Bileni Imbila Nsuma mu Kucincila

“Ku mitima mube ababilima; kuli Shikulu mube abapyunga.”—ABENA ROMA 12:11.

1, 2. Mimwene nshi Abena Kristu batukuta ukusungilila pamo nga bakashimikila ba mbila nsuma?

UMULUMENDO nasansamuka pa ncito engile. Pa bushiku bwa kubalilapo ku ncito, alefwaisha ukupeelwa amakambisho ku umwingishe incito. Alefwaisha ukubomba umulimo wa kubalilapo kabili napoosako amano. Alefwaisha ukubomba apo engapesha.

² Mu nshila imo ine, ifwe fwe Bena Kristu kuti twaimona nga babomfi bapya. Apo isubilo lyesu lya kwikala kuli pe na pe, kuti twatila e lyo twatendeka fye ukubombela Yehova. Ukwabula no kutwishika Kabumba wesu alitukwatila imilimo iingi iikatulenga ukuba abapamfiwa ku ciyayaya. Lelo umulimo wa ntanshi twapokelela wa kubilisha imbila nsuma iya Bufumu bwakwe. (1 Abena Tesalonika 2:4) Tumfwa shani pali uyu mulimo wafuma kuli Lesa? Kwati ni ulya mulumendo, tufwaya ukuubomba ukufika apapelele amaka yesu, mu kupimpa, mu nsansa—na mu kucincila kwine!

3. Cinshi cikabilwa pa kutunguluka mu kuba umutumikishi wa mbila nsuma?

³ Ca cine ukuti ukutwalilila ukuba ne mimwene isuma iya musango yu takwayanguka. Ukulunda pa butumikishi bwesu, twalikwata imilimo na imbi iingi, imo iitunasha no kutusakamika. Ilingi, tulakumanisha ukubomba iyi milimo ilyo tulebomba no butumikishi bwesu. Nalyo line kuti caba kutwalilila ukutukuta. (Marko 8:34) Yesu akomailepo kuti ukutunguluka mu Bwina Kristu kwali no kupinda ukupilikita.—Luka 13:24.

4. Amasakamika ya cila bushiku kuti yakuma shani imimwene yesu iya fya ku mupashi?

⁴ Apo kwaba ifingi ifya kucita, calyanguka ukubipilwa nelyo ukufuupulwa inshita shimo. “Amasakamika ya bwikashi buno” kuti yalenga twaleka ukupimpila no kutesekesha ifya Bufumu. (Luka 21:34, 35; Marko 4:18, 19) Pa mulandu wa kukanapwililika kwa buntunse, pambi kuti twaleka ‘ukutemwa kwesu ukwa pa kutendeka.’ (Ukusokolola 2:1-4) Imbali shimo isha mulimo wesu kuli Yehova kuti shasanguka nge cibelesho fye. Baibolo ipayanya shani inkosho shikabilwa ku kuleka tutwalilile ukupimpila ubutumikishi?

Waba ngo “Mulilo Ulepya” mu Mitima Yesu

5, 6. Umutumwa Paulo alemona shani ishuko lyakwe ilya kushimikila?

⁵ Ubutumikishi ubo Yehova atuseekesha bwalicindamisha ica kuti tatwingabuleka ukuba icintu ca fye. Umutumwa Paulo alemona ukushimikila kwa mbila nsuma ukuti lishuko likalamba, kabili aleimona ngo ushalinga ukuseekeshiwa uyu mulimo. Atile: “Kuli ine, ne munono ku bacepesha pali bonse abashila, kwapeelwe ica kusenamina ici, ku kuyabila ku Bena fyalo imbila nsuma ya bucindami ubushingakumwako bwa kwa Kristu; no kulenga kumoneke ku bantu bonse ukulondolola kwa ca nkama icafishilwe ku nshita sha muyayaya muli Lesa Kalenga wa fyonse.”—Abena Efese 3:8, 9.

⁶ Ifyo Paulo acindamike ubutumikishi caba ca kumwenako cishaiwamina kuli ifwe. Muli kalata wakwe ku bena Roma, atile: “Ndi no mutima uwasantuka ukubile mbila nsuma.” Tali na nsoni ku mbila nsuma. (Abena Roma 1: 15, 16) Akwete imimwene isuma kabili alefwaisha ukubomba ubutumikishi bwakwe.

