Ubumi Bwapwililika Te Ciloto Fye!

Cinshi icalo capwililika cipilibula kuli imwe? Elenganyeni abantunse baleikala mu calo umwabula bumpulamafunde, ukubomfye miti bubi bubi ifipowe, ubupiina, atemwa ulufyengo. Abantunse bonse bali ne nkuntu shisuma kabili baleipakisha ubutuntulu busuma. Takuli ukukalipwa nelyo ubulanda pantu nangu ni mfwa ine naifumishiwapo. Bushe cili icalinga ukufuluka icalo ca musango yo?

NANGU line abantunse tabasuula ukulunduluka kwacitwa mu fya sayansi ne fya kupangapanga, abengi tabasumina ukuti ukulamuka kwa muntunse nelyo ukusambilila kwakwe kukaletako icalo capwililika umo bonse bakekala umutende kabili aba nsansa. Lubali lumbi, te kuti tukaane ukuti umuntunse alemenena ku kufwaisha ukuwamya ifintu no kulungika ifishapwililika. Ca cine, ifya kwelenganya fye tafingafwa ababula amayanda na bapiina, nangu ukucitila abalemana na balwala ifyo bafwaya, ukubelululako ku macushi. Icalo capwililika te kuti ciise fye ukupitila mu fya kwelenganya kwa bantunse. Te mulandu no kucula no mutitikisha ifya nomba, kwaliba imilandu ine ine iya kusuminina ukuti icalo mwingatila icapwililika cine cine cili mupepi.

Lintu mwatontonkanya pa bumi bwapwililika, nalimo ico mwingebukisha bumi bwa kwa Yesu Kristu. Yesu taali e muntu wapwililika eka uwabalile abako pe sonde. Adamu na Efa, abalengelwe mu cata ca kwa Lesa, baliipakishe ubumi bwapwililika mu paradise. Lelo, balufishe uku kupwililika pa mulandu wa kupondokela Shibo wa mu muulu. (Ukutendeka 3:1-6) Nangu cibe fyo, Kalenga, abikile ukufwaya kwa kwikala umuyayaya mu mintontonkanya ya bantunse. Lukala Milandu 3:11 asuminishe co lintu asosa ukuti: “[Lesa] acitile conse cine icayemba mu nshita ya ciko; abika ne nshita ya muyayaya mu mitima ya bantu, pa kuti umuntu te kuti eluke umulimo uo Lesa abomba ukutula pa kutendeka no kufika ku mpelelekesho.”

Nangu ca kuti ukukanapwililika no lubembu fyatungulwile umuntunse ku bumi bwa “kuicusha fye” kabili ku “busha bwa kubola,” umfweni amashiwi ya kusansamusha aya mutumwa Paulo aya kuti: “Ifibumbwa filolela no kufulukisha ukusokololwa kwa bana ba kwa Lesa. Pantu ifibumbwa fyalengelwe ukulamba ku kuicusha fye,  te ku kuitemenwa iyo, lelo pa mulandu wa wafilamfishe, pa kucetekelo kwa kuti ifibumbwa na fyo fikalubulwa ku busha bwa kubola no kutwalwa mu buntungwa bwa bukata bwa bana ba kwa Lesa.” (Abena Roma 8:19-21) Baibolo yalilondolola bwino ukutila Lesa alipayanya ukubwesesha ubumi bwapwililika ku bantunse ukupitila muli Yesu Kristu.—Yohane 3:16; 17:3.

Ukulunda pali ili subilo lishaiwamina ilya ku ntanshi, bonse twalikwata amaka ya kulunduluka lwa ku mupashi, ukulenga ukulunduluka kwesu ukumoneka na lelo line.

