Yehova Alikula Acile Mitima Yesu

KEMBA wa malumbo alembele ukuti, “Yehova acankilwa abamutiina.” Cine cine, Kalenga alatemwa ukumona umubomfi wakwe umo na umo alekonka ifipimo fyakwe ifyalungama. Lesa alapaala abantu bakwe aba bucishinka, alabakoselesha, no kubasansamusha ilyo bapelelwa. Alishiba ukuti bakapepa bakwe tabapwililika, e co tenekela bene ukucite co bashingakumanisha.—Amalumbo 147:11.

Napamo kuti caanguka ukusumina ukuti Yehova alitemwa sana ababomfi bakwe bonse. Lelo, bamo bamoneka ukusakamana sana pa lwa filubo fyabo ica kuti balashininwa ukuti Yehova te kuti abatemwe. Napamo basondwelela ukuti,  “Yehova te kuti antemwe ne ushapwililika nangu panono.” Ca cine, bonse tulomfwapo ifyo mu nshita mu nshita. Nalyo line bamo bamoneka ukutwalilila ukuyumfwa abashacindama.

Ukuyumfwa Abashacindama

Mu Baibolo mwalilembwa abantu ba busumino abali ababombomana. Yobo apatile ubumi kabili atontonkenye ukuti Lesa alimulekeleshe. Hana, uwaishileba nyina kwa Samwele, pa nshita imo ukubulwo mwana kwamulengele ukumanama kabili alelila sana. Davidi ‘alifwamine apakalamba,’ na Epafroditi alisakamikwe pantu ukulwala kwakwe kwalengele bamunyina ubulanda.—Amalumbo 38:6; 1 Samwele 1:7, 10; Yobo 29:2, 4, 5; Abena Filipi 2:25, 26.

Ni shani pa lwa Bena Kristu ilelo? Nalimo ukulwala, ubukote, nelyo imibele imbi iya pa lwabo filabacilikila ukubomba umulimo washila ukulingana na fintu bengatemwa ukubomba. Ici kuti calenga basondwelela ukuti balelufyanya kuli Yehova na ku basumina banabo. Bamo kuti baleipeela umulandu lyonse pa filubo bacitile kale no kutwishika nampo nga Yehova alibelela. Napamo abakulila mu ndupwa shayafya kuti basondwelela ukuti tabengatemwikwa. Bushe ici kuti cacitikako shani?

Bamo bakulila mu ndupwa umwaba bukaitemwe, umusaalula, no mwenso lelo ukutemwa tamwaba. Aba te kuti beshibe ifyo cumfwika ukukwata shibo uwabatemwa nga nshi, uufwailisha amashuko ya kubatasha no kubakoselesha, uusuulako ku tulubo utunono kabili uwaiteyanya ukubelela nelyo bacita icilubo icikalamba, kabili uo ukutemwa kwakwe kubalenga ukuyumfwa abacingililwa. Apo tababalile abakwatapo shibo wa kutemwa pano isonde, napamo kuti cakosa ukumfwikisha cintu ukukwata Shibo wa mu muulu uwa kutemwa cipilibula.

Ku ca kumwenako, Fritz alemba ukuti: “Icikulilo no bwaice bwandi fyalyambukilwe sana ne mibele yabulo kutemwa iya batata. * Tababalile abantashapo, kabili nshabalile mba cibusa wabo. Na kuba, ilingi nalebatiina.” Pali uyu mulandu, Fritz, uuli ne myaka 50 nomba, acili ayumfwa uushalinga. Kabili Margarette alondolola ukuti: “Abafyashi bandi tabaali abasansamuka kabili tabantemenwe. Ilyo natendeke ukusambilila Baibolo, calinkosele ukwelenganya fintu wishi wa kutemwa aba.”

Uko kuyumfwa, te mulandu ne cingalenga, kuti kwalangilila ukuti inshita shimo icilenga ukuti tubombele Lesa, te kutemwa iyo, lelo sana sana ciba kuyumfwa aba mulandu e lyo no mwenso. Tatwikushiwa no kubomba ukulingana na papelele amaka yesu. Ukufwaisha ukusekesha Yehova na basumina banensu kuti kwalenga twalamona kwati tatulekumanisha ukucita ifyo tulingile ukucita. Na muli fyo, kuti twafilwa ukufika pa mabuyo yesu, kuti twaipeela umulandu, no kufuupulwa sana.

Cinshi twingacita? Napamo tulekabila ukuicinkulako fintu Yehova aba uulangulukilako. Uwaumfwikishe iyi mibele ya kwa Lesa iya kutemwa ali mutumwa Yohane.

“Lesa Alikula Acile Mitima Yesu”

Pa kupwa kwa mwanda wa myaka uwa kubalilapo C.E., Yohane alembeele abasumina banankwe ukuti: “Kabili muli ici e mo kuti twaishibilo kuti tuli ba mu cine, no kuteke mitima yesu ku cinso cakwe lyonse ilyo imitima yesu ituseka; ico Lesa alikula acile mitima yesu, kabili aishiba fyonse.” Mulandu nshi Yohane alembeele aya mashiwi?—1 Yohane 3:19, 20.

