Umulimo wa Kupususha pa Cishi  ca Robinson Crusoe

ICISHI ca Robinson Crusoe ni cimo ica fishi fitatu ifyaba pali bemba wa Pacific Ocean ifitwa Juan Fernández. Ukufuma ku lulamba lwa Chile ukufika pa fishi paba amakilomita 640. * Ishina lya ici cishi icakula ukufika ku masikweya kilomita 93 lyafuma mu citabo calumbwike nga nshi muli ba 1700 icakwete umutwe waleti Robinson Crusoe, icalembelwe na Daniel Defoe, umuNgeleshi. Ici citabo calilandapo pa kupansa kwa kwa Alexander Selkirk, umwina Scotland, uwaikele eka pa cishi mupepi ne myaka ine.

Amashiwi yamo ayaba pa cipampa ca mbao ica pali ci cishi yatila: “Pali iyi ncende, e po cila bushiku, pa myaka ine umwina Scotland Alexander Selkirk alelolekesesha akatalamukila pali bemba ukufwaisha ukuti kwingesa ubwato bwa kupusukilamo ubwa kumufumya kuntu aleikala eka.” Kuli pele pele, Selkirk alipusushiwe kabili bamubwekeshe ku calo cakwe, icishalemusekesha pa numa ya kwikala muli paradise wakwe umunono. Cashimikwa ukuti, pa numa atile: “Yangu, icishi candi ico natemwisha! Kanshi nga nshafumineko!”

Mu kupita kwa nshita, icishi caishileba cifulo ca kufuungilako abantu, ukwaleikala bamo abapeelwe umulandu wa “kukaana ifisumino” fye Calici lya ciKatolika. Mwandi icishi capala paradise cintu Selkirk aishibe calyalwike! Nalyo line, abekashi ba pa cishi aba lelo, balaipakisha umutende uushisangwa mu ncende ishingi isha calo. Imikalile yaanguka, nga ilya ine iya mu fishi ifingi, ilenga ukuti canguke ukutendeka ukulanshanya no uli fye onse.

Ukulingana ne fipendo fya balashi, icishi ca Robinson Crusoe cakwata abekashi mupepi na 500, lelo inshita iikalamba iya mwaka, mupepi na 400 fye e bekala pa cishi. Umulandu umo wa kuti banyinabo na bana babo abaya ku masukulu bekala mu Chile inshita ye sukulu. Ku cishi babwelelako pa myeshi ya cuti ku kuyaikala no lupwa ulushala.

Nangu line icishi ca Robinson Crusoe capala ibala lyayemba, abekashi ba pali ici cishi bamo bayumfwa ukuti balipelelwa lwa ku mupashi kabili balafwaya ifyasuko. Bambi bayumfwa kwati balakabila ukupusushiwa lwa ku mupashi.

Ukupususha lwa ku Mupashi

Uyu mulimo wa kupususha watendeke mu 1979. Umwanakashi uwalesambilila Baibolo ne Nte sha kwa Yehova mu Santiago, mu Chile, akuukile ku cishi kabili atendeke ukusambilisha bambi ifyo asambilile. Pa numa eluda uwailebombela kuli ci cishi imilimo ya pa lwakwe, alisungwike ukusanga akalibumba kanono aka basambi ba Baibolo ako uyu mwanakashi aleafwa ukulunduluka lwa ku mupashi. Pa numa ya myeshi itatu ilyo eluda atandele pa cishi na kabili, uyu kasambilisha wa Baibolo uwali eka e lyo na basambi bakwe babili, bali nabafikapo ukubatishiwa, e co uyu eluda alibabatishe. Pa numa, umo uwa aba Bena Kristu bapya  ababatishiwe alyupilwe, kabili wene no mulume wakwe batwalilile ukufwayafwaya bambi abalekabila ukupusushiwa lwa ku mupashi. Umulume wakwe e waleangalila umulimo wa kukuula Inga’nda ya Bufumu iisuma, iyo aka kalibumba kanono aka pa cishi katwalilila ukubomfya. Mu kupita kwa nshita, pa mulandu wa mafya ya fya ndalama balikuukile ukufuma pa cishi no kuya ku cilonganino cimbi lwa pa kati ka Chile, uko batwalilila ukubombela Yehova.

