Icalo Umushaba Ukupelelwa Cili Mupepi

IMIKALILE ileya ilekoselako fye, kabili ifilenga ukupelelwa fingi. Ilyo twakalifiwa, napamo kuti catukosela ukulama inkuntu shesu. Pantu na bantu fye abatemwa umweo kuti baba ababulwe nsansa icine cine! Moneni ifi fya kumwenako finono.

Kale sana, kasesema Mose afuupwilwe cibi ica kuti aebele Lesa ati: “Shi munjipaye no kwipaya, nga namono kusenaminwa mu menso yenu; mwileka mone ububi ubwalamponena.” (Impendwa 11:15) Ilyo alefulumuka abalwani bakwe, kasesema Eliya alilishike ati: “Epela; nomba, mwe Yehova, buuleni umweo wandi.” (1 Ishamfumu 19:4) Na kasesema Yona atile: “Mwe Yehova, shi mpokeni umweo; pantu cang’wamino kufwa ukucilo kuba no mweo.” (Yona 4:3) Nangu cali fyo Mose, Eliya, na Yona tabaipeye. Balishibe ifunde lya kwa Lesa ilitila: “Wilatala misoka.” (Ukufuma 20:13) Pa kuba ne citetekelo cakosa muli Lesa, balishibe ukuti lyonse isubilo lilabapo te mulandu ne cabaponena balishibe no kuti umweo bupe bwafuma kuli Lesa.

Ni shani pa lwa mafya tulekwata lelo? Ukusansha pa mafya ya mu nkuntu nelyo amalwele, inshita shimo shimo kuti twacushiwa ku lupwa, abena mupalamano, nelyo ku bantu tubomba nabo. Baibolo ilalandapo pa lwa bantu abaisulamo  “ukuulungana konse, ubucende, ububifi, ulwinso, abafula akafindwe, imisoka, ifikansa, ukufutika, umufulo; abasoso lwambo, aba miponto, abapata Lesa, aba misuula, aba miiya, aba mataki, abelenganye fibi, abashumfwa ku bafyashi, abatumpa, abashifisha amalayano, abaumalala, abashaba na luse.” (Abena Roma 1:28-31) Ukwikala na bantu ba musango yo cila bushiku kuti kwalenga ubumi ukumoneka nge cisendo. Kuti twayafwa shani abalekabila icisansamushi no kwilululwa?

Ukuitemenwa Ukukutika

Ubulanda no kucula kuti fyalenga umuntu ukufulunganishiwa. Umuntu wa mano atile: “Ulumanimani lulengo wa mano ukubo watumpa.” (Lukala Milandu 7:7) Kanshi uulelanda pa lwa kuipaya tufwile ukumumona nga uushilesekesha fye. Amafya akwete, nampo nga ya mu nkuntu, atemwa malwele, nangu ya mu muntontonkanya, nelyo ya ku mupashi, kuti yakabila ukubombelwapo ilyo line fye. Kwena, imyundapile ya baishiba ukundapa ilapusanapusana, kabili cila muntu afwile ukuipingwila umwine umusango wa kundapilwamo alefwaya.—Abena Galatia 6:5.

Te mulandu ne cilelenga umuntu ukuti afwaye ukuipaya, ukukwata umuntu uwiluka, uwa cililishi, kabili uwatekanya uwa kwebako ifili ku mutima kuti kwapususha umweo. Aba mu lupwa ne fibusa abali abaitemenwa ukukutika napamo kuti bayafwa. Ukulunda pa kuba ne cililishi no luse, ifyebo fya kukuulilila ukufuma mu Cebo ca kwa Lesa kuti fyayafwa sana abapelelwa.

Ukwafwa kwa ku Mupashi ku Bapopomenwa

Kuti mwapapa ifyo ukubelenga Baibolo kwingaba ukwa kukoselesha. Nangu ca kuti te citabo ca fya muntontonkanya, Baibolo kuti yatwafwa ukucindika umweo. Imfumu Solomone yatile: “Ninjishibo kuti takuli cisuma kuli bene, kano ukusamwa no kucite cisuma mu nshita ya myeo yabo. Kabili ukuti umuntu onse alye, no kunwa, no kumone cisuma mu kucucutika kwakwe konse, e ca bupe ca kwa Lesa.” (Lukala Milandu 3:12, 13) Ukulunda pa ncito iilenga ubumi ukuba ubusuma, ifintu fishayafya ukusanga pamo nga ka mwela katalala, ulubuuto lwa kasuba, amaluba, ifimuti, ne fyuni, fyaba bupe Lesa atupeela ifyo twingaipakisha.

