Umfweni Ico Umupashi Ulesosa

“Ilyo mwapaatukila ku kwa kulyo nangu ku kwa kuso, amatwi yenu yakomfwe cebo cafuma ku numa yenu, icileti, Iyi e nshila, e mo mwende.”—ESAYA 30:21.

1, 2. Ukufuma fye ku kale Yehova alanda shani ku bantunse?

MU CISHI ca Puerto Rico e mwaba cimashini icipokelela imyengelele ya cilimba icakulisha kabili icakwatisha amaka mwi sonde lyonse. Pa myaka iingi, basayantisti balisubila ukuti bakapokelela ubukombe ukufuma ku fibumbwa fya ku nse ye sonde ukubomfya ici cimashini cishaikulila. Lelo ubukombe bwa musango yo tabwatala abupokelelwapo. Nangu cibe fyo, kwaliba ubukombe ubwaumfwika ubufuma ku nse ya bwikashi bwa bantunse ubo na ifwe bonse twingapokelela pa nshita iili yonse—ukwabula ukubomfya cimashini capikaana. Ubu bukombe bufuma ku Ntulo yasumbukisha ukucila icili conse ica kwelenganya icaba ku nse ye sonde. Ni nani aba Intulo ya bukombe bwa musango yo, kabili ni bani abalebupokelela? Cinshi ubo bukombe busosa?

² Muli Baibolo mwaba amalyashi yafulilako pa lwa nshita shimo lintu ubukombe bwa bulesa bwalengelwe ukumfwika mu matwi ya bantunse. Limo limo ifibumbwa fya mupashi ifyo Lesa alebomfya nge nkombe e fyalebilisha ubu bukombe. (Ukutendeka 22:11, 15; Sekaria 4:4, 5; Luka 1:26-28) Ishiwi lya kwa Yehova umwine lyaumfwike imiku itatu. (Mateo 3:17; 17:5; Yohane 12:28, 29) Na kabili Lesa alandile muli bakasesema abantunse, abengi aba bene abalembele ico abapuutilemo ukusosa. Ilelo, twalikwata Baibolo, umwaba ubu bukombe ubwingi ubwalembwa,  ukusanshako ifisambilisho fya kwa Yesu na basambi bakwe. (AbaHebere 1:1, 2) Cine cine Yehova alatuma ubukombe ku fibumbwa fyakwe ifya buntunse.

3. Cinshi caba imifwaile ya bukombe bwa kwa Lesa, kabili cinshi ico tufwile ukucita?

³ Ubu bukombe bonse ubwapuutwamo ubufuma kuli Lesa tabusokolola ifingi pa lwa bubumbo bwesu ubumoneka. Butontomesha pa fyacindama, ifingambukila ubumi bwesu nomba na ku ntanshi. (Amalumbo 19:7-11; 1 Timote 4:8) Yehova abomfya ubu bukombe ku kubilisha ukufwaya kwakwe no kutupayanishisha ubutungulushi bwakwe. Iyi ni nshila imo iyo amashiwi ya kwa kasesema Esaya yalefikilishiwamo ayatila: “Ilyo mwapaatukila ku kwa kulyo nangu ku kwa kuso, amatwi yenu yakomfwe cebo cafuma ku numa yenu, icileti, Iyi e nshila, e mo mwende.” (Esaya 30:21) Yehova tatupatikisha ukukutika kwi “shiwi” lyakwe. Cashalila kuli ifwe umo na umo ukukonka ubutungulushi bwa kwa Lesa no kwenda mu nshila yakwe. E ico Amalembo yatukonkomesha ukukutika ku bukombe ubufuma kuli Yehova. Ibuuku lya Ukusokolola, lilatukoselesha imiku cinelubali ‘ukumfwa ico Umupashi ulesosa.’—Ukusokolola 2:7, 11, 17, 29; 3:6, 13, 22.

4. Bushe calibamo amano mu nshiku shesu ukwenekela Lesa ukulanda kuli ifwe mu kulungatika ukufuma mu muulu?

⁴ Ilelo, Yehova talanda kuli ifwe mu kulungatika ukufuma mu muulu. Nangu fye ku bantu balembwa mu Baibolo, uku kulanshanya kwa cipesha mano takwaseekele, limo limo palepita imyaka iingi. Ukutula fye na kale, Yehova ilingi line alilanda ku bantu bakwe mu nshila sha manshoko. E fyo acita na mu nshiku shesu. Natubebete inshila shitatu isho Yehova alandilamo kuli ifwe ilelo.

