Tuli Abakwate Citetekelo

Ukubilisha Ubufumu bwa kwa Lesa pa Fishi fya ku Fiji

YESU KRISTU inshita imo alandile pa lwa nshila shibili. Imo intu yapabuka kabili itwala ku mfwa. Imbi yalifyenenkana lelo itwala ku mweo. (Mateo 7:13, 14) Pa kulenga abantu ukusala inshila isuma, Yehova Lesa afwaile ukuti imbila nsuma iya Bufumu ibilwe mu calo conse. (Mateo 24:14) E mulandu wine, abantu ukuli konse balekutikila ku bukombe bwa Bufumu, kabili bamo balesalapo umweo ukupitila mu kuba “abakwate citetekelo no kusunge mitima.” (AbaHebere 10:39) Tulemulaalika ukubelenga pa lwa bantu basalile umweo mu Fiji ne fishi fimbi ifyaba lwa mupepi pa cimana ca South Pacific.

Batetekele Muli Yehova

Mere ali mwana we sukulu lintu aumfwile ubukombe bwa Bufumu pa muku wa kubalilapo mu 1964. Pa mulandu wa kuba pa cishi caba ceka, te lingi line alemonana ne Nte sha kwa Yehova. Nangu cibe fyo, mu kupita kwa nshita asukile asambilila ukwishiba kwine kwine ukwa mu Baibolo. Pali ilya nshita, alyupilwe kuli mwine mushi wa mu mushi muntu aleikala. Pa mulandu wa kuti Mere asalilepo ukumfwila ifishinte fya mu Baibolo mu mikalile yakwe, umulume wakwe na balupwa ba mulume bamusungile buluku buluku, na bekalamushi na bo balemukankamba. Te mulandu ne fyo, mu 1991 alibatishiwe.

Tapakokwele, umulume wa kwa Mere, Josua, ayalwile imibele yakwe kabili ayambile no kusangwa kwi sambililo lya Baibolo ilyo Mere aletungulula ku bana babo. Josua alekele ukupepa ku calici lya Methodist. Apo ali ni mwine mushi, talekele ukusangwa ku cilye caleba mu mushi cila mulungu. Ku bekala mushi, Josua alemoneka ukukaanaba na bucishinka kwi calici lya Methodist, pantu ili calici lyalicindikwe sana ku bekala mushi ba pa cishi ca Fiji. E co, pasta wa pali ulya mushi akonkomeshe Josua ukubwelela mwi calici lyakwe ilya kale.

Ukwabula umwenso Josua aebele abekala mushi ukuti ena no lupwa lwakwe tabali na kwalula ico bapingwilepo kabili bapampamine pa kupepa Yehova Lesa “mu Mupashi na mu cine.” (Yohane 4:24) Pa cilye cakonkelepo muli ulya mushi, imfumu nkalamba yapingwile ukuti Josua no lupwa lwakwe bafume mu mushi pantu balikankambilwe. Babapeele inshiku 7 isha kufuma pa cishi ukusha ing’anda yabo, impanga, ne filimwa—e kutila, fyonse ifyo baleikalilamo.

Bamunyina ba ku mupashi ukufuma ku cishi cimbi baileyafwilisha Josua no lupwa lwakwe, babafwaile apakwikala ne ncende ya kulimapo ifya kulya. Josua no mwana wakwe ibeli pali ndakai balibatishiwa, umwana na umbi umwaume ni kasabankanya wa mbila nsuma uushabatishiwa. Kabili ni nomba line Mere alembeshe bupainiya bwa nshita yonse (kashimikila wa Bufumu uwa nshita yonse). Ukusalapo kwabo ukwa kubombela Yehova kwabalengele ukulufya icifulo ne fikwatwa, lelo ukupala umutumwa Paulo, bamona fyonse fi nge fishili kantu lintu bafilinganya ku fyo banonka.—Abena Filipi 3:8.

