Ubumi Bwabo

Yehova Lyonse Alalambula Aba Bucishinka Bakwe

NGA FINTU CASHIMIKWA NA BA VERNON DUNCOMBE

Napwishishe fye ukulya utwa kulya mu nshita ya cungulo bushiku no kusonteka umushanga wa fwaka nga fintu nalecita lyonse. Lyene naipwishe Aileen, umwina mwandi ukuti: “Bushe finshi fyacibako ku kulongana cino cungulo bushiku?”

ATALILE akutumana cinono e lyo ayasuka ati: “Kwaciba ukubelenga kalata no kwita amashina ya basontelwe, pabo bacilumbula ne shina lyenu epo lyaciba. Muli no kulasakamana ifisoselo. Amashiwi ya kulekelesha muli kalata yacitila: ‘Nga ca kutila pali aba bamunyina basontwa pali na bapeepa fwaka, balingile ukulembela Sosaite ukuti tabalingile ukubomba uyo mulimo.’” * Pa numa ya kwishe cefu nalandile mwi shiwi lyakosa ukuti, “Ci-ii-su-ma! Kanshi e fyaciba muli kalata!”

Nasumenye ameno no kushonaula umushanga mu ka kushonawilapo. “Nshaishibe no mulandu nasontelwe ukubomba uyu mulimo. Lelo nshabalankanapo umulimo nelyo umo, kabili nshitontonkanyapo no kukaana.” Napingwilepo ukuti nshakabale mpeepa fwaka na kabili. Kulya kupingulapo kwandi kwayalwile nga nshi ubumi bwandi pamo nga Umwina Kristu kabili kemba wa nyimbo. Kamushimikileko fimo ifyalecitika ifyalengele ukuti mpingulepo ukuleka ukupeepa fwaka.

Fintu Twakushiiwe mu Lupwa

Nafyalilwe mu Toronto, Canada, pa September 21, 1914, nine beli uwafyelwe ku bafyashi abatutemenwe kabili abakosa, baVernon na baLila, abakushishe bwino abana baume bane na banakashi babili. Uwankonkele pa numa ni Yorke, e lyo pakonka Orlando, Douglas, Aileen, na Coral. Ilyo nali fye ne myaka 9, bamayo bampeele violin (icilimba) kabili bampekanishishe ukuti ndesambilila ifya kulisha inyimbo pe sukulu baleti Harris School of Music. Imikalile yalikosele, lelo Bamayo na Batata bafwaileko inshila sha kusangilamo indalama sha kwendela ne sha kundipilila  ku sukulu. Kuli pele pele nasambilile amafunde bakonka pa kwimba ne fya kushika inyimbo pa Royal Conservatory of Music mu Toronto, kabili lintu nakwete imyaka 12, naile ku kucimfyanya kwa bakemba bafumine mu musumba onse ukwabelele mu cikuulwa ca Massey Hall, icikuulwa ca lulumbi ico bembilamo inyimbo mu musumba wa Toronto. Nine nacimfishe kabili bampeele violin iyo bafungile mu cibokoshi capangilwe ku mukupo wa ng’wena.

Mu kuya kwa nshita, nasambilile ne fyakulisha piyano na violin wakulisha pa filimba fya violin. Ilingi line bamo pe bumba lyesu baleya mu kulishisha abantu abalekwata amaparte yanono pa nshiku sha pali Cisano na pa Cibelushi mu nshita ya cungulo bushiku, na pa mangalo ya kucinda. Cali ni pa kwangala kumo ukwa musango yu e po namwene Aileen pa muku wa kubalilapo. Lintu nali mu mwaka wa kupwishe sukulu lya ku sekondari, nalishishe ifilimba na bakemba wa nyimbo abengi abafumine mu ncende shapusanapusana mu musumba. Pa numa ya kupwishe sukulu, ibumba lya bakemba ilya Ferde Mowry Orchestra lyanjingishe ncito no kulamfoleshe ndalama ishingi, kabili nshalefwaya ukuleka mpaka mu 1943.