“Amalembo Yonse Yantu Yapuutwamo”

5. Cibombelo nshi icikalamba ico Yehova alandilamo ilelo, kabili ni shani twinganonkelamo muli cene?

⁵ Icibombelo cikalamba ico Lesa alandilamo ku bantunse ni Baibolo. Yalipuutwamo kuli Lesa, kabili fyonse ifyabamo kuti fyatunonsha. (2 Timote 3:16) Mu Baibolo mwaba ifya kumwenako ifingi ifya bantu aba cine cine abaleipingwila nampo nga balefwaya ukukutika kwi shiwi lya kwa Yehova nelyo iyo. Ifya kumwenako fya musango yo fitucinkulako umulandu cacindamina ukumfwila ico umupashi wa kwa Lesa ulesosa. (1 Abena Korinti 10:11) Na kabili mu Baibolo mwaba amano yabomba, ayatufunda lintu twalolenkana ne fya kupingulapo mu bumi. Cili kwati Lesa ali ku numa yesu, alelandila mu kutwi kwesu amashiwi ya kuti: “Iyi, e nshila, e mo mwende.”

6. Mulandu nshi Baibolo yabela iyasumbuka ukucila ifitabo fimbi fyonse?

⁶ Pa kuti twingomfwa ico umupashi ulesosa ukupitila muli Baibolo, tufwile ukulaibelenga lyonse. Baibolo te citabo caseeka, icalembwa bwino, kabili cimo fye pa fitabo ifingi ifyabako ilelo. Baibolo yalipuutwamo umupashi kabili mwaba amatontonkanyo ya kwa Lesa. AbaHebere 4:12 yatila: “Icebo ca kwa Lesa ca mweo, kabili caliluma no kutwo kucilo lupanga lonse ulwatwila kubili kubili, kabili cilatula na ku kulekanyo mutima no mupashi, ne mfyufyu no bufyompo, cilingulula amatontonkanyo na mapange ya mutima.” Ilintu tulebelenga Baibolo, ifyebo fyabamo filatula ngo lupanga mu matontonkanyo yesu ayashika na mapange ya mutima, ukusokolola apo twapelela mu kukonka ukufwaya kwa kwa Lesa.

7. Mulandu nshi ukubelenga Baibolo kwacindamina, kabili miku inga tulekoseleshiwa ukucite co?

⁷ “Amatontonkanyo na mapange ya mutima” kuti fyayaluka mu kupita kwa nshita na lintu tuleambukilwa  ne fisuma ne fyayafya ifyo tukumanya mu bumi. Nga tatulesambilila lyonse Icebo ca kwa Lesa, amatontonkanyo yesu, imibele yesu, ne nkuntu shesu tafyakulaumfwana ne fishinte fya bukapepa. E ico, Baibolo itukonkomesesha ati: “Muyeshe mwe bene, mumone nga muli mu kutetekela; muilinge mwe bene.” (2 Abena Korinti 13:5) Pa kuti twingatwalilila ukuumfwa ico umupashi ulesosa, tulingile ukumfwila ukufunda kwa kubelenga Icebo ca kwa Lesa cila bushiku.—Amalumbo 1:2.

8. Mashiwi nshi aya mutumwa Paulo yaletwafwilisha ukulaibebeta pa lwa kubelenga Baibolo?

⁸ Ica kucinkulako cacindama ku babelenga Baibolo ni ci: Lekeni papiteko inshita pa kuti mumfwikishe ifyo mulebelenga! Pa kufwaya ukumfwila ukufunda kwa kubelenga Baibolo lyonse, tatulingile ukubelenga fye lubilo lubilo ifipandwa fyafulilako ukwabula ukwiluka ifyo tulebelenga. Nangu ca kuti ukubelenga Baibolo lyonse kwalicindama, tatulingile ukukwata fye ubuyo bwa kupwisha ukubelenga ifyo tutantike; tulingile ukukwata ukufwaisha kwa cine cine ukwa kusambilila pa lwa kwa Yehova ne mifwaile yakwe. E ico, pa kuibebeta kuti twabomfya amashiwi ya mutumwa Paulo, uwalembele Abena Kristu banankwe, ati: “Mfukamina kuli Shifwe, mpaapaato kuti, . . . amupe . . . Kristu ekale mu mitima yenu pa mulandu wa kutetekela; ukuti, pa kuba abalimbwa kabili abakuulwa mu kutemwa, mukose ku kulingulula pamo na bashila bonse ifyabo bufumo no kulepa no kusansama no kushika; kabili ukwishibo kutemwa kwa kwa Kristu ukwapesha amano, ukuti mwisulemo umwisulo onse wa kwa Lesa.”—Abena Efese 3:14, 16-19.

