Ubumi Bwabo

Ukupeelwa Ubupyani Bwaibela

NGA FINTU CASHIMIKWA NA BA CAROL ALLEN

Nali neka ukwabula abafyashi, ne citabo candi icipya kabili icisuma mu minwe yandi. Nalyumfwile umwenso,kabili ifilamba fyatendeke ukupona. Na kuba, pali ilya nshita nali akakashana ka myaka 7 kabili nali mu musumba uo nshabalile njako, uku no ku kwali imintapendwa ya bantu!

MU NSHIKU sha nomba line, naibukishe bwino bwino ifyancitikile ku bwaice fintu numbwile pa muulu ninshi libe palipita ne myaka mupepi na 60 ukutula apo fyacitikile, ukutandala twatandele na balume bandi, baPaul, ku Watchtower Educational Center iyaba ku Patterson, mu New York, e kwalengele ukuti njibukishe ifyacitike. Abalume bandi babetile ukuyasangwa mwi kalasi lyalenga bubili ilye sukulu lya bakangalila benda aba Nte sha kwa Yehova.

Lintu twalelolekesha mu muputule wa kulolelamo umwali umwabuuta, namwene apalembelwe ifilembo ifikulu ifyaleti “AMABUNGANO.” Lwa pa kati ka cikope pali abacaice bacincimushiwa abalepeepeesha ifitabo fyabo fintu na ine nakweteko ku bwaice! Ukwabula ukupoose nshita nabelengele amashiwi yali pa cikope aya kuti: “Uku ni ku St. Louis, Missouri, mu 1941—pa kwamba kwa ciputulwa ca lucelo, abacaice 15,000—abali ne myaka ukwambila pali 5 ukufika kuli 18—babungene mu cibansa cikalamba ku ntanshi ya cisebele. . . . Munyina Rutherford abilishe ukufuma kwa citabo cipya icaleti Children (Abana).”

Bonse abana bapeelwe icitabo cimo cimo. Lyene baebelwe ukubwelela ku bafyashi babo—bonse balibwelelemo lelo ine nalilubile uko abafyashi bali! Bakapyunga abali no mweo uusuma balinjimishe no kunjimika pa cibokoshi ca misangulo icitali no kunjeba ukumonapo abakaya. Nalisakamikwe lintu nalelolesha pa bantu baleikila pa matabo. Mu kupumikisha, namwene impumi iyo naishibe! Kabili napundile ati: “BaBob! BaBob!” E fyo nalondweke! BaBob Rainer balinsendele no kuntwala ukwali abafyashi bandi abasakamene nga nshi.

 Ifyalecitika ku Bwaice Ifyayalwile Ubumi Bwandi

Ukulolesha pa cikope kwanjibukishe ifingi—ifyayalwile ubumi bwandi no kulenga ukuti tuye ku maofeshi ya ku Patterson ayawamisha. Amatontonkanyo yandi yabwelele ku fyalecitika kale ukucila pa myaka 100 iyapitapo, ifyo maka maka naumfwile kuli bashikulu na bamama na ku bafyashi bandi.

Mu December 1894 umutumikishi wa nshita yonse uwali Musambi wa Baibolo, nga fintu Inte sha kwa Yehova shaishibikwe pali ilya nshita, atandalile bashikulu, abafyele batata, baClayton J. Woodworth, pa ng’anda ya bo mu Scranton, Pennsylvania, U.S.A. Bashikulu baClayton e lyo fye baupene na bamama. Bashikulu batumine kalata kuli bapresidenti wa Watch Tower Bible and Tract Society, baCharles Taze Russell, kabili iyi kalata yalisabankanishiwe mu Ulupungu lwa kwa Kalinda ulwa mu Cisungu ulwa June 15, 1895. Batile:

“Ine no mukashi wandi tucili abacaice kabili tupepa mwi calici lya mapepo ilya mwi shina fye pa myaka 10; lelo pali ndakai, tuleenekela ukuti, tuli no kufuma mu mfimfi ya ili calici no kwingila mu lubuuto lwa bushiku bupya ubulebalikila pa bana ba Wapulishamo. . . . Akale ilyo ine no mukashi tatulamonana twalefwaisha ukuti tukabombeleko Shikulu, nga ca kutila ili shuko lyalimoneke, ukubombako umulimo wa bumishonari mu calo cimbi.”