Ukutendeka Ukwishiba Yehova

Abafyashi bandi batendeke ukusambilila icine ca mu Baibolo lintu fye Inkondo ya Calo iya Kubalilapo yali mupepi no kubalamuka, ninshi Batata balebomba umulimo wa kutantika ifya kushitisha mu shitolo linono ilyali mu musumba wa Toronto. Mu muputule baleliila ica kulya ca kasuba, batata balekutika ku fyo abanabo balebomba na bo babili abali Basambi ba Baibolo (nga fintu Inte sha kwa Yehova shaishibikwe pali ilya nshita) balelanshanya, kabili nga babwela ku ng’anda mu nshita ya cungulo baleisa mu kushimikilako Bamayo fintu bomfwile. Ilyo papitile myaka, mu 1927, Abasambi ba Baibolo bakwete ibungano mu Toronto mu cibansa ca mangalo ica Canadian National Exhibition Grounds. Ing’anda yesu, iyabelele lwa ku mwinshi wa ku masamba ya cibansa, yalebomfiwa ku kusendamo abantu 25 abalefuma ku Ohio, U.S.A.

Ukufuma apo, baAda Bletsoe, bamo pa Basambi ba Baibolo, batendeke ukutandalila Bamayo libili libili, no kubashilako impapulo ishipya. Bushiku bumo baebele Bamayo ati: “Bana Duncombe, pakokolako apo natendekela ukumushila impapulo. Bushe mwalitala amubelengapo nelyo fye lumo?” Nangu ca kutila balesunga abana 6, Bamayo ukutule lyo bapingwilepo ukutendeka ukubelenga bamagazini, kabili tabatalile abaleka. Lelo, nshapooseleko sana amano ku mpapulo. Naleesha sana na maka ukuti mpwishe isukulu, kabili natemwishishe sana inyimbo.

Mu June 1935, Aileen na ine twalyupeene mwi calici lya Anglican. Lintu nali ne myaka 13 nalilekele ukuya ku calici lya United Church, kanshi nshakwete uko nalepepa; e co pa kulembesha icupo nalembeshe ukuti ndi Nte ya kwa Yehova, nelyo nshali Inte.

Twalefwaisha ukuti ku nshita ya ku ntanshi tukasunge bwino ulupwa lwesu no kuba abafyashi abasuma. E co, bonse pamo twayambile ukubelenga Icipingo Cipya. Nangu ca kutila yali mapange yasuma twakwete, kwaliko ifintu fimbi ifya tucilingenye. Ilyo papitileko akashita twalyeseshe na kabili lelo twalifililwe. Lyene twapokelele ubupe bwa pa Krisimasi mu 1935 ubwa citabo cintu bafungilishe bwino icaleti The Harp of God. Abakashi bandi batile: “Iye, tatwabala atupokelelapo ubupe bwa musango yu pa Krisimasi ukufuma kuli bamayofyala.” Lelo, lintu naile ku ncito, abakashi bandi batendeke ukubelenga icitabo, kabili balitemenwe ifyo balebelenga. Palipitile inshita ukwabula ukuti njishibe ukuti balebelenga icitabo. Kumfwa fintu twaenekele ukuti ulupwa lwesu lukabe, te fyo lwali. Umwana mwanakashi, twafyele pa February 1, 1937, alifwile ninshi alifye akanya. Twali no bulanda nga nshi!

Pali iyi nshita, ulupwa lwandi lwali ulwapimpa mu kushimikila, kabili nasangile ukuti pali bakasabankanya ba Bufumu bonse mu lupwa lwesu ni Batata fye beka e bashashalike ukulembesha kwa magazini wa Consolation (uwitwa Loleni! pali ndakai). Ukushalika kwa kulembesha magazini kwali e cikongwani ca butumikishi bwa mwi bala muli ulya mweshi. Nangu ca kutila pali ilya nshita nali nshilabelengapo ulupapulo nangu lumo pa mpapulo sha Sosaite, nalyumfwilileko batata ububi e co natile: “Cisuma, Tata, nembesesheni; na imwe mwalaba pali balya bakasabankanya bambi abashalike ukulembesha.” Ulusuba lwalitendeke, kabili ibumba lya bakemba lyafumine mu musumba no kuya mu kulisha ifilimba ku ncende imo ifi uko abantu baleya pa nshita bali pa cuti. Magazini wa Consolation atuminwe mu posti kuntu nali. Ilyo imibundo yatendeke, ibumba lya bakalisha wa filimba lyabwelele ku Toronto. Bamagazini batwalilile ukulaisa uko twakukiile, kabili nshabalile mfumyapo nelyo umo mu mapepala balefungilamo.

