Bushe Mulenonkelamo mu fya Kumwenako Fisuma?

UMUTUMWA Paulo alembele aya mashiwi ku Bena Kristu ba busumino abaleikala mu Tesalonika aya kuti: “Imwe mwabe ca kumwenako ku batetekela bonse aba mu Makedonia na mu Akaya.” Ica kumwenako baimikile abasumina banabo cali icisuma icine cine. Nalyo line, abena Tesalonika na bo balekonka ica kumwenako cintu Paulo na banankwe baimike. Paulo atile: “Imbila nsuma yesu tayafikile kuli imwe mu nsoso yeka, lelo na mu maka, kabili mu Mupashi wa mushilo, kabili mu kusuubila kwine kwine; filya fine mwaishibo musango uo twabelelemo muli imwe pa mulandu wenu. Kabili imwe mwaishileba abapashanya ifwe.”—1 Abena Tesalonika 1:5, 6.

Ca cine, Paulo taleshimikila fye. Imikalile yakwe ine yaleshimikila, ali ca kumwenako ca citetekelo, ukushipikisha, no kuipeelesha. imibele isuma iya kwa Paulo na bantu alebishanya na bo yalengele Abena Tesalonika, ukupokelela icine ‘no kucula ukwingi.’ Nangu ni fyo, te Paulo eka na babomfi banankwe abali fya kumwenako fisuma ku basumina banabo. Ifya kumwenako fya bambi abashipikishe ubucushi na fyo fyali ifya kukoselesha. Paulo alembeele abena Tesalonika ukuti: “Imwe, mwe bamunyinefwe, mwaishileba abapashanye nkuta sha kwa Lesa muli Kristu Yesu isha mu Yudea; ico na imwe mwaculile filya fintu ku ba luko lwenu bene, ifyo fine na shene shaculile ku baYuda.”—1 Abena Tesalonika 2:14.

Kristu Yesu E ca Kumwenako Capulamo

Nangu cakutila Paulo umwine alimike ca kumwenako icalinga ukukonka, aloseshe kuli Yesu Kristu nge ca kumwenako cikalamba ico Abena Kristu bafwile ukukonka. (1 Abena Tesalonika 1:6) Kristu ali kabili aba Ca kumwenako cesu icapulamo. Umutumwa Petro alembele ukuti: “Ni ci cine mwaitiilweko; pa kuti na Kristu aculiile imwe no kumushile ca kumwenako, ukuti mukonke mu makasa yakwe.”—1 Petro 2:21.

Nangu ni fyo, napapita imyaka mupepi na 2,000 apo Yesu afwilile ngo muntu. Nomba ‘aikala mu lubuuto ulushingapalamwako’ pamo nge cibumbwa ca mupashi icishifwa. Kanshi, “umuntunse nangu umo tamumona, na kabili te kuti amumone.” (1 Timote 6:16) Lelo, kuti twamupashanya shani? Inshila imo ni mu kusambilila pa bulondoloshi bune ubwa mu Baibolo ubwa bumi bwa kwa Yesu. Amalandwe yalatwafwa ukwishiba ubuntu bwakwe, imikalile yakwe, no “kwangwa” ukwali muli wene. (Abena Filipi 2:5-8) Kuti twaishibilapo na fimbi nga twapoosako amano ukusambilila icitabo ca Umuntu Wakulisha Uwabalile Abako Uwa Mweo, icilondolola bwino sana ifyalecitika mu bumi bwa kwa Yesu kabili ukulingana na muntu fyakonkanine ukucitika. *

Ica kumwenako ca kwa Yesu ica kuipeela bulilambo cakoseshe nga nshi umutumwa Paulo. Aebele Abena Kristu ba ku Korinti ukuti: “Awe ine ndecankwa apakalamba ukupoosela no kupooselwa pa mulandu wa mitima yenu.” (2 Abena Korinti 12:15) Mwandi iyo mibele ya mutima yapala iya kwa Kristu! Ilyo twabebeta ica kumwenako capwililika ica kwa Yesu, tufwile ukufwaisha ukumupashanya mu mikalile yesu.