Limbi limbi fye, mu 1903, baSebastian na baCatherine Kresge, bawishikulu na banakulu lya bamayo, batemenwe nga nshi pa kukutika ku fyebo fya mu Baibolo ifyo abeminishi ba Watch Tower babili babatwalile ku mwabo kwi farmu ilikalamba, ilyali pa mpili shayemba isha Pocono ku Pennsylvania. Abana babo abanakashi, baCora na baMary, na bo baleikala kulya kwine na balume babo, baWashington na baEdmund Howell. Abeminishi ba Watch Tower, baCarl Hammerle na baRay Ratcliffe, baikele na bo umulungu onse, balebasambilishe fintu ifingi. Aba bonse 6 muli ulu lupwa balikutikishe, balisambilishiwe, kabili mu kwangufyanya basangwike Abasambi ba Baibolo abapimpa.

Mu mwaka wine ulya uwa 1903, baCora na baWashington Howell bafyele umwana mwanakashi uo bainike ishina lya Catherine. Ifyo cali pa kuti baCatherine bese bopwe kuli batata, baClayton J. Woodworth (abali ne shina lya bawishi), lyashi lyawama ukumfwa kabili, ndemona, lyabamo imifwaile. Lilangilila ukushilimuka kwabamo ukutemwa no kusakamana kwawamisha uko bashikulu baClayton J. Woodworth, bawishi lya batata, bakwete.

Batata Bapokelela Ubwafwilisho Bwabamo Ukutemwa

Batata, baClayton (mwana), bafyalilwe mu Scranton mu 1906, apali intamfu nalimo amakilomita 80 ukufuma apo ifarmu lya baHowell lyali. Mu myaka ya kutendekelako fye, bashikulu baWoodworth balishibene sana no lupwa ulukulu ulwa baHowell, ilingi line baleipakisha icileela cabo ico baishibikilweko. BaHowell baleyafwilisha sana icilonganino ca Basambi ba Baibolo icabelele muli ilya ncende. Mu kuya kwa nshita, bashikulu babetile ukuyaufya abana baume batatu aba baHowell, kabili bashikulu na bo baletontonkanya pa kukusha bwino umwana wabo umwaume, e co pa kuya kuli aya menga baleya nankwe.

Pali ilya nshita batata tabalebombako mu butumikishi bwaletungululwa na Basambi ba Baibolo. Batata baleya mu kusha fye bashikulu mu butumikishi na motoka, lelo nelyo ca kutila bashikulu balebakoselesha, batata bena tabalebombako. Pali ilya nshita, batata batemwishishe ukwimba inyimbo ukucila fimbi, kabili balelunduluka ukuti bengaba incenshi mu kwimba.

BaCatherine, abana banakashi ba baCora na baWashington Howell, balishibe ukwimba, balelisha piyano no kufunda ifya kuilisha. Lelo lintu fye bali mupepi no kuba incenshi mu kwimba, balilekele  ukwimba no kwamba ubutumikishi bwa nshita yonse. Ukulingana ne mimwene yandi, bashikulu bafwile baletontonkanya ukuti uyu e mwanakashi wingasungana no mwana wabo! Batata balibatishiwe, kabili pa numa ya myeshi 6 baupile bamayo, mu June 1931.

Bashikulu lyonse balecankwa pa kwimba kwa nyimbo ukusuma ukwa mwana wabo. Bashikulu balisansamwike sana ilyo batata baebelwe ukusambilisha ibumba lya bakemba ba filimba aba pe bungano lya mu 1946 ilya pa kati ka nko mu Cleveland, Ohio. Mu myaka yakonkelepo, batata e baletungulula ibumba lya bakemba ba filimba pa mabungano ya Nte sha kwa Yehova.

Ukulubulula kwa Bashikulu ne Mikalile ya mu Cifungo

Ilyo twali mu muputule wa kulolelamo ku Patterson, ine na baPaul twamwene ici cikope mulemona pe bula likonkelepo. Kabili ine bwangu bwangu fye nalibukishe ici cikope, pantu bashikulu balintumineko icikope ici cine ukucila pa myaka 50 iyapitapo. Bashikulu e abo mulemona beminine ku lutwe ku kulyo.

