwa kwa Yehova!

[Ifikope pe bula 7]

Isubilo lyaba mu Baibolo ilya nshita ya ku ntanshi kuti lyamusansamusha