Yohane alishibe bwino bwino ukuti umubomfi wa kwa Yehova kuti asekwa no mutima wakwe. Napamo Yohane na o aliisekelepo. Apo ali umulumendo uwalekuntukilwa sana, libili libili Yesu Kristu alemwafwa ukukanalengulula sana bambi. Na kuba, Yesu ainike Yohane na munyina Yakobo “ishina lya Boanerge, e kutila, Abana ba kubuluma kwa mfula.”—Marko 3:17; Luka 9:49-56.

Mu myaka 60 iyakonkelepo, Yohane alundulwile icongwe, no kuba Umwina Kristu uwashikatala, uwa kutemwa, kabili uwa nkumbu. Pa kuba umutumwa wa kulekeleshako ukufwa, pa nshita alelemba kalata wakwe uwa kubalilapo kabili uwapuutwamo, alishibe ukuti Yehova talubulwisha ababomfi bakwe pa tulubo tonse utunono tuntu bacita. Lelo ni Lesa wa nsansa, uulangulukilako, kapekape, kabili Shifwe wa  nkumbu uwatemwa sana abamutemwa na bamupepa mu cine. Yohane alembele ukuti: “Lesa kutemwa.”—1 Yohane 4:8.

Yehova Alasekelela pa fyo Tumubombela

Lesa alishiba ubunake no kupelebela kwesu, kabili alebukisha iyi mibele iyo tufyalwa fye na yo. Davidi alembele ukuti: “Wene aliishibe mibumbilwe yesu, aibukisho kuti tuli lukungu.” Yehova alishiba ukuti icikulilo cesu e calenga ukuti tube fino. Na kuba, alitwishiba bwino sana ukucila fintu twaishiba fwe bene.—Amalumbo 103:14.

Alishiba ukuti fwe bengi tulafwaya ukucita bwino, lelo te kuti tucimfye ukukanapwilika kwesu. Imibele yesu kuti yalinganishiwa ku ya mutumwa Paulo, uwalembele ukuti: “Icisuma ico mfwaya, nshicita; lelo icibi ico nshifwaya, e co ncita.” Bonse tulashomboka mu nshila imo ine. Inshita shimo ici e cilenga umutima wesu ukutuseka.—Abena Roma 7:19.

Lyonse muleibukisha ukuti: Icacindama sana ni fintu Yehova atumona te fintu tuimona fwe bene. Lyonse nga atumona tulecita ifingamutemuna, alekushiwa sana kabili alasekelela pa fyo tucita. (Amapinda 27:11) Nangu line ifyo twingacita kuti fyamoneka ifinono mu menso yesu, ukufwaisha kwesu na mapange yesu ayasuma filamutemuna. Alalolekesha ukucila pa fyo tucita kabili aleshiba ifyo tufwaya ukucita; alishiba ifyo tufwaisha. Yehova kuti amona mu mutima wesu.—Yeremia 12:3; 17:10.

Ku ca kumwenako, mu cifyalilwa fye Inte sha kwa Yehova ishingi shalikwata umwenso ne nsoni kabili tashifwaya ukuilangisha ku bantu. Kuli bene, kuti cayafya sana ukushimikila imbila nsuma ku ng’anda ne ng’anda. Nalyo line, ukufwaisha ukubombela Lesa no kwafwa abantu banabo, kulenga na ba mwenso ukusambilila ifya kutununuka no kulanda ku bantu pa lwa Baibolo. Limo limo kuti bamona kwati balepwishishisha fye utunono, ne ci kuti calenga ubuseko bwabo ukupwa. Umutima wabo kuti wabeba ukuti ubutumikishi bwabo tabwacindama. Lelo Yehova alasekelela nga nshi pa kuibikilishako kwabo mu mulimo. Kabili, te kuti beshibe uko imbuto shikamenena na lintu shikamena, ukukula no kutwala ifisabo.—Lukala Milandu 11:6; Marko 12:41-44; 2 Abena Korinti 8:12.

Inte sha kwa Yehova shimbi shilalwalilila nelyo shileya shilekota. E co, amasakamika no kukalipwa kuti fyabafinina lyonse lintu balesangwa ku kulongana pa Ng’anda ya Bufumu. Ilyo bakutika ku lyashi ililelanda pa lwa mulimo wa kushimikila, napamo balacinkulwako pa fyo balecita kale ne fyo bacili balefwaya ukucita, nangu line ukulwala kulabacilikila. Aba pambi balaipeela umulandu pantu tabalekonka ukufunda nga fintu bengatemwa ukucita. Lelo, Yehova alatasha bucishinka bwabo no kushipikisha. Talaba imilimo yabo iya busumino kulila fye batwalilila aba bucishinka.—Amalumbo 18:25; 37:28.

