Mulandu Nshi Bashakwatila Bana?

DELE na Fola, * bantu baupana, abaleikala no kubomba pe ofeshi linono ilya Watch Tower Society mu Nigeria. Pa numa fye ya nshita iinono iya kubombela pe ofeshi, banyina kwa Fola baishile ku kubapempula. Baendele ulwendo lutali ku kwisalanshanya umulandu wabacushishe sana, umulandu uwalebafufyo tulo.

Banyina kwa Fola baebele umwana wabo no mulume ukuti: “Mulancitile ifisuma. Mulampeela ubupe, no kumpempula. Uku kutemwa mulanga kwa mutengo kuli ine. Lelo cilansakamika kabili ndatontonkanyapo lyonse ukuti bushe imwe nga mwafika pa mushinku wandi nani akamusakamana? Apo mwaupanina nomba papita imyaka ibili, kabili tamulakwata bana. Bushe tamuletontonkanyapo pali ino nshita ukuleka umulimo wenu uwa pa Bethel no kutendeka ukufyala abana?”

Banyina kwa Fola bapelulwile ukuti: Dele na Fola balibombako pa Bethel inshita iikalamba. Nomba ino e nshita bafwile ukulatontonkanya pa lwa mikalile yabo iya ku ntanshi. Icine cine abantu bambi kuti babapyana ukulabombe ncito ine iyi. Dele na Fola tabalekabila ukuleka ubutumikishi bwa nshita yonse, lelo kuti baya mu mulimo umbi, uwingabasuminisha ukukwata abana no kuba no buseko ubwaba mu bufyashi.

Ukwangwako kwa Banyina kwa Fola

Ukwangwako kwa banyina kwa Fola kwali fye bwino. Ukufwaya abana kwaba kwa cifyalilwa kabili kwaliseeka mu ntambi shonse na mu nshita shonse. Ukufyala abana kulaleta sana ubuseko ne subilo. Baibolo isosa ukuti: “Ubufyashi bwa mwi fumo . . . cilambu.” Cine cine, amaka ya kufyala abana yaba bupe bwa mutengo ukufuma kuli Kabumba wesu uwa kutemwa.—Amalumbo 127:3.

Mu nko ishingi, abaupana balapatikishiwa sana ukufyala ku bo bekala na bo mu bwikashi. Ku ca kumwenako, mu Nigeria, umo abanakashi abengi bafyala abana 6, caliseeka pa menga ukumfwa abaletasha abopene nomba line ukubeba ukuti: “Tukenekela ukumfwa akanya kalelila mu myenu mu myeshi 9 ukufuma nomba.” Pamo nge ca bupe ica bwinga, bashibwinga na banabwinga limbi balabapeela ica kusendamamo akanya. Ba nafyalebo balatampa ukulapenda imyeshi. Nga nabwinga tali pa bukulu pa numa ya mwaka umo nangu ukucilapo, balafwaya ukwishiba nga kuliko ubwafya ubuli bonse bengafwilisha ukupwisha.

Ku bafyashi banakashi abengi umulandu abantu bopanina waba kufyala abana no kusunge shina lya mu lupwa. Banyina kwa Fola bamwebele ukuti: “Mulandu nshi waupilwe nga ca kuti tamwakafyale? Imwe mwalikwete abamufyele; na imwe mulingile ukufyala abana abenu.”

Pa mbali ya ico, kwaliba imilandu iisuma fye iya kutontonkanyapo. Mu fyalo ifingi ifya mu Afrika, tamwaba ifipani fya buteko ifya kusakamana abakoloci. Ukulingana no mwata, abana e basunga abafyashi babo abakoloci nge fyo abafyashi nabo bene babasungile ilyo bali abaice. E co banyina kwa Fola bapelulwile ukuti nga abana babo tabakwete abana ba kuifyalila, ku ntanshi bakaba abatalalilwa, ababulo kutemwikwa, abapiina, ukwabulo uwa kubashiika nga bafwa.

