Ilyashi lya Bakabilisha ba Bufumu

Aba Mutengo Kuli Yehova Bantu Abamutemwa

UKUFUMA mu nshita sha mu Baibolo, Lebanone yaishibikilwa ku filengwa na Lesa yakwata. (Amalumbo 72:16; Esaya 60:13) Icakwatishe ubukumu mu Lebanone mikedari ikankala iyo balebomfya sana ku makuule pa mulandu wa kuyemba, icena cisuma, no kukosa kwa iko. Mu mwanda wa myaka uwa kubalilapo, icintu ca mutengo calimoneke mu Lebanone. Ilandwe lya kwa Marko lishimiko ukuti mu Turi na Sidone, imisumba yali mu Lebanone wa pa kale mwafumine, “ibumba likalamba, pa kuumfwe fyo [Yesu] alecita, baile kuli wene.”—Marko 3:8.

Cimo cine ne lelo, Lebanone yalitwalilila ukutwale fisabo ifya mutengo nga nshi mu menso ya kwa Yehova. Ifya kukumanya fikonkelepo filangisha ici.

• Nte wacaice uwe shina lya Wissam balimwebele ukulande lyashi lya maminiti 30 mu kalasi lyakwe pa sukulu. Wissam amwene ili nge shuko lishaiwamina ilya kucitilo bunte. E co abomfeshe icitabo Life—How Did It Get Here? By Evolution or by Creation? no kupekanya ilyashi pa lwa bubumbo. Nangu cibe fyo, ilyo bakafundisha ba kwa Wissam bamwene ifyebo apekenye batile fyali ifyacindama, na muli ifyo Wissam alingile ukulanda ilyashi lyakwe mu maminiti 45.

Ilyo Wissam atendeke ukulanda ilyashi, bakafundisha wakwe balimucilime no kutuma aba kuyaita kafundisha mukalamba ukwisaumfwako. Mu nshita inono, kafundisha mukalamba alifikile kabili Wissam atendeke ukulanda ilyashi lyakwe cipya cipya. Ilyo kafundisha mukalamba alekutika ku fipusho ifyo Wissam aleipusha mu kutendeka kwa lyashi lyakwe, kafundisha mukalamba alitemenwe kabili atile bonse abana be sukulu balingile ukupokako kope wa lyashi lyakwe.

Pa numa ya nshita inono kafundisha umbi, uwalepita, amwene abana be sukulu mu kalasi nabacincimuka kabili aipwishe icalecitika. Ilyo bamwishibishe, aipwishe nga ca kuti Wissam aleesha ukutungilila ububumbo nelyo ukusanguka. Icasuko catile, aletungilila “ububumbo.” Ilyo aishibe ukuti Wissam ali ni Nte ya kwa Yehova, kafundisha aebele abali mu kalasi ukuti: “Mwalaumfwa ku lyashi lyakwe ukuti sayansi ilasuminishako ukuti ifintu fyabumbilwe fye, taitungilila ukusanguka iyo.”

Caishileishibikwa ukuti uyu kafundisha alikweteko icitabo ca Creation kabili alecibomfya ukusambilishako pa yuniversiti! Ilyo kafundisha talaya, aipwishe nga ca kuti kuti abwela ubushiku ubwakonkelepo pamo na bana be sukulu pa kuti Wissam akeselanda ku bana be sukulu afunda. Ici cafuminemo bunte na bumbi ubusuma kuli Yehova.

• Nina uwa myaka ya bukulu 22 alefwaisha amenshi ya cine. Bushiku bumo umufyala wakwe amupeele Baibolo no kumulanga ku calici lya Pentecostal. Nina abelengele Baibolo mu buseko no kusambilila ukufuma mu kubelenga kwakwe ukuti Abena Kristu balingile ukushimikila, e co atendeke ukulanda kubo abeleshenye nabo. Uuli onse uo alelanda na o amwipwishe icipusho ca kuti: “Bushe uli Nte ya kwa Yehova?” Ici calimupapwishe.

Pa numa ya myaka 6, Inte sha kwa Yehova baishile pa ng’anda ya kwa Nina ku kumwebako pa lwa Bufumu bwa kwa Lesa. Intanshi aleesha ukusange filubo mu fisambilisho fyabo. Lelo asangile ukuti ifyasuko bamwaswike fyalimo amano kabili fyashimpilwe pali Baibolo.

Mu kupita kwa nshita ifyo Nina asambilile pamo nga ishina ilya kwa Lesa ukuti ni Yehova; amapaalo yantu Ubufumu bukaleta; na fimbipo fyalimushinine ukuti alisangile icine. Apeele ubumi bwakwe kuli Lesa no kubatishiwa. Mu myaka 7 iyapita, Nina alibomba nga kabila wa mbila nsuma uwa nshita yonse. Mwandi Yehova alapaala abamutemwa icine cine.—1 Abena Korinti 2:9.