Icacilapo no kukoselesha bulayo bwa mu Baibolo ubwa kuti Yehova Lesa no Mwana wakwe, Yesu Kristu, balatusakamana. (Yohane 3:16; 1 Petro 5:6, 7) E mulandu wine, kemba wa malumbo atilile: “Abe uwacindikwa Shikulu, Lesa ipusukilo lyesu! ubushiku no bushiku atusenda.” (Amalumbo 68:19) Nangu ca kuti tuleimona abashacindama kabili abashalinga, Lesa alafwaya ukuti twapepa kuli wene. Ishibeni ukuti uwaicefya kabili uulelomba ubwafwilisho mu bufumacumi takasuulwe iyo.

Takuli nangu umo uwingenekela ukwikala ukwabula amafya pali lelo. (Yobo 14:1) Lelo, icine ca mu Cebo ca kwa Lesa calilanga abengi ukuti ukuipaya te nshila yalungama iya kupwishishamo amafya yabo. Taleni tontonkanyeni ifyo umutumwa Paulo ayafwilishe kalinda wa cifungo uyo uwapelelelwe “pa kushibuka mu tulo, no kumono kuti ku miinshi ya cifungo nakwisuka, asomwene ulupanga ati njiipaye, pa kutila nabafyuka abafungwa.” Muli iyo ine fye inshita, ulya kalinda wa cifungo apingwilepo ati ukuipaya kwawama ukucila ukufwa imfwa ya museebanya napamo iya kucululusha pa kwipaya pa mulandu wa kufilwa kwakwe. Umutumwa Paulo abilishe ati: “Wiicita cabipa; pantu e mo tuli bonse.” Paulo tapelele fye palya pene. Na kuba, wene na Sila basansamwishe kalinda wa cifungo no kumwasuka icipusho aipwishe icaleti: “Mwe bashikulu, bushe mfwile ukucita shani ukuti mpusuke?” Bamwaswike ati: “Tetekela Shikulu Yesu Kristu, e lyo ukapusuka, iwe na ba mu ng’anda yobe.” Lyene bamushimikile icebo ca kwa Yehova capamo na ba mu ng’anda yakwe, ica kuti “abatishiwe apo pene, wene na bakwe bonse.” Ulya kalinda wa cifungo na ba ng’anda yakwe bonse basekelele cibi no kusanga ukuti kanshi ubumi bwalicindama.—Imilimo 16:27-35.

Pali lelo, fintu cili ica kupembesula ukwishiba ukuti Lesa te ulenga ububifi! Icebo cakwe cisokolola malaika wabipa, ‘uwitwa Kaseebanya kabili Satana,’ ukuti e ‘ulufya bonse abaikala mu calo conse.’ Lelo inshita yakwe ilepwa lubilo lubilo. (Ukusokolola 12:9, 12) Nomba line fye, ukucululuka konse uko Satana ne fibanda fyakwe baletela abantunse fili no kupwishishiwa na Lesa. Lyene  mu calo cipya ica bulungami ico Lesa alaya, akafumyamo fyonse ifilenga ukupelelwa no kuipaya, akafifumishamo umuku wa limo.—2 Petro 3:13.

Icisansamushi ku Bapunda Mutuule

Nangu ni nomba, abapelelwa kuti basanga icisansamushi mu Malembo. (Abena Roma 15:4) Kemba wa malumbo Davidi aimbile ati: “Umutima uwalopota uwafunshika tamwakausuule, mwe Lesa.” (Amalumbo 51:17) Cine cine, twaba ne fya kwesha ifyo tushingaleuka e lyo no kupita mu filengwa no kukanapwililika. Lelo ukulasambilila pa lwa kwishiba kwalungama ukwa kwa Shifwe wa ku muulu uwa cikuuku, uwa kutemwa, kabili uwa congwe kukatulenga ukushininkisha ati twalyuma umutengo mu menso yakwe. Lesa kuti aba Cibusa wesu uwacindamisha kabili Kasambilisha. Nga twaba ifibusa fyapalamisha na Yehova Lesa, takatale atulenge nsoni. Kabumba wesu atila, “Ine ndi Yehova Lesa obe, uukusambilisho kuti ucenjele, uukwensha mu nshila iyo ufwile ukuyamo.”—Esaya 48:17.

