Ilyashi lya Bakabilisha ba Bufumu

Ukutapilila Imbuto sha Cine mu Chile

MU CISWEBEBE ca ku kapinda ka ku kuso aka Chile, limo palapita imyaka iingi pa kuti imfula iloke. Lelo nga yaloboka, umushili wauma, uwa nsakalabwe ulakupwa na maluba yabalabata. Uku kumoneka kwayemba kulacebusha abatandashi abafuma muli ci calo conse.

Lelo icintu cimo, icisuma nga nshi cilecitika ku bena Chile. Amenshi ya cine ca Baibolo yalekonkolokela mu mbali shonse isha ici calo, kabili abengi abafumaluka “balebalula” no kuba abasambi ba kwa Yesu Kristu. Inshila imo iilebomfiwa pa kutapilila ishi mbuto sha ku mupashi ni foni. Ifya kukumanya fyakonkapo filelangilila ifintu ifishaiwamina ifilepwishishiwa ne yi nshila ya kushimikililamo.

• Karina, kabila wa nshita yonse alipushiwe ukulangilila pa kulongana kwa muputule ifyo engashimikila pa foni. Lelo, Karina, tabalile ashimikilako pa foni. Pa kumukoselesha ukulangilila ici pa kulongana, eluda pamo no mwina mwakwe balanshenye na Karina ifyebo fimo pa lwa kushimikila pa foni. Bamukonkomeshe no kupepela ubutungulushi bwa kwa Yehova pali uyu mulandu. Alicitile fyo na kuli pele pele apingwilepo ukutuma foni.

Karina asalile inambala ya foni iya mu mushi wa mupepi. Uubombela apafikila amafoni alyaswike, na Karina alondolwele umulandu atumiine foni. Uubombela apafikila amafoni alyankwileko bwino, kabili balipekenye ukuti bakalanshanye na kabili pa numa ya nshiku shitatu. Icipempu ca kubwelelamo pa foni, calengele batendeke isambililo lya Baibolo, ukubomfya broshuwa wa kuti Cinshi Cintu Lesa Afwaya Kuli Ifwe? Ukutule lyo, balaipakisha isambililo lya Baibolo ilya kucincimusha, kabili Karina alatumina uyu mwanakashi impapulo sha kwasuka ifipusho fyakwe.

• Bernarda aliitendekeleko ukushimikila ku mwaume uwalefwaya ukutumina umuntu umbi foni lelo yafikilile kuli wene. Bernarda takalipe iyo, ukucila ailondolwele ukuti ali ni Nte ya kwa Yehova kabili aipwishe ulya muntu nga engatemwa ukumwafwilishako. Batendeke ukulanshanya, kabili umwaume alekutikisha ilyo alelondolola ukuti Ubufumu bwa kwa Lesa bwalaswa bufumyepo ulufyengo. Umwaume apeele Bernarda inambala ya foni wakwe, kabili acitile ifipempu fya kubwelelamo pa foni. Pa nshita imo ilyo balelanshanya, amubelengeeleko icitabo ca Ukwishiba Uko Kutungulula ku Mweo wa Muyayaya. Umwaume amwipwishe ifyo engasanga cilya citabo, kabili Bernarda alimutumiine ici citabo pamo na Baibolo. Kwali amapekanyo ya kuti munyina wa kuli ilya ncende akayemutandalila, uyo pali nomba atwalilila “ukutapilila” ici “cimenwa” ciletemfuma.

Ca cine, mu mushili wauma lwa ku mupashi uwa ici calo, imbuto shishilapuuka shilelolela ukupuuka nga shatapililwa na menshi ya cine ayapeela umweo. Abengi nga nshi ababa ne cilaka baletwalilila ‘ukumena’ no “kubalula” ukufika ku kuba ababomfi ba busumino aba kwa Yehova Lesa.—Esaya 44:3, 4.