Isonde—Bushe Lyaba Fye Cifulo Apa Kweseshapo?

FINTU cali kwilulukwa! Umwanakashi umo alipitile amashindano. Pa numa ya kwikalila amashindano ayakosa aya milungu ibili, uyu umwana we sukulu mu kupelako apokelele lipoti wa kusansamusha. E co nomba kuti atampa ne ncito intu alefwaya lyonse.

Abengi e fyo bamona no bumi pe sonde. Batontonkanya ukuti ubumi bwaba bwesho fye ubo bonse balingile ukupitamo. “Abapita ubu bwesho” balakuukila mu musango uwa Bumi bwa pe ubwawaminako pa numa ya mfwa. Kuti cabe ca bulanda icine cine nga ca kuti ubumi bwa ndakai—ubo abengi bekala fye cikulu bwaca—e bumi fye ubwawamisha ubo abantunse benekela. Nangu ca kuti umuntu wa mu Baibolo Yobo ali no bumi busuma kabili ali umukankaala pa nshita ntali iya mu bumi bwakwe atile: “Umuntu uwafyalwa ku mwanakashi wa nshiku shinono, kabili uwaisulamo ukutenkana.”—Yobo 14:1.

Ukulangilila ico abengi batontonkanya, icitabo ca New Catholic Encyclopedia cilando kuti: “Ubuyo ubo Lesa afwaila umuntunse bwaba kukatamikwa mu muulu. . . . Insansa isha muntu shaba mu kukwata ukusangalala kwa ku muulu.” Mu kufwailisha ukwa nomba line ukwa Church of Christ ukwa mu United States, batile amapesenti 87 aya abo baipwishe balisumina ukwabulo kutwishika ukuti nga bafwa bali no kuya ku muulu.

Abengi abashili Bena Kristu nabo bene basubila ukuti nga bafwa bali no kushe ili isonde no kuya ku cifulo icisuma. Ku ca kumwenako, abaShilamu basubila ukuya kuli paradise wa ku muulu. Abakonshi ba cakaniko ca Pure Land (Icalo Casanguluka) ica mipepele ya buBuddha mu China na Japan basumina ukuti ukubwekeshabwekeshapo amashiwi aya kusungila ku mutwe aya kuti “Amitabha” ishina ilya buBuddha ilya Lubuto Ulushishima, kuti kwabalenga ukufyalwa cipya cipya mu Calo Casanguluka, atemwa Paradise wa ku Masamba, umo bakekala mu nsansa ishapulishamo.

Na kuba, Baibolo, iyaba icitabo ca mushilo icacilapo ukupilibulwa no kwananishiwa mwi sonde lyonse, tailondolola isonde ukuti cifulo ico abantu basha, icifulo apa kutanukila fye. Ku ca kumwenako, itwebo kuti: “Abalungama bakapyaninine calo, no kwikalamo inshiku pe.” (Amalumbo 37:29) Mu Baibolo kabili musangwa amashiwi ya kwa Yesu ayaishibikwa nga nshi aya kuti: “Balipaalwa abafuuka: pantu bakapyaninine sonde.”—Mateo 5:5, King James Version.

Ico abengi basuminamo ica kuti ubwikashi bwesu pe sonde bwa nshita iinono calola mu kuti imfwa mwinshi wa kwingililapo ukuya ku bumi bwa mu kusangalala pa numa ya mfwa. Nga e fyo caba, ninshi cine cine imfwa yaba lipaalo. Lelo bushe abengi e fyo bamona imfwa, nelyo bushe baleesha ukutantalishako ubumi bwa ndakai? Ifyo abantu bapitamo filangilila ukuti nga abantu baleipakisha ubumi busuma no mutelelwe, tabafwaya kufwa.

Nangu cibe fyo, apo ubumi pe sonde bwafulamo ububifi no kucula, abengi bacili bamona ukuya ku muulu ukuba fye e cifulo ceka uko bengasanga umutende ne nsansa sha cine cine. Bushe umuulu waba e cifulo ca kusangalalako mu mutende, icifulo ukushaba ububifi no kukanaumfwana? Kabili bushe Ubumi bwa pe bwaba fye mu muulu umushaishibikwa? Kuti mwasunguka pa fyasuko fyaba mu Baibolo. Mukwai belengeni ifikonkelepo.