Ukulambulwa pa Kusapika pa Nshita Ntali

“YEHOVA? Bushe Yehova nani?” Silvia uwa myaka 8 amwene ili shina mu Baibolo ya cina Armenia, uyu Baibolo uwali cuma ca lupwa ico umukashana umbi amulangile. Alipwishe mu Yerevan monse umo aleikala ku Armenia, bonse balifililwe ukumweba untu Yehova aba. Abafyashi na bakafundisha bakwe, na bashimapepo be calici lya ku mwabo na bo balifililwe ukumweba.

Silvia alikulile, apwisha isukulu, kabili aingila ne ncito, nalyo line ali talamwishiba Yehova. Ilyo ali umukashana, alifulumwike ukufuma ku Armenia, kabili pa numa aishile mu Poland, umo aleikala mu kamuputule kanono ne mbutushi shimbi. Umo pa bo aleikala na bo mu muputule alepokelela abeni cila nshita. Silvia aipwishe ati, “Bushe abeni bobe ni bani?” Amwaswike ati, “Ni Nte sha kwa Yehova abesa mu kunsambilisha Baibolo.”

Umutima wa kwa Silvia walicilimwike ilyo aumfwile ishina lya kuti Yehova. Kuli pele pele, atendeke ukusambilila untu Yehova aba na fintu aba Lesa wa kutemwa. Lelo, tapapitile na nshita alifumineko ku Poland. Aileuba ku Denmark, bushilya bwa Bemba wa Baltic. Asendele fye ifikwatwa ifinono, lelo pali ifyo fikwatwa pali impapulo sha Baibolo ishasabankanishiwa ne Nte sha kwa Yehova. Silvia asangile umutande wa maadresi ya maofeshi yanono aya Watch Tower Society pe bula lya kulekelesha ilya lupapulo lumo. Ico cali cimo ica fikwatwa fyacindama akwete, e nshila fye ali no kwishibilamo Yehova!

Mu Denmark, Silvia bamutwele ku nkambi ya mbutushi, kabili apo pene fye atendeke ukufwaya Inte sha kwa Yehova. Ukulingana no mutande wa maadresi akwete, alishibe ukuti amaofeshi yanono aya Watch Tower Society mu Denmark yabela mwi tauni lya Holbæk. Lelo, bushe ni kwi ili tauni lyabelele? Silvia bamukuushishe mwi shitima ukuya ku nkambi imbi, kabili ilyo aleya kulya, ishitima lyapitile mu Holbæk! Na kabili umutima wakwe walicilimwike.

Ilyo afikile fye, bushiku bumo mu kasuba kalotoka, aninine ishitima no kubwelela ku Holbæk kabili alyendele ukufuma pa citesheni ukuya ku maofeshi yanono aya Watch Tower Society. Ebukisha ukuti: “Ilyo naingile mu lubansa lwa maluba ne cani, naikele pa cipuna no kuisosha nati, ‘Iyi ni paradise.’” Alipokelelwe fye bwino pa maofeshi ya Watch Tower Society na kuli pele pele nomba kuti atendeka ukusambilila Baibolo na o.

Lelo alitwalilile ukukuuka. Ku nkambi sha mbutushi konse uko alekuukila alefwayafwaya Inte sha kwa Yehova no kulatendeka cipya cipya ukusambilila Baibolo libili libili. Nangu cibe fyo, pa numa ya myaka ibili, asambilile ifyalinga ukuti apeele ubumi bwakwe kuli Yehova. Alibatishiwe kabili tapapitile na nshita aishiletendeka ubutumikishi bwa nshita yonse. Mu 1998, abalashi ba mu Denmark bamusuminishe ukuuba muli cilya calo.

Silvia nomba ali ne myaka 26 kabili abomba pa cifulo cimwibukisha pa lwa paradise, pa maofeshi yanono aya Nte sha kwa Yehova mu Denmark. Nomba atila: “Finshi ningasosa? Nalesapika Yehova ukufuma fye ilyo nali umwaice. Nomba nalimusanga. Ico nalefwaisha kumubombela umweo wandi onse, na cine ndi pano pa Bethel. Ndapepa ukuti nkatwalilila ukwikala pano pene ukufikila imfwa yandi.”