Ukushintilila pali Lesa kwalyafwa abengi. Ku ca kumwenako: Ba Mara bali nabanashiwa kale no kupopomenwa kwatwalilila ilyo umwana wabo umwaume afwile mu busanso bwa pa musebo. * Balibensawike kabili baeseshe ukuipaya. Nangu cibe fyo, ndakai babuka ku maca cila bushiku ku kubomba incito sha pa ng’anda. Balaipakisha ukukutika ku nyimbo no kwafwilishako bambi. Isubilo lya kuti “kukabo kwima ku bafwa kwa balungama na bashalungama” lyalifumyapo ukukalipwa kumo bakalipwe pa mfwa ya mwana wabo umwaume kabili lyalikosha icitetekelo cabo muli Lesa. (Imilimo 24:15) Apo ba Mara tabatalile abafwaya ukuba nga malaika mu muulu, amashiwi yaba pa Amalumbo 37:11 yalibafika pa mutima. Yatila: “Abalanda bakapyaninine calo, no kuilemeno bwingi bwa mutende.”

Na umbi umwanakashi umwina Brazil, uwe shina lya Sandra, alebombesha sana pa kuti abe nyina musuma ku bana bakwe batatu. Asumina ukuti: “Nali uwapamfiwa icine cine ica kuti lintu batata bafwile imfwa ya kupumikisha kabili lintu naishibe pa nshita imo ine ukuti umulume wandi aleenda no mwanakashi umbi, nshatontonkenye pa kupepa kuli Lesa ukuti anjafwe.” Pa mulandu wa kupelelwa Sandra afwaile ukuipaya. Cinshi camwafwa  ukupuupuutuka? Caba kumfwikisha ifintu fya ku mupashi. “Cila bushiku ilyo nshilaya ku kusendama, ndabelenga Baibolo, no kwesha ukumfwa ifyaleumfwa balya ndebelengapo. Ndabelenga na bamagazini ba Ulupungu lwa kwa Kalinda na Loleni!, kabili natemwa sana ukubelenga amalyashi yashimika pa bumi, pantu yalanjafwa ukwikala fye bwino.” Pa kwishiba ukuti Yehova e cibusa wakwe uwapalamisha, alisambilila ukulungatika ico alefwaya ilyo alepepa.

Inshita ya ku Ntanshi Iyabulwamo Ukupelelwa

Fintu tusansamushiwa ukwishiba ukuti ukucula kwa bantunse kwa pa nshita fye inono! Mu kuteka kwa Bufumu bwa kwa Lesa, abana na bakalamba abalesanswa pa mulandu wa bumpulamafunde, abalefyengwa, nelyo ukupatwa bakasekelela. Ukulingana ne fyo casobelwe mwi lumbo lya kusesema, Imfumu yasontwa iya kwa Yehova, Yesu Kristu, ‘ikapokololo mubusu uwakuuta, no mulanda, no ushikwete wa kumwafwa.’ Ukulundapo, ‘ikalililo bulanda umulanda no mubusu, ne myeo ya babusu ikapususha.’ Cine cine, ‘ikalubule myeo yabo mu kunyanyantilwa na mu kufyengwa; no mulopa wabo ukaba uwafinisha mu menso ya iko.’—Amalumbo 72:12-14.

Inshita ya kufikilishiwamo kwa kusesema uku ili mupepi. Bushe ukwishiba ukuti kukaba ukuipakisha ubumi bwa muyayaya pe sonde mu bwikashi bwa musango yo kulamusekesha? Nga ni fyo, mufwile ukusekelela no kukatamika ubumi ubwaba bupe ukufuma kuli Lesa. Kabili nga mwaebako na bambi aya malayo yasansamusha aya mu Malembo, kuti mwalenga abapunda mutuule ukuba ne nsansa shikalamba muli ici calo icishakwata cililishi, icabulamo ukutemwa.

[Futunoti]

[Icikope pe bula 6]

Ndakai inshita sha kuba ne nsansa shingi

[Icikope pe bula 7]

Bushe mulafwaisha icalo umushaba ukupelelwa?