 Mu Afrika onse, ukukanakwata abana bacimona nge citiipu. Mu ncende shimo, abanakashi balenekelwa no kushininkisha fye ukuti balikwata amaka ya bufyashi ilyo tabalaupwa na kuupwa. Abanakashi abengi abashimita balafwaye imiti iya kwesha ukuposha ubuumba bwabo.

Pa mulandu wa iyi mibele, abaupana abashifwaya ukukwata abana babamona nga baipusula. Balabamona nga bapusanako, abashimwena libela ifintu ifya ku ntanshi kabili abakaililila ubulanda.

Mwalibamo Buseko no Mulimo

Abantu ba kwa Yehova balishibo kuti nangu ca kuti mwaliba ubuseko mu kukusha abana, mwaliba no mulimo. Baibolo, pali 1 Timote 5:8 itila: “Lelo umuntu nga tasunga abantu bakwe, pali bufi aba mu ng’anda yakwe, ninshi nakaana icitetekelo, kabili abo mubi ukucisha uushatetekela.”

Abafyashi balingile ukupayanishisha indupwa shabo lwa ku mubili na lwa ku mupashi, kabili ici cilasenda sana inshita no kubombesha. Abafyashi tabatila apo Lesa eupeela abana, cishalila kuli Lesa ukubasakamana. Balishibo ukuti ukukusha abana ukulingana ne fishinte fya mu Baibolo mulimo wa lyonse uwapeelwa na Lesa ku bafyashi; te mulimo ulingile ukupeelwa kuli bambi iyo.—Amalango 6:6, 7.

Incito ya kukusha abana yalikosa ukucilisha muli shino “nshiku sha kulekelesha . . . ishayafya.” (2 Timote 3:1-5) Pa mbali ya mafya ya ndalama ayalebipilako, kuli ukufula kwa kubulwa bukapepa mu calo ukulundako ku bwafya bwa kukusha abana ilelo. Nalyo line, mwi sonde lyonse, Abena Kristu abengi abaupana balilolenkana no ku kusonsomba kabili balitunguluka bwino bwino mu kukusha abana ba bukapepa “mu kufunda no kukonkomesha kwa kwa Shikulu.” (Abena Efese 6:4) Yehova alitemwa kabili alapaala abafyashi ba musango yu pa kubombesha kwabo.

Umulandu Bamo Bashikwatila Bana

Lelo, Abena Kristu abaupana abengi tabakwata bana. Bamo tabakwata bufyashi lelo tabaya ku kufwayafwaya abana ba kukusha. Abaupana bambi abakwata maka ya bufyashi bapingulapo ukukanakwata abana. Abaupana aba musango yu tabapingulapo ukukanakwata abana pa mulandu wa kusengauke ncito nelyo ukutiina fye ukulolenkana na mafya ya bufyashi. Lelo, bapampamina pa kupoosako amano ku mbali shimbi isha butumikishi ubwa nshita yonse shintu ukukusha abana te kuti kubasuminishe ukubomba. Bamo ni bamishonari. Bambi babombela Yehova mu mulimo wa kwenda nelyo pa Bethel.

Ukupala Abena Kristu bonse, baishibo kuti kuli mulimo uwe pamfya uulingile ukubombwa. Yesu atile: “Imbila nsuma iyi ya bufumu ikabilwa ku fyalo fyonse ku kubo bunte ku nko shonse; e lyo impela ikesa.” Uyu mulimo ulebombwa ilelo. Uli mulimo uwacindama, apo “impela” ikonaula abo bonse abashikutika ku mbila nsuma.—Mateo 24:14; 2 Abena Tesalonika 1:7, 8.

Inshita shesu shili shipalene ku nshita lintu Noa no lupwa lwakwe bakuulile icibwato icababakile mu Lyeshi likalamba. (Ukutendeka 6:13-16; Mateo 24:37) Nangu ca kuti abana baume batatu aba kwa Noa balyupile, tabafyele abana ukufikila Ilyeshi lyapwa. Umulandu umo uwa kucitile co napamo wali wa kuti aba baupana balefwaya ukupoosa amano na maka ku mulimo untu bapeelwe. Umulandu na umbi nalimo wali wa kukanafwaya ukukusha abana mu calo cabipa kabili ica lukaakala ‘umwafulile ububi bwa bantu no kulinga konse kwa matontonkanyo ya mitima yabo kwabipile fye inshiku shonse.’—Ukutendeka 6:5.