Ku ca kumwenako, Yesu atusambilishe ukuti tufwile ukushintilila pa kulaya kwa kwa Lesa ukwa kuti akatupeela ifyo imibili yesu ikabila. Lelo talesambilisha fye iyo. Cila bushiku  alelangilila icitetekelo no kucetekela Yehova. Atile: “Bamumbwe bali ne miimba, ne fyuni fya mu lwelele fili ne fisansala, lelo Umwana wa muntu takwete apa kulaaliko mutwe.” (Mateo 6:25; 8:20) Bushe amasakamika ya fya ku mubili e yaandatila incitilo shenu ne mitontonkanishishe? Nelyo bushe imikalile yenu ilangilila ukuti mulefwaya Ubufumu intanshi? Kabili bushe mumona shani umulimo wa kwa Yehova? Bushe muumona nge fyo Yesu, uwaba Ica kumwenako cesu aleumona? Baibolo isosa ukuti Yesu talebila fye mu kupimpa lelo alilangile ukupimpa kwabilima pa nshita ishingi. (Yohane 2:14-17) Ukulundapo, mwandi cali ca kumwenako icisuma cintu Yesu aimike ica kutemwa! Na kuba, apeele ubumi bwakwe bwine nge lambo pa mulandu wa basambi bakwe! (Yohane 15:13) Bushe mulepashanya Yesu ukupitila mu kutemwa bamunyinenwe Abena Kristu? Nelyo bushe mulaleka ukukanapwililika kwa bamo kwamulesha ukubatemwa?

Ilingi twakulapelebela ilyo tuleesha ukukonka ica kumwenako ca kwa Kristu. Lelo kwena ukuibikilishako kwesu ukwa ‘kufwala Shikulu Yesu Kristu’ kulatemuna Yehova.—Abena Roma 13:14.

“Ifya Kumwenako ku Mukuni”

Bushe mu cilonganino mwalibako abengaba ifya kumwenako fyesu ilelo? Cine cine e mo baba! Bamunyina basontwa mu fifulo fya kutungulula bafwile maka maka ukwimike ica kumwenako. Paulo aebele Tito, uwalebombele filonganino mu Krete no kusonta bakangalila, ukuti eluda umo na umo uwasontwa afwile ukuba ‘umuntu uushitungwa kabi.’ (Tito 1:5, 6) Umutumwa Petro na o acincishe “abakalamba” “ukube ca kumwenako ku mukuni.” (1 Petro 5:1-3) Kabili ni shani pa lwa babomfi batumikila? Na bo bene bafwilo “kupyunga bwino budikone.”—1 Timote 3:13.

Lelo, tatufwile ukwenekela ukuti eluda onse nelyo umubomfi utumikila akaba uwalamuka sana mu milimo yonse iya butumikishi bwa Bwina Kristu. Paulo aebele Abena Kristu mu Roma ukuti: “Tuli ne fya bupe ifyalekanalekana umwabelo kusenamina uko twapeelwa.” (Abena Roma 12:6) Bamunyina bapusanapusana balabomba bwino mu milimo yalekanalekana. Tacalinga ukwenekela ukuti insoselo ne ncitilo sha baeluda fyonse fikabe fyapwililika. Pali Yakobo 3:2, Baibolo isosa ukuti: “Ifwe bonse tuipununa apengi. Umuntu nga taipununa mu kusosa, wene muntu uwapwililila; wa maka ku kulama no mubili onse ku mukobelo.” Lelo, te mulandu no kukanapwililika kwabo, ukupala Timote, baeluda kuti ‘babe ca kumwenako mu misosele, mu mibele, mu kutemwa, mu kutetekela, mu kusanguluka.’ (1 Timote 4:12) Baeluda nga bacite fyo, aba mu mukuni bakaitemenwa ukukonka ukukonkomesha kwa pa AbaHebere 13:7 ukwa kuti: “Ibukisheni intungulushi shenu, . . . tontonkanyeni umwaile imibele yabo, no kupashanye citetekelo cabo.”