9. Ni shani fintu twingalundulula no kulundako ukufwaisha kwesu ukwa kusambilishiwa na Yehova?

⁹ Ca cine ukuti bamo aba ifwe mu cifyalilwa tatuipakisha ukubelenga, lelo bambi na bo balitemwa ukubelenga. Nangu cibe fyo, te mulandu ne mibele yesu, kuti twalundulula no kulundako ukufwaisha kwesu kwa kusambilishiwa na Yehova. Umutumwa Petro alondolwele ukuti tulingile ukulafuluka ukwishiba kwa mu Baibolo, kabili alishibe ukuti ukufwaisha kwa musango yo kuti kwalundululwa. Alembele ati: “Fulukeni ishiba lya bumupashi ilyabulo bucenjeshi, ngo tunya utwafyalwa nomba, ukuti mukulileko ukufika ku kupusuka.” (1 Petro 2:2) Ukuisalapula kwalicindama nga tuli no ‘kulafuluka’ ukusambilila Baibolo. Nga fintu twingatendeka ukutemwa ica kulya ico tushatala atulyapo pa numa ya kucisonda imiku iingi, e fyo ne mibelengele yesu ne misambililile ingawaminako nga ca kuti tuleisalapula ukukonka lyonse ifyo twatantika.

“Ifya Kulya mu Nshita Iyene”

10. Ni bani baba mwi bumba lya “musha wa cishinka kabili uwashilimuka,” kabili Yehova alebabomfya shani ilelo?

¹⁰ Inshila imbi iyo Yehova alandilamo kuli ifwe ilelo yalilumbulwa na Yesu pali Mateo 24:45-47. Palya alandile ulwa cilonganino ca Bena Kristu basubwa no mupashi, “umusha wacishinka kabili uwashilimuka” uwasontwa ukupayanya ‘ifya kulya fya ku mupashi mu nshita iyene.’ Pamo ngo muntu umo umo, aba muli ili bumba baba “ba mu ng’anda” ya kwa Yesu. Aba, capamo ne “bumba likalamba” ilya “mpaanga shimbi,” balapokelela ukukoseleshiwa no butungulushi. (Ukusokolola 7:9; Yohane 10:16) Ifingi ifya ifi fya kulya mu nshita iyene filapayanishiwa ukupitila mu mpapulo ishapulintwa, pamo nga Ulupungu lwa kwa Kalinda, na Loleni!, ne mpapulo shimbi. Ifya kulya fya ku mupashi na fimbi filapayanishiwa ukupitila mu malyashi ne filangililo pa  mabungano, ukulongana kukalamba, no kulongana kwa pa cilonganino.

11. Twankulako shani ku co umupashi usosa ukupitila mu “musha wa cishinka kabili uwashilimuka”?

¹¹ Ifyebo ifipayanishiwa no “musha wa cishinka kabili uwashilimuka” fyabelako ku kukosha icitetekelo cesu no kukansha ukulingulula kwesu. (AbaHebere 5:14) Ukufunda kwa musango yo nalimo takwingalondolola fyonse pa kuti umo na umo amone ifyo engakubomfya. Mu nshita mu nshita, tulapokelela no kufunda ukulanda pali fimo ifya kulungatika ifibimbamo imyendele yesu. Tulingile ukwankulako shani nga ca kuti cine cine tulakutika ico umupashi ulesosa ukupitila mwi bumba lya musha? Umutumwa Paulo ayasuka ukuti: “Beni aba cumfwila ku balemutungulula.” (AbaHebere 13:17) Ca cine, bonse ababa mwi bumba lya musha tabapwililika. Nalyo line, nangu cingati tabapwililika, Yehova alabekelwo kubomfya ababomfi bakwe abantunse ku kututungulula muli ino nshita ya ku mpela.

Ukutungululwa na Kampingu Wesu

12, 13. (a) Ni ntulo nshi imbi iya butungulushi iyo Yehova atupeela? (b) Busuma nshi kampingu engaletako na ku bantu abashakwata ukwishiba kwalungika ukwa Cebo ca kwa Lesa?

¹² Yehova alitupeela na cimbi ica kututungulula—e kutila, kampingu wesu. Abumbile umuntu na maka ya kwishiba icalungama ne calubana. Ici caba cifyalilwa cesu. Muli kalata wakwe ku Bena Roma, umutumwa Paulo alondolwele ati: “Ilyo Abena fyalo abashaba na Malango bacita Amalango ku cifyalilwa, ninshi baba Amalango abene, nelyo tabakwata Amalango. Balango kuti Amalango yalembwa mu mitima yabo, apo kampingu wabo abe nte, ne nkuntumutima yabo ilabashinina nalimo ilabapoosa ku numa.”—Abena Roma 2:14, 15.