Pa nshita lintu abantu bacincimwike sana pa mulandu wa kutemwisha icalo cabo no kufwaisha ukucicingilila ilyo kwali Inkondo ya Calo iya Kubalilapo, aba Basambi ba Baibolo 8 mulemona—apali na baJoseph F. Rutherford (abekeleko pa kati), abali e bapresidenti wa Watch Tower Society—bapooselwe mu cifungo apabula no mulandu kabili bakeenye fye no kubalipililako indalama sha kubalekako. Imilandu babapeele yashimpilwe pa mashiwi yali muli volyumu walenga 7 uwa citabo ca Studies in the Scriptures, icaleti The Finished Mystery. Bena baumfwile kwati amashiwi yali muli ici citabo yalelesha icalo ca United States ukulwako Inkondo ya Calo iya Kubalilapo.

Pa myaka iingi, baCharles Taze Russel balilembele amavolyumu 6 aya citabo ca Studies in the Scriptures, lelo bafwile ilyo tabalalemba volyumu walenga 7. E co ifyebo balembele fyapeelwe kuli bashikulu na ku Musambi wa Baibolo umbi, kabili aba balembele volyumu walenga 7. Uyu volyumu afumine mu 1917, ninshi inkondo iciliko. Ilyo bashikulu balelubulula, kumo na bambi, babapingwilile ukukakwa ifiputulwa fine ifya myaka 20 cimo na cimo.

Amashiwi ya pa cikope mu muputule wa kulolelamo ku Patterson yatila: “Imyeshi 9 pa numa baRutherford na banabo bapingwilwe ukukakwa—libe ne nkondo yalipwa kale—pa March 21, 1919, icilye cikalamba cakambishe ukuti bonse 8 babalipilile indalama sha kubalekako, kabili pa March 26, balibalekeleko mu Brooklyn pa madola ya ndalama 10,000 cila muntu. Pa May 5, 1920, ba J.F. Rutherford na banabo bambi basangilwe ukwabula umulandu.”

Pa numa ya kupingulwa, lelo lintu bashilatwalwa  ku cifungo ca mu Atlanta, ku Georgia, bonse aba 8 basungilwe mu cifungo ca Raymond Street mu Brooklyn, ku New York, pa nshiku sha kubalilako. Ukufuma apo, bashikulu balondolwele ifyo babapoosele mu kalokoni kali na mamita 1.8 mu bufumo na mamita 2.4 mu butali “umwali ifiko sana ne cimfulumfulu.” Batile: “Nga naukwata amanyunshipepala ayengi, ayo pa kubala watala wayasuula, mu kwangufyanya kwaleba ukwibukisha ukuti ayo yene manyunshipepala kumo ne sopo ne cisalu ca kusambilako, e fiikete ubusaka bobe no mucinshi wa pa lobe.”

Nangu cibe fyo, bashikulu bali ba nseko, baleita fye ne cifungo ukuti “Ihotela Lisuma,” baleti, “ndi no kufuma muno nga ca kutila inshita yandi yafika.” Balondolwele ne fyacitike ilyo bali mu musebo. Lintu bafwaile ukusakula umushishi, umupupu abasompwele inkoloko ya mwi tumba, lelo ukulingana na fintu balembele, batile, “Umunyololo waliputwike kabili inkoloko yandi yalipuswike.” Ilyo nailetandala ku Bethel ya ku Brooklyn mu 1958, baGrant Suiter, abali pali ilya nshita bakalemba kabili abalesunga icipao ca Watch Tower Society, banjitile ku ofeshi lyabo no kumpeela inkoloko ine iyi. Na ndakai iyi nkoloko naliitemwa.

Ifyo Batata Bakuminweko

Ilyo bashikulu babakakile ukwabula no mulandu mu 1918, batata bali ne myaka 12. Bamama baisele mu ng’anda no kusenda batata no kukuukila kuli banyinabo ukwali ne nkashi shinabo shitatu. Ishina lya bawishi kwa bamama ni baArthur, kabili ulupwa lwaletwanga no kuitunga ukuti umuntu umo, Chester Alan Arthur, uwali presidenti walenga 21 uwa calo ca United States ali ni lupwa lwabo.

Pa numa ya kupingula bashikulu ukukakwa imyaka iingi lintu bababepeshe ukutoba amafunde ya mu United States, ulupwa lwa baArthur lwatile bashikulu balisebenye ishina lya lupwa lwabo. Batata baliculile sana mu muntontonkanya. Napamo ifi fine e fyabalengele no kuti baleshingashinga ukubombako ubutumikishi bwa ku cintubwingi pa kubala.