Ukusalapo Ukusanshamo Kampingu

Ukusalapo ukumfwila kampingu wakanshiwa na Baibolo kukabila icitetekelo no kushipa. Ifi fine fye e fyo cali kuli Suraang umukashana uwabatishiwe nomba line uwikala pa cishi ca Tarawa, cimo pa fishi fyaba mu Kiribati. Suraang alombele ulusa lwa kuti elabombako umulimo umo pa milimo alebomba iya bunasi pa cipatala. Ukulomba kwakwe takwasuminishiwe kabili kwalengele ukuti bamutume ukuya mu kubombela ku cipatala cinono icali pa cishi caba ceka pa kumutalusha ku basumina banankwe.

Pali cilya cishi paba ulutambi lwa kuti umweni onse alingile ukutule mituulo ku “mupashi” wa pali  ici cishi. Abantu basumino kuti umuntu nga akaana ukutuule mituulo kuti afwa. Apo Suraang alikeene ukuti uyu musango wa kupepa utulubi wicitwa kuli wene, abekala mushi balelolela ukumona kuntu umupashi wakalifiwe wali no kumwipaya. Pa kumona ukuti takuli nelyo cimo icacitikile Suraang, amashuko ayengi aya kucitilo bunte busuma yaliswike.

Lelo ukweshiwa kwa kwa Suraang takwapelele palya pene. Abalumendo bamo aba pali cilya cishi bamona ukuti ukusengasenga abakashana baya mu kutandala kulya mulimo wa kuilangilapo ubwaume. Nangu cibe fyo, Suraang alikeene ukusengasenga kwabo kabili atwalilile ukuba na bumpomfu bwakwe kuli Lesa. Na kuba, alibombeleko bupainiya bwa nshita yonse, nangu ca kutila alebomba amaawala 24 cila bushiku mu mulimo wakwe uwa bunasi.

Pa mutebeto bapayanishishe Suraang uwa kumutasha lintu aleipekanya ukufuma pa cishi, abakalamba ba pali ulya mushi batile e mishonari wine wine uwa kubalilapo ukubatandalila. Pa mulandu wa kuti alikakatile ku fishinte fya mu Baibolo, bambi na bo pali cilya cishi balyankulako bwino ku bukombe bwa Bufumu.

Amafya Yaletwako ne Fintu Fimbi

Apo imishi imo yalitaluka ku ibiye abantu ba kwa Yehova balatukuta sana pa kubombako ubutumikishi no kusangwa ku kulongana kwa Bwina Kristu. Moneni ica kumwenako ca baNte bane ababatishiwa—munyina umo na bankashi batatu—abaleenda amaawala ayengi pa kuya na pa kubwela ku kulongana. Pa kuya peka fye baleyabuka imimana itatu. Nga ca kutila umumana naupoosa, munyina e walebalilapo ukusamba pa kwabuka, ni nshi ku kuboko kumo alekula ne cipoto bepikilamo umulongelwe ifyola, amabuuku, ne fya kufwala pa kulongana. Lyena alebwelelamo ku kwafwilisha bankashi batatu.

Ibumba limbi ilinono, ilya bamunyina balonganina pa cishi ca Nonouti icaba akatalamukila mu Kiribati, bapita mu mafya yapusanako. Mu ng’anda balonganina mwingila fye abantu 7 nelyo 8. Bambi bekala pa nse ya ng’anda iyapindililwa ne nsale ukuba e fibumba e lyo balemona ifilecitika mu kati. Balonganina fye pa mulola apapita abekala mushi banabo ilyo baleya no kubwela ku macalici yabo ayakuulwa bwino. Kwena, ababomfi ba kwa Yehova balishiba ukuti abantu e bawama mu menso ya kwa Lesa, te fikuulwa iyo. (Hagai 2:7) Pali ici cishi paba fye nkashi wa cikoloci umo uwabatishiwa kabili te kuti ende ukuya ukutali. Lelo, pa kuya mu butumikishi umukashana, kasabankanya ushabatishiwa e umusunkako pa cicinga ca kusunka. We kutasha we kuntu balanga pa kusanga icine!

Bakasabankanya ukucila pali 2,100 ababombela pa fishi fya ku Fiji balipampamina pa kutwalilila ukubilisha imbila nsuma iya Bufumu bwa kwa Lesa. Kabili balicetekela ukuti na bambi abengi ‘bakakwate citetekelo no kusunge mitima.’

[Mapu pe bula 8]

(Nga mulefwaya ukumona mapu, moneni muli magazini)

Australia

Fiji