Panono panono, aka kalibumba kanono aka pa cishi kalitwalilile ukukula lintu bambi nabo balepusushiwa ukufuma ku mipepele ya bufi. Lelo, apo abana be sukulu balakuukila ku Chile, ku kusambilila isukulu lya ku sekondari, ibumba lyalicepele, pashele bankashi babili ababatishiwa e lyo no mukashana umo. Ibumba lilakula mu nshita ya kutusha ilyo banyinabo bamo babwelela ku cishi. Ici cilasumbamo aba bankashi batatu abashala beka umwaka onse. Pa mulandu wa kubombesha kwa aba bankashi, Inte sha kwa Yehova shalishibikwa sana pa cishi ca Robinson Crusoe. Ca cine, abekashi ba pa cishi bambi balakaanya umulimo wabo uwa kushimikila kabili balasonga bambi ukukaana ubukombe bwa Bufumu. Nangu ni fyo, imbuto sha cine ca Baibolo ishilimbwa mu mitima ya ba bufumacumi shalitwalilila ukupuuka.

Ukukosha Abo Abapusushiwa

Cila mwaka kangalila wenda alatandalila ici cishi. Bushe ciba shani ukutandalila Inte sha kwa Yehova abanono fye pa cishi caba ukutali? Kangalila wa muputule umo alondolola ukutandala kwakwe ukwa kubalilapo pa cishi ca Robinson Crusoe ati:

“Ulu lwendo lwaliweme nga nshi. Lwatendeke pa 7:00 hrs. ilyo twaimine ukufuma ku Valparaiso no kuya na motoka ku cibansa ca ndeke ica ku Santiago ica Cerrillos Airport. Twaninine indeke inono iisenda fye abantu 7. Pa numa ya kwenda amaawala yabili na maminiti 45, akatalamukila twamwene ulupili ulo ubutali bwa luko bwafikile mu makumbi. Lintu twalepalamina, icishi catendeke ukumoneka, cali mwalaala ukalamba pa kati ka bemba. Calemoneka kwati uleelela pa kati ka menshi, ukupala ingalaba iilelulumba pa menshi.

“Ilyo twafikile, twaile pa mushi mu bwato. Mumo mumo mwali  ifimabwe fyalundumana ifyapanga utufishi apo inama shitwa fur seals isha ku Juan Fernández shatemwa ukutushisha. Calibindwa ukulunga ishi nama pantu impendwa ya shiko yalicepelako nga nshi. Mu kupumikisha, icintu caishilepupuka lwa ku bwato e lyo caingila muli bemba na kabili. Lyali musango we sabi lipupuka, ilyakwata utumaapa twapala amapindo. Camoneke ukuti lyaleipakisha ukwima amabaka ku kwikata utushishi. Kwena, inshita shimo nalyo line lilekatwa; ukutolaukatolauka kuti kwacebusha ifilwani fimbi ifiba ifyaiteyanya ukulimina ilyo lilebwelela mu menshi.

“Twasukile twafika pa mushi wa San Juan Bautista (Umutakatifu Yohane Kabatisha). Kwali abekashi ba pa cishi abengi nabeminina pa cabu, balelolela abeni babo nelyo ukufwaisha ukumona abalefika pali iyi nshita. Twalitemenwe nga nshi ico twamwene, ici cali lupili lwitwa El Yunque (Ica kufulilapo) ulwalulubala kabili ulwa filundulundu, ulwaba kwati lwakupwa ne cifimbo ca katapakatapa, kabili bushilya, umuulu walengama lubali ku lutwe kuli na makumbi yabuta.

“Twaishilemona akalibumba ka bankashi ba Bwina Kristu na bana babo baletulolela pa cabu. Yali ni nshita ya cuti, e co akalibumba kalikulile ukucila fintu kaba lyonse. Pa numa ya kuposhanya mu kucincimuka, batutwele ku kayanda akasuma ako twali no kwikalamo pa mulungu umo.

“Wali mulungu waibela icine cine, kabili twalishibe ukuti wali no kupita bwangu. Twakabile ukubomfya bwino inshita yesu. Bulya bwine ubushiku, pa numa fye ya ca kulya ca kasuba, twatandalile umusambi wa Baibolo uwali mupepi no kuba nkashi yesu uwa ku mupashi kabili no kuilunda kuli paradise wa kwa Lesa uwa ku mupashi. Ali no buseko sana lelo na kabili alikweteko umwenso. Ubuyo bwakwe ubwa kubatishiwa ubo alolela pa nshita ntali bwalepalamina. Twabebetele na wene ifyebo fimo ifikabilwa pa kuti afikepo ku kuba kasabankanya wa mbila nsuma. Ubushiku bwakonkelepo, alibombeleko umulimo wa kushimikila pa muku wa kubalilapo. Ubushiku bwa citatu, twatendeke ukumupitulusha mu fya lubatisho. Ilyo umulungu taulapwa, alibatishiwe.