Lintu naletuusha pa bushiku bwa Krisimasi, naloleshe pa mwina wa bamagazini kabili natile kwena nalipoosapo indalama pa kuti nkwate aba bamagazini, e co mfwile nabelengapo fye nangu yanono pa  kuti ningamona ifyabamo. Magazini nabalilepo ukwisula yalimpapwishe. Yaletele pa bwelu ubufi bwali mu fya mapolitiki na mafisakanwa yaliko pali ilya nshita. Nayambile ukushimikilako abo twaleimba na bo fintu nalebelenga. Lelo, balisuushishe ukuti ifyo nalebelenga fya bufi, kabili natwalilile ukubelenga pa kuti ningalaipokololako. Ukwabula ukwishiba, natendeke ukushimikila pa lwa kwa Yehova. Kabili ukutula lilya line, nshabala ndeka ukubelenga impapulo sha Baibolo ishishaiwamina ishilembwa no “musha wa cishinka kabili uwashilimuka.”—Mateo 24:45.

Nangu ca kutila mu kati ka mulungu nshalekwata inshita pa mulandu wa ncito, ukwabula ukupoose nshita ine na Aileen twayambile ukusangwa ku kulongana kwa pa Mulungu. Ilyo fye twafikile pa kulongana kwa pa Mulungu kumo mu 1938, bankashi bacikoloci babili baishiletuposha, kabili bamo pali aba batile: “Munyina wacaice, bushe nomba walipingulapo ukuba ku lubali lwa kwa Yehova? Nawishiba, Amargedone ili fye mupepi!” Nalishibe ukuti Yehova e Lesa fye eka uwa cine, kabili nalishininwe ukuti uku e kuteyanya kwakwe. Nalefwaya ukuba mu kuteyanya, e co pa October 15, 1938, nalibatishiwe. Aileen abatishiwe pa numa ya myeshi nalimo mutanda. Ndi uwa nsansa ukusosa ukuti bonse mu lupwa lwandi basangwike ababomfi baipeela kuli Yehova.

Mwandi naliipakishe nga nshi ukubishanya na bantu ba kwa Lesa! Mu kwangufyanya, nabeleshenye na bo. Nga nshile ku kulongana, lyonse nalefwaisha ukwishiba ifyo ukulongana kwaciba. Cilya cungulo bushiku numbwile pa kubala cali e bushiku nayalwile ubumi bwandi apakalamba ukutendeka ukubombela Yehova.

Inshita ya Kwaluka Kwesu Ukukalamba

Ukwaluka kwesu ukukalamba kumbi kwacitike pa May 1, 1943. Twalisangilwe kwi bungano likalamba pa muku wa kubalilapo, mu September 1942 ilyakwete umutwe waleti New World Theocratic Assembly mu Cleveland, Ohio. Lilya line kwali inkondo ya cipesha mano, iyalemoneka nge ishakapwe, e lyo twaumfwile Munyina Knorr, uwali pali ilya nshita presidenti wa Watch Tower Society, mu kushipa alanda ilyashi lya cintubwingi ilyaleti, “Bushe Umutende Kuti Watwalilila?” Tulebukisha bwino bwino ifyo alondolwele icipandwa ca Ukusokolola 17, atile pa numa ya nkondo kukaba inshita ya mutende umo umulimo ushaikulila uwa kushimikila ukapwishishiwa.

Ilyashi lya kubalilapo lintu Munyina Knorr alandile e lyatukumine sana, lyaleti “Yefta no Mulapo Wakwe.” Ukufuma apo kwali ukwipusha abalefwaya ukuba bapainiya! Aileen na ine twaloleshenye no kulanda mu mutima umo (bonse pamo na bambi abaliko) ukutila: “Ni fwe!” Apo pene twayambile ukupanga amapange ya kwalukila ku kucito mulimo wacindamisha.