Ifya Kumwenako Fimbi Ifya Muno Nshiku

Amakumi ya myaka ayapitapo, abantu na bambi abengi baliilangisha ukube fya kumwenako fisuma. Ni shani pa lwa makana ya bamishonari abasha “bamunyina, nangu ni nkashi, nangu ni [bashibo], nangu ni [banyinabo], . . . nangu bana, nangu filime” pa kuti babombe umulimo wa Bwina Kristu mu fyalo fimbi? (Mateo 19:29) Tontonkanyeni na kabili pali bakangalila benda na bakashi babo, pa baume na banakashi abaitemenwa ukubombela pa maofeshi ya Watch Tower Society, e lyo na bapainiya ababombela ku filonganino. Bushe ifi ifya kumwenako kuti fyacincisha bambi? Kabila wa mbila nsuma Umwina Kristu mu Asia ebukisha mishonari uwali mwi kalasi lyalenga 8 ilye Sukulu lya Baibolo Ilya Gileadi Ilya Watchtower. Atile uyu munyina wa busumino “aliitemenwe ukuya ukwafula bamung’wing’wi ne cipuki icine cine. . . . Ica kulengo buseko cimbi ca kuti alelanda icina China ne ciMalay nangu ca kuti mwina England.” Cinshi cafuma muli ici ca kumwenako cishaiwamina?  Uyu munyina atile: “Ukushikatala kwakwe no kuicetekela fyanengele ukufwaisha ukuba mishonari ilyo nakula.” Te ca kupapa ukuti uyu munyina alishileba mishonari.

Icisontelelo ca Watch Tower Publications Index calikwata amalyashi pa lwa bumi bwa bantu ayasangwa muli bamagazini ba Ulupungu lwa kwa Kalinda na Loleni! Aya malyashi yalanda pa lwa bantu abasha incito sha ku calo na mabuyo, abacimfya amabunake, abayalula sana ubuntu bwabo, abatwalilila ne mibele isuma te mulandu na mafya, kabili abapikintika, abashipikisha, aba bucishinka, abaicefya kabili abaipeelesha. Kabelenga umo alembele pa lwa aya malyashi ukuti: “Ukubelenga ifyo aba bambi bakumanya, kunenga ukuba uwaicefya kabili Umwina Kristu uutasha kabili fyalingafwa ukukanaituntumba nelyo ukuba uwaitemwa.”

Ukulundapo, mwilaba ifya kumwenako fishaiwamina ifya mu cilonganino mwaba: imitwe ya ndupwa iishifilwa ukusakamana indupwa shabo lwa ku mubili na lwa ku mupashi; bankashi, ukusanshako abafyashi abanakashi abashimbe abapita mu mafya ya kukusha abana pa nshita imo ine no kubombako ubutumikishi; abakalamba abo ne mibili yanakuka abatwalilila aba busumino te mulandu na maka ayaleya yalepwa no kulwalilila. Bushe tamucincishiwa ne fya kumwenako fya musango yo?

Ca cine, icalo caisulamo ifya kumwenako fyabipa. (2 Timote 3:13) Nalyo line moneni fintu Paulo akonkomeshe Abena Kristu baleikala mu Yudea. Pa numa ya kulanda pa mibele yawamisha iya baume na banakashi ba citetekelo, umutumwa Paulo abakonkomeshe ukuti: “E ico na ifwe, pa kuba abashingulukwa kwi kumbi lya nte ilyakule fi, . . . tubutuke no mukoosha ulubilo ulwabikilwa ifwe, ukutonta amenso kuli Yesu, kelenganya kabili kawaminisha wa citetekelo cesu.” (AbaHebere 12:1, 2) Abena Kristu ilelo na bo bashingulukwa ne ‘kumbi likalamba’ ilya fya kumwenako fisuma, ifya ku kale ne fya muno nshiku. Bushe cine cine mulenonkelamo muli fi? Kuti mwanonkelamo nga ca kuti mwapampamina pa ‘kukanapashanya icibi kano icawama.’—3 Yohane 11.

[Futunoti]

[Amashiwi pe bula 20]

Tatufwile ukwenekela ukuti eluda onse nelyo umubomfi utumikila akaba uwalamuka sana mu milimo yonse iya butumikishi bwa Bwina Kristu

[Ifikope pe bula 21]

Baeluda bafwile ukuba “ifya kumwenako ku mukuni”