“Abengi abaleisa ku kulongana twalekwata mu kati ka mulungu, impendwa ya baleisa yalifikile 14. Cila bushiku kwaleba amapekanyo ya kuya mu mulimo wa mwi bala, ifipempu fya kubwelelamo, amasambililo ya Baibolo, ne fipempu fya bucemi. Mwandi bankashi abalebomba beka umulimo pa mwaka onse balikoseleshiwe!”

Calikosa ku baume ba pa cishi ukupokelele cine, nalimo ni ci incito shabo isha ku mubili shikabila ukubombesha. Incito iikalamba yaba kwipaya ba lobster (ifya mweo fimo ifya mu menshi), ne yo ncito ifwaya ukuipelesha nga nshi. Impatila nayo ilalenga abengi ukukanapokelela icine. Nangu cibe fyo, cileenekelwa ukuti abena cishi abengi, bonse capamo abaume na banakashi, bakapokelela icine ku nshita ya ku ntanshi.

Ukufika pali lelo, abantu 10 balipusushiwa pa cishi ukupitila mu kwishiba icine ne mifwaile ya kwa Yehova Lesa. Bamo pali aba balikuuka ukufuma pa cishi pa milandu iyalekanalekana. Lelo, Nampo nga batwalilila ukwikala pa cishi nelyo iyo, ukulubulwa kwabo ukwa ku mupashi kwalicindama ukucila ukwa kwa Alexander Selkirk. Nomba balaipakisha paradise wa ku mupashi ukuli konse kuntu bekala. Bankashi abacili bekashi ba pa cishi na bana babo balaipakisha ukwikala mu cifulo icapala ibala lyayemba, lelo ukucila pali fyo, balikwata isubilo lya kwisasangwako lintu isonde lyonse likaba paradise wa cine cine.

Umulimo wa Kupususha Uletwalilila

Nga kukonka uko babela, aka kalibumba kanono aka Nte sha kwa Yehova aka pa cishi ca Robinson Crusoe kabela ukutali sana ukufuma kuli bamunyinabo na bankashi ba ku mupashi. Lelo, tabaimona ukuti baba beka, nga fintu Selkirk umwina Scotland ayumfwile. Ukupitila mu mpapulo sha teokrasi, amavidio ya mabungano no kulongana kukalamba ifyo babatumina ukufuma ku maofeshi yanono aya Watch Tower Society mu Chile imiku itatu mu mwaka, e lyo no kutandalilwa na kangalila wa muputule cila mwaka, tabasusukako ku kuteyanya kwa kwa Yehova. E co balitwalilila ukuba abacincila ngo lubali lwa ‘bamunyina ba pano isonde.’—1 Petro 5:9.

[Futunoti]

[Amamapu ne Cikope ifili pe bula 9]

(Nga mulefwaya ukumona amamapu, moneni muli magazini)

CHILE

Santiago

ICISHI CA ROBINSON CRUSOE

San Juan Bautista

El Yunque

BEMBA WA PACIFIC OCEAN

ICISHI CA SANTA CLARA

[Icikope]

Lintu icishi catendeke ukumoneka, umo kuti amona umwalaala ukalamba pa kati ka bemba

[Abatusuminishe]

Mapu wa Chile: Mountain High Maps® Copyright © 1997 Digital Wisdom, Inc.

[Icikope pe bula 8, 9]

Ulupili lwalulubala ulwa filundulundu ulwitwa El Yunque (Ica kufulilapo)

[Icikope pe bula 9]

Umushi wa San Juan Bautista (Umutakatifu Yohane Kabatisha)

[Icikope pe bula 9]

Utufishi utunono apo inama shitwa “fur seals” na “sea lions”shitushisha

[Icikope pe bula 10]

Twaendeele mu ndeke iinono ukufuma ku Santiago, ku Chile

[Icikope pe bula 10]

Ululamba lwa filundulundu ulwa cishi ca Robinson Crusoe

[Icikope pe bula 10]

Ing’anda ya Bufumu iisuma iya pa cishi