Ilyo bashikulu babafumishe mu cifungo, bakuushishe ulupwa lwabo no kuya mu kwikala mu ng’anda iikulu iyali mu musebo wa Quincy mu musumba wa Scranton. Nalishibe bwino bwino ing’anda ya bashikulu ne mbale sha bamama ishe bumba nasho nalishishibe bwino bwino. Imbale sha bamama twashinike ukuti ni mbale sha mushilo pantu tabalefwaya umuntu umbi ukushisamfyako. Ilyo Bamama bafwile mu 1943, bamayo ilingi line e balesakamana no kubomfya shilya mbale ishisuma.

Ukupikintika mu Mulimo wa Bufumu

Ubushiku na bumbi kulya kwine ku Patterson, namwene icikope ca kwa Munyina Rutherford ninshi alelanda pe bungano lya mu 1919, ilyabelele ku Cedar Point, ku Ohio. Kulya eko akoseleshe bonse ukubombako umulimo wa kubilisha Ubufumu bwa kwa Lesa mu kupimpa no kubomfya magazini mupya uwafumine pe bungano lilya line, uyu magazini aleitwa ukuti The Golden Age. Bashikulu e basontelwe ukuba bakalemba, kabili balelemba ifipande fya muli uyu magazini ukufika fye na muli ba 1940, ilyo bashilati bafwe. Mu 1937 ishina lya uyu magazini lyabele Consolation kabili mu 1946 lyaishileba Awake! (Loleni!)

Bashikulu balelembela pa ng’anda mu Scranton na ku maofeshi yakalamba aya Watch Tower Society ayali mu Brooklyn, apali amakilomita 240, ku ng’anda baleikalako imilungu ibili na ku maofeshi nako ibili. Batata batila balebukisha ukumfwa uko taipi wa kulembelako alelila lyonse mu ma 5 koloko ya lucelo. Nalyo line, bashikulu balyangilwe sana na ku kubombako umulimo wa kushimikila ku cintubwingi. Na kuba, bapangileko ne nsengeleti yakwete amatumba ayakulu mu kati umo balebika impapulo sha Baibolo. Ba mukayama baNaomi Howell, abali ne myaka ya kufyalwa 94, bacili balikwata iyi nsengeleti. Bashikulu bapangileko ne cola ca banakashi umwa kusendela amabuuku.

 Bushiku bumo, ilyo fye bapwile ukulanshanya pa fya mu Baibolo mu kucincimuka, bamo abalebomba umulimo na bashikulu baebele bashikulu ukuti: “C.J., wacilabako icintu cimo.”

Lyene bashikulu baipwishe ati: “Cinshi ico cine?” Baloleshe mu nsengeleti yabo. Mu matumba yonse tamwali nelyo kamo.

“Wacilaba ukumwebo kulembesha magazini wa The Golden Age (Loleni!).” Bawile mu nseko pa mulandu wa kuti kalemba alaba ukutambika magazini untu alemba.

Ukwibukisha Inkulilo Yandi

Ndebukisha ku bwaice ninshi ninjikala pa molu ya bashikulu, ninshi apo nabekata na kakuboko kandi e lyo balenshimikila ilyashi lilanda pa lwa minwe. Baletampila ne cikumo e lyo bakonkeshapo umbi balenjeba ifisuma pa lwa munwe umo na umo. Lyene balebika iminwe yandi yonse pamo bwino bwino no kunjeba amashiwi ya kumfunda ayaleti: “Iminwe yonse ibomba bwino nga ili pamo, umunwe umo na umo ulafwilisha iibiye.”

Lintu abafyashi bandi baupene, bakukiile ku Cleveland, ku Ohio, uko bailesanga baEd na baMary Hooper abo baileba ifibusa fyabo sana. Indupwa shabo shali Basambi ba Baibolo ukutula fye pa kwamba kwa mwanda wa myaka. Abafyashi bandi baEd na baMary, balitemenwe sana. Umwana mwanakashi umo mpo uo baHooper bafyele afwile ninshi fye acili akanya, kanshi ilyo twaile kulya mu 1934, naileba “umwana mwanakashi” wabo uwatemwikwa sana. Apo nalekulila pa bantu abakatamike ifya ku mupashi, naliipeele kuli Lesa no kubatishiwa ninshi nshilafisha ne myaka 8 iya kufyalwa.