Ukubinda umulimo wa Nte sha kwa Yehova kwalitwalilile mu Canada ukutula pa July 4, 1940. Ilyo twayambile bupainiya pa May 1, 1943, ukushimikila pa lwa kwa Yehova no kushalika impapulo sha Sosaite mu mulimo wa mwi bala kwalibindilwe. Pa kubomba umulimo wa Bwina Kristu, twalesenda fye amakope yesu aya Baibolo wa King James Version. Inshiku shinono fye pa numa ya kufika uko twaile mu kubombela umulimo wesu uwa bupainiya umuku wa kubalilapo mu musumba wa Parry Sound, mu Ontario, iofeshi lya Sosaite lyatutumine Stewart Mann, uwali ni painiya wabelesha ukwisabomba na ifwe mwi bala. Mwandi kupayanya kwa kutemwa! Munyina Mann ali ne mibele iisuma kabili uumwentula ukwabula ukupatikishiwa. Twalisambilile ifingi kuli wene kabili twaliipakishe ukuba nankwe. Twaletungulula amasambililo ya Baibolo ayengi ilyo Sosaite yatutumine ku musumba umbi uwa Hamilton. Ukufuma apo tapakokwele, banembele ubushilika nangu ca kuti umushinku wandi walicilile pa mushinku wa kubo mushilika. Lintu nakeene ukwingila ubushilika balinjikete pa December 31, 1943. Pa numa ya kutwalwa mu filye, bampingwile ukuya ku kamba kambi umwali abashilika bashaleikata ifyanso, emo naikele mpaka na mu August 1945.

Ilyo bandekeleko fye ine na Aileen twapokelele umulimo wa bupainiya uwatulengele no kuti tuye ku  Cornwall, mu Ontario. Tapakokwele, kabili twaile ku Quebec mu kubomba umulimo waibela ukufuma ku ciputulwa ca Legal Department ica Sosaite icakumine imibombele ya bakapokola. Ifi fyonse fyalecitika lintu kwali imitekele ya baDuplessis mu Quebec ilyo ukupakasa Inte sha kwa Yehova kwacilile mu cipimo. Nalepoosa inshiku ishingi cila mulungu, ukuya ku filye 4 mu kwafwilisha bamunyina. Ilya yali ni nshita ya kucincimusha kabili iya kukosha icitetekelo.

Pa numa ye bungano lya mu 1946 ilyabelele mu Cleveland, twaletumwa mu mulimo wa muputule no wa citungu ne ci calengele ine no mukashi wandi ukubombela mu fyabu fyapusanapusana mu Canada. Ifintu fyalecitika lubilo lubilo. Mu 1948 balitwitile ukuyasangwa mwi kalasi lyalenga 11 ilye Sukulu lya Baibolo Ilya Gileadi ilya Watchtower. Munyina Albert Schroeder na Maxwell Friend e bali bakafundisha wesu, kabili mwi kalasi lyesu umwali abasambi 108 mwasanshishe na basubwa 40. Apo mwali ababomfi ba kwa Yehova ababombele pa myaka iingi, kwali ukunonkelamo no kumwenamo nga nshi!

Bushiku bumo Munyina Knorr ukufuma ku Brooklyn alitutandalile. Mu lyashi lyakwe, aipwisheko abengaitemenwa 25 ukusambilila ululimi lwa bena Japan. Bonse 108 balitemenwe ukusambilila! Cashaliile kuli presidenti ukusalamo abakusambilishiwa. Ndemona ni Yehova watungulwile kulya kusala pantu fyonse fyaendele fye bwino. Abengi pali balya 25 abasalilwe no kutumwa ku Japan mu kutendeka umulimo na lelo line e ko bali no mulimo wa bo—te mulandu no kuba abakoloci, bacili kulya kwine. Bamo, pamo nga Lloyd na Melba Barry, balituminwe ukuyabombela kumbi. Lloyd ali mwi Bumba Litungulula ukufika na lintu afwile uyu mwaka wapwile. Tulesekelela capamo na bo pa mulandu wa cilambu ico Yehova atupeela.

Ubushiku bwa kupwishe sukulu, batutumine ku Jamaica. Lelo, apo kwali imilandu yalekabilwa ukulubulula mu Quebec, batwebele ukubwelela ku Canada.

Ukwimba na Kumbi!

Nelyo ca kutila umulimo wa bupainiya wanengele ukuleka ukwimba, camoneke kwati nshalekele kwimba. Umwaka wakonkelepo presidenti wa Sosaite, Nathan Knorr, na kalemba wakwe, Milton Henschel, baishile ku cibansa ca Maple Leaf Gardens mu Toronto. Ilyashi lyalandile munyina Knorr ilya cintubwingi ilyaleti “It is Later Than You Think!” lyalitukoseshe bonse. Uyu wali e muku wakubalilapo ukunjeba ukutungulula bakemba wa nyimbo pe bungano. Twashikile inyimbo ishaishibikwe ukufuma mu Citabo ca Nyimbo sha Mulimo wa Bufumu ica mu (1944). Kwena calemoneka ukuti bamunyina balitemenwe shilya nyimbo. Ilyo programu yapwile mu nshita ya kasuba pa Cibelushi, twalipitulwike mu nyimbo shali no kwimbwa pa Mulungu. Namwene Munyina Henschel alalanya pa kati ka cipaka ukulungama uko twali, kabili naimike abo twalelisha na bo pa kuti nje mukumanye. Anjipwishe ukuti, “Muli na bakemba banga mwi bumba lyobe abaleimba pano?” Nayaswike ukuti, “bonse nga epo tuli, tulafika mu ma 35.” Atile, “Cisuma, muli no kufulilako imiku ibili nga mwaya ku New York mu lusuba luleisa.”