Nangu ca kuti ici tacalola mu kuti calilubana ukukwata abana ilelo, Abena Kristu abaupana abengi ico bashifwaila kukwata bana ni mu kuti bengabombako na maka yonse umulimo we pamfya untu Yehova apeela abantu bakwe ukubomba. Abaupana bamo balipembelelako inshita inono ilyo bashilakwata abana; bambi bapingulapo ukwikala ukwabula abana kabili batontonkanya pa lwa kwisakusha abana mu calo cipya icalungama ica kwa Yehova. Bushe iyi mimwene ya cimpelesha? Bushe balaipusula mu mikalile? Bushe bambi bafwile ukulililwa ubulanda?

 Imikalile Yacingililwa Kabili Iya Buseko

Dele na Fola, abalumbwilwe pa kwiswila, nomba baupana pa myaka ukucila 10, kabili bapampamina ukutwalilila ukwikala ukwabula abana. Dele atila: “Balupwa bacili balatupatikisha ukuti tukwate abana. Icibasakamika nga nshi ni fintu tukekala ku ntanshi. Lyonse tulatasha pa kwangwako kwabo, lelo tulabalondolwela mu kucenjela ukuti twaliba aba nsansa nga nshi mu co tucita. Pa lwa ba kutusakamana ku ntanshi, tulabeba ukuti ukucetekela kwesu kwaba muli Yehova, uwangwa ukusakamana bonse abatwalilila mu citetekelo kabili aba cishinka kuli wene. Kabili tulabalondolwela ukuti ukukwata abana tacaba bushininkisho bwa kuti abana bakesasakamana abafyashi babo mu bukote. Abantu bamo balasakamana abafyashi babo panono, bambi balafilwo kubasakamana, bambi ebabalilapo kufwa pa bafyashi babo. Lelo, inshita yesu iya ku ntanshi yalibe yashininkishiwa kuli Yehova.”

Dele na bambi ukupala wene balicetekela ubulayo ubo Yehova alaya babomfi bakwe aba busumino ubwa kuti: “Nshakakupoose nakalya, nangu kukusha nakalya.” (AbaHebere 13:5) Kabili balisumina ukuti “ukuboko kwa kwa Yehova takwaipipa ku kupususha, kabili ukutwi kwakwe takwakoma ku kuumfwa.”—Esaya 59:1.

Umulandu na umbi wa kucetekela waba mu kumona fintu Yehova atungilila ababomfi bakwe aba busumino. Imfumu Davidi yalembele ukuti: “Nali umwaice, nomba ninkota; lelo nshamona uwalungama nalekeleshiwa.” Tontonkanyeni pali ci. Bushe mwalishibapo ulwa mubomfi wa kwa Yehova uwa busumino ‘uwalekeleshiwa’?—Amalumbo 37:25.

Ababomfya ubumi bwabo mu kubombela Yehova na Bena Kristu banabo balayumfwa abaikushiwa mu bumi ukucila ukulolesha ku numa no kuliliishika. Munyina Iro Umah aba mu mulimo wa nshita yonse pa myaka 45 kabili pali nomba ni kangalila wenda mu Nigeria. Atile: “Nangu ca kuti ine na bena mwandi tatwakwata bana, tulebukisha ukuti Yehova lyonse alatusakamana lwa ku mupashi na lwa ku mubili. Tatubulisha icili conse. Takatulekeleshe nga twakota. Imyaka iyi twabomfya mu mulimo wa nshita yonse yaba e myaka twaba ne nsansa sana mu mikalile yesu. Tulatasha pa kubombela bamunyina, kabili bamunyinefwe balatasha umulimo wesu, no kutwafwilisha.”