7. Muli kalata wakwe ku bena Roma, cinshi Paulo abasokele?

⁷ Umutumwa Paulo alibukile ubucindami bwa kutwalilila abapimpa, e co akonkomeseshe Abena Kristu ba mu Roma ukuti: “Ku kupimpa mwiba banenuka; ku mitima mube ababilima; kuli Shikulu mube abapyunga.” (Abena Roma 12:11) Ishiwi lya ciGriki ilyapilibulwa ‘ukunenuka’ lipilibula “ubunang’ani.” Ilyo napamo te kuti tunenuke mu butumikishi bwesu, ifwe bonse tulingile ukwibukila ifishibilo fyonse ifibalilapo ukulangilila ubunag’ani bwa ku mupashi no kuteulula imimwene yesu nga twamona ukuti natukwata ifi fishibilo.—Amapinda 22:3.

8. (a) Cinshi caishileba ngo “mulilo ulepya” mu mutima wa kwa Yeremia, kabili mulandu nshi? (b) Finshi twingasambililako ku fyacitikile Yeremia?

⁸ Umupashi wa kwa Lesa na o kuti watwafwa lintu twafuupulwa. Ku ca kumwenako, inshita imo kasesema Yeremia alifuupwilwe, kabili atontonkenye na pa kuleka umulimo wa kusesema. Asosele na pali Yehova ukuti: “Nshakamulumbule, nshakasosele kabili mwi shina lyakwe.” Bushe ici cali bushinino bwa kuti Yeremia alipelebele nga nshi lwa ku mupashi? Iyo. Na kuba, bumupashi bwakosa ubwa kwa Yeremia, ukutemwa Yehova, no kupimpila icine fyamulengele ukutwalilila ukusesema. Alondolola ukuti: “Mu mutima wandi [icebo ca kwa Yehova caba] kwati mulilo uulepya, uwacilikilwa mu mafupa yandi. Ninaka ku kuminina  mu nda, kabili nafilwa.” (Yeremia 20:9) E fyo caba fye ukuti limo limo ababomfi ba busumino aba kwa Lesa balafuupulwa. Lelo lintu bapepa kuli Yehova ukuti abafwe, akamona mu mitima yabo no kubapeela umupashi wakwe uwa mushilo nga ca kuti, ukupala Yeremia, baba ne cebo cakwe mu mitima yabo.—Luka 11:9-13; Imilimo 15:8.

“Mwishimya Mupashi”

9. Cinshi cingacilikila ifyo umupashi wa mushilo wingatucitila?

⁹ Umutumwa Paulo akonkomeshe abena Tesalonika ukuti: “Mwishimya Mupashi.” (1 Abena Tesalonika 5:19) Imibele ne mimwene ishumfwana ne fishinte fya bukapepa kuti fyacilikila ifyo umupashi wa mushilo wingatucitila. (Abena Efese 4:30) Abena Kristu lelo balikwata umulimo wa kushimikila imbila nsuma. Twalicindika nga nshi ili shuko. Tatupapa ukuti abashaishiba Lesa bamona umulimo wesu uwa kushimikila nge cintu casuulwa. Lelo lintu Umwina Kristu ku mufulo alekelesha ubutumikishi bwakwe, kuti ashimya umulilo wa mupashi uwa kwa Lesa uutucincisha.

10. (a) Imimwene ya bantu banensu kuti yatukuma shani? (b) Mimwene nshi iyasansuka iya butumikishi bwesu yalandwa pali 2 Abena Korinti 2:17?

¹⁰ Bamo abashaba mu cilonganino ca Bwina Kristu kuti bamona ubutumikishi bwesu ngo mulimo wa kwananya fye impapulo. Bamo mu kuluba kuti basondwelela ukuti tuya ku ng’anda ne ng’anda ku kupoka fye imisangulo. Nga ca kuti twalekelela imimwene yalubana iya musango yu ukutufuupula, ici kuti calenga ubunasha ku mibombele yesu mu butumikishi. Mu cifulo ca kulekelela imimwene ya musango yu ukutufuupula, natutwalilile ukulamona ubutumikishi bwesu nga fintu Yehova na Yesu babumona. Umutumwa Paulo alandile pali iyo mimwene yacindama lintu atile: “Tatuli nga ba cinabwingi, abenshe cebo ca kwa Lesa ku kumwenamo; lelo nga ba bufumacumi, nga ba kwa Lesa, tulandila muli Kristu ku cinso ca kwa Lesa.”—2 Abena Korinti 2:17.