Lelo, lintu lulya lusuba lushilafika, balinjitile ku Brooklyn. Pa mulandu wa mafya yamo, uyu muku wa kubalilapo nshaile na Aileen. Pali ilya nshita icikuulwa cipya ica 124 Columbia Heights ninshi tacilapwa kukuulwa, e co banangile umwakulaala mu cikuulwa ca kale, mu muputule uunono umwalelaala bamunyina basubwa babili—e kuti Munyina wa cikoloci Payne na Karl Klein, abo nakumenye pa muku wa kubalilapo. Bushe twaletitikana? Ee. Nangu cibe fyo, twalikele fye bwino. Aba bamunyina bacikoloci bali abashishimisha kabili abatekanya. Nalyeseshe ukuiteulula! Lyali lisambililo lishaiwamina ilya fintu umupashi wa kwa Lesa wingapwishishisha. Ukukumana na Munyina Klein no kubombela pamo nankwe fyandetele amapaalo ya musango uyo! Ali ne congwe kabili uwa kwaafwa lyonse. Nalibombele nankwe bwino kabili na ndakai tuletwalilila ukuba ifibusa fyapalamisha ukucila pa myaka 50.

Nali ne shuko lya kwafwilishako ukulisha inyimbo mu cibansa ca Yankee Stadium pa mabungano ya mu 1950, 1953, 1955, na 1958, no kubombela pamo na Al Kavelin imilimo yakumine ukulisha inyimbo mu 1963 pe bungano lyabelele pa Rose Bowl mu Pasadena, ku California. Ilyo kwali ibungano mu 1953 mu cibansa ca Yankee Stadium, kwali programu wa kulisha inyimbo pa Mulungu lintu ilyashi lya cintubwingi lishilatendeka. Erich Frost aitile Edith Shemionik (uwaishileba Weigand), ku kwimba soprano, Shemionik aimbile ulwimbo ashikile ulwaleti “Akuyeni, Mwe Nte!” ninshi ibumba lyesu lilekonkeleshamo ne filimba. Lyene twalitemenwe pa kumfwa amashiwi yalongoloka aya bamunyina na bankashi ba mu Afrika pa muku wa kubalilapo. Twalisangalele ilyo Harry Arnott uwali ni mishonari aletele tepu umusuma ukukutikako uo bakopeelemo inyimbo ukufuma ku Northern Rhodesia (icalo citwa nomba Zambia). Iciunda cakumene icibansa conse.

 Ukukopa Inyimbo Shaba mu Citabo ca Nyimbo ica mu 1966

Bushe muleibukisha icitabo ca nyimbo ica nkupo ya pinki, icaleti “Muleimba no Kuisanshamo Mwe Bene ne Ciunda Cisuma mu Mitima Yenu”? Ilyo caleya cilepwa ukulembwa, Munyina Knorr atile: “Tuli no kukopako shimo. Ndefwaya ukolonganye ibumba linono ilya bakemba, ukuti mubomfye fye ifilimba fya violin ifinono ne fimpeta ifyalinga fye. Nshilefwaya nelyo umo ‘ukulisha ipenga lyakwe’!” Ing’anda ya Bufumu iya pa Bethel e mo tukakopela inyimbo, lelo twali abasakamana pa lwa kubomfye Ng’anda ya Bufumu. Twali no kucita shani ku ciunda caleumfwikila mu fibumba ifishafimbwako kantu, na pa nshi apali fye amatailoshi, ne mipando yapangwa ne fyela? Nani wali no kutwaafwa mu kupwisho bwafya bwa ciunda cibi? Umo atile: “Tommy Mitchell! Uubomba pa mulabasa wa ABC Network Studios.” Twalanshenye na Munyina Mitchell, nao alitemenwe ukutwaafwa.