Ukubelenga Baibolo kwali ukwakatama sana mu myaka yandi iya ku bwaice. Pa malembo natemwishishe paba ne lembo lya kwa Esaya 11:6-9 ilyalondolola ifyo ubumi mu calo cipya ica kwa Lesa bukaba. Ukwesha kwandi ukwa kubalilapo mu kubelenga Baibolo yonse kwali mu 1944, pa numa ya kupokelela Baibolo wandi uwa American Standard Version, uwafumine mu musango waibela pe bungano lya pa Buffalo, mu New York. Mwandi nalicincimwike sana pa kubelenga uyu Baibolo wapilibulwa bwino uwalimo ne shina lya kwa Lesa, Yehova, ilyabweshiwa umo lifwile ukuba mupepi ne miku 7,000 mu “Cipingo ca Kale”!

Lyonse pa kupwa kwa mulungu kwalewama. Abafyashi bandi no lupwa lwa baHooper balensenda mu kushimikila mu ncende sha mu mishi. Twalesendela limo ifya kulya ifyo twaleya mu kuliila mupepi na kamana. Lyene twaleya pa farmu no kulanda ilyashi lya Baibolo ilya pa lwalaala apo twalelaalika abena mupalamano bonse. Imikalile yali iyaanguka. Twaleipakisha nge ndupwa. Abengi muli shi ndupwa shali ifibusa fyesu fya kubangilila baishileba ni bakangalila benda, ukubikapo fye na baEd Hooper, baBob Rainer, na bana babo abaume babili. BaRichard Rainer bena bacili ni bakangalila benda, baba pamo na bakashi babo baLinda.

Mu lusuba e lyo kwalewama sana. Ine naleya ku kwikala pa farmu lya baHowell ne nkashi shinandi shibili. Mu 1949 nkashi nandi uwa muli bamayo mukalamba Grace aupilwe kuli baMalcolm Allen. Nshaishibe ukuti mu myaka ya ku ntanshi na ine nkopwa ku baice baba Malcolm. Umufyala wandi Marion ali ni mishonari mu Uruguay. Marion aupilwe kuli baHoward Hilborn mu 1966. Aba babili na balume babo balibombele pa maofeshi yakalamba aya ku Brooklyn pa myaka iingi.

Bashikulu no Kupwisha Kwandi Ukwe Sukulu

Ilyo nali pa sukulu lya ku sekondari, bashikulu balentumina sana amakalata. Mu makalata balentumina balebikamo ne fikope fya lupwa lwabo ifya kale, ku numa ya fikope kwaleba amashiwi ayengi, aya kunjebako pa fintu ulupwa lwali kale. Mu makalata yene aya balentumina e mo napokelele ne cikope apo bali na bambi abo bapoosele mu cifungo ukwabula umulandu.

Ku kupwa kwa 1951, bashikulu balwele kansa wa pa mukolomino, ne shiwi lyalile. Ukucenjelesha kwabo takwapwile, lelo nga balefwaya ukulanda balelemba fye pe pepala lintu baleenda nalyo. Ikalasi lya ku sekondari nalimo lyali no kupwisha icipande ca pa kati mu January 1952. Ku kwamba kwa December, natumiine bashikulu ipepala nalembelepo amashiwi yandi aya kwiswila ifya kulanda pa kupwisha isukulu. Balungikepo tumo tumo kabili lyene pe bula lya kulekeleshako balembelepo amashiwi yabili ayamfikile pa mutima ayaleti: “Sokulu natemwa.” Bapwishishe umulimo wabo pe sonde pa mushinku wa myaka 81, pa December 18, 1951. * Na ndakai line nalikatamika lilya ipepala nalembelepo amashiwi aya pa kulanda pa kupwisha isukulu na yalya mashiwi yabili aya bashikulu.

Pa numa fye ya kupwisha isukulu, natendeke umulimo wa bupainiya, ukulingana na fintu Inte sha kwa  Yehova shiita umulimo wa nshita yonse uwa kushimikila. Mu 1958, nasangilwe kwi bungano ilishaikulila mu musumba wa New York City, ukwali abantu 253,922 abafumine mu fyalo 123, baiswile ifibansa fibili, ica Yankee Stadium ne ca Polo Grounds. Kulya kwine eko bushiku bumo nakumene no wafumine ku Afrika uwafwele baji walipo ishina lya “Woodworth Mills.” Imyaka 30 iyabangilileko, bamwinike ishina lya bashikulu!