11. Cinshi calengele Abena Kristu ba ntanshi ukutwalilila abapimpa nangu bapakaswa, kabili ica kumwenako cabo cilingile ukutukuma shani?

¹¹ Tapapitile na nshita apo Yesu afwilile, abasambi bakwe mu Yerusalemu bapitile mu nshita ya kupakaswa. Balitiinishiwe no kukambishiwa ukuleka ukushimikila. Lelo, Baibolo isosa  ukuti “baisushiwemo Umupashi wa mushilo, no kulande cebo ca kwa Lesa no kushipa.” (Imilimo 4:17, 21, 31) Amashiwi Paulo aebele Timote pa numa ya myaka imo yalangilila imimwene isuma iyo Abena Kristu balingile ukukwata. Paulo atile: “Lesa tatupeele umutima wa bukuuwe, lelo uwa maka kabili uwa kutemwa kabili uwa kutekanya. E ico wiba na nsoni ukushimika Shikulwifwe ubunte, nangu kuli ine ne mufungwa wakwe; lelo culile mbila nsuma pamo na ine, umwabela amaka ya kwa Lesa.”—2 Timote 1:7, 8.

Misha Nshi Twakwatila Abanensu?

12. Mulandu nshi uukalamba uo tushimikilila imbila nsuma?

¹² Pa kuti tukwate imimwene isuma pa lwa butumikishi bwesu, tulingile ukuba ne mifwaile isuma. Mulandu nshi tushimikilila? Umulandu ukalamba waba mu mashiwi ya kwa kemba wa malumbo uwatile: “Ababile benu balemucindika [mwe Yehova]; ubukata bwa bufumu bwenu balebulanda, na bumpalume bwenu balebusosa, ku kulenga abana ba bantu beshibe ifya bumpalume fyakwe, no bukata ubwacindama bwa bufumu bwakwe.” (Amalumbo 145:10-12) Cine cine, tushimikila pa kuti tulumbanye Yehova ku cintubwingi no kushishe shina lyakwe ku bantunse bonse. Nangu banono bakutika kuli ifwe, ukubila ubukombe bwe pusukilo mu busumino kulumbanya Yehova.

13. Finshi fitucincisha ukwebako bambi isubilo lye pusukilo?

¹³ Na kabili tushimikila pa mulandu wa kutemwa abantu no kusengauka umulandu wa mulopa. (Esekiele 33:8; Marko 6:34) Ifyakuma kuli ci mashiwi ya kwa Paulo lintu alelanda ku bashaba mu cilonganino ca Bwina Kristu, aya kuti: “Ku bena Hela na batuutu pamo, ku ba mano na bapelwa amano pamo, ndi wa misha.” (Abena Roma 1:14) Paulo aleumfwa ukuti alikwete imisha ku bantu iya kubila imbila nsuma kuli bene, pantu kufwaya kwa kwa Lesa ukuti ‘abantu bonse bakapusuke.’ (1 Timote 2:4) Lelo, abanensu twabatemwa mu nshila imo ine kabili tumfwa abashingamwa mu nshila imo ine. Ukutemwa abantunse kwalengele Yehova ukutuma Umwana wakwe pe sonde ku kubafwila. (Yohane 3:16) Ilyo lyali lilambo likalamba. Tupashanya ukutemwa kwa kwa Yehova lintu twabomfya inshita na maka mu kwebako bambi imbila nsuma iye pusukilo iyashimpwa pe lambo lya kwa Yesu.

14. Baibolo ilondolola shani icalo icishaba mu cilonganino ca Bwina Kristu?

¹⁴ Inte sha kwa Yehova bamona abantu banabo nga bengesaba mu bwananyina bwa Bwina Kristu ku ntanshi. Tulingile ukushimikila mu kushipa, lelo ukushipa kwesu te kwa bunkalwe. Na kuba, Baibolo ilabomfya amashiwi yaluma ilyo ilanda pa calo mu cinkumbawile. Paulo talelanda pa fisuma lintu abomfeshe amashiwi ya kuti “icalo” na “amano ya pano [calo, NW]” ne “fya lunkumbwa fya pano [calo, NW].” (1 Abena Korinti 3:19; Tito 2:12) Na kabili Paulo acinkwileko Abena Kristu ba ku Efese ukuti lintu baendele “umwabelo bwikashi bwa calo cino,” bali “abafwa” lwa ku mupashi. (Abena Efese 2:1-3) Ifi fyebo na fimbi ifyapalako fyumfwana na mashiwi ya mutumwa Yohane aya kuti: “Pano [calo, NW] ponse palaala mu maka ya Mubifi.”—1 Yohane 5:19.