Esheni Ukuba Abapelulula

Yesu Kristu alimwene ukuti ukupwililika kwalicindamisha kabili e mulandu wine aebele cinkupiti wa balemukutika ukuti: “E ico beni abafikapo nge fyo Shinwe wa mu muulu abo wafikapo.” (Mateo 5:48) Bushe Yesu cine cine aletwenekela ukuba ababula akalema muli buno bwikashi bubifi? Iyo. Cine cine tufwile ukutukuta ukulundulula imibele ya bukapekape, icongwe, no kutemwa abantu banensu, lelo ilingi line tulapelebela ukucite calungama. No mutumwa umo pa batumwa ba kwa Yesu alembele ukuti: “Nga tuyebelele membu shesu, wene wa cishinka kabili mulungami ukuti atulekelele imembu, no kutusangulula ku kuulungana konse; nga tutila, Tatwabembuka, ninshi twamucita uwa bufi, ne cebo cakwe muli ifwe tamwaba.”—1 Yohane 1:9, 10.

Nangu cabe fyo, kuti twawamyako ifyo tuimona ne fyo tucita kuli bambi, ukusengauka ukucilamo. Bushe nani wingasanga ubutungulushi bwawama ubwingafwa abantu ukushikatala, no kupelulula ukucila pali bulya ubusangwa mu Cebo ca kwa Lesa, Baibolo? Ukulundulula imibele ya kusekelela no kukanacishamo kukatwafwa ukubomba bwino na bambi pa ncito, abena mwesu, na bafyashi besu atemwa abana. Umutumwa Paulo akonkomeshe Abena Kristu ukuti: “Sekeleleni pe muli Shikulu; ndetila kabili, Sekeleleni. [Lekeni ukupelulula kwenu kwishibikwe, NW] ku bantu bonse.”—Abena Filipi 4:4, 5.

Ifyo Ukuba Uupelulula Kunonsha

Nga mwaba abapelulula ilyo muleenekelapo fimo kabili mwasengauka ukuikalifya no kuicimfya mwe bene pa mulandu wa kupwililika kwacilamo, mukanonkelamo mwe bene na bambi. Ukwishiba bwino ifyo mwingaba na maka ya kucita, kusanshamo ukuba uupelulula bwino pa co mulefwaya ukucita. Ibukisheni ukuti, Lesa atubumbile ukwikala mu calo no kwikushiwa ilyo tulecita umulimo usuma uwingatunonsha na bambi.—Ukutendeka 2:7-9.

Nga ca kuti mulaipatikisha sana ukucita ifyacilamo, bushe te kuti ciwame ukupepa kuli Yehova? Ukusanga ukusenaminwa kwa kwa Lesa kukamuletela ukwilulukwa ukukalamba. Yehova alishiba imipangilwe yesu no kukanapwililika kwesu, e co taba uushipelulula atemwa uwayafya ukutemuna. Kemba wa malumbo atulaya ukuti: “Ifyo shibo acite nkumbu ku bana bakwe, e fyo Yehova acite nkumbu ku bamutiina; pantu wene aliishibe mibumbilwe yesu, aibukisho kuti tuli lukungu.” (Amalumbo 103:13, 14) Mwandi tulingile ukuba abatasha pa kwishibo ukuti Lesa abomba na bantunse muli yo nshila ya nkumbu! Alishiba ukupelebela kwesu, lelo twaba aba mutengo mu menso yakwe nga abana batemwikwa.

Mu cifulo ca kufwaisha ukupwililika kwacilamo, fintu cingacilapo ukube ca mano ukulundulula  umucetekanya mu fintu fya ku mupashi no kukanacishamo mu fyo tulecita! Kabili, kuti twaba abashininkisho kuti takuli nelyo umo uwingalesha Yehova ukufikilisha imifwaile yakwe iya kusansabika umuntunse ku kupwililika mu kuteka kwa Bufumu bwa kwa Lesa. Lelo bushe ukupwililika kwa muntunse kupilibula nshi?

