Bushe Mulingile Ukufwailisha pa lwa Mipepele Imbi?

MIGUEL uuli nomba Inte ya kwa Yehova mu South America atila: “Nalisangilwe ku kulongana kwa Bwina Kristu mupepi no mwaka umo, kabili naleipakisha ukwebako bambi pa lwa Bufumu bwa kwa Lesa. Lyene natendeke ukukutika ku maprogramu ya fya mipepele pa redio no kutamba bashimapepo pa televishoni. Naletontonkanya ukuti aya maprogramu kuti yangafwa ukumfwikisha bwino abantu ba mu mipepele imbi. Nalishibe ukuti ifisambilisho fyabo tafyumfwana na Baibolo, lelo nalefwaisha ukufishiba.”

Muli ici cine calo, Jorge ali uwapimpa mu kusambilisha bambi pa lwa kupepa kwa cine. Lelo, pa nshita imo, na o wine atendeke ukukutika ku maprogramu ya fya mipepele pa redio na pa televishoni. Atemenwe ukusosa ati, “Cisuma ukwishiba ifyo bambi baletontonkanya.” Nga bamwipusha pa lwa mafya yengesako pa mulandu wa kukutika ku fisambilisho fya bufi, aleyasuka ati: “Tapali icinganenuna icitetekelo ca muntu uwaishiba icine ca mu Baibolo.” Ifi fyacitile aba babili fyaleta icipusho cacindama ica kuti, Bushe caliba fye bwino ukukutika ku fyo bambi basuminamo?

Ukwishiba UbuKristu bwa Cine

Pa numa ya mfwa ya batumwa, ukupepa kwa cine kwalishilekoweshiwa ku buKristu bwa bufi ubwalekanalekana ubwaleya bulelunduluka. Pa kumwena kabela ici, Yesu asokolwele inshila imo iya kulekanishishamo ubu buKristu bwa bufi ukufuma ku buKristu bwa cine. Intanshi asokele ati: “Cenjeleni kuli bakasesema wa bufi, abeshila kuli imwe mu fya kufwala fya mpaanga, lelo mu kati mimbulu ya kutaakanya.” Lyene alundilepo ukuti: “Mukabeshibila ku fisabo fyabo.” (Mateo 7:15-23) Abakonshi ba kwa Yesu aba cine bacita ifyo Yesu alefunda, kabili baleshibikwa bwangu ku fisabo  fyabo ifisuma. Nga fintu fye Yesu umwine alecita, na bo balatandalila abantu no kulondolola Ubufumu bwa kwa Lesa ukufuma mu Malembo. Pa kukonka ifyo Yesu alecita, bataluka ku mapolitiki ya calo ne fikansa fya mu bwikashi. Balisumina ukuti Baibolo Cebo ca kwa Lesa kabili baimona ukuti e cine. Baleshibisha ishina lya kwa Lesa. Na kabili, apo balatukuta mu kutemwa nge fyo Lesa abasambilisha, tabalwako inkondo. Ukucila, baimona ukuti ba bwananyina.—Luka 4:43; 10:1-9; Yohane 13:34, 35; 17:16, 17, 26.

Ukulingana na Malembo, kuti ‘twamona apalekene umulungami no mubifi, apalekene uubombela Lesa no ushimubombela.’ (Malaki 3:18) Bakapepa ba cine aba lelo balikatana mu muntontonkanya na mu ncitilo, nga fintu fye na Bena Kristu ba mu mwanda wa myaka uwa kubalilapo baali. (Abena Efese 4:4-6) Nga mwaishiba ilyo ibumba lya Bena Kristu bene bene, mulandu nshi mwingalasapikila nelyo ukufwaisha ukwishiba ifyo bambi basuminamo?

Cenjeleni na Bakasambilisha wa Bufi

Baibolo ilangilila ukuti nangu fye ni lintu umuntu nasambilila icine, kuti akoweshiwa lwa ku mupashi ku fisambilisho fya bufi. Umutumwa Paulo asokele ati: “Cenjeleni ukuti umuntu emubeleleka mu kutemwa amano ayali longolo lwa fye, umwalole cishilano ca bantu, umwalole mipashi ya kapona ya pano isonde, no mwalola Kristu iyo.” (Abena Kolose 2:8) Mwandi ili lembo lyalondolola bwino bwino ici cishinka! Bakasambilisha wa bufi kuti bamuletela ubwafya, kwati fiswango ifilefwaya ukumutakanya no kumulya.

Ca cine, Paulo aleishiba ifyo bambi basuminemo. Inshita imo atendeke ilyashi lyakwe pa kusoso kuti: “Mwe bena Atena, namona konse konse imwe mwaba nga bacilamo ukupepe mipashi. Pantu pa kupita no kumone fyo mupepa, nasangile ulufuba apalembwa, kuli Lesa uushaishibikwa.” (Imilimo 17:22, 23) Nalyo line, Paulo taleliisha umuntontonkanya wakwe amano ya pano nse aya ba njishikweba ba ciGriki.

Ukwishiba intendekelo ne fisambilisho fya mipepele ya bufi kwalipusana sana no kubelenga pa lwa fyene. * Yehova alisonta “umusha wa cishinka kabili uwashilimuka” ku kutusambilisha ifya mu malembo. (Mateo 4:4; 24:45) Paulo umwine alembele ukuti: “Te kuti muliile pe tebulo lya kwa Shikulu ne tebulo lya fiwa. Bushe nalimo tulenge Shikulu akalumwa, mwa?”—1 Abena Korinti 10:20-22.

Bamo bakasambilisha wa bufi napamo kale bali Bena Kristu ba cine, lelo pa nshita imo bafutwike ku cine no kuya ku filubo. (Yuda 4, 11) Ici tacilingile ukutusungusha. Pa numa ya kulanda pa “musha wa cishinka kabili uwashilimuka” uwimininako ibumba lya Bena Kristu basubwa, Yesu alandile pa “musha mubi,” ibumba iliilishanya ati, “shikulu akokolo kwisa,” no kutendeka ukuuma abasha banankwe. (Mateo 24:48, 49) Ilingi abantu ba musango yo na bakonshi babo tabakwata ifisambilisho fine fine ifyabo abene; bafwaya fye ukonaula icitetekelo ca bambi. Umutumwa Yohane alembele pa lwa bene ati: “Ngo muntu aisa kuli imwe, ne sambilisho ili taliletele, mwimupokelela ku mwenu, nangu kumuposha.”—2 Yohane 10; 2 Abena Korinti 11:3, 4, 13-15.

Kuti cawama abafumacumi abalefwaya ukubebeta bwino ifintu bomfwa ukufuma mu mipepele yalekanalekana. Mu kupita kwa nshita, Lesa akapaala abantu ba bufumacumi abafwaya icine. Baibolo isosa pa lwa mano ya bulesa ati: “Nga wafisokota nga silfere, no kufifwimfwinta nge fyuma ifyashikama; . . . no kwishiba Lesa ukakusanga.” (Amapinda 2:4, 5) Ilyo basanga uku kwishiba Lesa ukupitila muli Baibolo ne cilonganino ca Bwina Kristu kabili bamona ne fyo Yehova apaala abatungululwa no ko kwishiba, Abena Kristu ba cine tabatwalilila ukukutika ku fisambilisho fya mipepele ya bufi.—2 Timote 3:14.

[Futunoti]