Ndi Uwa Nsansa pa Bupyani Bwandi

Ilyo nali ne myaka 14, bamayo na kabili balitendeke bupainiya. Bafwile pa numa ya myaka 40, mu 1988, ninshi bacili ni bapainiya! Batata bena balebombako fye bupainiya apapelele amaka yabo. Batata e babalilepo ukufwa e lyo pa numa ya myeshi 9, bamayo nabo bakonkapo. Abo twalesambilila na bo isambililo lya Baibolo baishileba ifibusa fine fine. Abana babo bamo baile mu kubombela pa maofeshi yakalamba aya ku Brooklyn, kumfwa bambi batendeke bupainiya.

Umwaka wa 1959 wali uwaibela sana kuli ine. Muli uyu wine mwaka emo banjishibishe kuli baPaul Allen. BaPaul basontelwe ukuba bakangalila benda mu 1946 pa numa ya kupwisha ikalasi lyalenga 7 ilya pa Gileadi, ili isukulu likansha bamishonari ba Nte sha kwa Yehova. Ilyo twalelongana, bonse tatwaishibe ukuti baPaul bali no kuya mu kubombela ku Cleveland, ku Ohio, uko nalebomba bupainiya. Batata balitemenwe baPaul, nangu fye ni bamayo bene. Twaupene mu July 1963 pa farmu lya baHowell, balupwa lwesu balisangilweko, baEd Hooper e balandile ilyashi lya bwinga. Camoneke nge ciloto.

BaPaul tabakwete motoka. Ilyo twafumine ku Cleveland no kuya uko batutumine ukuyabombela, ifipe fyesu fyonse fyalongelwe muli kamotoka kandi aka mutundu wa Volkswagen Bug akapangilwe mu 1961. Ilingi line aba bwananyina baleisa ku mwesu pali Cimo, ubushiku twalekuukila ku cilonganino cimbi, no kumona ifyo tulelonga ifipe. Caleba kwati ni ku bulangisho pa kumona basutikeshi, ifyola, icibokoshi ca mafaelo, taipi , na fimbi, fyonse fyaingila muli kamotoka kanono.

Ine na baPaul twalyenda bakilomita abengi abashingapendwa, twaliipakisha ifintu ifisuma no kushipikisha amafya yaba mu bwikashi buno—fyonse fyacitilwe mu bukose ubo Yehova eka fye e wingabupayanya. Imyaka yonse twabomba twaliba aba nsansa, abaisulamo no kutemwa Yehova, ukutemwana fwe bene, no kutemwa ifibusa fya kale ne fipya. Imyeshi ibili iyo twaikele ku Patterson ilyo baPaul balekanshiwa, e nshita yacilapo ukuwama mu bumi bwesu ukufika pali lelo. Ukumona mu kupalamisha ukuteyanya kwa pe sonde ukwa kwa Yehova, kwakoseshe ukushininwa abafyashi bandi bapishishe muli ine, kabili kwaba e bupyani bwa ku mupashi ubwaumo mutengo. Uku kushininwa kwa kuti: Uku cine cine e kuteyanya kwa kwa Lesa. Mwandi caba buseko mu kubombako nelyo fye ulubali lunono mu kuteyanya!

[Futunoti]

[Icikope pe bula 25]

Ine na baEd Hooper ilyo kwashele panono ukuti Ibungano lya mu 1941 ilyabelele mu St. Louis litendeke. Uko eko napokele icitabo candi ica “Children”

[Icikope pe bula 26]

Bashikulu mu 1948

[Icikope pe bula 26]

Pa farmu lya baHowell ilyo abafyashi bandi (abali mu kati) baupene

[Icikope pe bula 27]

Abasambi ba Baibolo 8 abaali mu cifungo ukwabula umulandu mu 1918 (Bashikulu beminine ku kulyo ku lutwe)

[Icikope pe bula 29]

Fyonse ifipe fyesu fyalingile muli Volkswagen wesu

[Icikope pe bula 29]

Ine na balume bandi, baPaul