15. Pa lwa bantu umo umo abashaba mu cilonganino ca Bwina Kristu, cinshi tushicita, kabili mulandu nshi?

¹⁵ Lelo, ibukisheni ukuti ifyebo fya musango yu filanda pa calo canunuka kuli Lesa, te ku bantu umo umo. Abena Kristu tabesha na kupingula ifyo umuntu akankulako ku mulimo wa kushimikila. Tabakwata apa kusosela ukuti uyu muntu ni mbushi. Te cesu ukusosa ifikafumamo ilyo Yesu aisa ku kupaatukanye “mpaanga” ku “mbushi.” (Mateo 25:31-46) Yesu e kapingula wasontwa; te ifwe iyo. Ukulundapo, ifyacitika fyalilangilila ukuti bamo abali ne mibele yabipisha balipokelela ubukombe bwa mu Baibolo, balyaluka, no kuba Abena Kristu basanguluka. E co, ilyo te kuti tubishanye na bantu bamo, tatushingashinga ukulanshanya na bo pa lwe subilo lya Bufumu lintu kwaba ishuko.  Amalembo yalanda pa bantu bamo bamo abo ilyo bali abashasumina “basontelwe ku kuya mu mweo wa muyayaya.” Basukile batetekela. (Imilimo 13:48) Te kuti twishibe kanshi uusontelwe ukufikila twamushimikila—napamo imiku iingi. Pa mulandu wa ici, ku bashilapokelela ubukombe bwe pusukilo tulaba ‘abafuuka’ kabili “tulabacindika, NW,” ukusubila ukuti bamo pali bene bakankula ku bukombe bwa mweo.—2 Timote 2:25; 1 Petro 3:15.

16. Mulandu nshi umo tufwaila ukulundulwila “imisambilishishe” yesu?

¹⁶ Ukulundulula imisambilishishe pamo nga bakasambilisha kukalenga tufwaishe ukubila imbila nsuma. Ukulangilila: Icangalo cicincimusha pambi te kuti cibe ica kusekesha ku muntu uushaishiba ifya kwangala ico cangalo. Lelo ku waishiba bwino ifyo bangala ico cangalo, caba cintu aipakisha. Mu nshila imo ine, Abena Kristu abalundulula “imisambilishishe, NW” yabo balalundako ubuseko mu butumikishi. (2 Timote 4:2; Tito 1:9) Paulo apandile Timote ukuti: “Cincilo kuipeela kuli Lesa ngo wasuminishiwa, umubomfi uushingaba na ca kukwatilapo insoni, uulungiko kusose cebo ca Cine.” (2 Timote 2:15) Kuti twalundulula shani imisambilishishe yesu?

17. Kuti ‘twailenga shani ukulafuluka’ ukwishiba kwa mu Baibolo, kabili ukwishiba kwa musango yu kukanonsha shani ubutumikishi bwesu?

¹⁷ Inshila imo ya kukwatilapo ukwishiba kwalungika na kumbi. Umutumwa Petro atukoselesha ukuti: “Fulukeni ishiba lya bumupashi ilyabulo bucenjeshi, ngo tunya utwafyalwa nomba, ukuti mukulileko ukufika ku kupusuka.” (1 Petro 2:2) Umwana wakwata ubumi busuma mu cifyalilwa fye afuluka ishiba. Lelo, Umwina Kristu akabila ‘[ukuilenga, NW] ukufuluka’ ukwishiba kwa mu Baibolo. Ici kuti cacitwa mu kulundulula ifibelesho fisuma ifya kusambilila no kubelenga. (Amapinda 2:1-6) Ukubombesha no kuisalapula filakabilwa nga tuli no kuba bakasambilisha balamuka aba Cebo ca kwa Lesa, lelo ukubombesha kwa musango yu kuleta ifilambu. Insansa shifuma mu kubebeta Icebo ca kwa Lesa shikatulenga ukuba ababilima no mupashi wa kwa Lesa, no kufwaisha ukwebako bambi ifyo tulesambilila.