“Ukuteke Mitima Yesu”

Ukufika pa nshita Yohane alekota, afwile alyumfwikishe sana ukuti Lesa alalangulukilako. Ibukisheni ukuti alembele ati: “Lesa alikula acile mitima yesu, kabili aishiba fyonse.” Na kabili, Yohane atukoselesha “ukuteke mitima yesu.” Cinshi Yohane apilibwile pa kusose fyo?

Ukulingana na Vine’s Expository Dictionary of Old and New Testament Words, ishiwi lya ciGriki ilyapilibulwa ‘ukuteka’ lipilibula “ukunashanasha, nelyo ukukolopeka.” Mu mashiwi yambi, pa kuteke mitima, tukabila ukukolopeka imitima yesu, ukuinashanasha ukusumina ukuti Yehova alitutemwa. Mu nshila nshi?

Fritz, uo tulandilepo kale muli ici cipande, ni eluda mu cilonganino ca Nte sha kwa Yehova pa myaka 25 kabili asanga ukuti isambililo lya pa lwakwe kuti lyashinina umutima wakwe ukuti Yehova alimutemwa. “Ndapoosako amano ku kubelenga Baibolo ne mpapulo shesu lyonse. Cilangafwa ukukanatontonkanya pa fya kale lelo  ukupoosa amano ku nshita yawamisha iili ku ntanshi. Limo ukulanguluka pa nshita ya ku numa kulacilamo ica kuti natontonkanya no kuti Lesa te kuti antemwe. Lelo, ca cine ukuti ukusambilila lyonse kulakosha umutima wandi, kulalundulula icitetekelo candi, kabili kulangafwa ukutwalilila ukusekelela no kushikatala.”

Kwena, ukubelenga Baibolo no kwetetula te kuti fyalule imibele ine tulimo. Lelo kuti fyayalula imimwene yesu pa lwa fitucitikila. Ukubaka ifyebo fya mu Cebo ca kwa Lesa mu mitima yesu kuti kwatwafwa ukutontonkanya nga wene. Kabili isambililo lilatwafwa ukucilanapo ukumfwikisha ukuti Lesa alalangulukilako. Mu kupita kwa nshita, tukasumina ukuti Yehova tatupeela mulandu pa cikulilo cesu na pa kulwalilila kwesu. Alishiba ukuti fwe bengi tatuitemenwa fye ukucula nampo nga ni lwa ku mubili nelyo lwa ku muntontonkanya kabili alebukisha ifi mu kutemwa.

Ni shani pa lwa kwa Margarette uo tulandilepo kale? Na o wine ukusambilila Baibolo kwalimunonseshe nga nshi lintu aishibe Yehova. Ukupala Fritz, alilungike imimwene yakwe pa lwa kwa wishi. Ipepo lyalyafwile Margarette ukukosha ifyo asambilile. Margarette atila, “Natendeke ukumona Yehova ukuti ni cibusa wandi uwapalamisha, apo te mulandu no kukwata tata uushantemenwe, nalishilekwata ifibusa ifingi sana ifyantemenwe. Panono panono nalisambilile ukulanda kuli Yehova pa lwa kuyumfwa kwandi, ukutwishika, amasakamika, na mafya yandi. Cila nshita nalelanda na wene mwi pepo, pa nshita imo ine naleampanya ifyo nalesambilila pa lwa kwa Lesa ngo ulelenga icikope cabalabata. Mu kupita kwa nshita, naishiletemwa Yehova ica kuti pali nomba nshikwata sana ubwafya bwa kumumona ukuti ni Tata wa kutemwa.”

Ukulubulwa ku Masakamika Yonse

Muli buno bwikashi bukote ubwabipa, takuli ushakwata amasakamika. Abena Kristu bamo balapopomenwa pa mulandu wa kucululuka na masakamika nelyo ukuitwishika mu kubwekeshabwekeshapo. Lelo kuti twashininwa ukuti Yehova alishiba amapange yesu ayasuma no kubombesha kwesu mu mulimo wakwe. Takatale alaba ukutemwa uko tulangisha kwi shina lyakwe.—AbaHebere 6:10.

Mu calo cipya icisungamine, icikatekwa no Bufumu bwa buMesia, aba busumino bonse kuti baenekela ukulubukako ku mafya ya mu bwikashi bwa kwa Satana. Mwandi uko kukaba kwilululwa! Lyene tukamona ubushinino bwakulilako ubwa kuti Yehova alalangulukilako. Ukufikile yo nshita, natwebekeshiwe bonse fye ukuti “Lesa alikula acile mitima yesu, kabili aishiba fyonse.”—1 Yohane 3:20.

[Futunoti]

[Amashiwi pe bula 30]

Yehova te Lesa wa culukusu, lelo ni Wishi wa nsansa uulangulukilako, kabili uwa nkumbu

[Icikope pe bula 31]

Ukubelengesha Icebo ca kwa Lesa kulatwafwa ukutontonkanya nga wene