Ilyashi lya Bakabilisha ba Bufumu

Imikalile ya Nsansa mu Lupwa Yapalamika Bambi Kuli Lesa

YEHOVA apeele Yosefe amano ayengi no mucetekanya. (Imilimo 7:10) E calengele ukuti ukushilimuka kwa kwa Yosefe ‘kuwame mu menso ya kwa Farao, na mu menso ya babomfi bakwe bonse.’—Ukutendeka 41:37.

Na lelo, Yehova alapeela abantu bakwe ukushilimuka no mucetekanya ilyo balesambilila Baibolo. (2 Timote 3:16, 17) Muli aya mano no mucetekanya mulafuma ifisuma lintu babomfya ukufunda kwa Baibolo. Ilingi, imibele yabo iisuma ‘yaliwama mu menso ya babamona,’ nga fintu ifya kukumanya fyakonkapo ifya ku Zimbabwe filelangilila.

• Abena mupalamano ba mwanakashi umo bali ni Nte sha kwa Yehova. Nangu cingati tatemenwe Nte, alekumbwako imibele yabo, maka maka fintu ulupwa lwabo lwaleikala. Amwene ukuti abalume na bakashi baleumfwana sana, na filya bana babo bali ne cumfwila. Maka maka amwene ukuti abalume balitemenwe sana abakashi babo.

Mu myata ya mu Afrika imo, abengi batila umulume nga alitemwa umukashi wakwe, ninshi umukashi alimulisho muti. E co ulya mwanakashi aile kuli muka Nte no kumwipusha ati: “Bushe kuti mwampeelako umuti untu mwalisha abalume benu pa kuti na ine abalume bandi bakantemwe nga fintu abalume benu bamutemwa?” Nte ayaswike ati: “Cili fye bwino. Nkamuletela mailo icungulo kasuba.”

Ubushiku bwakonkelepo, nkashi alitandalile umwina mupalamano wakwe no kumutwalila umuti. Bushe muti nshi amutwalile? Ni Baibolo, ne citabo ca Ukwishiba Uko Kutungulula ku Mweo wa Muyayaya. Ilyo bapwishishe ukulanshanya pa fyaba mu citabo ca Ukwishiba mu cipande ca kuti “Ukukusha Ulupwa Ulucindika Lesa,” aebele ulya mwanakashi ukuti: “Uyu e ‘muti’ tuiilisha na balume bandi, kabili e mulandu wine twatemwanina sana.” Alitendeke ukusambilila nankwe Baibolo, kabili ulya mwanakashi alilundulwike bwangu ica kuti alangilile no kuipeela kwakwe kuli Yehova ukupitila mu lubatisho lwa mu menshi.

• Bapainiya baibela babili abatuminwe ku cilonganino cinono icapalamina ku mupaka wa kapinda ka kuso na ku kabanga ka Zimbabwe na Mozambique tabaile mu butumikishi bwa ku ng’anda ne ng’anda pa milungu ibili. Mulandu nshi? Pantu abantu balebakonkela pa kuti bomfwe ifyo baleshimikila. Umo painiya ashimika ifyo cacitike ukuti: “Twaleenda amakilomita 15 pa kuyatungulula isambililo lya Baibolo cila mulungu ku muntu uwalefwaya ukusambilila icine. Caletwafya sana ukufika uko aleikala. Twalepita mu matipa, no kwabuka imimana ninshi naipoosa kabili amenshi yaletufika mu mukoshi. Ici casanshishemo ukusenda ifya kufwala fyesu ne nsapato pa mutwe, e lyo no kwabuka umumana, kabili lyene ukufwalila ifya kufwala kwi shilya.

“Abena mupalamano ba uyu muntu uwalefwaya ukusambilila icine balikumbilwe sana ukupimpa kwesu. Pa bakumbilwe pali ne ntungulushi imo iye bumba lya fya mapepo. Yaebele abakonshi ba iko ukuti: ‘Bushe tamufwaya ukupimpa nge fyapimpa balya balumendo Inte sha kwa Yehova?’ Ubushiku bwakonkelepo abakonshi bakwe abengi baishile ku mwesu mu kwipusha icalenga ukuti tube no mupampamina. Ukulundapo, pa milungu ibili iyakonkelepo, twalikwete sana abeni ica kuti tatwakwete na nshita ya kwipika ifya kulya!”

Pali balya batandalile bapainiya ilya milungu ibili pali na ulya shimapepo. Tontonkanyeni fintu bapainiya bali ne nsansa ilyo asumine Isambililo lya Baibolo ilya pa ng’anda!