Nangu ca kuti abaupana abengi tabafyala abana abali bonse, balifyala abana aba musango uwapusanako: Abasambi ba Bwina Kristu abapepa Yehova. Umutumwa Yohane ali mupepi ne myaka ya bukulu 100 ilyo alembele ukuti: “Nshikwete ukusekelela ukwacisha pali uku, pa kuumfwe fyo abana bandi baleenda mu Cine.” (3 Yohane 4) Ubusumino bwa “bana” ba kwa Yohane—abo asambilishe “Cine”—bwamuletele ubuseko apakalamba.

Ubuseko bumo bwine bulasangwa ilelo. BaBernice, abena Nigeria, balyupwa pa myaka 19 kabili balisalapo ukwikala ukwabula abana. Mu myaka 14 iyapita, balibomba bupainiya. Ilintu balepalamina imyaka ya bukulu ilyo bashakabe na maka ya kufyala abana, tabayumfwa aba bulanda pa lwa kubomfya ubumi bwabo mu mulimo wa kupanga abasambi. Batila: “Ndasekelela pa kumona abana bandi aba ku mupashi uko balekula. Nangu nga nalikwete abana bandi, ndatwishika nga kuti bapalamina kuli ine ukucila pa bantu nayafwilisha ukusambilile cine. Bansunga kwati ni nyinabo uwa kubafyala, balalanshanya na ine ifyo baipakisha na mafya yabo no kwipusha ukuti mbapandeko amano. Balanembela amakalata, kabili tulapempushanya.

“Bamo bamona ukukanakwata abana ba kuifyalila kwati citiipu. Basosa abati ukesacuula nga wakota. Lelo ine te fyo ncimona. Nalishibo kuti kulila fye ndebombela Yehova no mweo onse, akanambula no kunsakamana. Takamfwintule iyo nga nakota.”

Abatemwikwa Kabili aba Mutengo Kuli Lesa

Abafyala no kukusha abana ‘abendela mu cine’ baba ne fingi ifya kutasha. E mulandu wine Baibolo itila: “Pantu ukwanga kuti ayanga wishi wa mulungami, no wafyalo wa mano kuti asamwa kuli wene. Leka wiso asamwe, leka aange uwakufyele.”—Amapinda 23:24, 25.

Abena Kristu abashabala abakwatapo ubuseko bwa kukusha abana mu calo balipaalwa mu  nshila shimbi. Ubwingi ubwa aba baupana balibomba ulubali lwakatama ulwa kutwala pa ntanshi ifya Bufumu mu nshila yakulilako. Mu kupita kwa nshita, balanonka ukubelesha, amano, no kukampuka ifibalenga ukusangwilako sana ku mulimo wa Bufumu. Ubwingi bwabo baba pa ntanshi muli uyu mulimo.

Nangu ca kuti tabakwata abana pa mulandu wa fya Bufumu, Yehova alibapaala ukupitila mu kubapa ulupwa lwa ku mupashi ulwa batemwa no kutesekesha nga nshi ifyo baipusula. Cili kwati fintu Yesu atile: “Takuli nangu umo uwashile ku mwabo, nangu ni bamunyina, nangu ni nkashi, nangu ni nyina, nangu ni wishi, nangu bana, nangu filime, pa mulandu wa ine na pa mulandu wa mbila nsuma, uushakapokelele nomba mu nshita ino ifya miku umwanda umo, amayanda, na bamunyina, ne nkashi, na banyina, na bana, ne filime . . . na mu bwikashi ubukesa umweo wa muyayaya.”—Marko 10:29, 30.

Mwandi bonse aba busumino baba aba mutengo kuli Yehova! Aba cishinka aba musango yu, bonse abakwata abana na bashakwata, balaiwa ku mutumwa Paulo ukuti: “Pantu Lesa tali uushalungama; takalabe umulimo wenu, no kutemwa uko mwalangile kwi shina lyakwe, apo mwalepyungila aba mushilo, kabili mucili mulebapyungila.”—AbaHebere 6:10.

[Futunoti]

[Ifikope pe bula 23]

Abaupana abashakwata bana balipaalwa ukupitila mu kukwata ulupwa lwa ku mupashi ulwa citemwishi