Ubushiku bwa kubalilapo ukukopa ubwa pa Cibelushi bwalifikile, kabili ilyo balelangisha bakemba, munyina umo ali ne cibokoshi umwali trombone (umusango we penga). Naibukishe fintu Munyina Knorr atusokele ukuti: “Nshilefwaya uuli onse ‘ukulisha ipenga lyakwe’!” Nomba, nali no kucita cinshi? Naloleshe fye kuntu munyina alefumya trombone yakwe mu cibokoshi, akwikako no mupaipi wa iko uwaongama, no kwamba ukulisha pa kuti amone nga cilelila bwino. Uyu munyina ishina lyakwe ni Tom Mitchell, kabili fintu alishisheko panono fyaliweme. Imilishishe yakwe yalengele trombone ukumfwika kwati ni violin! Natontonkenye ukuti, ‘uyu munyina atwalilile ukulisha!’ Munyina Knorr na o taakene.

Muli lilya ibumba lya bakemba twakwete, mwali bakemba abasuma abali ni bamunyina na bankashi abakwete ukutemwa. Tamwali abalekuntukilwa bwangu! Umulimo wa kukope nyimbo walikosele, lelo takwali uwaleilishanya. Ilyo umulimo wa kukope nyimbo wapwile, kwali ukulila pa mulandu wa kuti twali no kulekana; kabili ababombeleko uyu mulimo na ndakai line bacili fibusa fine fine. Bonse twaliipakishe uyu umulimo, kabili tulatasha kuli Yehova, pa kuupwisha.

Ukubombe Milimo na Imbi iya Kulambula

Pa numa ya kubombe myaka iingi, nalitwalilila ukuipakisha ubutumikishi bwa nshita yonse. Nalibomba mu muputule na mu citungu pa myaka 28—kabili naliipakishe ukubombe yi milimo yonse. Pakonkele ne myaka 5 iya kusunga Iciyanda ca Kulonganinamo icitwa Norval Assembly Hall mu Ontario. Pa mulandu wa kulongana kwa muputule no kwa citungu ukwalebela mu ndimi sha cilendo, Aileen na ine twaleba abapamfiwa. Mu 1979 na 1980, bakashila wa ng’anda kumo ne ncenshi mu fya makuule babomfeshe ifisolobelo fya pa Ciyanda ca Kulonganinamo ilyo baleshila iofeshi lya Sosaite ilyali no kukuulwa ku ntanshi pa lupili lwa Halton Hills. Pa numa ya kupwisho mulimo wesu uwa kusunga Iciyanda ca Kulonganinamo, batupeele umulimo umbi uwalengele no kuti tubwelele mu kwimbe nyimbo ku Brooklyn, ukutula mu 1982 ukufika mu 1984.

Abakashi bandi natemenwe nga nshi bafwile pa June 17, 1994, pa numa fye ya nshiku 7 ukufuma apo imyaka 59 yakumanine ukutula apo twacitile ubwinga. Twabombele na bakashi imyaka 51 mu mulimo wa bupainiya.

Ilyo mpituluka muli fyonse ifyo napitamo, ndebukisha ukuti Baibolo yaba ca kutungulula caumo mutengo. Limo limo, ndabomfya Baibolo wa kwa Aileen no kusansamushiwa lintu nalolesha pa fya mufikile pa mutima—e kuti ifikomo fyonse, umutande wa mashiwi ya kulungatika, na mashiwi yamo ayo ashililepo. Filya fine cali kuli Aileen, na ine wine nalikwatako amalembo yamo ayaba no bupilibulo bwaibela. Ifyebo fimo fintu fyaba pa Amalumbo 137, apasangwa ipepo lishaiwamina kuli Yehova ilya kuti: “Nga nalaba iwe, we Yerusalemu, shi nikabala lisha nsango na kabili! Shi nikabala imba na kabili nga nshibukiishe iwe, nga nshitontonkenye ukuti niwe kusekelela kwandi ukwapulamo!” (Amalumbo 137:5, 6, muli Baibolo wa Today’s English Version) Nangu line nalitemwa inyimbo, ukusekelela kwandi ukwapulamo kwaba mu kubombela Yehova na bucishinka, uwanambula ubumi busuma kabili ubwa kwikusha.

[Futunoti]

[Icikope pe bula 28]

Ndi na Aileen mu 1947

[Icikope pe bula 30]

Pa nshita ya kukopa inyimbo ukwa kubalilapo