¹³ Abengi abashaishiba Yehova, balikwatako amaka ya kulenga amatontonkanyo yabo ne micitile ukumfwana ne fishinte fya bukapepa ifyalungama ne fishalungama. Cili kwati balomfwa ishiwi lya lwa nkati ilya kutepelesha lilebatungulula mu ntunga yalungama. Nga e fyo caba ku bashakwata ukwishiba kwalungika ukwa Cebo ca kwa Lesa, ninshi ku Bena Kristu ba cine kwena ilyo shiwi lya lwa nkati lilingile lilekatisha! Cine cine, kampingu wa Mwina Kristu uwalopololwa ku kwishiba kwalungika ukwa Cebo ca kwa Lesa kabili uubomba mu kumfwana no mupashi wa mushilo uwa kwa Yehova kuti apayanya ubutungulushi bwacetekelwa.—Abena Roma 9:1.

14. Ni shani fintu kampingu wakanshiwa na Baibolo engatwafwa ukukonka ubutungulushi bwa mupashi wa kwa Yehova?

¹⁴ Kampingu musuma, uwakanshiwa na Baibolo, kuti atucinkulako ulwa nshila iyo umupashi ulefwaya twendemo. Kuti kwaba inshita lintu Amalembo nangu impapulo shashimpwa pali Baibolo shishilanda mu kulungatika pa lwa fimo twingakumanya. Nalyo line, kampingu wesu kuti atusoka ukusengauka inshila iingatuletela ububi. Nga cabe fyo, ukusuula ifyo kampingu wesu aletweba, kuti capilibula ukusuula ico umupashi wa kwa Yehova ulesosa. Lelo, nga twasambilila ukushintilila pali kampingu wesu uwa Bwina Kristu uwakanshiwa, kuti alatwafwa ukusala mano mano nangu fye takwingaba ubutungulushi bwa mu kulungatika ubwalembwa. Nangu cibe fyo, calicindama ukwibukisha ukuti lintu takuli icishinte, icipope, nelyo ifunde ifyapayanishiwa na Lesa, tacingaba icalinga ukupatikisha Abena Kristu banensu ukukonka kampingu wesu mu fintu ifishitukumine nangu panono.—Abena Roma 14:1-4; Abena Galatia 6:5.

15, 16. Cinshi cingalenga kampingu wesu ukukanabomba bwino, kabili kuti twacincintila shani ica musango yo ukucitika?

¹⁵ Kampingu wasanguluka, uwakanshiwa na Baibolo aba ca bupe icafuma kuli Lesa. (Yakobo 1:17) Lelo tufwile ukucingilila ici ca bupe ku kusonga kwa boni pa kuti cingabomba bwino mu kucingilila imibele yesu. Intambi sha cikaya, ifishilano, ne fibelesho fipinkana ne fipimo fya kwa Lesa, nga tulefikonkelela, kuti fyalenga kampingu wesu ukukanabomba bwino no kufilwa ukututungulula mu ntunga yalungama. Kuti twafilwa ukupingulapo bwino ifya kucita nangu fye ukutukopeka twalatontonkanya ukuti ukucita icabipa kwaliba fye bwino.—Linganyeniko Yohane 16:2.

¹⁶ Nga twatwalilila ukulasuula ifyo kampingu wesu aletusoka, ishiwi lyakwe likatendeka ukulaumfwika  panini mpaka tukasuke atukunkuma nelyo ukuba abomankonso. Kemba wa malumbo alandile ulwa bantu ba musango yo lintu atile: “Imitima yabo yainisha ngo munofu wa mafuta, lelo ine, amalango yenu mpekwamo.” (Amalumbo 119:70) Bamo abasuula fintu kampingu wabo alebeba balaleka ukutontonkanya bwino. Balaleka ukutungululwa ne fishinte fya kwa Lesa ifyaba muli Baibolo, kabili balafilwa ukupingulapo bwino. Pa kusengauka ica musango yo, tulingile ukumfwila kampingu wa Bwina Kristu nangu fye imilandu ibimbilwemo ingamoneka kwati inono.—Luka 16:10.