18. Ukulongana kwa Bwina Kristu kuti kwatupangasha shani ukulungiko kusose cebo ca cine?

¹⁸ Ukulongana kwa Bwina Kristu na ko kulabomba umulimo wacindama mu kubomfya Icebo ca kwa Lesa mu kulamuka. Lintu amalembo ya mu Baibolo yalebelengwa ne lyashi lya cintubwingi lilelandwa no kulanshanya kumbi ukwa mu Malembo, cisuma ukukonkamo ukubelenga mu maBaibolo yesu. Cisuma ukukutikisha ku malyashi mu kulongana, ukusanshako na yalanda fye pa mulimo wesu uwa kushimikila. Tatufwile ukucefya ubucindami bwa filangililo, napamo ukulenga twapumfyanishiwa. Na kabili, ukuisalapula no kukutikisha filakabilwa. (1 Timote 4:16) Ukulongana kwa Bwina Kristu kukosha icitetekelo cesu, kutwafwa ukufuluka Icebo ca kwa Lesa, no kutukansha ukuba bakabila bacincila aba mbila nsuma.

Kuti Twacetekela Ubwafwilisho bwa kwa Yehova

19. Mulandu nshi ukubombako lyonse mu mulimo wa kushimikila kwacindamina?

¹⁹ Abena Kristu abo ‘ku mitima baba ababilima’ kabili abafwaisha ukubila imbila nsuma  batukuta ukubombako lyonse mu butumikishi. (Abena Efese 5:15, 16) Ca cine ukuti imibele ilapusana, kabili te bonse bengabomfya inshita imo ine muli uyu mulimo wa kupususha. (Abena Galatia 6:4, 5) Lelo, napamo icacindama ukucila pa nshita tubomfya mu mulimo wa kushimikila caba miku tulanda pe subilo lyesu kuli bambi. (2 Timote 4:1, 2) Nga ca kuti twalundako ukushimikila, tukacilapo ukutesekesha ubucindami bwa uyu mulimo. (Abena Roma 10:14, 15) Tukalundako icililishi no kutemwa ilyo lyonse tulelanshanya na bantu bafumaluka abaleteta no kulila kabili abashikwete isubilo.—Esekiele 9:4; Abena Roma 8:22.

20, 21. (a) Mulimo nshi uo tukwete ku ntanshi? (b) Yehova aletungilila shani ukubombesha kwesu?

²⁰ Yehova alituseekesha imbila nsuma. Uyu e mulimo wa ntanshi uo twapokelela kuli wene pamo nga “babomfi ba kwa Lesa abalebombela pamo.” (1 Abena Korinti 3:6-9) Tufwaisha ukufishapo no mweo onse uyu mulimo Lesa atupeela, ukubomba ukufika apo twingapesha. (Marko 12:30; Abena Roma 12:1) Kucili abantu na bambi abengi abengomfwa icine mu calo. Kuli umulimo ukalamba uwa kubomba, lelo kuti twacetekela ubwafwilisho bwa kwa Yehova ilyo tulepwishishisha ubutumikishi bwesu.—2 Timote 4:5.

²¹ Yehova atutambika umupashi wakwe kabili alatupangasha no “lupanga lwa Mupashi,” Icebo ca kwa Lesa. Ku bwafwilisho bwakwe kuti twayasamuna utunwa twesu “mu kushipa ku kulenga ciishibwe ica nkama ca mbila nsuma.” (Abena Efese 6:17-20) Nacisoswe pali ifwe ico umutumwa Paulo alembele ku Bena Kristu mu Tesalonika ukuti: “Imbila nsuma yesu tayafikile kuli imwe mu nsoso yeka, lelo na mu maka, kabili mu Mupashi wa mushilo, kabili mu kusuubila kwine kwine.” (1 Abena Tesalonika 1:5) Natubile imbila nsuma mu kucincila!

Ukupitulukamo Ukwipi

• Pa mulandu wa masakamika ya mu bumi, cinshi cingacitika ku kupimpa kwesu mu butumikishi?

• Ni mu nshila nshi umo ukufwaisha kwa kubila imbila nsuma kulingile ukuba ngo “mulilo ulepya” mu mitima yesu?

• Mimwene nshi iishawama pa lwa butumikishi iyo tulingile ukusengauka?

• Mu cinkumbawile, tulingile ukumona shani abashasumina mu fyo twasumina?

• Yehova atwafwa shani ukusungilila ukupimpa kwesu mu mulimo wa kushimikila?

[Amepusho]

[Ifikope pe bula 9]

Abena Kristu bapashanya ukupimpa kwa kwa Paulo na Yeremia

[Ifikope pe bula 10]

Ukucincila kwesu mu butumikishi kubako pa mulandu wa kutemwa Lesa na banensu