Ubumi Bwapwililika Bwaliwamisha Ukucila pa Kupwililika Kwacilamo

Ukuba umuntu wapwililika tacipilibula ukuba uufwaya ukupwililika kwacishamo. Abakaba ne shuko lya kwikala mu Paradise pe sonde mu kuteka kwa Bufumu bwa kwa Lesa cine cine tabakapinde ifyacilamo, e kuti ukuilungamika abene beka. Cimo pa fifwaikwa pa kupusuka ubucushi bukalamba kutasha kwa kufuma pa nshi ya mutima pe lambo lya cilubula, nga fintu calangililwa ne bumba likalamba abakafuma mu nko shonse abo umutumwa Yohane alondolwele ukuti balepunda abati: “Ipusukilo lya kwa Lesa wesu uwaikala pa cipuna ca bufumu, ne lya Mwana wa mpaanga.” (Ukusokolola 7:9, 10, 14) Bonse bakapusunsuka ba bucushi bukalamba ubuleisa bakatasha ukuti Kristu mu kuitemenwa alibafwilile capamo na bo bonse abakwata icitetekelo muli wene. Ilambo lyakwe ilya kutemwa e ntendekelo ya kuleta ukwilulukwa kwa muyayaya ukufuma ku kukanapwililika kwabo no bunake.—Yohane 3:16; Abena Roma 8:21, 22.

Bushe ubumi bwapwililika bukaba shani? Tabwakabe bwa kucimfyanya nelyo ubwa kusupila ifya bukaitemwe, lelo, ukutemwa ne congwe pa kati ka bantunse fikalenga ukuipakisho bumi, ukufumyapo amasakamika no kuimona nga uushaba kantu. Nalyo line, ubumi bwapwililika tabwakabe ubwa kutendusha nelyo ubwa kulacita fye ifintu fimo fine. Icebo ca kwa Lesa tacilondolola fyonse pa lwa Paradise lelo cilondolola fintu ubumi twingenekela bukaba: “Bakakuula amayanda no kwikalamo, bakalima na mabala ya myanganshi no kulye fisabo fya yako; tabakakuule na bambi abekalamo, tabakalime na bambi abalyako; pantu inshiku sha bantu bandi shikaba nge nshiku sha muti, ne milimo ya minwe yabo abasalwa bandi bakasekelamo pa myaka iingi; tabakacucutikile ibusha, nangu kufyalila abana itentula.”—Esaya 65:21-23.

Mu cifulo ca kulalanguluka pa lwa fya kusekesha, ifikuulwa fya kushitamo ifintu, ifya kupangapanga, atemwa imyendele Ubufumu bukapayanya, elenganyeni ukuti muleipakisha ukufishiwapo kwa mashiwi ya kuti: “Umumbulu no mwana wa mpaanga fikamemena pamo, ne nkalamo ikalye mpimbili nge ng’ombe, ne nsoka, ulukungu lukaba e cilyo ca iko; tafyakacite bubi kabili tafyakonaule monse mu lupili lwandi lwa mushilo, e fyo asosa Yehova.” (Esaya 65:25) Fintu ubumi bwapwililika bukapusaninina no bumi bwa ndakai ee! Nga ca kuti mukaba pali balya bakawaminwa ukuba no mweo pali ilya nshita, mukaba no mulandu uusuma uwa kucetekelela ukuti Shinwe wa kutemwa uwa mu muulu akabakilila imwe no lupwa lwenu. “Ilemene kuli Yehova, na o akakupeele fifwayo mutima obe.”—Amalumbo 37:4.

Ubumi bwapwililika te ciloto fye. Imifwaile ya kwa Yehova iya kutemwa ku muntunse ikafishiwapo umupwilapo. Imwe no lupwa lwenu kuti mwaba pali abo abakafwiwa ukufika pa kupwililika kwa muntunse no kwikala umuyayaya mu calo cipya ica kwa Lesa. Baibolo yasobele ukuti: “Abalungama bakapyaninine calo, no kwikalamo inshiku pe.”—Amalumbo 37:29.

[Icikope pe bula 6]

Kuti twawamyako ifyo tuimona na fintu tumona bambi, ukusengauka ukupwililika kwacilamo atemwa ukufwaya fyonse ukupwililika

[Icikope pe bula 7]

Mulandu nshi mushingelenganishisha ukuti kale kale mwalitendeka ukuipakisho mutende no bulungami mu calo cipya?