Ba Nsansa Abakutika no Kumfwila

17. Ilintu tulekutika kwi ‘shiwi ku numa yesu’ no kumfwila kampingu wesu uwakanshiwa na Baibolo, tukapaalwa shani?

¹⁷ Ilintu twaimika icipasho ca kukutika kwi ‘shiwi ku numa yesu’—ilintu lilepayanishiwa ukupitila mu Malembo na mu musha wa cishinka kabili uwashilimuka—kabili ilintu tuleumfwila ifyo kampingu wesu uwakanshiwa na Baibolo aletucinkulako, Yehova akatupaala no mupashi wakwe. Umupashi wa mushilo, na o, ukatulenga ukupokelela bwino no kumfwikisha ifyo Yehova aletweba.

18, 19. Ni shani fintu ubutungulushi bwa kwa Yehova butunonsha mu butumikishi bwesu na mu bumi bwa pa lwesu?

¹⁸ Na kabili umupashi wa kwa Yehova ukatukosha ukulolenkana na mafya yakakala ukupitila mu kubomfya amano no bukose. Nga fintu cali ku batumwa, umupashi wa kwa Lesa kuti wacincisha imintontonkanya yesu no kulatwafwilisha lyonse ukucita no kulanda mu kumfwana ne fishinte fya mu Baibolo. (Mateo 10:18-20; Yohane 14:26; Imilimo 4:5-8, 13, 31; 15:28) Umupashi wa kwa Yehova no kuibikilishako kwesu fikatulenga ukutunguluka ilintu tulepingula ukucita ifyacindama mu bumi, ukutupeela ubukose bwa kubombelapo pa fyo twapingulapo. Ku ca kumwenako, nalimo mulefwaya ukuteulula imikalile yenu no kulapoosa inshita ikalamba ku fya ku mupashi. Atemwa mulekabila ukucita ifyacindama ifingaalula ubumi bwenu, ifili nga ukusala uwa kuupana nankwe, ukumona ubusuma nelyo ububi bwa ncito balefwaya ukumwingisha, atemwa ukushite ng’anda. Ukucila ukuleka fye inkuntu shesu sha buntunse shiletupingwilako, tufwile ukukutika ku co umupashi wa kwa Lesa ulesosa no kukonka ubutungulushi bwa uko.

¹⁹ Tulatasha icine cine pa fyo Abena Kristu banensu ukusanshako baeluda batucinkulako mu cikuuku no kutufunda. Nangu cibe fyo, tatukabila lyonse ukulalolela bambi ukutucinkulako pali fimo. Nga natwishiba ica mano icikabila ukucitwa no mo tulekabila ukuteulula imibele yesu ne myendele pa kuti twingatemuna Lesa, shi natucitepo cimo. Yesu alandile ati: “Nga mwaishibe fintu ifi, ninshi mwalishuka nga muleficita.”—Yohane 13:17.

20. Lipaalo nshi ilyo abakutika kwi ‘shiwi ku numa yabo’ bakakwata?

²⁰ Kwena, pa kuti beshibe ifyo bengatemuna Lesa, Abena Kristu tabakabila ukumfwa ishiwi lya cine cine ukufuma mu muulu, nangu ukutandalilwa na malaika. Balipaalwa pa kukwata Icebo ca kwa Lesa icalembwa e lyo no butungulushi bwa kutemwa ukupitila mwi bumba lyasubwa ilya pe sonde. Nga bakutikisha kuli ili ‘shiwi ku numa yabo’ no kukonka ifyo kampingu a letutungulula uwakanshiwa na Baibolo, bakatunguluka mu kucita ukufwaya kwa kwa Lesa. Lyene ukwabulo kutwishika bakamonako ukufikilishiwa kwa bulayo bwa mutumwa Yohane ubutila: “Uucito kufwaya kwa kwa Lesa ekalilila umuyayaya.”—1 Yohane 2:17.

Ukusupawila

• Mulandu nshi Yehova alandila ku fibumbwa fyakwe ifya buntunse?

• Kuti twanonkelamo shani muli programu wa kubelenga Baibolo lyonse?

• Tulingile ukwankulako shani ku butungulushi ubufuma kwi bumba lya musha?

• Mulandu nshi tatulingile ukusuulila ifyo kampingu wakanshiwa na Baibolo aletweba?

[Amepusho]

[Icikope pe bula 13]

Umuntunse takabila ifibombelo fyapikaana pa kupokelela ubukombe ukufuma kuli Lesa

[Abatusuminishe]

Abatusuminishe ni ba Arecibo Observatory/David Parker/Science Photo Library

[Icikope pe bula 15]

Yehova alanda kuli ifwe ukupitila muli Baibolo no kupitila mu “musha wa cishinka kabili uwashilimuka”